پاکستان نا صوبہ خیبر پختونخواہ پولیس لائن پشاور ئٹی درو نا مروک تراک ئٹ کہوک آتا کچ ودیسہ 88 مسنے۔
لیڈی ریڈنگ اسپتال نا ترجمان نا رد ئٹ دا وخت اسپتال ئٹ 65 ئنا خڑک ٹپی آک داخل ءُ اندن کہوک آتا کچ 88 مسنے۔
ایلو پارہ غا کمکار 1122 پشاور نا کوالخواہ تا رد ئٹ کمکار آپریشن دا وخت اسکان ہم برجا ءِ۔ ترجمان 1122 پشاور نا رد ئٹ ‘نن ئنا 12 بجہ آن دائسکان 21 جون مِش تا کیرغ آن کشنگانے۔
تحریک طالبان پاکستان پشاور پولیس لائنز ئٹ مروک جلہو آن بے تعلقی نا دعویٰ کرینے۔
تحریک طالبان پاکستان نا کنڈ آن شینک مروک بیان ئٹ دعویٰ کننگانے کہ “دا تدینی تون تحریک طالبان پاکستان نا ہچو تعلقداری اس اف و ننا قانود و لس راہبند نا رد ئٹ مسجد، مسیت، جنازہ جاہ و ایلو پاک جاگہ تیٹ ہر وڑ ئنا کاروائی ڈوہ ئسے۔”
تدوکا سال اِرا فروری نا نن ہشت و ہشت و نیم ئنا نیام ئٹ بلوچستان نا اِرا جتاء ضلع نوشکی و پنجگور ئٹ اسہ وار آ تراک و سم تا توار پِنک، ہراڑان گڈ بروک آ کیہی دے و تُو تے اسکان پنجگور و نوشکی تیوہ جہان ئنا میڈیا تا سرخی ٹی جاگہ جوڑ کیرہ۔
دو فروری آ انت مس؟
شانزدہ سلاء بند بندغ و اِرا خودکش بمبار ہرا گاڑی تیٹ سوار ئسر، اول نوشکی و پنجگور ئٹ ٹہیفوک پاکستانی لشکر نا کیمپ آتا بنجائی در آتے تراک آتیٹ ٹک کیرہ، ہرافتیان گڈ ایلو سلاء بند بندغ آک کیمپ آتیٹ پیہنگ ئٹ سرسہب مریرہ، نوشکی کیمپ ئٹ پیہوک غٹ سلاء بند بندغ آک ایلو دے شہید مریرہ، اندن پنجگور ئٹ مُسہ دے اسکان سلاء بند بندغ آک و پاکستانی لشکر نا نیام ئٹ ترند جھڑپ آک برجا مریرہ، مُسہ دے اسکان دا سلاء بند بندغ آک کیمپ آ کوزہ ءِ برجا تخیرہ۔
جلہو کار آک دیر ئسر؟
جلہو نا منہ ساعت آن گڈ بلوچ لبریشن آرمی (بی ایل اے) دا ہڑتوما جلہو تا ذمہ واری ءِ ارفک، بی ایل اے نا ترجمان جیئند بلوچ نا رد ئٹ بی ایل اے مجید برگیڈ نا فدائیک پنجگور و نوشکی نا فوجی کیمپ آتیا جلہو کرینو، ترجمان دعویٰ کریسس کہ بی ایل اے نا جنگجوک ہڑتوما کیمپ آتا اسہ بھلو بشخ ئسے آ کوزہ کرینو و کیہی فوجی کارندہ تے مرگ ئنا گواچی کننگانے، مُسہ دے آن گڈ ہراتم غٹ جلہو کار آک شہید مریرہ و جنگ ایسر مریک گڑا بی ایل اے نا کنڈ آن دعویٰ کننگک کہ دا جلہو ئٹ دو سد نا خڑک فوجی کارندہ غاک مرگ ئنا گواچی کننگانو۔ و مجید برگیڈ نا شانزدہ فدائی جلہو کار آک دا جلہو ئٹ شہید مسنو۔
حکومتی ہیت انت ئس؟
پاکستانی لشکر نا شعبہ تعلقات عامہ و پاکستان نا او وخت ئنا وزیر داخلہ شیخ رشید جلہو نا منہ گھنٹہ آن گڈ ہڑتوما علاقہ تیٹ غٹ بندغ آتا خلنگ نا دعویٰ کیرہ ولے زمینی گواچنیک داڑان اسُل چپ مریرہ۔ جلہو آتے بےسہب کننگ نا دعویٰ تیان بیدس مُسہ دے اسکان پنجگور و نوشکی ٹی کرفیو خلنگ نا پڑو کننگک، و ترند سم کاری و شیلنگ نا توار آک پنیسہ کیرہ اندن کوالخواہ تا کنڈ آن بندغ آتے اُرا تیٹ تولنگ نا پابند کننگک۔ بروک آ اسہ ہفتہ اسکان ہڑتوما علاقہ تیٹ موبائل انٹرنیٹ و نیٹورک بند کننگک، اندن پن کروک علاقہ تیٹ گن شپ ہیلی کاپٹر و سیاڈی طیارہ تا بال، بمب تراک و سم تا توار برجا مریک۔
مجید برگیڈ انت ئسے؟
مجید برگیڈ بلوچ لبریشن آرمی نا اعلیٰ تربیت ہلوک جند ندری یونٹ ئسے، ہرا جند ندری جلہو کار آتیا تالان ءِ، ہرا داڑان مالو ہم بلوچستان و کراچی ٹی کیہی جلہو تے کرینے۔
مجید برگیڈ نا پِن تیوہ غاتیان مُست ہموتم مونا بس ہراتم اِرا ہزار یانزدہ دسمبر نا گڈیکو دے سی تاریخ آ بارود آن پُر اسہ گاڑی اس پاکستان نا مسکوہی وزیر میر نصیر خان مینگل نا مار شفیق مینگل اُرا ءِ رہینگوک جاہ ءِ ٹک کننگا، کوالخواہ تا رد ئٹ دا جلہو ئٹ سینزدہ بندغ مرگ ئنا گواچی و سی و چار ٹپی مسوسر۔ شفیق مینگل آ دا دوبہ ئس کہ او پاکستانی لشکر نا سروکی ٹی بلوچ آجوئی دوست آتا بر خلاف سلاء بند ڈیتھ اسکواڈ چلیفک۔
بلوچ لبریشن آرمی نا ترجمان میرک بلوچ دا جلہو نا ذمہ واری ءِ ارفیسہ پاریسس کہ دا جند ندری جلہو اس ئس، ہرادے مجید برگیڈ نا جند ندر درویش بلوچ سر تس۔
مجید برگیڈ نا دا جلہو آن گڈ ہفت سال ئنا بھلا چھپی آن گڈ مجید برگیڈ نا پن دوارہ ہموتم مونا بس ہراتم یانزدہ اگست اِرا ہزار ہژدہ غا مجید برگیڈ بلوچستان نا علاقہ دالبندین ئٹ چینی انجینئر آتا اسہ بس ئسے ٹک کرے۔ دا جلہو ءِ او وخت ئنا بی ایل اے سروک اسلم بلوچ نا مار ریحان بلوچ سر تسوسس۔
دا جلہو آن گڈ مجید برگیڈ ہمو سال نومبر نا تُو ئٹ 23 تاریخ آ کراچی ٹی ٹہیفوک چینی قونصل خانہ ءِ ٹک کرے، اندن ایلو سال 2019 ئٹ یانزدہ مئی نا دے گوادر ئٹ ٹہیفوک فائیو اسٹار ہوٹل ‘پرل کانٹیننٹل’ آ جلہو مس، داڑان گڈ بیست و ہشت جون اِرا ہزار بیست ئٹ پاکستان نا کل آن بھلا شار کراچی ٹی ٹہیفوک بازارِ حصص، پاکستان اسٹاک ایکسچینج ءِ ٹک کننگا، بیست اگست 2021 آ بلوچستان نا دریابی شار گوادر ئٹ چائنیز انجینئر آتا قافلہ غا اسہ پین فدائی جلہو اس کننگا، اندن 26 اپریل 2022 آ کراچی یونیورسٹی ٹی اولیکو بلوچ زالبول فدائی شاری بلوچ چینی شاری تے ٹک کرے، ہراڑے چینی بولی ہیل تروک ادارہ کنفیوشس انسٹی ٹیوٹ نا ڈائریکٹر تون اوار چار بندغ مرگ ئنا گواچی مسر۔
مجید بریگیڈ نا کاروائی تا تُرندی نا سوب ؟
بلوچ لبریشن آرمی مجید بریگیڈ ہراڑے اِرا ہزار یانزدہ آ تینا اولیکو فدائی جلہو ءِ ایسری ایتِک، ہموڑے ہفت سال ئنا مرغن آ چُپی آن گُڈ ہرا وخت اِرا ہزار ہژدہ آ چینی شاری تے ٹِک کیک، اوکان گُڈ مُسہ سال نا نیام ئٹ نیمہ درزن نا کچ آ فدائی جلہو کننگ ئٹ ہرا وڑ سر سہُب مریک؟ ہراڑے بیست و نو نا کچ فدائی جلہو کروک آک بشخ ہلیرہ۔
دانا کُل آن بھلا سوب بی ایل اے نا تہٹی بھلو بدلی ئس ٹہیفنگیک، ہراڑے تنظیم نا قبائلی بنیات تخوک راہشون ءِ بدل کریسہ، اسلم بلوچ و بشیر زیب بلوچ نا وڑ مڈل کلاس سیاسی راہشون تنظیم نا سرکماشی ءِ کیرہ و بی ایل اے ءِ پوسکنو کسر ئسے آ شاغیرہ۔ دا بدلی تیٹ قابل ذکر بدلی مجید بریگیڈ ءِ دوارہ اوار کننگ ئس۔ داڑتون اوار اوار فتح اسکواڈ و ایس ٹی او ایس نا وڑ ایلیٹ یونٹ آتا ٹہیفنگ ہم ارے ۔
فدائی جلہو تا بلوچ تحریک آ زیم آک
بیست سال آتیان برجاء سلاء بند تحریک نا خوڑتی ئٹ ہُننگ ئٹ جاچ ہلنگے گڑا معلوم مریک کہ اخس تُرندی ٹی دا تحریک تدوکا پنچ سال نا نیام ئٹ بس، دانا مثیل تدوکا اِرا دہائی آن رسینگپک۔ دانا غُٹ آن بھلا سوب جند ندری جلہوک ءُ۔
تدوکا اِرا دہائی نا نیام ئٹ ہرا بھلو جلہو مس دافتیٹ اِرا ہزار چار آ گوادر ٹی چار چینی انجینیئر آک مرگ نا گواچی، اِرا ہزار یانزدہ ٹی بولان ئٹ مروک پاکستانی لشکر نا کیمپ آتیا قوضہ و اِرا ہزار سینزدہ ٹی دریابی شار گوادر ٹی کوسٹ گارڈ نا کیمپ آ قوضہ و کارندہ آتا دزگیری اوار ءِ۔
ایڑے ارٹمی پارہ غان اِرا ہزار ہژدہ ٹی دالبندین ئٹ چینی انجینیر آتا اُلاخ آ مروک جلہو آن گُڈ سلاء بند تحریک اسہ دم تُرندی اختیار کرے۔ ہراڑے ہژدہ سال آتیٹ منَہ بھلو کاروائی کننگ ٹی بلوچ سلاء بند تنظیم آک سرسہب مسُر، ایڑے اِرا ہزار ہژدہ آن گُڈ دہ نا کچ فورسز کارندہ آتا کیمپ آتیا قوضہ و گیشتر کہی علاقہ تیٹ بھلو حالیت نا جلہو مس ۔
دا ہم خننگ ئٹ بسونے کہ بلوچ سلاء بند تنظیم آک پوسکنو حکمت عملی ءِ تینا کریسہ ، ہندی اینجٹ آتے تکنیکی جلہو آتیٹ ٹِک کننگو، اندن پاکستان آرمی نا حاضر سروس افسر آک و گیشتر کارندہ آتیا چھاپہ خلیسہ کاروائی نا نیام ئٹ دزگیر کننگ ٹی سر سہب مسونو۔ دا دزگیر مروک آتیٹی پاکستانی فوج نا حاضر سروس کرنل لئیق بیگ ہم اوار ءِ۔
ایسری
بی ایل اے مجید برگیڈ نا جلہو تیان گڈ ہراڑے اسہ پارہ غان بلوچ سلاء بند تنظیم تا کاروائی تیٹ ودکی و ترندی خننگ اٹ بسونے ہموڑے سیاسی رِدئٹ زمینی حالیت آتیٹی ہم بھاز بھلو بدلی اس خننگ اٹ بریک۔ ساڑی وخت ئٹ شابیت ءُ پِڑ ئسے آ پاکستانی فوج نا ظلم و ریاستی سلاء بند ٹولی تا برخلاف ہم اُلسی پِڑ آ بھلو کچ اسیٹ مزاحمت خننگ اٹ بننگے، اندن بلوچستان اٹ سیاسی بے جاراتی نا مُد تالان مننگے۔ مخلوق بنماسی حق آتیان دو خالی ءُ، جتا وخت ئٹ بلوچستان نا جتا تپہ فکر آن تعلقدار مخلوق و کُڑدہ غاک برجاء برانز نا دروشم ئٹ تینا سوختئی نا درشانی ءِ کننگو، ہرافتا پاش سواد بلوچ سلاء بند تنظیم آتے دوئی مننگے۔
بلوچ تحریک و بلوچستان آ خن خلوک تجزیہ نگار آتا پاننگے کہ تربت ئٹ چُنک سن برمش ءِ ٹپی کننگ و اونا لمہ ءِ کسفنگ آن گڈ ہرا اُلسی پِڑ آ مزاحمت مونا بس، دا تیوہ غاتے طاغت اندا جلہو تیان رسینگاسس۔ داکان مالو ہم اندنو تدینی مریسہ کرینے ولے اُلسی پِڑ آ دنو مزاحمت نا جاگہ غا زیات چُھپی خننگ مسکہ ولے دا وخت دننگا تدینی تیٹ ہر وخت اُلسی پِڑ آ مزاحمت خننگ ئٹی بریک۔
اسہ سال اس گدرینگ آن گڈ ہم اِرا فروری جلہو نا زیم آک دائسکان بلوچ سیاست و مزاحمت آ خننگ مریرہ۔ دا جلہو دا خیال ءِ زوال کرے کہ بلوچستان ئٹ پاکستانی لشکر آ سرسہبی مننگ کپک۔ ہرانا سوب آن بلوچستان نا سوختہ غا ورنا، ترندی خواہوک بلوچ سلاء بند تنظیم آتا پارہ غا پامدار مریک۔
عارضی کچ و حساب نا رد ئٹ بیرہ 11.3 درسد ووٹ شاغنگانو اندن اپوزیشن ٹولیک گچینکاری تیان بائیکاٹ کریسر۔ دا گچینکاری تے صدر قیس ئنا حکمرانی و ملک ئنا جمہوریت کن اسہ امتحان ئسے نا وڑ ئٹ اوننگک۔
تیونس ئٹ 29 جنوری یک شمبے نا دے پارلیمانی گچینکاری تیکن ووٹ مس و حوال تا رد ئٹ بھاز آ ووٹ تروک آک پولنگ ءِ ہلار۔ عارضی وڑ ئٹ کچ و حساب نا رد ئٹ بیرہ 11.3 درسد ووٹ تروک آک پولنگ بوتھ اسکان سر مسر۔
دسمبر 2022 ئٹ اڈ تروک اولیکو وار نا گچینکاری تیٹ ہم کم و ود اندا کچ ئنا ووٹ تماسس۔
دا گچینکاری تے ملک ئنا صدر قیس سعید نا کنڈ آن تینا اقتدار ءِ سوگو کننگ نا کوشست و اسہ امتحان ئسے نا وڑ ئٹ اوننگاکہ ولے داخس کم کچ ئٹ ووٹ مننگ نا سوب آن داسا گچینکاری تا قانودی دروشم آ سوج ئنا نشان خلنگانے۔
کیہی اوپوزیشن ٹولیک گچینکاری تیان بائیکاٹ کریر ملک ئٹی سیاسی وڑ ئٹ کل آن زیم تخوک اسلامی ٹولی النہضہ ءِ، ہرا گچینکاری تیٹ بشخ ہلتو۔ اندا نا سروکی کروک پارلیمان ءِ صدر قیس سعید مالو سال 2021 ئٹ کشاسس و اوکان گڈ اودے ایسر کننگاسس۔
صدر سعید مقننہ نا تاغت ءِ کم کننگ و تینے گیشتر بااختیار و سیاسی وڑ ئٹ تاغتور کننگ کن راہبند ئٹ ہم بدلی کرینے۔
گچینکاری نا بارو ئٹ ننے پین انت سما ءِ؟
مالو نا وار ئنا گچینکاری تیٹ 10 اومیت وار بیدس ووٹ دوئی کننگ آن کٹاسر، انتئے کہ اوفتا مونٹی ارٹمیکو ہچو اومیت وار اس الو۔ دا وار ہفت کڑدہ آتیکن تو ہچو اومیت وار اس میدان ئٹ الو۔ گچینکاری افسر آتا پاننگ ءِ کہ دا نشست آتے پدان خاص گچینکاری تیان پُر کننگو۔
شاہد و مراکبون کون آ آزاد ادارہ تا پاننگ ءِ کہ منہ پولنگ بنجاہ تا سروک آک مبصرین آتیکن شاغوک ووٹ آتا ڈیٹا اسکان سر مننگ آن ہم نمن کریر۔
شاہد پِنی ادارہ نا پاننگ ءِ کہ گچین کاری نا دے مہم چلیفنگ نا برخلاف اصول آتا ہم خلاف ورزی کننگا و کوالخواہ نا ووٹر آک پولنگ بنجاہ اسکان رسینگنگ کِن سرکاری اُلاخ آتے کاریم ئٹ ایسُر ۔
گچین کاری کمیشن نا اسہ کارندہ ئس اوتا دوبہ تیان نمن مس، واہم اوک منار کہ مننگ کیک کہ بھاز ہند آتیا دا ڈول ئنا اسہ اِرا تدُینی مونا بریر۔
تیونس ٹی صحافی تا تنظیم ‘ نیشنل یونین آف جرنلسٹس ‘ نا نائب صدر امیرہ محمد اسہ ریڈیو مجلس ئسے نا نیام ئٹ پارے کہ صحافی تے ہم بھاز آ پولنگ بنجاہ اسکان ہِننگ نا موکل تننگتو ۔
اُلس ٹی بے پِن حکومت ورک اینڈ ایچیومنٹ پِنی حزب اختلاف نا جماعت آن ہم گچین کاری تا بائیکاٹ کننگاسس۔ دا نیام ئٹ یک شمبے نا دے تینا اسہ دیوان ئس کریر۔
پارٹی نا راہشون عبدالطیف مکی حوال تِروک ادارہ ایسوسی ایشن ایٹیڈ پریس ئٹ ہیت و گپ کننگ ئٹ پارے کہ “ارٹمی پارلیمنٹ نا حکومت آ ہچو توننگ ئس اف۔ گڑا پارلیمنٹ نا باسک آک خلقت آن ءُ، ہراسوغند کیرہ، دافتیکن دا وڑ آ انت مرو، ہرانا ذریعت ئٹ او تینا سوغند آتے پورہ کرور؟”
“انتئے کہ مالو نا حکومت آک زرگزرانی ءِ برجاء کننگ یا اُلسی خذمت ءِ گچین کننگ ئٹ بے سہُب مسُر، اندا خاطر اُلس نا اسہ تپہ ئس بنائی رِدئٹ ئٹ سال 2021 ٹی صدر سعید نا اختیار آتیا قوضہ کننگ آ خیر مقدم کریسس۔ واہم داسا اسہ بھلو تپہ ئس داتا طرز حکمرانی آن بھاز اُست کُٹہ ءِ۔”
تدوکا سال تیٹ صدر قیس سعید نا ارفِنگ ئٹ کمبوتی بسونے، انتئے کہ تیونس نا خلقت مالی کمبوتی نا گواچی ءِ۔ وے روزگاری و الّمی گِڑاتا کمبوتی شاری تے مروک غُٹ آن اہم آ ویل آتیان اسٹ ءِ۔
سلطان سعید نا خاہوت میڈیا آ شینک کروک بیان اسیٹ پارینے کہ گل محمد لین، لیاری نا ہندی سلطان سعید ءِ 30 جنوری 2021 آ رینجرز و سادہ پُچ بینوک کارندہ غاک اوفتا اُرا غان دزگیر کننگ آن گڈ نادرست جاگہ آ دریر ہراڑان گڈ اونا بارو ئٹ ہچو معلومداری اس رسینگتنے۔
اوفک پاریر کہ 740 دے تدینگا ولے سلطان سعید ءِ نہ اسہ عدالت اسیٹ ہتنگا و نئے کہ اودے یلہ کننگانے۔
اوفک پاریر کہ بنداوی حق آتیکن توار بڑز کننگ دا ریاست ئٹ ڈوہ ئسے۔ سلطان ءِ مظلوم بلوچ الس نا حق ئٹ چاگڑدی میڈیا آ نوشتہ و ہیت کننگ نا سوب آن زوراکی ئٹ برمتہ کننگا ہرا دائسکان یلہ متنے۔
خاہوت سلاء بند ادارہ تیان خواست کرینے کہ سلطان سعید ءِ یلہ کننگے۔
پاکستان نا صوبہ خیبر پختونخواہ نا بنجائی شار پشاور ئٹ پولیس لائنز ئٹی ٹہیفوک میست ئٹ مروک تراک آن 20 بندغ کسکر 83 بندغ ٹپی مسر اندن پین کہنگ نا خُلیس ءِ۔
پولیس چیف پشاور محمد اعجاز جان پیشن ملکی حوال سر کروک ادارہ ‘اے ایف پی’ تون ہیت ئٹ منہ کہوک آتا پک کریسہ پارے کہ دا ہلہلہی حالیت ئسے۔
پیشن ملکی حوال سر کروک ادارہ ‘رائٹرز’ ءِ ہندی پولیس کوالخواک پاریر کہ پشاور ئٹ تراک مسیت ئٹ نماز نا وخت آ مس، ہرا نا سوب آن کم آن کم 90 بندغ ٹپی مسنو۔
لیڈی ریڈنگ اسپتال (ایل آر سی) نا ترجمان محمد عاصم پارے کہ کیہی ٹپی تے اسپتال آ ہتنگانے۔
ترجمان لیڈی ریڈنگ اسپتال محمد عاصم رائٹرز ءِ پارے کہ 70 ٹپی ءُ بندغ اسپتال آ ہتنگانے ہرافتیٹ منٹ ئسے نا حالیت خراب ءِ۔
حوال تا رد ئٹ تراک کم و ود یک بجہ 40 منٹ آ ہموتم مس ہراتم بندغ آک پیشیم نا نماز خواننگ ئٹی اسر، تراک ترند حالیت نا اس ئس ہرا نا سوب مسیت نا چھت و دیوال تما۔
تراک پشاور نا ریڈ زون ئٹ مس ہراڑے گورنر ہاؤس تون اوار اہم سرکاری ماڑی و دفتر آک ٹہیفوک ءُ۔
تراک آن گڈ قانود ٹہیفوک ادارہ غاک جاگہ ءِ گھیرہ کریر اندن کمکی کاروائی برجا ءِ، تراک ئٹ کیہی شاریک تا ٹپی مننگ نا حوال آک اریر ہرافتے جانجوڑی کمک کن خڑک ئنا اسپتال آ دننگک۔
ڈیرہ بگٹی نا تحصیل سوئی ٹی 13 سالی بینگن آ مار بارُن اِرغ نہ رسینگ نا سوب لخ ئٹی چٹ اس شاغیسہ زند ءِ ایسر کرے۔
شابیتی حوال تا رد ئٹ درو بلوچستان نا علاقہ سوئی، وشحال کالونی نا 13 سالی چنک سن آ ورنا راجو ڈومب بگٹی غریبی و اُرانا حالیت آتیان بیزار مریسہ تینا زند ءِ ایسر کرے۔
پاننگک کہ چنک سن آ چنا بازار ئٹ بندغ آتا بوٹ آتے پالش کریکہ تدوکا دے ڈیہاڑی نہ رسینگ نا سوب اُرا غا بریسہ لُمہ آن اِرغ خواہانے۔
ہندی بندغ آتا رد ئٹ لُمہ مار ءِ اُراٹی تولفیسہ ہمسایہ تیان نُت خواہنگ کن ہنا گڑا بین آن بدحال چنک سن آ چنا نا اومیت مریسہ لخ ئٹی چٹ ءِ شاغیسہ خودکشی کرے۔
یاتی مرے کہ ضلع ڈیرہ بگٹی ٹی دا وخت چار گیس فلیڈز سوئی، پرکوہ، لوٹی و اُچ اریر ہرا تیوہ پاکستان ئٹ گیس سپلائی کیرہ واہم سوئی گیس آن اوڑے نا ہندی بندغ آک دائسکان نیست ءُ اندن بے پوریائی نا شرح ہم زیات ءِ۔
سوئی گیس فیلڈ پاکستان پٹرولیم لمیٹڈ (پی پی ایل) پنی ءُ کمپنی اس چلیفک، ہرانا ہیڈ کوارٹر کراچی ٹی ءِ۔ سوئی گیس فیلڈ آن گیس ئنا یومیہ ودشت کم و ود شش سد شست ملین کیوبک فٹ ءِ و اوڑے دائسکان ہم اسہ اندازہ ئسے نا رد ئٹ اِرا ٹریلین کیوبک فٹ گیس ئنا کوڑ آک ساڑی ءُ۔
بلوچستان نا ضلع لسبیلہ نا تحصیل بیلہ ئٹ کوئٹہ آن کراچی ہنوک کوچ درنگ ئٹ تمنگ آن 39 بندغ مرگ ئنا گواچی و کہیک ٹپی مسر۔
کمکار آتا رِدئٹ درنگ اٹ تمنگ آن گڈ مسافر کوچ ئٹ خاخر لگا ہرادے کسفنگ ئٹ اِرا گھنٹہ لگا، دوارہ جوْن تے کشنگ بناء کننگا۔
اسسٹنٹ کمشنر بیلہ حمزہ انجم پارے کہ کوئٹہ آن کراچی بروک مسافر بس ترندی نا سوب آن بیلہ نا رہی آ چوٹ ءِ ہلنگ وختا پول ئنا تمبہ تون ڈک لگیسہ درنگ ئٹ تما ہرانا سوب اوٹی خاخر لگا۔
اسسٹنٹ کمشنر پارے کہ کوچ ئٹ 48 بندغ سوار ئسر ہرافتیان اسہ چُناس و زالبول تون اوار مُسہ بندغ زندہ کشنگانے و ایلو 39 جوْن ءِ کشنگانے، اندن پین جوْن تا کشنگ برجاء ءِ۔
بلوچستان کے ضلع لسبیلہ کے تحصیل بیلہ میں کوئٹہ سے کراچی آنے والی کوچ کھائی میں گرنے سے 39 مسافر جاں بحق ہوگئے۔
ریسکیو ذرائع کا کہنا ہے کہ کھائی میں گرنے کے بعد مسافر کوچ میں آگ لگ گئی جس پر قابو پانے میں 2 گھنٹے لگ گئے۔ pic.twitter.com/BtlVwM9XJC
دے ٹکی یروشلم ئٹ یہودی تا عبادت جاہ آ جلہو نا سوب آن کم آن کم ہفت بندغ مرگ ئنا گواچی و 10 ٹپی مسنو۔
دا تدینی اِرا دے مالو مقبوضہ دے کہی کرّک ئٹ جنین شار ئٹی اسرائیلی فوج ئنا جلہو ئٹ نو فلسطینی تا خلنگ آن گڈ مسنے۔
پنچ شمبے آ جنین آ اسرائیلی جلہو برجا سال تیٹ شار ئٹ مروک کل آن بھلا جلہو آتیان اسٹ اس ئس۔
داڑے پولیس نا دا یہودی آبادکاری ٹی عبادت کن مُچ مروک بندغ آک ہراتم عبادت جاہ آن پیشن پیشتمنگ اسر کہ جلہو کار اوفتیا سم کاری کرے ہراڑان گڈ پولیس نا کنڈ آن اودے کسفنگا۔
اسرائیلی پولیس نا رد ئٹ جلہو کار نن ئنا 8 بجہ 12 منٹ آ عبادت جاہ ئٹ پیہا و بندغ آتیا سم کاری کرے۔
غزہ ئٹی حماس نا ترجمان حازم قاسم حوال سر کروک ادارہ روئٹرز ءِ پارے کہ ‘دا کاروائی جنین ئٹ کوزہ گیر آتا ڈوہ تا ورندی و کوزہ گیر نا ڈوہدار آ گام تا قدرتی ردعمل ءِ۔’ اسلامی جہاد تنظیم ہم دا جلہو جوان پارینے واہم ہچو فلسطینی ٹولی اس دا جلہو نا ذمہ واری ءِ ارفتنے۔
جاگہ غا ساڑی فرانزک ٹولیک اسہ پیہنو گاڑی ئسے نا بارو ئٹ پٹ و پول کننگ ءُ ہرادے گمانی وڑ ئٹ جلہو کار چلفنگ ئس۔
یہودی تا عبادت جاہ آ جلہو ہولوکاسٹ یات گری دے ئنا وخت آ مسنے۔ دا دے جرمنی ٹی نازی دور ئٹ 60 لکھ یہودی تا خون ئنا سوگ ئٹ گدریفنگک۔
برطانوی وزیر خارجہ جیمز کلیورلی ٹوئٹر آ نوشتہ کرینے کہ ‘یہودی تا عبادت جاہ آ ہولوکاسٹ یات گری دے و سبت نا دے جلہو فریشانی ئسے۔ نن تینا اسرائیلی سنگت آتون سلوک اُن۔’
دانگا امریکی وزیر خارجہ انٹونی بلنکن پارینے کہ ‘امریکہ دا دہشت گرد جلہو نا ترند مذمت کیک۔’
وائٹ ہاؤس نا رد ئٹ صدر جو بائیڈن اسرائیلی سر وزیر بنیامن نتن یاہو تون فون آ ہیت کرینے و اودے مخ تفی نا باوری ترفینے۔
بنیامن نتن یاہو آن بیدس متنازع راجی سلامتی نا وزیر ایتمار بن غفیر جاگہ نا دورہ کرینے۔ بن غفیر وعدہ کریسس کہ او اسرائیل نا گلی تیٹ امن دوارہ ہترو واہم دن مفننگ آ بندغ آک اوڑا سوختہ ءُ۔
اقوام متحدہ نا سیکریٹری جنرل انٹونیو گٹیریز نا ترجمان نا رد ئٹ او پارینے کہ او اسرائیلی و فلسطینی علاقہ تیٹ بےداد تدینی تا ودکی آ بھاز فریشان ءِ۔ ‘دا مزاحمت پاش کننگ نا وخت ءِ۔’
خیال ئٹ مرے کہ اسرائیل 1967 نا وخت آ دے ٹکی نیامکوئی علاقہ نا جنگ ئٹ دے ٹکی یروشلم نا علاقہ غا کوزہ کریسس و داسا دا تیوہ علاقہ ءِ تینا بنجائی شار تصور کیک۔ واہم جہانی تلہ غا اکثریت ہمو ملک آتا ءِ ہرا اودے منیپسہ۔
فلسطینی تا دعویٰ ءِ کہ دے ٹکی یروشلم بروک وخت ئٹ اوفتا آزاد ریاست نا بنجائی شار مرو۔
کوئٹہ ٹی “ری امیجننگ پاکستان” نا پن ئٹ اسہ مجلس اس ہڈ تننگا ہراٹی پاکستان نا مسکوہی سر وزیر و ن لیگی راہشون شاہد خاقان عباسی، بلوچستان نا مسکوہی سر وزیر نواب اسلم رئیسانی، پاکستان نا ساڑی ن لیگی پارٹی نا مسکوہی وزیر خزانہ مفتاح اسماعیل، پیپلز پارٹی نا مسکوہی راہشون و سینٹر مصطفی نواز کھوکھر، پاکستان یونین آف جرنلسٹ نا صدر شہزادہ ذوالفقار و حق دو تحریک نا راہشون خواجہ حسین و ایلوفک تران کریر۔
پاکستان ئٹ ہراتم اسہ پوسکنو آزموندہ اس کننگک تو اونا بناء بلوچستان آن مریک، گڑا او راسکوہ ٹی ایٹمی آزموندہ غاک مریر یا باپ ئنا دروشم ئٹ ننوئی نن بنجائی پارٹی نا ودشت مرے، داسا ری امیجننگ پاکستان ءِ ہم بلوچستان نا شار کوئٹہ غان بناء کننگانے۔ دائسکان درشان اف کہ ری امیجننگ پاکستان نا مسخت آک انت ءُ ولے اونا راہشونک پارہ کہ او ہمو ویل آتیا ہیت کننگ خوائرہ ہرافتیا پاکستان نا اسمبلی یا تعلقداری تخوک تلہ آتیان ہیت مفک۔
مجلس ئٹ زوراکی نا بیگواہی تون اوار بلوچستان نا ویل آتیا ہیت کننگا۔ بلوچستان نا ویل آتے پاش کننگا ولے اوفتا ایسری کن درشان ءُ روڈ میپ اس تننگتو و ہرا ویل آتیا ہیت کننگا اوفتا ذمہ وار آک ہم اسہ ہد ئسے اسکان سیاسی شخصیت و پارلیمانی ٹولیک ءُ۔ شاہد خاقان عباسی سر وزیر ئس، او وخت او زوراکی نا بیگواہی تیا ہیت کننگ کن تیار ئس نئے بلوچستان ئٹ لشکر کشی تیا ہیت کریکہ۔ بلوچستان ئٹ ہراتم ہڑدے زوراکی ئٹ بیگواہ مروک بندغ آتا جشوک جونک رسینگارہ ہموتم مصطفیٰ نواز کھوکھر پیپلز پارٹی نا بشخ اس ئس و بلوچستان ئٹ پیپلز پارٹی اقتدار ئٹ ئس۔
اینو بلوچ ورنا تا زوراکی نا بیگواہی و دروغ نا مونتس تیٹ خون مننگ آ پوہاڑ کروک آ نواب اسلم رئیسانی بلوچستان نا سر وزیر ئس، بلوچ ورنا تا لس خون ئنا چرجوئی پیپلز پارٹی نا حکومت نا وخت ئٹی بناء مسوسس۔ پاکستان ئٹ پارلیمانی ٹولیک و شخصیت آک اپوزیشن ئٹ مریرہ گڑا بلوچستان ئٹ اوفک زلم و بے دادی ءِ خنرہ ولے ہراتم حکومت ئٹی مریرہ گڑا ریاستی زلم ئٹ پاکستانی لشکر نا سنگت جوڑ مریرہ۔
بلوچستان نا ویل آک سیمینار ئٹ تران کننگ یا پارلیمنٹ ئٹ اسہ بِل اس پاس کننگ آن اسیر مفسہ۔ ہراتم اسکان ریاست پاکستان یا پاکستانی لشکر بنداوی بلوچ راجی حق و آجوئی نا حق اتون اوار مننگ آ تیار متور ہموتم اسکان بلوچستان ہشنگیسہ کرو و بلوچ انسرجنسی برجا مرو۔
