تدوکا دے کیچ نا علاقہ ہوشاپ ئٹ پاکستانی لشکر تون جھڑپ ئٹ بیران مروک بندغ آتا چاہنداری مسنے۔

بیران مروک آتا چاہنداری امام ولد مسکان ہند تجابان، رضائی ولد واحد بخش ہند سری کرکی، یحییٰ ولد آسمی ہند پسنی و ممتاز ولدگزی ہند پرکوٹک ہوشاپ نا پن تیٹ مسنے۔

خیال ئٹ مرے کہ تدوکا دے ضلع کیچ نا علاقہ ہوشاپ ئٹ پاکستانی لشکر و سلاء بند بندغ آتا نیامٹ مروک اسہ جھڑپ اسیٹ چار بندغبیران مسوسر، ہرافتا جون تے لیویز سول اسپتال تربت آ سر کریسس۔

پاکستانی لشکر نا شعبہ تعلقات عامہ تدینی نا پک کرینے۔

ایلو پارہ غا ذرائع تا پاننگ ءِ کہ بیران مروک بندغ آتا تعلقداری بلوچ آجوئی دوست سلاء بند گل آتیان ءِ واہم دا بارو ئٹ آجوئی دوست آتاہیت داسکان مونا بتنے۔

بلوچستان نا ضلع کیچ نا علاقہ ہوشاپ ئٹ پاکستانی سیکورٹی فورسز چار جون لیویز کوالخواہ تے تسنے۔

سیکورٹی حوال تا رد ئٹ ہوشاپ بل نا مشی آ علاقہ ٹی سرچ آپریشن نا وخت آ 4 بندغ نا خون کننگانے۔

سرکاری حوال تا رد ئٹ سیکورٹی فورسز آک ہوشاپ و بل نا مشی آ علاقہ ٹی سرچ آپریشن نا وخت آ 4 شکبر بندغ ءِ خلکنو۔

کہوکا بندغ آتا جون تے ایف سی کیمپ آ دننگ آن گڈ لیویز فورس نا حوالہ کننگا۔ لیویز فورس جون تے چاہنداری کن ڈسٹرکٹ ٹیچنگاسپتال تربت آ سر کرینے۔

واہم جون تا چاہنداری داسکان متنے و نئے کہ سلاء بند گل آتا کنڈ آن ہیت اس مونا بسنے۔

یاتی مرے کہ بلوچستان ئٹ دا وڑ ئنا تدینیک مونا بریسہ کرینو ہرافتیٹ بھاز آ جون تا چاہنداری مالو آن بیگواہ مروک بندغ آتا وڑ ئٹمسنے۔

بلوچستان نا راج دوست ٹولیک و بندغی حق آتا گل آک دا وڑ ئنا تدینی تے شکبر پن تسنو۔

واہم پن کروک جون تا بارو ئٹ داسکان پین شابیتی حوال بتنے۔

بارنا پَن

نوشت: فرانز کافکا
مٹ: نوید احمد

دی بلوچستان پوسٹ

اندن لگیک کے لمہ وطن آ بھازا ویلاک اریر ہرافتیا نن خنتے تر کرینُن۔ نن دا باروٹ منہ وخت مالو اِسکا اسل کم جیڑانہ۔ تینا ہردے نا باخو کَٹنگ و کننگ ئٹ اختہ ئسون ولے اندا دے تیٹی گڑاس اندنو تدینی مسر ہراتے آن نن گڑتی نا گواچی مسون۔ و دھرتی نا بابت ئٹ جیڑنگ نا بناء کرین۔ شاہی محل تو مقابل چوک ئنا رہی آ چوٹ نا کنا دکان ءِ۔ ای سہب ئنا پاس آ دکان ءِ ملاٹ تو خنیوہ کَری بَڈی آ وردی تے بینوک توفک تُد ءُ سپاہی ہر کوچہ نا مونا آ سلوک ءُ۔ وا ہم دا ننا فوجیک اسل افس بلکہ قطب نا پارہ غان بروکو پاوال ءُ۔ او ہر دروشم اٹ، کنکن دا ناولد ءُ، بھلا شارٹ بسونو، حالانکہ سیم آن بازیکہ مُر ءُ، ہر رنگ اٹ ولے او داڑے اریر، ہر سہب دافتیٹی ودیکی مریسہ کیک۔ امر کے اوتا فطرت ءِ، بھلا جاگہ تیٹی ہندی مننگ، انتئے کہ رہنگنگ نا وڑ اٹ افس، او زخم آتے تیز کریسہ، تیر چلیفسہ، ہلی تا سواری ءِ کریسہ۔

دا پُر امن انگا چوک ہرادے ہر وخت صاف تِخنگاکہ، داسہ داتے کِن، داتا دو آن، دانا دروشم اسل جتا مسونے۔ نن بازیکا، وخت وخت، تینا دوکان تا مون ءِ صفا کینہ ولے دُن بھاز کم مریک، انتئے کہ دا کوشست بیکار ہم مریک۔ داڑان بیدس، ننے ہلی تا شیف یا کوڑہ تے آن کہنگ نا خُلیس ءِ۔ دا بروکا پاوال آتون ہیت گپ سخت ءِ۔ دا ننا بولی ءِ تپّسہ، اصل ئٹ دافتا جند ئنا ہچّو بولی ئس اف۔ تین پہ تین ہم دا بھاز کم ہیت کیرہ، تینا تُرند آ توار ئٹ ننے خف تیرہ۔ او ننا زند گدریفنگ نا وڑ، ننا تہذیبی ہند آتے نہ پو مریرہ نہ پو مننگ نا کوشست و اُست خُواہی تخیرہ داڑان بیدیس ننا اشارہی آ بولی ہم اوتا سمجھ آن پیشن ءِ، نی اگر تینا دوی ءِ کشَس یا تینا دوتے تَفس او نے پو متنو نہ وخت ئس نے او پو مرور۔

اوفک بازیکا خن نشان ایترہ یا گڑا خنتے تینا پیہن کیرہ، با تا گج آن پُر مریک، ولے راستیکا دا کُل آن اوفتے ہِچ مطلب مفک، دا خطرہ نا نشانی ہم اَف، او بیرہ دا غُٹ ءِ دا خاطرآن کیرہ کہ دا اوفتا فطرت ءِ اُریرہ، انت ئس کہ اُست تا خوائے، نی دا پاننگ کپیسہ کہ او طاقت نا خواجہ غاکو ولے ہراتم او گڑاسیٹی دو ءِ سخت کیرہ تو نی تینٹ اسے کُنج ئس الیسہ، او گڑا ءِ اوتے کِن الیسہ، کنا جند ئنا دوکان آن بھاز آ گڑاتے درینو ولے ای بھاز مشکل ئٹ گِلہ شونی کیوہ ولے ہراتم خنیوہ کہ روڈ ئنا ایپارا قصاب زور ئسے ٹی وام آ سامان ایسونے ولے او پُلنگانے، دا پُوسکن بروکاک تینائی کرینو تا۔ پین تو پین ءِ دافتا ہُلیک ہم سُو کنیرہ۔ اسے ہلی سوار ئس تینا ہّلی تو اوار سُو ءِ کشکیک او کنیرہ۔

قصاب خُلیسونے، تینا سُو تے بچفّنگ نا ہمت ءِ کپک۔ وا ہم نن اودے پو مرینہ اونا نسخان نا پورہ واری او کمک کِن اسٹ مرینہ. دیر چائک کہ دا کَری بَڈی آ وردی تون انت کرور ہراتم دافتے سُو رسینگپرو۔ دا بابت ئٹ دیر چائک کہ ہر دے سُو کنوکا ءِ اسے دے سُو رسینگپ تو انت کننگ نا لائخی تِخک۔ ایلو دے قصاب زندہ ءُ خراس ئس ایسوسس کم سِکم قصاب خراس تڑنگ نا مصیبت آن تو بچا ولے پین دے ئس او دُن اسُل کپک۔ اسے گھنٹہ سے کِن، ای تینا دوکان نا مونا فرش آ لیٹاٹ۔ ای تِینے آ کُلے کمبل او پُچاتے شاغاسُٹ، تاکہ ای قصاب نا خراس نا زمبہیر کروکا توار ءِ بنپر ہرادے پاوال آک چار مہ کنڈان الکُسر کہ دانا باسُنا سُوتے تینا دنتان تیٹ چَپاڑیسہ کار۔ شام آ کنا پیشتمنگ آن پد کّل جنگلیک اُرے اِسکا تموک اسور، شراب نا مُتکنا بوتل آ دنکے شرابیک، اندن او خراس نا دا پار ایپار۔ امو ساعت آ کنے خیال بس کہ ای بادشاہ ءِ خناسٹ کھڑکی آن اُرنگا۔ ایہن تو او وخت ئس دا کھڑکی تے آ بفک بازیکا تینا محل نا باغ ئٹ درخت آتا نیام ئٹ پُدین آ تہو نا چَس ءِ الیک ولے دا ساعت آ او کھڑکی آ بسس، کم از کم کنے تو اندن لگنگ ئس، کھڑکی تیان ئسٹ آ سلوک تینا محل ئنا مونا دا مُچا تماشہ ءِ سیل کریکہ۔ نن کُل تینے سوج کرین امر مریک؟ ہراتم اسکا نن دا عذاب آن تیر مرون؟ شاہی محل تینا کنڈا پاوال آتے پامدار کرے ولے او دا تپسہ کہ اوتے پدا ہم نروئی ءِ۔ دروازہ غاک بازیکہ بند ءُ۔ (سنتری ہرا چڑہ پیشن گاٹ تسورہ، داسہ بند انگا کھڑکی تیٹی تینے ڈھکیرہ۔)

لمہ وطن نا رکھ داسہ نن کاریگر او تاجر آتیا سلیسونے ولے نن دا کاریم نا لائخ افن، نہ وختس نن دا دعویٰ ءِ کرینن، دا بے سمجھی سے اندا ننا بربادی نا نشانی ءِ۔

زوراکی ئٹ بیگواہ عبدالحمید زہری نا زائیفہ کراچی ٹی ٹہیفوک وائس فار بلوچ مسنگ پرسنز نا کیمپ آن ویڈیو بیان اس شینک کریسہپارے اگہ کنا اَرغ آ دوبہ اس ارے گڑا اودے عدالت ئٹ ہتیسہ پاش کننگے۔

عبدالحمید زہری نا زائیفہ فاطمہ بلوچ تینا ویڈیو بیان ئٹ پارے کہ اونا ارغ عبدالحمید زہری ءِ پاکستانی ڈھکوک ادارہ و سندھ پولیس ناکارندہ غاک ارفیسہ دریر۔ فاطمہ نا رد ئٹ پولیس اوفتے پارے کہ او سر و سوج آن گڈ عبدالحمید ءِ پدا یلہ کرور۔

عبدالحمید زہری ءِ 10 اپریل 2021 آ کراچی آن دزگیر کننگ آن گڈ زوراکی ئٹ بیگواہ کننگاسس، عبدالحمید نا خاہوت اونا زوراکی ئٹبیگواہی نا برخلاف تدوکا اِرا سال آن کراچی و اسلام آباد تون اوار بلوچستان ئٹ برانز ریکارڈ کرفینے۔

فاطمہ بلوچ نا پاننگ ئس کہ ارغ نا زوراکی ئٹ بیگواہی نا برخلاف و انصاف کن او بیگواہ بندغ آتیکن جوڑ کروک کمیٹی و کمیشن آتامونا ہنا، عدالت آتیٹ کیس جمع کرینے واہم ہچو سماعت اس متنے۔

فاطمہ بلوچ بندغی حق آتا ادارہ و حکومتی باسک آتیان ارغ نا یلہ مننگ ئٹ کڑد ایسری تننگ و انصاف ئنا خواست کرے۔

یاتی مرے کہ بیگواہ بندغ آتا یلہ مننگ کن جہد کروکا گل وائس فار بلوچ مسنگ پرسنز نا برانزی کیمپ تدوکا شش دے آن کراچی پریسکلب نا مونا برجاء ءِ اندن داکان مالو بلوچستان نا بنجائی شار کوئٹہ پریس کلب نا مونا برجاء ئس۔

آجوئی نا علمبردار “روستو”

تحریر: کامریڈ سنگت بولانی

دی بلوچستان پوسٹ

گل سرزمین بلوچستان ہر دور ٹی دلیر و فرزند ودی کرینے ہرا تینا بے وس آ قوم نا بے وسی ءِ خنار، ہرا تینا ورنا تا بے گواہی ءِ خنار، ہرالمّہ و ایڑ تا خڑینک و دڑدے محسوس کریر او سخت انگا سوچ و فکر تون تحریک آجوئی ٹی اوار تمار او تینا ایسری ساہ ءِ دا سرزمینکن تسر ولے پدی چک خلتوس، بے ایمان متوس، بے ضمیر متوس، مایوس متوس، جہد ءِ نیام ٹی الیتوس، بدنام متوس نامدار مسر۔ تیناایسری سم ءِ تینا پنا کریر زندہ مسر۔ 

شہید در محمد امو ہزار آ جہد کار آ تیٹی اسٹ ئس ہرا ریاست نا قید و بند سختی سوری تے بھلو وخت اس سگیسہ آجو مس۔ او آجومننگ آن پد خن ٹپ آتیان بار اُراٹی تولتو سدھا جہد ءِ آجوئی نا علمبردار آ تون سوگو ءُ فکر سے ٹی اوار تما۔

دلیری ٹی شہید در محمد نا ثانی کس الو۔ شہید در محمد ءِ سنگت آک تنظیمی راہبند آ تا رد ئٹ روستو نا پنٹ یاد کریرہ، روستو بھاززوت تنظیمی راہبند و جنگی وڑ و ڈول ہیل کرے، روستو اسہ ہنینو مہربان ءُ بندغ اس ئس۔ بوگ شوگ کروکا بندغ اس ئس۔ اونا جوڑتیا ہروخت بشخندہ ئس۔

روستو مچا علاقہ نا ہر کسر، ہر چر و دیر آن واخب ئس، ہرا وخت کہ گشت ئسے آ روستو سنگت آ تون اوار مسکہ گڑا سنگت آک اُستجم مسُرہ روستو تینا ذمہ واری تے پُہہ مسکہ ہرا جاگہ ءِ کہ سنگت آک اوتاخ کریرہ روستو ہمو جاگہ نا ٹیڑھ سے آ لگاکہ او تینا دوربینءِ کشاکہ چپ و چاگڑد ءِ جوانی ٹی جاچ کریکہ ۔

بقول سنگت سے نا  اسہ جنگی محاز سیٹی بیرہ ای او روستو اسون دشمن نا پنچ سپاہی تینا حوالدار تون اوار پوسٹ آ واپس انارہ  “انت پاسہ روستو مرے تا دژمن آ  زمبہیر ئس” ای روستو ءِ پاریٹ۔ “دہنز ایتینہ تا سنگت ہمت کر” روستو بشخندہ کریسہ پارے ۔

او گواچنی ہمو جلہو نا وڈیو اُننگ آن پد سما تما کہ دژمن نا سپاہیک تینا حوالدار تون اوار امر چیہانٹ خلیسہ ریڑ کریر و مرگ ناگواچی مسُر۔

ہر اسہ محاز آ روستو ڈژمن آ جلہو کننگ ٹی مون مستی ئس ۔

گور بام نا وخت سہب نا 6 بجہ ئس ننا خف تیٹی کبینو توار ئس پننگ بناء مس، سنگت آک بش مسُر تینا ہمیل توفک و سامان تےسھنبالار، مچا آسمان ٹی  ڈرون آ تا ژونگ ژونگ ئس، ننے آن خڑک مالدار ئسے نا اُرا خاہوت ہند و جاگہ ئس ہرا نا زی آ  ڈرون آکپھیری خلکورہ۔

“دا توفکے تینا سرزمین نا آجوئی کہ ارفنگ تون اوار تینا ننگ و ناموس نا رکھ ءِ کننگ ہم ننا زی آ فرض ءِ ” ہمت کبو گڑاس سنگت مالدارنا چنا نیاڑی تے کشبو اگہ دشمن بس گڑاس سنگت دشمن تون مون ایتینہ۔ شہید روستو جزباتی مریسہ پارے۔ انداڑتون اوار دشمنفوج نا ہیلی تا توار مس شہید روستو، نصیب اللہ (میشدار) و چنکا فرید جان دشمن لشکر تون مون ایتنگ کہ سلیسُر۔  دشمن نا خیال ءِچپ کننگ کن سم کاری بنای کریر۔ ایلو کنڈ آن سنگت آک مالدار نا چنا نیاڑی تے کشیسہ مون مستی مسر۔ ہیلی تا شیلنگ و فوج نا سمکاری بناء مس۔ کنا خاک نا دلیر آ فرزند اک تینا گڈیکو میگزین اسکان دشمن نا مونے توریر و چندی سپاہی کہ تا مرگ نا گواچی کریر اوتینا گڈیکو سم تے جتا کریر سم تا کھٹنگ تون تینا گڈیکو سم کے تینا پنا کریر او دیہاڑ ٹی زندہ سلیسر۔

فلسفہ ءِ امیر الملک پدا زندہ مس دا گڈیکو سم نا فلسفہ تا آجوئی نا دے اسکان برجاء مرو ۔۔۔۔۔

اوغانستان نا مسکوہی حکومت ئٹ پارلیمان نا زالبول باسک مرسل نبی زادہ ءِ اونا اُرا ٹی گھاٹ تون اوار سُم کاری کریسہ کسفنگا۔

جہانی خبر تروک ادارہ نا رد ئٹ اوغانستان نا بنجائی شار کابل ئٹ پارلیمنٹ نا مسکوہی زالبول باسک مرسل نبی خانزادہ نا اُرا ٹیاسہ سلاء بند بندغ اس پیہا ہرادے اونا گھاٹ توننگ نا کوشست کرے ولے سلاء بند بندغ سُم کاری کریسہ گھاٹ تون اوار زالبول ءِکسفے۔ زالبول باسک اسمبلی نا ایلم باز ٹپی مس ہرادے خڑک ئنا اسپتال آ سر کننگا۔

یاتی مرے کہ طالبان نا اوغانستان ئٹ حکومت آن گڈ کیہی مسکوہی باسک آک پیشن ملک آ ہنانو و داکان مُست جتا مسکوہی فوجی وسرکاری پولیس افسر آک ہم کسفنگانو۔

اوغانستان ئٹ طالبان نا حکومت آن پد جہانی ادارہ آتا کنڈ آن دا تدینی نا ذمہ وار طالبان حکومت ءِ پاننگانے۔

تدینی نا بابت ئٹ طالبان کوالخواہ تا پاننگ ءِ کہ سلاء بند جلہو کار تدینی آن  پد نرانے و داسکان اونا چاہنداری مننگ کتنے وا ہم پولیسخونی ءِ زوت دزگیر کرو۔

بلوچستان نا علاقہ نوکنڈی ٹی مروکا روڈ شکست ئٹ مُسہ بندغ ساہ تسر۔

تدینی نوکنڈی نا علاقہ عیسی طاہر لانڈی نا خڑک آ ایرانی جوڑ کروک زمیاد و کار ئسے نا نیام ئٹ ڈک لگنگ نا سوب آن مسنے۔

تدینی ٹی بیران مروکا تا چاہنداری محمد حیات، نعمت اللہ و ایاز نا پن آ مسنے۔

تدینی ٹی کہوکا تا تعلقداری نوشکی احمد وال و خاران آن پاننگک۔ ہر مُسہ جون تے نوکنڈی اسپتال آ سر کننگانے۔

کوئٹہ ٹی گیس ئنا ہننگ نا سوب آن مروک تراک ئٹ 5 چنا تون اوار باوہ بیران مس۔

کمکار ذرائع تا رد ئٹ گیس ہننگ نا تدینی سیٹلائٹ ٹاؤن ئٹ مونا بسنے ہراڑے مسلم اتحاد کالونی نا ہندی 40 سالی شرف الدین نا اُراٹی گیس ئنا ہننگ نا سوب آن تراک مس ہراڑان گڈ خاخر لمبہ کرے۔

کمکار ذرائع تا رد ئٹ حوال رسینگ تون فائر بریگیڈ و کمکار ٹولیک جاگہ غا سر مسر و خاخر ءِ کسفیر۔

تراک ئٹ شریف الدین و اونا 5 چنا بیران مسر ہرافتا سن آک 5 آن 12 سال اسکان پاننگرہ۔

چین ئٹ محکمہ جانجوڑی نا کوالخواہ پارینے کہ ‘کرونا وائرس نا سوب آن ملک ئٹی کم و ود 60 ہزار بندغ مرگ ئنا گواچی مسنو۔‘

فرانسیسی نیوز ایجنسی اے ایف پی نا رد ئٹ چین ئنا حکومت دسمبر ئٹی کرونا وائرس نا بارو ئٹ رکھ آتے مُر کننگ آن گڈ اولیکو وارمرگ آتا کچ ءِ پارینے۔

نیشنل ہیلتھ کمیشن ئٹ بیورو آف میڈیکل ایڈمنسٹریشن نا سروک جیاؤ یاہوی سنیچر ءِ پریس کانفرنس ئٹ پارے کہ ‘8 دسمبر 2022 آن 12 جنوری 2023 اسکان 59 ہزار 938 بندغ مرگ ئنا گواچی مسر۔‘

دا کچ سرکاری اسپتال آتیٹ کہوک آ بندغ آتا ءِ و دا کچ داکان زیات مننگ کیک۔

اونا پاننگ ئس کہ ‘دافتیٹ پنچ ہزار 503 مرگ کرونا وائرس نا سوب آن و 54 ہزار 435 مرگ کرونا و ایلو ناجوڑی تا سوب آن مسر۔‘

تدوکا سال دسمبر ئٹی کرونا رکھ آتے ایسر کننگ آن گڈ چین آ دوبہ خلنگاکہ کہ او مرگ آتا گواچن کچ ءِ پاتنے۔

چین داڑان مالو کرونا نا سوب آن مروکا مرگ آتا کیٹیگری ءِ بدل کریسہ پاریسس کہ ‘او بیرہ ہمو بندغ آتا کہنگ ءِ حساب کرو ہرا کرونانا سوب آن دم ئنا تکلیف ئٹ مرگ ئنا گواچی مرور۔‘

واہم جہانی ادارہ جانجوڑی اوڑا نغدکاری کریسس۔ ڈبلیو ایچ او نا سروک ٹیڈروس ایڈہانم پاریسس کہ ‘اوفتا ادارہ چین آن کرونا ناسوب آن مروکا مرگ و اسپتال آتیٹ پیہوک ناجوڑ آتا باور نا لائخ ڈیٹا دوئی کننگ نا پاننگے۔‘

چینی محکمہ جانجوڑی نا کوالخواہ سنیچر ءِ پارے کہ ‘مرگ ئنا گواچی مروک بندغ آتا سن 80.3 سال ءِ ہرافتیٹ 90 درسد بندغ آکاندنو اسر ہرافتا سن 65 سال آن زیات ئس۔‘

یاتی مرے کہ چین ئٹ 60 سال آن زیات سن ئنا لکھ آ بندغ آتے ویکسین خلنگتو۔