تیوہ بلوچستان ئٹ خود کشی  نا ودوک تدینیک سلِنگ نا پِن ءِ  ہلنگ افس تدوکا ہفتہ تیوہ بلوچستان ٹی اسہ مسڑ تون اوار اِرا بندغ نا خود کشی نا تدینی رپورٹ مسُنے ۔ 

یک شمبے نا دے لسبیلہ ٹی ہیڈ کانسٹیبل رحمت اللہ ولد غلام محمد ساکن بگھیاڑی لِخ ٹی چِٹ شاغیسہ تینے ٹنگا ہراڑان او ساہ تس۔

داکان مالو ضلع کیچ آن تعلق تخوک اسہ مسڑ ئس گمانی ردئٹ میڈیکل ٹیسٹ ٹی پد سلینگ نا سوب آن خود کشی  کریسہ بیران مسس۔ 

یک شمبے نا دے لسبیلہ ٹی مروک تدینی نا باروٹ پولیس نا پاننگ ئس کہ پولیس جون ءِ دوئی کریسہ گُڈ قانود نا کاروائی کننگ آن گُڈ جون ءِ خاہوت ءِ تس ۔ 

پولیس نا پاننگ ئس کہ تدینی نا سوب چاننگ نا کوشست کننگ ءُ واہم دائسکان سوب آک معلوم متنو ۔ 

یاتی مرے کہ تدوکا ہفتہ بلوچستان ٹی مروک دا ارٹمی تدینی ءِ داکان مالو کیچ آن تعلق تخوک اسہ مسڑ ئس گمانی ردئٹ میڈیکل ٹیسٹ ٹی سلینگ آن گُڈ خود کشی  کرے ۔ 

تیوہ بلوچستان ٹی اِرا سال نا نیام ئٹ خود کشی  نا تدینیک زیات تُرند مننگ ءُ ، دی بلوچستان پوسٹ نا پارہ آن مُچکروک کچ نا ردئٹ تدوکا سال کیس آک پنجا آن زیات مسُنو ۔ 

یاتی مرے کہ بلوچستان ٹی خود کشی نا تدینیک ہرا اُرا یا علاقہ ٹی مسُنو ، اوفتے ڈھکنگ نا کوشست کننگیک انتئے کہ بندغ آک دادے تینکن بد نامی سرپد مریرہ ۔ 

دی بلوچستان پوسٹ نا پارہ آن مُچ کروک کچ نا ردئٹ بیدس شک دا مروک تدینی تا مونا بروک بھاز چنکو کچ ئسے۔

بلوچستان نا ضلع کیچ نا علاقہ مند ئٹ درو نا درست بندغ آتا جلہو ئٹ پاکستان فوج نا اِرا کارندہ ہند آ مرگ ئنا گواچی مسر۔ جلہو کروک آک کارندہ آتا سلاء تے ہم تینتون دریر۔

جلہو نا ذمہ داری ءِ آزادی کن جنگ کروک بلوچستان لبریشن فرنٹ ارفینے۔ ترجمان میجر گہرام بلوچ شینک کروک بیان ئٹ پارے کہ سرمچار آک مند نا علاقہ کوہ شیراز ٹی سلات کور ٹی پاکستانی لشکر نا اسہ موٹر سائیکل آ مروک اِرا کارندہ آتیا جلہو کریسہ اوفتے مرگ نا گواچی کریر  و موٹر سائیکل ءِ ہُشار ۔ سرمچار آک دژمن لشکر نا اِرا توفک تینا قوضہ ٹی ہلکر۔ 

ترجمان نا پاننگ ئس جلہو آن گُڈ شکست کُنوک  لشکر جتاء پارہ  آتیا مارٹر گولہ خلک۔

بلوچستان ئٹ بلوچ آزادی خواہوک تنظیم تا پارہ غان پاکستان فوج و اوفتا کمکار تیا جلہوک ہڑدے مونا بریرہ۔ دا جلہو تیٹ بھاز وخت پاکستان فوج ءِ زیات جانی و مالی نقصان ہم مسونے۔

تدوکا دے تیٹ بلوچ لبریشن آرمی نے پارہ غان گوادر نا علاقہ پسنی ئٹ کوسٹ گاڑد نا پوسٹ ئسے آ جلہو نا ذمہ داری ارفنگاسس۔ تنظیم نا ترجمان جیئند بلوچ پارے کہ سرمچار آک راکٹ و ایلو بھلا سلاء تیٹ دژمن آ جلہو کریر ہراڑان اودے جانی و مالی نسخان ارفوئی تما۔

بلوچستان نا علاقہ کیچ ٹی سُم ئٹ کسفنگوک بندغ ئسے نا جوْن خننگانے۔

جوْن کیچ نا تحصیل تمپ نا علاقہ کورجو آن رسینگانے، ہرانا چاہنداری اللہ داد عرف واجو ولد محمد سکنہ آسیہ آباد نا پِن آن مسُنے۔

تدینی نا سوب دائسکان سما تمتنے اندن پولیس نا پاننگ ءِ کہ پِن کروک بندغ ءِ سُم ئٹ خلیسہ کسفنگانے۔

ترکیہ ایران و شام ٹی کرد جنگجو تا سنگر تیا فضائی جلہو بناء کرے ہرانا سوب ٹی 12 بندغ بیران مسونو۔

پیشن ملکی حوال تِروک آتا ردئٹ ترکیہ نا پاننگ ئس کہ عراق و شمالی شام ٹی کردش جنگجو تا سنگر تیا فضائی نا بناء کننگانے انتئےکہ دا علاقہ استنبول ٹی تخریبی جلہو تیٹ کاریم ئٹ ہتِنگیسہ ءِ۔ ترکیہ فضائی آپریشن ءِ ‘ کلا سورڈ ‘ نا پِن تِننگانے ہرا تدوکا ہفتہاستنبول نا اختہ مروک مارکیٹ ٹی اسہ بمب جلہو آن گُڈ بناء کننگانے ۔

تدوکا ہفتہ استنبول نا اختہ مروک مارکیٹ ٹی بمب تراک ئٹ 6 بندغ مرگ نا گواچی و 81 ٹپی مسوسُر اندن ترکیہ نا حکومت دانا ذمہوار کردستان ورکرز پارٹی ءِ پِن کرینے ۔

وزیر رکھ ہلوسی اکار ایئر فورس آپریشن بنجاہ آن جنگی جہاز آتا رادہ مننگ آن مالو پاریسس کہ ‘ نن داسا آن آپریشن ‘ کلا سورڈ ‘ نا بناء کننگُن ۔

ترکیہ وزیر رکھ نا پاننگ ئس کہ فضائی جلہو تیان کردستان ورکرز پارٹی و کردش پیپلز پروٹیکشن یونٹس نا سنگر تے ٹِک کننگانے ۔

اوفتا پاننگ ءِ کہ اقوام متحدہ نا چارٹرز نا آرٹیکل 51 نا ردئٹ نن تینا رکھ نا حق ءِ تخیسہ عراق و شام نا شمال ٹی دا علاقہ آتیٹفضائی آپریشن کلاسورڈ بناء کرینن ہرا ننا ڈیہہ آ تخریب کار آتا جلہو کِن وتاخ نا وڑ ئٹ کاریم ئٹ ہتِنگیرہ ۔

ترکیہ نا حکومت استنبول ٹی پنچ سال آن گُڈ مروک زوت مروک بمب تراک نا ذمہ وار کردستان ورکرز پارٹی ءِ پن کرینے ہرا 2015 و2017 نا نیام ئٹ مروک جلہو نا یات آتے خازہ کرینے۔

واہم کردستان ورکرز پارٹی و کردش پیپلز پروٹیکشن یونٹس استنبول ٹی مروک بمب تراک نا دوبہ آتیان نمن ءُ اندن دائسکان اسہ ہم ٹولیئس دا جلہو نا ذمہ واری ءِ ارفتنے ۔

اِرا تُو مالو پاکستانی فورسز نا دوتیان بیگواہ کروک بندغ ءِ فورسز کارندہ آک پولیس نا حوالہ کریر ۔

شابیت حوال تا ردئٹ مستونگ نا علاقہ کڈھ کوچہ آن اِرا تُو مالو زوراکی ئٹ بیگواہ کروک راؤف شاہوانی مونا ہتِنگا ۔ پِن کروک ورنا ءِ اِراتُو مالو پاکستانی فورسز کارندہ آک مستونگ آن دزگیر کریسہ نا درست ہند آ دریسُر ہرادے تدوکا دے سیکیورٹی فورسز کارندہ آک سٹیتھانہ مستونگ نا حوالہ کریر ۔

یاتی مرے کہ بلوچستان ٹی جتاء وخت آتیٹ اندُنو تدینی مونا بسُنے ہراڑے فورسز کارندہ آک مالو آن بیگواہ بندغ آتے یا گڑا دروغ مقابلہٹی کسفیرہ یا جتاء دوبہ آتا تحت کیس خلیسہ پولیس کارندہ آتا حوالہ کننگیک ۔

حوال تا رد ئٹ بلوچستان ئٹ زوت نوکاپ نا بھس کاری تیان گڈ سبزی و میوہ آتا نرخ آک کم مننگ کتوس۔

  گیشتر حوال تا رد ئٹ بلوچستان ئٹ سبزی و میوہ آتا نرخ آتیٹ ودکی مننگ آن گڈ لس مخلوق نا سختی تیٹ ودکی مسونے، اندن ملکئٹ بھینڈی 180، مٹر 250، گوبی و وانگڑ 70 آن 80 رپئی اسہ کلو اندن 120، پیماز 100 و ٹماٹر 200 رپئی  کلو سودا مننگے۔

اندن مارکیٹ ٹی سونٹ و توم 80 آن 100 رپئی پاو، اندن تیوہ آتیان زیات کم نرخ والا سبزی شلغم 60 رپئی کلو سودا مننگ ءِ۔ مارکیٹٹی انار 120 آن 300، سوف 70 آن 160 رپئی و امرود 80 رپئی کلو اندن کیلا 120 آن 200 رپئی اسہ جوڑی ءِ سودا کننگ ءُ۔

نیشنل کمیشن فار جسٹس اینڈ پیس نا راہشون آک پارینو کہ ملک ئٹ ووٹ تننگ کن سن ارے ولے برام کہ سن ءِ اوننگپک، بلوچستان ٹیچنکا سن ئنا برام نا دود ودینگ ءِ۔ 

او خواست کرینو کہ ملک ئٹ چنکا عمر ئنا برام آ پابندی خلوئی ءِ دا ہیت ءِ ۔نیشنل کمیشن فور جسٹس اینڈ پیس نا راہشونک فر خندہ،عالیہ گل، ردہ فاطمہ جمعہ نا دے کوئٹہ پریس کلب ٹی پریس کانفرنس کریسہ پاریر۔ 

او پاریر کہ ملک ئٹ چنکا سن ئنا برام و زورٹ دین ءِ بدل کننگ نا ویل آتیٹ ودکی مننگ ءِ۔ ہر صوبہ و علاقہ نا تینا دود و بلوچستان ٹیچنکا عمر ئنا برام نا ویل آک کم اندن برام نا خڑچ آتا سوب آن چنکا سن نا برام نا ویل آک زیات ءُ۔ 

او پاریر کہ نیشنل کمیشن فار جسٹس اینڈ پیس نا بھاز اجلاس مسونو ہرافتیٹ دا ویل تا زیا ہیت ہم کننگانے برام نا سن نہ تخنگ ناسوب آن اسہ علاقہ ٹی 16 اندن ایلو علاقہ ٹی 18 سال ئنا مسڑ تا برام کننگیک چنکا سن ئنا برام نا دود پنجاب و سندھ ئٹی زیات مننگءِ ہراڑا مثبت گام ارفینگے۔ 

او پین پارے کہ ملک ئٹی چنکا سن نا برام نا رد ئٹ قانود ساڑی ءِ ولے اوڑا گام ارفینگ ہم المی ءِ او خواست کرینو کہ تیوہ آ ملک ئٹ چنسنی نا برام و زورٹ دین ءِ بدل کننگ نا ویل آتا نوٹس ءِ کلیسہ  ویل آتے توننگ کہ گام ارفینگے۔

بلوچ اسٹوڈنٹس ایکشن کمیٹی نا بنجائی ترجمان بیان ئس شینک کریسہ پارے کہ تنظیم نا کنڈ آن اڈ تروک مستونگ ایجوکیشنل فیسٹولسرسہبی تون ایسر مس ہرا ٹی گام میگزین نا مون پاشی تون اوار بلوچ لٹریسی کیمپین و لُمئی بولی ٹی خواننگ نا سواد آتیا پینلڈسکشن کننگا اندن چنا تا ادب، لُمئی بولی ٹی خواننگ نا نفسیاتی جاچ تون اوار بلوچستان نا تعلیمی ویل آتیا تران کننگا۔

او گیشتر ہیت کریسہ پارے کہ مستونگ بلوچ سیاست و ادب ئٹ اسہ خاص ءُ اہمیت ئس تخک ہرانا پِنی آ سیاسی راہشونک و ادبیچاہندار آک بلوچ چاگڑد ئٹ اہم ءُ ہند ئس ودی کرینو۔ بھلو وخت ئسے آن مستونگ جتاء وے چاگڑدی بندغ تا جاگہ مسنے ہراڑان مستونگنا سیاسی و ادبی ماحول آ رکھ خلنگا۔ تنظیم بھلو وخت ئسے مستونگ ئٹ ادبی دیوان ئس اڈ تننگ نا اُست خواہی تخانے و آخر تنظیمیباسک آتا خواری و ایمانداری ئٹ مستونگ ایجوکیشنل فیسٹول اڈ تننگا۔

او پارے کہ بلوچ اسٹوڈنٹس ایکشن کمیٹی بلوچ خوانندہ تا تعلیم و تربیت ئٹ تینا جہد ءِ برجاء تخیسہ دا وڑ نا ادبی و تعلیمی فیسٹولچرجوئی ئٹ اڈ تریسہ بسنے۔ نوشت میگزین تون اوار تنظیم “گام” میگزین ءِ شینک کننگ نا شعوری فیصلہ الک تاکن بلوچ خوانندہ تیٹبلوچی و براہوئی ٹی نوشتہ کننگ، خواننگ و تخلیق کننگ نا لائخی تے پاش کننگے۔ مستونگ ایجوکیشنل فیسٹول ٹی گام میگزین نا مونپاشی مس ہرا نا مسخت اسکول و کالج تا پڑ آ خوانندہ تیکن نوشتہ کننگ و خواننگ نا معیاری لٹریچر سر کننگ ءِ۔ تنظیم بلوچ خوانندہتا سیاسی و چاگڑدی تربیت ءِ بلوچ نیشنلزم نا بنیات سرپد مریک۔ ہرا کن بروک وخت آتیٹ ہم نوشت و گام میگزین نا شینکاری برجاءمرو۔

او ودیک پارے کہ دیوان نا ارٹمیکو بشخ ئٹ بلوچ لٹریسی کیمپین آ اسہ درستی راستی پینل ڈسکشن ئس تخنگا ہرا ٹی بنجائی ڈپٹیسیکرٹری جنرل و کوئٹہ ہنکین نا وائس پریذیڈنٹ فوزیہ بلوچ لٹریسی کیمپین نا اہمیت، سواد و تنظیمی کاریم تے درشان کرے ہراٹیموڈریٹر نا کاریم تے بساک کوئٹہ ہنکین نا جنرل سیکرٹری عامر بلوچ ایسری تس۔ لُمئی بولی تیٹ خواننگ آ پینل ڈسکشن تخنگا ہرا ناپینلسٹ آک پروفیسر حامد بلوچ و لیکچرر آصف بلوچ اسر۔ ہرافک لُمئی بولی ٹی خواننگ ءِ بنداوی بندغی حق پاریر کہ اسہ بندغ ئسے ناتخلیقی طاغت ئٹ لُمئی بولی نا بھلو کاریم ئسے۔ ہراتم لُمئی بولی نا جاگہ آ ایلو بولی تیٹ خوانفنگا گڑا داڑان خوانندہ تیٹ بدری مارشتودی مریک و تعلیمی کاریم تیٹ او اُست ئنا ہُب مفک۔ اندا سوب آن بلوچستان ئٹ تعلیمی پامداری ٹی کمبوتی خننگک۔

دیوان نا گڈیکو بشخ ئٹ چنا تا ادب و اونا اہمیت آ پروفیسر زیب النساء بلوچ گچین تران کرے اندن لُمئی بولی ٹی خواننگ و اونا نفسیاتیجاچ آ پروفیسر منیر بلوچ تران کرے ہرافک لُمئی بولی ٹی خواننگ و اونا نفسیاتی زیم آتیا ہیت کریسہ پاریر کہ چنانا دماخ موم ئنا وڑمریک اونا شخصیت آ خاہوت و چاگڑد نا اسہ بھلو زیم ئس مریک انتئے کہ او اندافتیان ہر وخت سرپد مریسہ کیک۔ ننے چنا تا نفسیاتیویل آتے خڑکی ئٹ اُروئی تمو و خواننگ ءِ اوفتا نفسیاتی زور جوڑ کننگ نا جاگہ آ جانجوڑ جوڑ کننگے تاکن او بھلن مریسہ چاگڑد نادیمروئی ٹی کڑد سر تننگ کیر۔

بلوچستان ئٹ تعلیمی ویل آتیا گڈیکو تران نرگس سلطانہ بلوچ کرے ہرا بلوچستان ئٹ تعلیمی ادارہ تا خڑک آن جاچ ءِ ہلکنے۔

او پارے کہ تعلیم بیدس ادارہ تیان مننگ کپک ولے افسوز تون پاروئی تمک کہ منہ بھلا شار تیٹ گڑاس تعلیمی آسراتی دوئی اریر ولےایلو جاگہ تیا بنداوی آسراتیک پٹنگ ہم رسینگپسہ۔ ننا اسکولنگ سسٹم تیوہ بےسہب ءِ تعلیمی ایمرجنسی بیرہ سیاسی بیان بازیاسکان ءِ۔ ننے بلوچستان ئٹ تعلیمی نظام آ اسہ پوسکنو پالیسی ئس جوڑ کروئی تمو۔

تینا بیان نا گڈ سر ئٹ او پارے کہ تنظیم بلوچ خوانندہ تا تربیتی کاریم ءِ اندا وڑ برجاء تخو بلوچ الس لٹریسی کیمپین ئٹ بشخ ہلے ودادے سرسہب کننگ ئٹ ننتون اوار مرے تاکن بلوچستان ئٹ بے کاریم اسکول آتون اوار پوسکنا اسکول آتے و تعلیمی ماحول ءِ تالانکننگے۔