باوہ جان، سردار عطاء اللہ مینگل نا یات آک
نوشت: میر جاوید مینگل
دی بلوچستان پوسٹ
باوہ پائک کہ اودے سیاست نا پارہ غا اسہ تدینی اس ایس۔ او پاریکہ کہ 1956 ئٹ سروزیر بلوچستان اسٹیٹس یونین احمد یار کھنڈوہ و ایلو حکومتی بندغ آک علاقہ ئٹ روڈ ئنا بنائی دود اکن بننگ ئسر و اوفتا مہمانداری نا بست و بند وڈھ اٹ ئس۔ بیلہ آن نن وڈھ رادہ مسون انتیکہ او زمانہ ئٹ روڈ دائے ہچس اَلو، اسہ کچہ ءُ کسر اس قبیلہ نا کمک ئٹ سردار عطاء اللہ مینگل و سردار فقیر محمد بزنجو بیلہ آن وڈھ اسکان ٹہیفیسر کہ مخلوق ءِ سفر کننگ آ آسراتی مرے انتیکہ داکان مالو سڑک نا ہچ ءُ ڈس اس اَلو۔ مخلوق اُچ آتیا سفر کریکہ و ساڑی روڈ نا بنماس سردار عطاء اللہ مینگل قبیلہ نا مخلوق تو اوار تخاسس۔ دا کچہ انگا سڑک آ سفر بھاز سخت ئس، سردار عطاء اللہ مینگل تینا گاڑی ءِ حکومتی قافلہ آن مونی کرے کہ او رد تمپس۔ ہراتم تیوہ غاک مینگل ہاوس آ سر مسر و اِرغ کُننگ نا وخت بس گڑا عطاء اللہ مینگل ءِ پاننگا کہ دافتیان اسہ افسر اس، ہرانا تعلقداری پنجاب آن ءِ، او اِرغ کُننگ اف، ہراتم سردار عطاء اللہ مینگل اونا غصہ مننگ نا سوب ءِ سوج کرے گڑا پاننگا کہ نا گاڑی قافلہ آن مونی ہنا ہراڑان مِش و دمز اوفتا گاڑی آ ہنا و اندا سوب او غصہ کرینے۔ داڑا باوہ مخلوق ءِ پارے کہ اودے کس ارغ کن منت کپ۔ او پارے کہ ننا وطن و ننا علاقہ ئٹ بریسہ او ننے خن نشان ایترہ، او ننتون خواجہ و غلام نا سیالی تخنگ خوارہ۔ باوہ پائک کہ دا ہمو تدینی ئس ہرا کنے قوم پرستی نا سیاست نا پارہ غا ایس۔
اسہ وار ہراتم باوہ آن سوج کریٹ کہ مخلوق انتکن مفاد پرستی نا گواچی مریک و قوم پرستی ءِ یلہ کریسہ جوفہ و سرکاری اوغدہ تا گواچی مریرہ؟ گڑا باوہ پارے کہ ہراتم کس وطن پرستی نا سیاست اٹ گام تخک گڑا زند اسہ فلم ئسے نا ڈول خن تا مون آ روان مریک، نی خنیسہ کہ اگہ ای وطن پرستی، راج دوستی نا سیاست کروٹ گڑا دا کسر ئٹ بھاز سختیک مرور، جیل و شہادت آک، ندر مننگ گام گام آ بخیر کرو ہرا بندغ آک ذہنی، فکری و گمان ئٹ سوگوْ مفسہ گڑا او کسر نا اڑاند، سختی، بے دادی تیتون بشخندہ تون مون ایترہ و او سوگوْ آ گام تون سلیرہ و منہ بندغ زند ئنا دا فلم ئٹ دا اُریرہ کہ اگہ او وطن و راج نا جاگہ غا ایلو چِر ئٹ کار گڑا اوفتے بھلو اوغدہ، مراعات و ذاتی اُست خواہیک دوئی مریر و ذاتی زند ءِ اوفک زیبا خنرہ دوارہ او وطن و راج کن جدوجہد کننگ نا جاگہ غا مفاد نا وڈائی نا گواچی مریرہ۔
باوہ جان پارے کہ نیپ نا زمانہ ئٹ نن اسبملی ئٹ سرداری بست و بند ءِ ایسر کننگ نا بل ءِ دا خاطر ایسون انتیکہ سرکار اندا بست و بند ءِ ارفیسہ تینا اُست خواہ سردار آتا کمک ئٹ مخلوق ءِ جوفہ تریسہ تینا مفاد آتیکن کاریم اٹ ہتنگ ئس۔ باوہ پارے کہ ہراتم مخلوق تینا سردار نا پاننگ آ تحریک ئٹ اوار مریک گڑا او سرپد مریرہ کہ او دا جدوجہد ءِ تینا سردار کن کننگ ءُ، ہرانا اسہ ہد اس مریک اوفک تینا فرض سرپد مریسہ اسہ ہد ئسے اسکان تحریک ئٹ تینا کڑد ءِ ایسری ایترہ و او سرپد مریرہ کہ اخس ننا طاغت اس نن تینا فرض ءِ پورو کرین، ہرافک شعوری ردئٹ تحریک آتیٹ گام تخرہ او تینا جہد ءِ کس ئسے آ احسان اس سرپد مفسہ بلکن تینا فرض سرپد مریسہ سرزمین کن ایسری دم اسکان جہد کیرہ۔
سن 1928 ئٹ انگریز پولیٹیکل ایجنٹ تون شرہ آن گڈ انگریز آک خان آف قلات نا کمک ئٹ ننا پیرہ ءِ زوراکی ئٹ علاقہ بدر کریسہ کرم خان مینگل ءِ سردار کننگاسس، ننا پیرہ وڈھ آن بریسہ لسبیلہ ئٹ ہندی مسوسس، 1930 ئٹ باوہ لسبیلہ ئٹ ودی مسوسس۔ بنماسی خواننگ او بیلہ آن دوئی کرے دوارہ مُستی خواننگ کن سندھ مدرسہ کراچی آ ہنا۔ ہراتم 1952 ئٹ باوہ جان اسہ دے پیرہ غان سوج کرے کہ نی انتکن وڈھ آ ہنپیسہ و قبیلہ ءِ سنبھالپیسہ، نا بے ساڑی گری ئٹ ننا تیوہ غا جائیداد آک و کشت کشاری ڈغار تیا کرم خان کوزہ کرینے، پیرہ باوہ ءِ پارے کہ خان و سرکار نا پارہ غا کنا اوڑے ہننگ آ رکھ خلوک ءِ، دا نیامٹ باوہ پارے کہ نے آ رکھ خلوک ءِ کنے آ تو اف، ای وڈھ آ کاوہ۔ پیرہ اودے پارے کہ امر اوڑے ہنوس، نہ علاقہ غان و نہ مخلوق تون واخب اُس، پیرہ غان باوہ سوج کرے کہ نا اخہ مار ءُ، پیرہ پارے انتئے دُن سوج کننگ اُس، باوہ نا زیات سوج کننگ آ پیرہ پارے کہ نے سما ءِ کہ نی، مہر اللہ و ضیاء اللہ دا کنا مار اُرے، باوہ اودے پارے کہ ای ہننگ اُٹ اگہ واپس بسوٹ تو جُوان نئے تو سرپد مریس کہ نا مُسہ نہ بیرہ اِرا مار ئسر۔
اندن باوہ 1952 ئٹ کراچی آن سارونا نا کسر آن وڈھ کن رادہ مس و سمان نا ہند آ کیمپ ٹہیفے۔ دا نیامٹ مینگل قبیلہ نا پیہن ریشیک حوال کریسہ کریر، ہراتم کرم خان ءِ سما تما گڑا او خان قلات کن کلہو رادہ کرے و اودے باوہ نا بابت پارے کہ او علاقہ ئٹ بسونے اگہ اودے داکان کشنگتئو گڑا مننگ کیک بھاز دتر وہے۔ خان باوہ ءِ علاقہ ءِ یلہ کننگ نا کلہو رادہ کرے و دوارہ باوہ اوکان مشکے سردار بلوچ خان محمد حسنی نا رہی آ ہنا۔ ہرا اونا ماما ئس، سردار بلوچ خان ہنا خان ءِ سرپد کرے کہ مینگل قبیلہ نا بندغ آک ہچبر کرم خان ءِ سردار منپرور و او خان ءِ صلہ تس کہ گچین کاری کرفے، قبیلہ نا پیہن ریشیک ہرکس سردار گچین کیر، اودے سردار مننگ مرے دوارہ خان گچین کاری کرفنگ کن امنا کرے و ہراتم گچین کاریک مسر باوہ ءِ 106 و کرم خان ءِ بیرہ 16 ووٹ رسینگا دُن باوہ مینگل قبیلہ نا سردار گچین مس۔
جنرل ایوب خان نا مارشل لاء نا باوہ نمن مس گڑا او اسیکہ وا کرم خان ءِ سردار کننگ خوائسرہ، قبیلہ نا بندغاک دا فیصلہ نا برخلاف سوختہ ئسر، اوفک کرم خان ءِ کسفیر و دا دوبہ ئٹ پیرہ تون اوار ننا تیوہ غا خاہوت ءِ قبیلہ نا چار سد بندغ تون دزگیر کننگا۔
ایوب خان نا زمانہ ئٹ باوہ و میر غوث بخش بزنجو کراچی سینٹرل جیل ئٹ کیز ئسر و اینو ہم کنے یات ءِ ہراتم اولیکو وار ننے باوہ جان تون اوڑئی کن سینٹرل جیل دننگا۔
میر غوث بخش زنجو، گل خان نصیر تون اوار ایلو سیاسی راہشونک ہراتم کراچی آ بسورہ گڑا ننا اُرا ٹی مسرہ، اُرا سیاسی کاریم تا بنجاہ ئس، پیرہ ساندہ باوہ ءِ ٹوک تروک ڈول پاریکہ نا لاڈلاک بسونو، نا دا سنگت آک دیچہ انت سیاست کیرہ و سما اف نے ہرانگ درور۔ پیرہ نا اندا ہیت آتا سوب آن باوہ اُرا ءِ جتا کرے کہ دُن مف باوہ کنا سنگت آتیا غصئی نا درشانی کے، دوارہ نن ناظم آباد ارٹمیکو اُرا غا ہنپ کرین، ہراڑے اُرا نا اسہ بشخ میرغوث بخش بزنجو و گل خان نصیر تون اوار ایلو سیاسی سروک آتیکن ئس و نواب اکبر خان بگٹی باوہ تون اوڑدئی کن ہروخت بسکہ۔
اسبملی ئٹ ایوب کان نا مارشل لاء نا برخلاف 1962 ئٹ باوہ تران کریسس، ہرانا سوب آن ایوب خان بھاز سوختہ ئس، اوکان گڈ اسہ مجلس اسیٹ ہراڑے تیوہ غا اسمبلی باسک آک بٹنگاسر، مجلس ئٹ باوہ جان، نواب مری و سردار بلخ شیر مزاری ہم ساڑی ئسر، ہراتم مجلس ئٹ ایوب خان بس گڑا تیوہ غا باسک آک سلیسہ اودے بخیر کریر ولے دا وخت باوہ تینا ہند آ تولوک مس۔ دا نیامٹ ایوب خان اونا پارہ غا اُرا و نواب مری سوج کرے کہ مینگل نا اُست اٹ گڑاس ارے یا ننے اوننگس؟ گڑا داڑا باوہ، نواب مری ءِ پارے کہ ای کس ءِ اوننگ افٹ، بیرہ ای اونا بخیر اکن سلپروٹ۔ گڑا نواب پارے کہ اگہ نی بش مفیسہ گڑا ای ہم تینا کرسی آن جک مفروٹ، دوارہ ایوبی مارشل لاء نا برخلاف کنکری گراونڈ کراچی ئٹ تران کننگ نا سوب آن باوہ ءِ دزگیر کننگاسس۔
ہراتم ایوب خان نا زمانہ ئٹ میر غوث بخش بزنجو ءِ دزگیر کننگا و اوڑا دا دوبہ ئس کہ اونا جیب آن اسہ نوٹ اس خننگانے ہراڑا نوشتہ ئس “ون یونٹ ءِ پرغبو”، دا ڈو ئٹ اودے کوڑا و ڈنڈ نا سزا بنفنگاسس۔ اگہ دا ڈنڈ ءِ پورو کننگ مفروس اودے کوڑہ خلنگاکہ، باوہ پائک کہ او زمانہ ئٹ 10 ہزار ڈنڈ تریسہ میر صاحب نا یلہ کریفنگ مننگ کرے و دا زر آتے باوہ کچھی نا تینا کشت و کشاری ڈغار تیان دوئی مروک زر آتیان پورو کریسس۔
ہراتم ون یونٹ ایسر مننگ ئس او زمانہ ئٹ خان آف قلات تیوہ غا سردار آتا اسہ جرگہ اس خوائفے، ہراتم باوہ ءِ جرگہ ئٹ اوار مننگ نا دعوت تننگا، او ہننگ آن نمن مریسہ پارے کہ ای خان نا جرگہ ٹی بفروٹ انتیکہ ایوب خان داسہ تینا مراعات و مفاد آتیکن ننے کاریم اٹ ہتنگ خوائک ولے سردار بلوچ خان محمد حسنی، سردار فقیر محمد بزنجو و ایلو سردار آتا بھاز پاننگ آ باوہ جرگہ ٹی ہننگ آ امنا کرے۔ او سردار تا مونا اسہ شرط اس تخا کہ جرگہ نا پڑو آ دستخط کپروٹ، تیوہ غا سردارک باوہ ءِ یخین تسر کہ دا شرط نا بابت نن خان ءِ حوال تسونن، دستخط نا بابت کس نیتون ہیت کپرو ولے نی جرگہ ٹی اوار مہ۔
جرگہ نا اولیکو دے خان قلات اوار متئوسس۔ اونا ترجمان محمود عزیز کرد جرگہ نا مسخت و سوب آتا بابت اوار مروک آتے پاننگ کن تران کرے۔ او تینا تران ئٹ دا ہیت ءِ کرے کہ مینگل قبیلہ دائسکان خان ءِ مننگ کن تیار اف، او خان آن بد دیرہ۔ باوہ پائے چھپ تولوک مسوٹ و ارٹمیکو دے اوار مننگ آن بشخنداری خوائسوٹ ولے اسیکہ وا سردار آک کنے اوار مننگ آ بیوس کریر و اسیکہ وا کنے یخین تریفیر کہ اینو خان قلات نا مراعات آتا بحالی نا ہیت جرگہ ٹی مفرو، باوہ پائک کہ ای سردار آتا یخین ترفنگ آ جرگہ ٹی اوار مسوٹ، ارٹمیکو دے ہراتم خان جرگہ ٹی بس گڑا دا نیامٹ خان و باوہ نا نیامٹ ہیت مس، باوہ ءِ خان پاریسس کہ بابو نی انتکن سوختہ اُس؟ انت سوب ءِ کنے پا، گڑا باوہ اودے پارے کہ ای سوختہ افٹ، خان پارے کہ نی عزیز کرد نا ہیت آتے اُست آ کرینس، اونا ہیت آتیا پام تفہ۔ گڑا باوہ خان ءِ پارے کہ باہ اونا ئس ولے ہیت آک نا ئسر۔ دا وختا خان اسیکہ وا باوہ ءِ پارے کہ نی پا انتکن سوختہ اُس؟ اگہ نے گلہ اس ارے کنے پا، باوہ اودے پاریسس کہ ہلے ای چُھپ مریو گڑا دا کنکن و نیکن زَبر مرو۔ خان نا وار دم سوج کننگ آ باوہ اودے پارے کہ بلوچستان نا تاریخ نے ہچبر بشخپرو امر کہ نی بلوچ آتا مرضی آن چپ الحاق نا کاغذ تیا دستخط کریسہ پاکستان ئٹ اوار کریس و نی ون یونٹ نا وختا ہم قول کریسس کہ ای دانا حق اٹ دستخط کپروٹ ولے نی کریس و داسہ اسیکہ وا تینا ذاتی مراعات آتیکن سردار تیان دا کاغذ تیا دستخط ہلنگ اُس، ہراڑا خان صاحب نا دروشم نا رنگ بدل مس و پارے کہ کپبو دستخط، ہشبو دا کاغذ ءِ، بس داکان گڈ نن مشکے کن سر ہلکن۔
ہراتم باوہ و ذوالفقار بھٹو نا نیامٹ شرہ مس گڑا اوفک بلوچستان حکومت ءِ ایسر کننگ کن جتا چم تے کریر، بیلہ ئٹ جام غلام قادر نا کمک ئٹ ٹیلی فون نا تار تے کاٹ کرفنگا، دوارہ مخلوق ءِ حکومت نا برخلاف بغاوت آ بچ تننگا کہ امن ایمنی نا ویل ودی کریسہ نیپ نا حکومت ءِ ایسر کننگ مرے، بلوچستان حکومت ملیشیا فورس ءِ بیلہ ئٹ کاروائی کن خوائفے ولے ملیشیا فورس بنجائی حکومت نا شیف کاریم کریکہ و بلوچستان حکومت ءِ کمک آن نمن مس۔ دوارہ بلوچستان حکومت ہندیء فورس و قبائل تا بندغ آتے بیلہ غا رادہ کرے دا تدینی ءِ نیمون کریسہ بھٹو بلوچستان ئٹ فوج کشی بناء کرے و اسلام آباد عراقی سفارت خانہ آن سلاء دوئی کننگ نا ڈرامہ ءِ کریسہ گچین مروک حکومت ءِ ایسر کریسہ گورنر راج خلک۔ باوہ تون اوار ایلو سیاسی راہشون تے ہرافتیٹ نواب خیربخش مری، گل خان نصیر، میر غوث بخش بزنجو اوار ئسر، اوفتے دزگیر کریسہ پنجاب نا جتا جیل تیٹ دننگا، حکومت نا ایسری و راہشون تا دزگیری نا سوب مخلوق مش تیا ہنا و دُن بغاوت نا بناء مس، بھٹو سیاسی و سلاء بند مزاحمت ءِ ایسر کننگ کن پبی فوج نا طاغت ءِ کاریم اٹ ایس۔ مہر اللہ مینگل، ضیاء اللہ مینگل و اسلم جان گچکی تون اوار بھاز آ بندغ آک افغانستان آ ہنار۔
سن 1975 ئٹ باوہ ءِ ہراتم جانجوڑی اوننگ کن جناح ہارٹ سینٹر ہتنگاکہ دا وختا اسد مینگل ہم باوہ تون اوڑدئی کرے و اودے پارے کہ منہ بندغ گاڑی تیٹ کنا رند ءِ ہلیرہ، باوہ اودے پارے کہ نی خیالداری کہ۔
فروری 1976 ئٹ اسد اللہ مینگل ءِ سردار بلخ شیر مزاری نا اُرا نا مون آن سنگت احمد شاہ تون اوار برمتہ کننگا، اسد سُہب تون اُراغان پیشن مس او ہروخت احمد شاہ نا رہی آ ہناکہ، اسہ نن اس او سردار بلخ شیر مزاری نا اُراغا ہنا ہراڑے او کس ئسے نا فون ئنا کسر اُروک ئس۔ اندا نیامٹ بجلی ئنا، اسد و احمد شاہ پیشن بریسہ گاڑی ئٹ توسُر، اِرا گاڑی اٹ سوار فوج نا اسپیشل کمانڈوز آک گلی ٹی پیہار، اوفتے خنیسہ اوفک تینا گاڑی ءِ اوکان کشنگ نا کوشست کریر، دا نیامٹ سلاء بند بندغاک اوفتیا سُم کاری کریر، کار توننگ متئو و دیوال تون لگا، دا نیامٹ سلاء بند بندغاک گاڑی آن دڑنگسہ اسد و احمد شاہ ءِ تینا گاڑی ٹی شاغسہ دریر، خن خنوک شاہد آتا ردئٹ اسٹ ئسے نا کاٹم اٹ سُم لگاسس و گمان دا اس کہ احمد شاہ ءِ کاٹم ٹی سُم لگاسس و اسد ٹپی مسوسس۔
تدینی نا نن اِرا وار منہ سرکاری بندغ سوج کننگ کن اُراغا بسوسر کہ اسد ہرانگ ءِ؟ دا وختا، اختر مینگل، چنگیز کرد و حافظ لال بخش بروہی ہرا ودی مروک کور ئس، او اُراٹی ئسر، نن اوفتے پارین کہ اوفک داڑے اُراٹی افس، او وخت اسکان ننے سما الو کہ دا تدینی مسونے، ارٹمیکو وار اسہ جیپ اسیٹ منہ بندغ بسر اوفک پاننگ ئسر کہ نن اسد ءِ پٹنگ اُن، اوفک کس ئسے آ فائرنگ کرینو و ننے اسہ عکس اس نشان تسرہرا اسد نا سنگت شوکت نا ئس۔ اسد تینا کار ءِ اوفتا اُرا ٹی سلیفسہ اونا کار ءِ ئٹ ہناسس۔ ہراتم نن اوفتے پارین کہ نن دا بندغ ءِ تپنہ اوفک ہنار، ارٹمیکو دے ننے سما تما کہ اسد و احمد شاہ ءِ فوج درینے۔ دا سما الو کہ اوفتے برمتہ کریسہ ہرانگ دریر و ارٹمیکو دے اسیکہ وا پین بندغ بسر اوفک اسد نا عینک و اسہ پستول اس ایسر کہ دا اوفتا کار آن خننگانو، اسد نا برمتہ مننگ آن گڈ کنے و اختر مینگل ءِ خاہوت ءِ سنبھالو ئس، حافظ لال بخش بروہی ہم ننتون اور ئسر، دوارہ دا کور ءِ ہم بھٹو بشختئو اودے ہم دزگیر کریسہ بیلہ ئٹ کیز کننگا۔
آئی ایس آئی نا مسکوہی سروک جنرل حمید گل اے آر وائی نا اسہ پروگرام اسیٹ مناسس کہ اسد ءِ ٹپی حالیت اٹ مظفر آباد کشمیر دلائی کیمپ ہتنگاسس و بیدادی ئٹ او کسک۔
دا نیامٹ ہراتم نن اسکول آ ہنانہ و اسکول آن واپس اُراغا بسونہ گڑا ڈھکوک ادارہ غاتا بندغ آک ننا رندے ہلکرہ و ساندہ اُرانا پیشن تینا گاڑی ءِ سلیفیرہ و ہرکس اُراغا بسکہ اوفتیا سر و سوج کریرہ، اوفتے جتا وڑئٹ تنک کریرہ۔
سن 1976 ئٹ حیدر آباد سازش کیس ئنا بناء کننگا و تیوہ غا دزگیر مروکا راہشون آک حیدر آباد جیل کن دننگار، نن ہر وخت پیشی تیا اوڑدئی کن ہنانا اسہ وار اس نن اوڑدئی کریسہ واپس کراچی کن ہننگ ئسون و کسر ئٹ دیر کُننگ کن گاڑی ءِ سلیفین گڑا دانا نیام ئٹ کیس بنیسہ جج واپس پولیس اسکواڈ تون اوار بننگ ئس۔ اوفک ننے خنیسہ تینا گاڑی تے سلیفیر و واپس ہنار، ایلو دے اخبار ئٹ دا حوال سرحال تیٹ شینک مس کہ منیر مینگل، جاوید مینگل و اوفتا سنگت آک جج آتے برمتہ کننگ خواہسرہ۔ ولدا ننے کراچی ءِ ہلنگ نا پرمان شینک کننگار، ہرانا ردعمل ئٹ باوہ او وخت ئنا چیف منسٹر سندھ غلام مصطفیٰ جتوئی ءِ اسہ چھٹی اسیٹ اوفتیکن سخت ءُ لوز نوشتہ کریسس۔
ہرا دے کیس ءِ بننگ مروس گڑا او دے نن اوڑدئی کن ہنانا جیل نا کوالخواک اوڑدئی کروک آتیکن کورٹ نا نیام ئٹ مسہ فٹ ئنا سلاخ خلکوسر، ولدا اوڑدئی کروک و جیل ئٹ بند بندغ آتا نیام ئٹ چِک و تاڑ کن سلاخ آتا جاگہ غا نیام ئٹ آئن نا دیوال سلیفیر کہ پیشی نا نیام ئٹ اسِٹ ایلو تون ملنگ کپس، ہموتم راہشون و باسک آتے بننگ کن ہتینگا اوفک آئن نا دیوال آتے خنیسہ سخت ترند مننگ نا درشانی ءِ کریر و پرغنگ ءُ چِک و تاڑ کریر و دیوال تے دَڑیفنگ نا کوشست ءِ کریر دا حالیت ءِ خنیسہ جج سماعت ءِ ہلیسہ ہنا۔ باسک آتا سخت آ برانز آن گُڈ جیل نا کوالخواک آئن نا دیوال ءِ مُر کریسہ واپس جالی اس خلکر۔
اسہ ورنا سندھی سپریٹنڈنٹ اس تخنگاسس، ہرا پیشی نا وخت آ بغیر یونیفارم آن کورٹ ئٹ بسوسس، ہراڑا جج اودے غُر تس، سپریٹینڈنٹ جج ءِ پارے کہ ای ڈیوٹی آ پوسکن اُٹ مونی خیال کیوہ، ہراتم او کورٹ آن پیشن مس گڑا ولی خان سپریٹینڈنٹ آن ہریفیسس کہ نی انتئے عدالت ئٹ دُن بسونُس، دا وخت آ نواب خیر بخش مری انگریزی ئٹ پارے کہ دا بندغ پاننگے کہ ای پوسکن اُٹ و ہیل کننگ اُٹ، ولدا او نواب ءِ پارے کہ پوسکن اُٹ ولے نے سبخ ایتنگ کیوہ، ہراڑا نواب اودے اسہ شامات اس خلک، ولدا دانا نیام ئٹ اوڑے ساڑی بلوچ و پشتون سیاسی قیدیک سپریٹینڈنٹ ءِ لغت مُشت کریسہ اودے بھاز ٹپی کریر۔
بھٹو ساندہ تینا حوال رسیفوک ءِ حیدر آباد جیل آ مون تسوکا کہ نیپ نا راہشون آتے گپ و تران کن منیفے، باوہ پارے کہ نن کُل صلہ کریسن کہ مونی بھٹو نا حوال رسیفوک آتون کس مِلپک، دافک ننتون مسخرہ کننگ ءُ۔ باوہ پاریکہ کہ میر بزنجو صاحب اول سرتیٹی فعال ءُ کڑد اس ایسری تس و قلات اسٹیٹ نیشنل پارٹی نا وخت ئٹ اونا اہم کڑد اس ئس ولے اونا مار بیزن و حاصل ورنا مسر گڑا اوفک میر صاحب ءِ وفاق پرستی نا سیاست نا کُنڈا دریر۔
ہموتم ضیاء طاغت ئٹ کوزہ کرے و او حیدر آباد سازش کیس ءِ ایسر کریسہ نیپ نا تیوہ غا راہشون آتے یلہ کننگ نا پرمان تس۔ یلہ کننگ آن گڈ باوہ دوا درمان کن لندن آ ہننگ نا فیصلہ ءِ کرے گڑا میر غوث بخش ءِ سما تما کہ سردار عطا اللہ مینگل لندن کن ہننگ ءِ، او باوہ ءِ پارے کہ نی ہننگ ئٹ اُس ای داڑے انت کروٹ؟ باوہ اودے پارے کہ نی بننگ افیس گڑا داڑے ہڈ کریسہ سیاست کر، میر صاحب نا ہیت دا اس کہ نی ہننگ اس گڑا ای امر پارٹی اس جوڑ کروٹ ہموتم اسکان ای نے ہننگ کن ہلپرہ نی کنے پارٹی جوڑ کننگ ئٹ کمک کپیس۔ ہموتم میر بزنجو این ڈی پی ءِ جوڑ کرے گڑا پریس کانفرنس ئٹ باوہ ساڑی اس، ولدا باوہ برطانیہ کن ہنا، منہ توہ آن گڈ نواب مری ہم ہموڑے ہنا، جنوری 1981 ئٹ نن و نواب مری نا خاہوت ہم برطانیہ کن ہنان، ولدا نواب مری تینا خاہوت تون اوار افغانستان کن ہنا۔
وطن آن مُرّی نا نیام 1980 نا دہ یک ٹی او لندن ئٹ قادر بخش نظامانی، اکبر بارکزئی و او جاگہ نا ہندی بلوچ آتون اوار ورلڈ بلوچ آرگنائزیشن ءِ جوڑار و او ماہنامہ آزات بلوچستان نا بناء ءِ کرے۔ قادر بخش نظامانی و اکبر بارکزئی اخبار شینک کریسہ خلیج و یورپ کن مون تسرا و ای ڈاک آن بلوچستان کن شمارہ مون تسوٹہ، منہ وخت آن پد باوہ عید محمد کرد ءِ WBO نا ذمہ واری تے تس۔
باوہ چنکا راج آتا اوار مننگ کن ساندہ کوشست ئٹ اس او سرپد مسوکا کہ نن کُل اوار مریسہ پنجاب نا دو بڑزی آن جان چٹیفنگ کینا، باوہ نا ساندہ اندا کوشست مسونے دا لڑ ئٹ او ممتاز بھٹو تون اوار مریسہ سندھی، بلوچ، پشتون فرنٹ نا بنماس ءِ تخا، بلوچ سندھی فورم جوڑ کننگ آ واپس بلوچستان آ بریسہ مظلوم راج آتا تحریک اس ہم جوڑاسس، اونا خیال اس کہ ہراتم اسکان مظلوم طاغت آک اوار مفسہ، ہموتم اسکان حق آتے دوئی کننگ کپرون، باوہ اسہ اوڑدئی ٹی بینظیر ءِ ہم پاریسس کہ او پنجاب نا سیاست ءِ ہلے بیرہ سندھ ئنا سیاست ءِ کے، اوار مریسہ مظلوم راج آتا حق آتیکن جدوجہد کین گڑا ننے سرسہبی دوئی مریک۔ پشتون آتا بارو ئٹ پاریکہ کہ اوغنگ ئٹ پشتون آک ننتون اوار ءُ و فوج، ایف سی و بیوروکریسی نا بشخ ئس جوڑ مریسہ استحصال ئٹ ہم بشخ ارے ننے۔
ہراتم وطن آن مُر مننگ آن گڈ باوہ واپس بلوچستان آ بس، او وخت نواب مری ہم وطن نا مری ءِ ایسر کریسہ واپس بسوسس گڑا سیاسی باسک و ایلو بندغ آتا پاننگ اس کہ سردار عطاء اللہ مینگل و نواب خیر بخش مری اوار مریسہ اسہ پارٹی اس جوڑ کیر، سیاسی باسک آک دا کوشست ئٹ ئسر کہ ہڑتوما راہشون آک اوار مریسہ جدوجہد کیر، دا وخت سریاب ئٹ اسہ پروگرام اس ہڈ تننگا کہ اوٹی باوہ و نواب مری ہڑتوم آک اوار مسر اوڑے ہم بندغ آک ہڑتوما راہشون آتیان خواست کریر کہ او اوار مریسہ اسہ پارٹی اس جوڑ کیر، بندغ آتا دا ترند آ اُست خواہی نا ردئٹ باوہ ہم دا خواہسوکا کہ نواب مری تون اوار مریسہ پارٹی اس جوڑ مرے ولے نواب صاحب منیتو، نواب صاحب نا دا پاننگ اس کہ پارٹی سیاست آن نن تنیا مسخت ءِ دوئی کننگ کپرون۔
داڑان گڈ حاصل بزنجو و ثناء اللہ زہری باوہ تون حوال کننگ ءِ بناء کریر و او خواہسرہ کہ بی این ایم و پی این پی ءِ اوار کریسہ اسہ پارٹی اس جوڑ کینہ، باوہ وڈھ ئٹ ئسوکا گڑا دا بندغ آک ہموڑے بسر۔ اسلم جان گچکی، اختر مینگل و ای باوہ ءِ پارین کہ دا بیرہ گچین کاری و سیٹ آتیکن سیوت و پارٹی اس جوڑ کننگ نا ہیت ءِ کننگ ءُ۔ اوفتون اوار مننگ ننا سیاست کن نسخان اس مریک ولے باوہ نا پاننگ اس کہ اگہ بلوچستان کن نن اوار مرین داٹی ہچو خرابی اس اف، اگہ پگہ دا بندغ آک واپس پارٹی ءِ ہلیسہ کار گڑا بیرہ تینا خف تے تینتون درور، ولدا 1996 ئٹ ہڑتوم آ جماعت آتا اوار مننگ نا وڑ ئٹ بی این پی ہڈ تننگا و ووٹ آتیٹ تیوہ غاتیان بھلا جماعت جوڑ مریسہ مونا بس و بلوچستان ئٹ حکومت اس جوڑ کرے، بزنجو ایلم آتا نیت اولیک سر آن صاف الو ولے بلوچستان ئٹ ایٹمی تراک آتا وخت آ دا مخالفت آک پاش مسر۔
ہموتم کہ ایٹمی تراک مس گڑا ای، اسلم جان گچکی و منہ پین سنگت کراچی ئٹ ساڑی ئسون، باوہ نا پاننگ ئس کہ داسہ نن بنجاہ تون اوار پین ہِننگ کپنہ، اختر مینگل حکومت آن استعفیٰ ایتے ولے اسہ سنگت ئس باوہ ءِ صلہ تس کہ اگہ پارٹی ءِ یخین ئٹ ہرفنگ آن بیدس دا فیصلہ ءِ نی ہلیسہ گڑا پارٹی پِنک جوانی انداٹی ءِ کہ سینٹرل کمیٹی نا مجلس ئٹ فیصلہ کننگے، مجلس ئٹ ای و باوہ ایٹمی تراک آتا برخلاف ہنیسہ پارین کہ نن پین نواز شریف نا حکومت تون اوار ہننگ کپنہ، ننے حکومت حکومت ءِ ہلوئی ءِ و دا نیام ئٹ او اسہ کسہ ئس بیان کرے کہ اسہ بندغ اس تینا سائیکل آ ہننگ اس گڑا کسر ئٹ اودے اسہ دُز اس سلیفے و پارے کہ جیب آن سامان تے کش، ولدا اونا دو آن گھڑی ءِ کشا ولدا پارے کہ پُچ آتے و بنین ءِ ہم کشک، داسہ سلوک بیرہ اسہ شلوار ئس اس، اودے ہم دُز پارے کہ کشک کاٹم نا بڑز آن، باوہ پارے کہ داسہ دا پنجابی ہم ننے آن اندا وڑ ئنا خواست کننگ ءِ اسہ گڑاس کہ منکن اف اودے ننے آن کریفنگ خوارہ ہرادے کہ نن کننگ کپنہ۔
دا وخت آ بیزن بزنجو بش مریسہ پارے سردار صاحب حکومت ءِ ہلپنہ اگہ شلوار ءِ کاٹم آن کشوئی ءِ گڑا اودے ہم نن کشینہ۔ دا ہیت ءِ بنیسہ باوہ بارے کہ داسہ ہیت کننگ نا اسہ کنجائش اس ہم اف ہلے داسہ ای انت پاروٹ نُمے، دا وڑ واپس اختلاف آک ترندی اختیار کریر و 1998 ئٹ پارٹی نا اولیکو قومی کونسل سیشن نا وخت آ بی این پی اِرا ونڈ ئٹ بشخنگا۔
خان نوری نصیر خان نا ہنپ و بِٹ نا ہند (خان ئنا خت) نا جاگہ و علاقہ تون باوہ نا گچین اُست خواہی اس، او خان نوری نصیر خان نا دلیری و کڑدار آن بھاز زیمی اس، ہراتم او وطن نا مُری آن گُڈ 1991 ئٹ واپس بسوسس، اسہ دے اس او پارے کہ کانبو لوئی آ کانا۔ لوئی ہمو علاقہ نا پن ءِ، ہراڑے (خان ئنا خت) جاگئی ءِ، نن اوڑے ہنان، او دا ہند آ اُرا جوڑ کننگ نا ارادہ ءِ تخاسس۔ او اوڑے اُرا کن زمین نا نشاندہی کرے و کنے پارے کہ اُرانا نقشہ جوڑیف، ای کراچی آ ہنیسہ نقشہ اس جوڑ کریفیٹ ولدا او اوڑے اُرانا جوڑ کننگ نا کاریم ءِ ہم بناء کریفیسس۔
نیام ئٹ اُرانا تفنگ ءِ کپ چنڈ ہِلا، منہ سال پَد ای باوہ ءِ پاریٹ کہ نی اُرا ءِ انتئے جوڑ کننگ افیس و کاریم ءِ نیام ئٹ ہلاس؟ اگہ نی کنے موکل ایتسہ گڑا ای او اُرا ءِ جوڑ کننگ خواوہ، گڑا او کنا کمک کن سلیس۔ نن اوڑے ہنان۔ واپس بننگ آ او کنے پارے دا اُرا نا بخت ئٹ مرے ولے ای داڑے شش فٹ زمین خواوا، دا ہیت ءِ بنیسہ ای اودے پاریٹ باوہ نی انتئے دُنو ہیت کنگس۔ او پارے کہوئی کُل ءِ ارے، ای اودے پاریٹ کہ نی دُنو ہیت کپہ اللہ نے زند اس ایتے۔ نن ہچ گمان کتوسن کہ نن باوہ آن بیدس ہم دا جہان ئٹ تنیا زندہ مرون۔ او کس ئسے کہنگ نا بنوس گڑا پاریکہ کہ کُل ننے بنیفنگ ءُ، اسہ دے اس نن ہم مخلوق ءِ بنیفینہ۔
باوہ تون بھاز وخت فون آ ہیت مسوکہ، اسہ وار اس ای اوڑتون ہیت کریٹ گڑا باوہ کنے پارے کہ نم ءُ چناک یات بریرے، نی اندنو کسر اس ارفینس کہ داڑے بننگ کپیسہ، ای اودے پاریٹ کہ باوہ نن دُنو ہچو کاریم اس کپنہ و دننگا کسر آ ہمپنہ کہ بندغ آک ننا سوب آن نے شغان خلیر، او کنے پارے کنے سما ءِ کہ نی بد ءُ کسر اس ارفتنس کہ کس ئس کنے شغان خلے۔
اودے جانجوڑی اوننگ کن بروئی اس ولے او بننگ کتو ہموتم ای پاریٹ کہ باوہ بہ ڈاکٹر تیا او کنے پارے کہ داسہ کنے ٹی دوا درمان نا ہچو شوق اس سلتنے نیتون و چنا تیتون اوڑدئی کن بریوا، ولے کورونا نا نیام ئٹ او بننگ کن تیار اس جاز آک بند مننگ نا سوب آن او بننگ کتو بلکن ننے یلہ کریسہ ہنا۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
