اینو اسلام آباد ہائی کورٹ ئٹ بیگواہ آ بندغ آتا آجوئی نا کیس ءِ بننگ نا وختا وزیراعظم پاکستان شہباز شریف عدالت آ بس، اونا بننگنا سوب آن سیکیورٹی نا سخت بست و بند کننگا۔
کیس ءِ بننگ آن مُست عدالتی عملہ پارے کہ چیف جسٹس نا عدالت ئٹ اینو بیرہ بیگواہ آ بندغ آتا کیس ءِ بننگ مرو و ایلو کیس آتا کازلسٹ ءِ پد بٹنگا۔
کیس ئنا بننگ کن بیگواہ آ بندغ آتا خاہوت آک عدالت آ بسر، بیگواہ صحافی مدثر نارو نا چُنک سن مار ہم عدالت نا کوٹی ٹی ساڑی ئسہراڑے شہباز شریف اوفتون اوڑدئی کرے۔ اندن آمنہ مسعود جنجوعہ ہم عدالت آ بسوسس۔
کیس ءِ بننگ بناء مس تو وزیر اعظم شہباز شریف، اٹارنی جنرل و وزیر قانود روسٹرم آ بسر۔ چیف جسٹس اطہر من اللہ وزیراعظم تونتران کریسہ پارے کہ نی دا ڈیہہ ئنا گچین مروک نمائندہ اُس و چیف ایگزیکٹو اُس، دا عدالت نے اندا سوب آن تکلیف تسنے انتئے کہ داباز بھلو ویل ئسے، ریاست ہمو وڑ پامداری تننگ اف ہرا وڑ تروئی ئس۔
چیف جسٹس ودیک پارے کہ اسہ چیف ایگزیکٹو اس ڈیہہ ئٹ 9 سال حکومت کرینے، او تینا کتاب ئٹ فخر ئٹ نوشتہ کرینے کہ او تینابندغ آتے پیشن نا ڈیہہ آتیٹ بہا کرینے، دا عدالت پٹ و پول کروک ایجنسی اس اف، باز وار عدالت دا ویل ئنا فیڈرل کیبنٹ ءِ پارے، فیڈرل کیبنٹ ہچو دنو پامداری تتو ہرا تروئی اس۔
او پارے کہ نُم اسہ کمیٹی اس اڈ تسرے، دا عدالت راہبندی عدالت ئسے، دا ویل بیرہ کمیٹی نا اف، بیگواہ آ بندغ آتیکن کمیشن جوڑمس، بیگواہ آ بندغ آتا خاہوت آک تولوک ءُ او کمیشن نا بابت ئٹ باز آ ہیت آتے کرینو، ریاست نا ہرا ذمہ واری کو او بائدے پورو مریر،کہی بندغ آجو مسنو ولے ہچو ایکشن ہلنگ متنے، دا عدالت راہبند ءِ ہُرو داکان بھلو پین ہچ ویل ہم اف۔
چیف جسٹس ودیک پارے کہ دا عدالت ئٹ بلوچ خوانندہ آتا رکھ ئنا ویل مونا بننگ ءِ، دنو تاثر بائدے ودی مف کہ قانود نافذ کروکا ادارہآک شاری تے ہفنگ ءُ، دا تاثر ننا نیشنل سیکورٹی ءِ زیمی کیک، سیاسی قیادت ءِ دا ویل ءِ ایسر کروئی ءِ، بندغ آتے بیگواہ کننگ ٹارچر ناغٹ آن بھلا اسہ ڈول ءِ، عدالت تون پین ہچ کسر اف کہ بیرہ ایگزیکٹو آن سوج کے۔
اونا پاننگ ئس کہ زوراکی نا بیگواہیک راہبند نا لتاڑنگ ءِ، دا ڈیہہ ئنا نیشنل سیکورٹی نُم وزیراعظم اُرے نما دو ٹی ءِ، دا عدالت نُمے آباور کیک، نُم دا ویل ئنا ایسری نا کسر ءِ پابو، اسہ چنکو چُناس داڑے بریک اودے عدالت انت ورندی ایتے، او وخت ئنا وزیراعظم تون ہمچُناک اوڑدئی کریر، دا عدالت زوراکی نا بیگواہی تا ذمہ وار دیر ءِ پائے۔
داڑا شہباز شریف ورندی تس کہ دا غٹ کنا ذمہ واری ءِ۔
شہباز شریف ورندی تس کہ ہرا وخت نُم کنے خوہسُرے تو ای عدالت آ بسوٹ، نُم باز گچین ءُ آبزرویشنز اس تسُرے، چُناس کنے پارے کہوزیراعظم کنا باوہ ءِ کنتو اوڑدئی کرفبو، دا ہیت کن کہ باز تکلیف دہ ءِ، ای باور ایتوہ نُمے کہ ای کوشست کروٹ، ای دا ڈیہہ ئنا عدالتآتے ورندی تروک اُٹ، کنے تینا خُدا ءِ ہم ورندی تروئی ءِ، ای داڑے کس آ دوبہ خلنگ کن بتنُٹ۔
وزیر اعظم ودیک پارے کہ نن اسہ کابینہ کمیٹی اس اڈ تسونن و اونا 6 میٹنگ مسنو، ای تینا الس ءِ ہم ورندی تروک اُٹ، سوگو ءُ شاہدی عدالت نا مونا تخوٹ، بیگواہ آ بندغ آتا کمیٹی نا 6 مجلس مسنو، بیگواہ آ بندغ آتا کمیٹی نا مجلس ءِ ای تینٹ ہُروٹ و عدالت ئٹ رپورٹ ءِہتوٹ، رپورٹ ہچو کسہ اس مفرو بلکن راستکی تیا جوڑ مرو۔
چیف جسٹس اٹارنی جنرل ءِ پنت تس کہ نُم آئین نا آرٹیکل 7 ءِ خونبو، اٹارنی جنرل آئین نا آرٹیکل 7 ءِ خوانیسہ بنفے، ہراڑان گڈ چیف جسٹس پارے کہ داسا پابو بیگواہ آ بندغ آتا ذمہ وار دیر ءِ، اسلام آباد آن اِرا ایلم بیگواہ ءُ اوفتا اینو اسکان کس ءِ سما اف۔
وزیر اعظم شہباز شریف ورندی تس کہ بیگواہ آ بندغ آتا کیس آتیٹ نُم ننا رویہ ءِ خنورے۔
چیف جسٹس اسلام آباد ہائیکورٹ پارے کہ کمیٹیک جوڑ مریرہ و باور کرفیرہ ولے پین ہچو کاریم کپسہ۔ وزیر اعظم نا پاننگ ئس کہ ایدا تو پاپرہ کہ کُل بیگواہ آ بندغ آک آجو مرور ولے نن ہچو کمبوتی اس الوفن، ڈکٹیٹر نا پالیسی تا ای و کنا ایلم ہم گواچی مسونن۔
چیف جسٹس پارے کہ شاری تے بیگواہ کننگ ڈیہہ ئنا راہبند آتیان چپ ءِ، نُمے اندا سوب آن خواہفین کہ نُم سرپند مبو کہ دا آخس بھلوویل ئسے۔
چیف جسٹس اطہر من اللہ نا پاننگ ئس کہ دا عدالت پارلیمنٹ نا باز شرفداری ءِ کیک، غٹ صوبہ آتا چیف ایگزیکٹو آک ہم ذمہ وار ءُ اگہاوفتا علاقہ آن کسس زوراکی ئٹ بیگواہ مریک، دا عدالت نا فیصلہ آن مُست ایگزیکٹو دا ہیت ءِ یخینی جوڑ کے کہ کسس زوراکی ئٹ بیگواہ کننگ مف۔
چیف جسٹس وزیراعظم ءِ پارے کہ زوراکی نا بیگواہی تیا سیکیورٹی کونسل نا ہر باسک ءِ عدالت ذمہ وار پائے؟ بیگواہ آ بندغ آتا مُتکن آکیس آ تیا خاہوت آتے مطمئن کننگ ریاست نا ذمہ واری ءِ، پین وختی کسس بیگواہ کننگ مف، پٹنگ عدالت نا آخہ ریاست نا کاریم ءِ،ریاست تون ایجنسیک اریر، پین ذریعہ ارے، بائدے کار و پٹر۔
کیس بننگ نا وختا وزیر قانود نا پاننگ ئس کہ 21 سال ئنا کیس آتے 10 دے ٹے ایسر کننگ نا پاننگ راست ءُ ہیت اس اف۔
چیف جسٹس نا پاننگ ئس کہ الس ئنا بھلنی و ادارہ آتیا حکومت نا کنٹرول راہبند نا مطابق مرے، ڈیہہ ئنا بنجائی شار آن اسہصحافی اس زوراکی ئٹ بیگواہ کننگ مریک و ہرا نا ویڈیوک ہم اریر، دا عدالت امر منّے کہ ریاست داخس نزور ءِ کہ دا نا پٹ و پول ءِکننگ کپک، ایس ای سی پی نا اسہ افسر ئسے بیگواہ کننگک و واپس بننگ آن گڈ او پائک کہ قطبی علاقہ آتے سیل کننگ کن ہناسُٹ۔
دا وختا مدثر نارو نا لمّہ نا پاننگ ئس کہ نن فروری 2019 ٹی تولوک برانز کننگ اسُن، رانا ثنا اللہ صاحب ننا فیصل آباد نا سے اودےاخس خواست کرین، نن آرمی نا شرفداری ءِ کینہ، خوانہ کہ بروکا نسل آک ہم دا نا شرفداری ءِ کیر۔
وزیراعظم شہباز شریف پارے کہ نُما کلہو ساف و پاش ءِ۔ دا وختا وزیر قانود عدالت ءِ پام تریسہ پارے کہ یو این سیکریٹری جنرل ءِوزیراعظم تون اوڑدئی کن دہ و نیم آ بروئی ءِ۔
چیف جسٹس اطہر من اللہ نا پاننگ ئس کہ وزیراعظم صاحب نُما باز منتواری اُن کہ نُم داڑے بسرے، زوراکی نا بیگواہی تے ایسر کننگنُما ذمہ واری ءِ، زوراکی نا بیگواہیک راہبند آن چپ ءُ۔ ہراکان گڈ عدالت وزیراعظم شہباز شریف ءِ ہننگ نا موکل تس۔
