حوال تا رد ئٹ بلوچستان نا علاقہ منگچر بازار ٹی گیش و روڈ تا کنڈا پارکنگ، ریڑھی تا سلیفنگ نا موْکل تننگ مفک،بھلا روڈ آ ٹریفک، ہن و بر ٹی ہڑاند جوڑ مروکا تا برخلاف کاروائی مرو۔
اسسٹنٹ کمشنرمنگچر بہرام سلیم بلوچ منگچر نا بازار ٹی دورہ نا وختا گیش ہند ہلوک آتا برخلاف کاروائی نا وختا میڈیا تون ہیت کرے۔ دا وختا اے سی بابو رمضان نوشیروانی، منگچر پریس کلب نا چیئرمین فیض سمالان، نائب صدر عبدالحئی نیچاری و ایلوفک ساڑی ئسر۔
او پارے کہ منگچر بازار، بھلا روڈ آ ٹہیفوک ءِ ہراڑا ہروخت بھاز مچی مریک، اندا سوب آن داڑے بازارٹی سوداگرد آک و ٹرانسپورٹر آک روڈ نا ہڑتوما کنڈ آتیا گیش جاغہ ہلنگ و گاڑی تا سلیفنگ آن خیالداری کیر تاکن ٹریفک نا ہن و بر ہم جوان مرے و روڈ شکست آتا منن کم مننگ کہ۔
اونا پین پاننگ ئس کہ روڈ ئنا ہڑتوما کنڈان رکشہ، گاڑیک، ویگن و ایلو لس مخلوق نا گاڑیک کسر نا کنڈا گاڑی سلیفنگ آن ٹریفک نا ہن و بر ٹی ہڑاند و روڈ شکست آتا کی دروشم ٹی زیات نسخان مننگ نا گمان ءِ۔
