ملک ناز نا گُد | ارٹمیکو بشخ
نوشت: محبوب شاہ
دی بلوچستان پوسٹ
ای حیرانی اٹ سرمٹ نا ڈغار آ سنگ مر مر نا خل آ اُراٹ، شیشہ نا بروفتہ آغا کے خناٹ تینا خالی آ دو تیا اُراٹ ہرافتیان کے دا خل یلہ مسوسس، تینا خُلوکا است ءِ چپ تریسہ شیشہ نا بروفتہ غاکے مُچ کریٹ۔
کنا سُرنگ آن کنا جان اٹ ساہ تما، کنا مزغ آن اسے بھلو باریم اس شیف تما، ہندن داسہ ای دفتر اٹ دانگ اینگ لپوسنگء بنا کریٹ، دریچہ نا خڑکا ہناٹ، روشندان تے اُراٹ کل بند ئسر۔
درگہ نا جاچ ءِ ہلکٹ ملوک ئس۔ اونا کاٹم اٹ اسے بھلو بلف اس لگاکہ، رہی آ اسے بھلو الماری اس تخوک ئس، اونا باہ ءِ ملاٹ اُراٹ اونا تہٹی ہم ہچ الو، بینچ آ دو خلکٹ اُراٹ او اسل بے جان اس، میز ہم دو خلکٹ اٹ او میز اس ئسکہ، کڑسی آ تولنگ آ مست ای ہمو دتری بلوچی کشیدہ کروکا گُدے اُراٹ، ہڑتوما دوتیٹی گدے ہرفیٹ اودے جُوان چنڈاٹ اودے ڈغار آ تالان کریٹ و تل تل آ تے نظر شاغاٹ۔ داسہ کنا ایمان جاگہ غا بس۔
او اسے گیچن و زیبا ءُ گد اس ئسکہ ہرانا رہیک رنگی آ دسک اٹ خوڑت کشیدہ کننگاسر ولے دتر نا بھاز انگا لپ آک اونا ٹمکوکا شیشہ غاکے بے نور کریسر، اونا زیبا غا رنگی آ دسک آکے دتر نا خیسن آ رنگ آک بے رنگ کریسر، بھاز انگا جاگہ غاتیان گد ئنا دسک آک چکوک ئسر، بلوچی آ گد آنا کشیدہء اُریسہ اُریسہ بے توار کنا با آن پیش تما اے مہروان آ خدا ننا امرءُ گیچن ءُ ربیدگ ئسے، اخس زیباء دتر اٹ اسٹء ولدہ ھم اننگ نا لاہخء دا امرو گودی سے نا مسونے، اخس اُست نا ہُب اٹ داڑا نن او دے خواری کرینے، ابوئے ابوئے بخت داڑا ہم دتر نا لپ آکو اسے وار اتون گد کنا دو آن یلہ مس دنکہ اسٹ اس دادے کنا دو آن چکے، خلیس آن بے ساہ مسوٹ، باہ کنا پاٹ آمبار بارس، دوک کنا چوٹ مننگ ئسر کہ ای زو زو تینا پرس، تینا بلوچی آ بھلا گدے ہرفیٹ مونء چر مُٹ کریٹ دفتر آن پیشتماٹ۔ جوانو ٹکر اس مُر سلیسٹ، گھڑی آ تینا اُراٹ تینا ایلم نا بننگ کن کسر اُروک مسوٹ، ہراتم آن کے کنا ڈیوٹی ہنداڑے لگانے کنا اسے سوشل ءُ ایلم اس کنے دیک ہتیک، کنا ڈیوٹی وخت اس سہب ئتون وخت اس بیگہ تون لگاکہ ولے اینو خدا نا شکرے کشاٹ جوان ءِ کہ اینو کنا ڈیوٹی نن ئنا ہلو، نہ تو کسکوٹہ۔
ڈیوٹی نا بناء ٹی ای جتا جتا وارڈ آتیٹی ناجوڑ آتا اریفنگ اوتیتو حال حوال کننگ کنا زند ئنا ویل و ڈکھ آکے ایسر کننگ نا اسے سوب اس ئسکہ۔
منہ وخت آن پد حالیت آتا خراب مننگ آن ہسپتال اٹ چندی نرس و ڈاکٹر آتا چھٹی نا سوب آن کنا ڈیوٹی وارڈ آتیٹی ہم دے اِرا دے اکن لگاکہ۔
اسہ دے مڑڈہ خانہ ٹِی بے وارث آ لاش تیان اخس کے لیپ و کمبل ٹپی ٹوری جون تا پُچ چوٹ صدری کوٹ انت اس کہ مُچ کننگاسس ہمو کلء خلق اٹ مسہ دیے ای او مفت میڈیکل کیمپ اسیا راہی کریٹ، دیچہ انتئے ہمو دتری آ بلوچی گد ہموڑے سلیس اس، داسہ بیدس دلیل آن کنا اُست گواہی تسکہ، کنا خلیس ہندا بلوچی آ گد ئنا سوب آنءِ ای است اٹ تینے تینٹ پاریٹ کہ مڑدہ خانہ نا ہمو اسٹور اٹ ہچ او حالیت اسیٹی ہنپرہ ہراڑے کہ دتری آ بلوچی گد تخوکء۔
ایلم نا موٹر نا پیمپ ئنا توار مس، ای خلیس نا سوب سوچ آتیٹی مین ہناسٹ، دودینگاٹ گاڑی نا درگہ ءِ ملاٹ توسٹ، تولنگ تون رنگ کنا پوشکن ہڑسینگاسس، دم کنا بند مسس، ایلم سوج کرے خیرے ایڑھ نی خلوک خننگیسہ؟ اگہ ویل اس ہرے کنے پا، ای ہیت ءِ دانگ اینگ ول تسوٹ، شام آ اِرغ آکے شاغار اِرا باخو کنگٹ است کنا پرمس، خاچنگ نا وخت آ تینے آ تینا گُدے شاغاٹ آسرتی اس خناٹ۔
ایلو دے ڈیوٹی آ بسوٹ، ایم ایس صاحب سختی ٹی ننے وخت ئنا قدرے کننگ نا پاریسس، بننگ تون خذمتءِ خلق اٹ گٹ مسون، اینو کنا سنگت نازل قول کریسس کہ او ہم خذمت خلق اٹ تینا پن نوشتہ کیک۔ نازل ہم کنتون اوار میڈیکل نا خوانندہ او مسڑ اس ئسکہ۔ اونا لمہ باوہ بیمار ئسرہ، تینے آن اسٹ اس ئسکہ، وطن اٹ ہڑدے نا جنگ و جیڑہ ورنا تا بیگواہی، اڑدے ٹپی ٹوری آ جون تا دو بننگ خلنگ، پُلنگ نا سوب آن میڈیکل کالج ءِ ہلا، اودے انسانیت نا خذمت کننگ نا چنکی آن شونک ئسکہ ولے او اینو اسکان مفت میڈیکل کیمپ آتیٹی دنو خذمت کتویسس۔ داسہ اونا لمہ باوہ نا تب مچے بھاز جوان ئس، او اینو بننگ نا قول کریسس۔
ای دفتر آ بسوٹ ولے نازل بتو، ای کڑسی آن بش مسوٹ مڑدہ خانہ نا تہٹی پترینگاٹ، ہمو جاگہ غا ہناٹ ہراڑے دتری آ بلوچی گد تخوک اس۔ ای گدے خننگ تون ولدا خلیسٹ ہندا خلیس آن وارس دفتر اٹ وارس مڑدہ خانہ ٹی پترینگاٹہ ہراڑان خلوکا استءِ مچے بھاز کرار رسینگاکہ۔
پیشن ہننگ بننگ نا وخت آ اسے پیرو بلہ اس خناٹ ہرا کے کنا دفتر نا درگہ غا جوکہ ئس، اریفیٹ بلی نی داڑے انت کننگس؟
ہچ کپرہ کنا مسڑ بس دم کشیوہ۔
گڑا نی وارڈ یا بینچ آتیا انتئے تولپیسہ ؟
بلہ ؛ حال و کوٹو آتیٹی ناجوڑ ٹپی آ بندغ آکو، اُست خراب مریک۔
ہسپتال نا تہٹی گڑاس ہندنو کیمپ جوڑ کننگاسس ہراتیٹی ہمو بندغ آک رہینگارہ ہراکے سرکار مُچ و لغت اٹ و اوتا خلق آتیان کشاسس و اوکے تینا زور آوری ٹی ہندا کیمپ آتیٹی توریسس، ہموتم اسکان کہ خلق آتیٹی قراریءُ حالیت اس جوڑ مف۔
بلہ نا پارہ غا اُراٹ خڑینک آکے تینا سفا کریسہ پارے او کنا مسڑ ہمو وارڈ آتیٹی اسے ایلوڑان ود ڈکھی آ بندغ آک تمانو، اوتا ڈھک آکے خنیسہ کنا اُست خوڑت مس، ای تنہا مننگ خواوہ۔
ای اودے پاریٹ بلی داڑے بر کنا دفتر اٹ توڷ۔ بلہءِ سما الو ای اودے تینا خلیسءِ گو انگ کن تہٹی ایسوٹ۔ او تینا گدے شیف کرے کنکے دعا کریسہ تہٹی بینچ ئنا زی آ توس۔ ای است جم مسوٹ، تینا کاریم ءِ بناء کریٹ۔
جٹ ئسے آن پد ای کاٹم ءِ بڑزا کریٹ خناٹ کہ بلہ نا حال بے وڑ مننگ اس، اونا خنک خڑینکی، اونا جوڑک بارن، اونا جان پاٹ آمبار ئسکہ، اونا خنک ہندا دتری آ بلوچی گد اٹ سخت ئسر، اونا مون زاڑچوبہ غامبار پوشکن مسوسس، او تینا ہڑتوما نکے بنچ آ مریفنگ آن مُست بارسوسس دنکہ مڑدہ خانہ ٹی تخوکو مڑدہ اس مرے۔
ای اوڑا ترند آن توار خلکٹ۔ بلی او بلی انت مس نے ولے او توار تتو، نہ تینا جاگہ غان سُرا، اندن ہمو گد آ اُریسہ کرے۔
کنے آ ولدا لڑزہ اس شولنگا، ای ہم تینے بلہ غامبار بے وس چائسوٹ، محسوس کریٹ دنکہ اوڑامبار بارنگٹ، خلیس نا چُپ انگا ویل تینا کل ءِ باریم ءِ کنا کاٹم آ شاغنگ ئس۔
