ہستی
نوشت: درناز بلوچ
دی بلوچستان پوسٹ
ماتی : مار کنا کاسہ پیشن ہرا وخت بروس۔۔۔۔۔؟
ہستی: ای دیچہ ہرا وختا بریوہ کاریم ارے زو مسُر تو زو بروٹ۔۔۔ داسا چناس افٹ پریشان مفہ۔ میرک دُن پارے مچے بشخندہ کرے ماتی نا پارہ غا اُرا۔۔۔۔۔ اللہ نے بھلن کے سرپدی ایتے، زند ایتے ولے لُمہّ نا اُست چُنا نا چُنکی آن بھلنی اسکا ہمو اُست ئے، تینا چُنا کہ پریشان مریک تینا چُنا کہ گڑتی کیک۔۔۔ بس اللہ نے رکھے کنا چُنا۔۔۔۔
ہستی بینا چَوٹ آتے پیشتما اُراغان۔۔۔ لُمہ جوان ای ہناٹ شامنا اُرے مس باوہ سوج کرے پاس تہ ای مہروان نا پارو آ کاوہ۔۔۔ اودان حال ئے کنا ہلے کنا فون خراب ئے۔
جوانے اللہ نا میار ٹی ئُس ہستی کنا (لمّہ پارے )۔۔۔
دیچہ انتئے لمّہ نا اُست تنک مننگ اس۔ میرک تانکہ دروازہ غان پیشتما ماتی نا خنک میرک آن دانگ اینگ متور۔۔۔ خُڑک آ تولوک ناز جان ماتی نا کوپہ غا دو ئے تخا۔
ناز جان : لُمہّ نے انت ءِ اینو؟ ایلم مگہ اینو اولیکو وار اُراغان پیشتمنگ ئے۔ ہردے روان ءِ جاگہ ئس، اللہ جوڑ کے تا، تینا سنگت آتے اسہ دے خنپ بے جارات مریک۔۔۔ ماتی دو تے زمین ٹی تِس بش مس۔
ماتی : آھو کنا چُنا جوان پاسہ ولے اینو کنا اُست تنک مننگ ئے، کس پائے میرک کنا اُست آ خل ئس تخا درغ آن پیشتمنگ آن مُست ۔۔۔ اللہ کنا مار ءِ سر سلامتی ئٹ ہتے۔۔۔۔ ای نماز خوانیو، نی مونو چاہ اس کر باوہ نا برو داسا بننگ نا تہ وخت ئے۔
ناز جان: جوانے لُمہ ای جوڑ کیوہ چاہ ئس، نی خوان نماز، اللہ خیر کرو۔
شام ئنا پاس مس ہستی نا باوہ بس اُراغا، چَوٹ آتے کشا، لخا تخوکا رومال ءِ درنجا
باوہ جان: شار بانو ہستی خننگپک؟
ماتی : ہستی پارے کہ کنے کاریم ارے، کاوہ کنا فون خراب ئے میرک آن حال ءِ ہلیرے اگہ اُرے کریٹ۔
باوہ جان: جوانے ای میرک ءِ فون اس کیوہ، کن کہ چاہ اس ہتہ ایسکا
ماتی: آھو کر تا فون، ای ہتیوہ چاہ ئے نا۔
ماتی دالان آ ہِنا چاہ ءِ ہتنگ کن۔ ہستی نا باوہ ام بالشت آ جوکہ کریسہ میرک نا فون ءِ خلک۔ میرک فون ءِ ہفے۔
باوہ جان : سلام کنا چُنا انت حالے جوڑ اُس تب نا جوانے، اُراٹی خیروانی ئے؟
میرک نا توار کبین کبین اس، توار تہ لڑزاکہ
میرک : جی کاکا اللہ نا کرم ءِ نما انت حال ئے۔
باوہ جان: پھل خیر ئے؟ نی جوڑ اُس، نا توار انتئے دُن ئے؟
میرک : کاکا خیر اَف
باوہ جان : اللہ خیر کے کنا چُنا انت مُسنے؟
میرک: نن چوک والا ہوٹل آن بننگ ئسن ہستی ءِ ایف سی والاک ہلکُر، گاڑی ٹی بٹیر دریر۔
باوہ جان: نی ہرانگ ئُس ای بریوہ؟
میرک: نن تھانہ ٹی بسونن ایف آئی آر کننگ کن ولے دا ساف منع کننگ ءُ۔
باوہ جان مُستی ہیت کننگ کتو فون ءِ بند کرے۔ بش مس رومال ءِ ہفے چوٹ آتے بینا پیشتما۔
ماتی : خیر بخش ہرانگ کاسہ نا چاہ ءِ ایسٹ۔
باوہ جان اچ ہیت کتو پیشتما
ماتی راست مس سلیس آسمان آ مون ءِ کرے ( اللہ خیر کیس)
ماتی بے جاراتی ٹی دو مُخ ئٹ خلوک ہِناکہ گیٹ ئنا با آ وا بسَکہ دالان نا مونا۔۔۔ اُست ئٹ آیت الکرسی نا ورد کننگ اس۔ دانگان دعا کریکہ اللہ نی خیر کیس۔۔۔ خُفتِن نا آذان مس ماتی اُراٹی پیہا کہ نمازی ئے ہتیو ڈَنّا نماز کیو کہ ہنداٹی ٹی گیٹ آتوار مس، جورک رمب کرے گیٹ ءِ مَلا۔۔۔ باوہ جان گیٹ آن پیہا۔۔۔۔ ماتی زو زو نمازی ءِ تِخا اسہ دم ئٹ تینا کُل سوج آتے کرے۔۔۔۔
ماتی : ہرانگ ہناس نی۔۔۔ داخس اُرے کریس۔۔۔ اسہ فون اس ام کتوس اُراغا۔۔۔۔ نن داخس پریشان مسُن نی داخس اشتافی ہرانگ ہناس ؟
باوہ جان : ہستی ءِ ایف سی والاک ہلکُنو۔۔۔ ایف آئی آر کننگ کہ ہناسُٹ
دا لوز الور ماتی نا وجود، اونا مُچ زند ءِ ہبکہ کروک ءُ بلاء ئسر۔۔۔۔۔ ماتی نا با آن اسہ توار اس پیشتما کہ یا رب اے کنا خالق، او اندا پاننگ تو بے سُد مس، زمینا تما۔۔۔۔۔
ماتی ئے اُراٹی دریر کس پارو اُراٹی قیامت بس۔۔۔
دا قیامت نا اولیکو دے اس داکا پد ئنا ہر دے قیامت نا دے اس۔ ہستی نا باوہ اسہ ہم انصاف نا ہند اس، اسہ ہم بندغی حق نا ادارہ اس اِلیتوسس کہ بلکن جاگہ نہ جاگہ اس اونا کوپہ اونا ہستی، اونا مار اودے رسینگو۔۔۔
ہستی نا اغواء مننگ ئے چار تو گدرینگاسس بان ئنا دروازہ غا ہستی نا لمہّ سلوک اس، بان ئنا تہہ ٹی دانگ اینگ اُرا، توس ہموڑے تہٹی ہِنتو، بے وس بے وس خنتان تے خڑینک آک بسُر۔ سما اف اُست ئٹ انت سوچا کہ آستونکٹ خڑینک آتے پہکا، اسہ مرغن او دم اس ہلک بش مس۔ بان ئٹی پیہا بان ہمو وڑ اس امر کہ ہستی ہلاسس تا۔۔۔ لُمہ پیشتما بان ئنا دروازہ آ واپس بس توس ۔۔۔ دروازہ آ تولوک میرک تو تینا گڈیکو گپ آتے یات کننگ اس ولے خڑینک خنتا بننگ کہ الِتوکہ۔ اُست تا ٹُنی کُنگکہ کس پارو کسس تینا دو ٹی ماتی نا اُست ءِ کرینے، او تینا وس ئٹ پلنگ ئے تا، بان ئٹی دانگ اینگ تموکا صفحہ آتے ہُراکہ۔۔۔ سگریٹ نا پیکٹ اس کھڑکی آ تخوک اس۔۔۔۔ بان ئنا اسہ کُنڈا ٹی وی تخوک اس ۔۔ ایلو کُنڈا شیلف ئٹی میرک نا کتاب آک۔۔۔ لمہّ بش مس پیشتما بان ئنا دروازہ ئے بند کرے۔۔۔ جورک رُمب کریسہ دروازہ ءِ ملنگ کہ کرے ماتی دو ءِ تا ہلک
ماتی : کپیس کنا چُنا، ہستی نا گڑاتے خراب کروس۔ برو نے آ چِڑو، چاسہ ہستی تینا کتاب آتے اخس سنبھال ئٹ تخک۔
جورک : لُمہّ ہستی داسا انتئے بفک؟
ماتی : ہستی ئے اللہ ہتو ظالم تا دو آن کشو۔
جورک : ہستی نن کے زہیر کپک مگہ؟ ای ہستی آن غصہ ئُٹ انتئے بفک
ماتی : نہ کنا چُنا دُن پاپک بندغ۔ ہستی برو خیر ئٹ نی انت پاریس نیکن کرو، خیرات تینا پھل آن۔
دُن پارِسہ ماتی جورک ئے خُمب ئٹ کرے کہ ہنداٹی ہستی نا باوہ بس فون دو ٹی۔۔۔ فون ءِ مُستی کرے ماتی نا کُنڈا
باوہ جان : دا زیب نساء تو ہیت کر ای کاوہ اینو اسلام آباد آ ہستی نا کیس اکن۔
ماتی فون ءِ ہلک۔ باوہ جان چَوٹ آتے بینا سلیس۔
ماتی : سلام زیب جان، انت حالے جوڑ اُس، تب نا جوانے، نا سنگت آک جوانو
زیب نساء : کُل جوانو لُمہ جان نما دعاکو۔ نم امرورے، جورک جوڑ ءِ، شیطانی کپک نے تنگ کپک؟
ماتی بشخندہ کریسہ : جورک شیطانی کپ دُن ہچ مننگ کپک۔ نی تینا حال تے ہیت۔
زیب نساء : ننا برانزی مُچی اس مسنگ پرسن تیکن۔ کنا نیت ارے ای پگہ بریو علاقہ آ جورک ام زہیر کرو، ای اوڑے افٹ۔ کیمپ آ ایڑ تے آن رخصت کیوہ منہ دے کن۔
ماتی : جوانے زیب جان بر اللہ ہتینے
زیب نساء : جوان لُمہ جان
ماتی فون ءِ واپس کرے کہ ہنداٹی میرک گیٹ آن پیہا تہہ ٹی۔۔۔ گوڑینگوک ماتی و باوہ جان ءِ اوننگ ئس۔۔۔۔ کس پارو تینا سُد سما ئٹ الو۔۔۔ رنگ تا ہڑسینگوک اس۔۔۔
ماتی : انت مس میرک انتئے دُن گوڑینگوک پریشان اُس
میرک تینا لڑزوکا توار ئٹ : کاکا ہستی (انداخس پارے کہ اونا توار گُم مس)
ماتی اندن راست مس سلیس : انت ہستی انت۔۔۔۔ میرک انت پاسہ
میرک : ماتی لاش اس اینو خننگا نے شہر آن پیشن جھل اسیٹی۔۔۔ ایجاز پاننگ اس کہ ہستی ءِ۔۔۔۔ دا پاننگ تو میرک باوہ جان نا کُنڈا اُرا۔
باوہ جان او میرک ترند گھام ہرفیسہ پیشتمار۔۔۔ ماتی نا زند اونا وجود اسہ خاخر نا ڈول ئٹ ہُشنگسہ و مِش مریسہ ئس۔
منہ ساعت گدرینگتو کہ دا اُرا ٹی اسہ ورنا ءُ مار ئسے نا دتر چلَہور آ لاش اونا پیر انگا لمہ باوہ نا مونا تخوک ئس۔ اونا بدن آ اسہ جاگہ اس ثابت ءُ الوکہ، اونا ٹپ یا بیدادی نا نشان مف۔ اونا ایڑ داخس وخت برانزی مُچی و روڈ آتا کوکار ئٹ گدریفے کہ کس اونا توار ءِ بنے۔ اونا باوہ اسہ دے آسراتی ئٹ تغ کتو۔ آسراتی ئٹ اُراٹی تولتو، انصاف نا ہر درغ آ تینا توار ءِ سر کرے ولے کس اونا توار ءِ ہم بنتو۔
اونا لمہ خُدا آن تینا ہستی نا سلامتی ءِ خواہا ولے واہم اینو دا اُرا ٹی قیامت جوڑ ئس۔ دا دڑد بلوچ قوم ئنا ہر لُمہ باوہ نا نسیب ئٹ لکھنگانے یا دادے نن تینا چُپی ئٹ تینا نسیب جوڑ کرینن دا سوج نا ورندی ننے کس آن ارفنگ نا خوست اف۔ اسہ چُناس دا جہان ٹی دم ہلنگ آن مُسٹ، دا جہان ٹی خن ملنگ آن مُست ہم تینا لُمہ نا وجود نا بشخ مریک۔ و اونا وجود نا ہمو بشخ اسہ دے بندغی سوچ آن ہم پیشن و بیدادی سگسہ اونا مونا بے ساہ ہمو حالیت ئٹ مرے کہ لُمہ ہم تینا چُنا نا مون ءِ اوننگ کپ۔
دا دڑد ءِ نن گمان ہم کننگ کپنہ۔ ہستی ماتی و زیب نساء بلکن کنا خیالی ءُ کڑدار ءُ ولے دا کڑدار آک ننا مون ئٹی ءُ، نن اخس خنتے، با ءِ، کفتے بند کین وا ہم نن دا گواچن آن نمن مننگ کپنہ کہ دا کڑدار آک ننا مون آن گدرینگوک ءُ اسہ نہ اسہ دروشم اسیٹی ننا خنوکو کڑدار ءُ۔
