11اگست 2017 غا دی بلوچستان پوسٹ تینا ٹہیفنگ تون ادارہ نا گیشتری ئٹ ”ننا مسخت، ننا کاریم نا وَڑ ڈَول و مِزل“ ءِ شینک کریسس۔ ٹہیفوک مزل نا اولیکو ٹک اٹ دا تکنگاسس کہ ادارہ ءِ شابیتی تریسہ ”دی بلوچستان پوسٹ ءِ چار جتا بولی تیٹ چار جتا ویب سائیٹ آتیان شینک کننگو۔“ اندا رِد ئٹ اسہ سال ئسے آن گڈ 11 اگست 2018 غا ادارہ نا ارٹمیکو ویب سائٹ انگریزی بولی ئٹ بناء کننگا۔ دا لَڑ ءِ برجا ء تخیسہ اینو 9 مئی 2020 نا تاریخ آ ادارہ ءِ پین شابیتی تریسہ راجی بولی بلوچی و براہوئی نا جتا جتا ویب سائٹ شینک کننگانو۔
چار جتا بولی انتکن؟
بلوچستان ئٹ صحافت ترند آ ریاستی ہڷ و تور آتا گواچی ءِ۔ ہرا صحافیک کشوک سینسر شپ نا لیک آن پیشن مریسہ بلوچستان نا گواچنی حالیت، علاقائی یا جہانی حوالکاری نا ذریعہ آتے اسکان سرمننگ نا کوشست کیرہ، او بیگواہ یا کسفنگ نا دروشم ئٹ تینٹ حوال جوڑ مریرہ۔ ہرانا سوب آن بلوچستان ئٹ گواچنی حوال و خوانوک نا نیامٹ ئٹ اسہ شابیت ءُ ہورکی اس ودی مسونے۔ دی بلوچستان پوسٹ نا ٹہیفنگ نا مسخت بلوچستان ئٹ صحافت نا ہورکی ءِ مُر کننگ و بلوچستان نا گواچنی حالیت آتے صحافتی دیانتداری، بیدس کس ئنا پارہ غا مننگ، دود ہلوک وَڑ و ڈول تیان چپ صحافت نا پوسکنا خواست آتیتون ہم کوپہ مریسہ دا ڈیہہ تون اوار تیوی جہان اسکان سرکننگ و بلوچستان نا توار مننگ ءِ۔
توار اس مننگ، معلومداری و حوال آتے سر کننگ کن بولی تیوہ غاتیان بھلا کمک ءِ۔ ادارہ نا بناء اردو بولی ئٹ کننگا، ہرانا بھلا سوب دا ئس کہ اردو بولی نہ بیرہ زیات بلوچ آباتی خواننگ و نوشتہ کننگ کیک بلکن اردو نا کمک ئٹ بھاز آ ہمسایہ قوم آتے اسکان آسراتی تون بلوچستان نا حوال آک سر کننگ مریرہ۔
دا وخت بلوچستان ئٹ ہچو جہانی حوالکاری نا ذریعہ ئسے پیہنگ نا موکل اف، انداڑان بھاز کم وخت بلوچستان نا حالیت آک جہانی میڈیا اسکان سر مننگ کیرہ۔ انگریزی بولی ئٹ بلوچ صحافت نا کمبوتی نا درک ءِ کریسہ، و جہانی قوم آتے اسکان بلوچستان نا توار ءِ سر کننگ کن ادارہ انگلش ڈیسک ٹہیفے و ارٹمیکو ویب سائٹ نا بناء ءِ انگریزی بولی ئٹ کرے۔
بلوچی، بلوچ آتا تیوہ غاتیان زیات پاننگوک راجی بولی ءِ۔ ہرا نہ بیرہ دے ٹکی بلوچستان ئٹ پاننگک بلکن دیکی بلوچستان ئٹ ہم پاش زیات پاننگوک بولی ءِ۔ بلوچی بولی ئٹ صحافت نہ بیرہ بلوچی بولی نا دیمروی و شابیتی بشخنگ ئٹ اسہ گچینو کڑد اس ایسری تننگ کیک بلکن دا وڑ ہمو بلوچ آتے اسکان ہم سر مننگ مریک ہرا اردو‘ انگریزی پاننگ و سرپد مفسہ۔دا سوب آتے مونا تخیسہ ادارہ، ٹی بی پی بلوچی ڈیسک ٹہیفسہ باقاعدہ جتا ویب سائٹ ئسے نا بناء کرے۔
براہوئی، بلوچ آتا ارٹمیکو بھلا بولی ءِ۔ بلوچی بولی ئٹ منہ بلوچ میڈیا ادارہ غاک مالو آ بھاز گچین کاریم کننگو، و صحافتی لوز گنج نا ویل اسہ کچ ئسے اسکان ایسر مسونے۔ ولے براہوئی بولی ئٹ دا وخت ہچو باقاعدہ حوالکاری ادارہ اس ٹہینگوک اف۔ دا ہورکی ءِ پُر کننگ کن ادارہ براہوئی ڈیسک ٹہیفے ہرا اُرے آن براہوئی حوالکاری لوز گنج آ کاریم کننگ ئس و اینو باقاعدہ ٹی بی پی براہوئی ویب سائٹ نا بناء کننگا۔
مُستی گام؟
دی بلوچستان پوسٹ میڈیا نیٹورک دا ہیت آ سلوکے کہ بڑز حوالکاری اقدار و معیار آ سلیسہ، ادارہ ءِ پین شابیتی تننگو۔ بلوچ آتا بھلو کچ ئس سرائیکی و فارسی بولی ٹی ہیت کیک۔ دا ہڑتوما زبان آتیٹ شابیتی ادارہ نا بروکا وخت ئٹ دا بابت گمان مننگ ءِ، ولے ادارہ نا پام جتا حوالکاری وسیلہ غاتا شابیتی نا پارہ غا زیات ءِ و اندا رد ئٹ ایلو گام گیج آتیا کاریم نا بناء کننگانے۔
دافتیٹ لڑ ئٹ بڑز آ ٹی بی پی پبلیکیشنز نا ہڈ تننگ ءِ۔ دی بلوچستان پوسٹ میڈیا نیٹورک ءِ اولیکو دے آن صحافتی و نوشتہ کار آ لائخیک دوئی مسونے۔ دا نیامٹ دا مارنگا کہ بھاز آ بلوچ دانشور، نوشتہ کار و شاعر آتے تینا کتاب و مجموعہ غاتا شینک کننگ نا آسراتی دوئی اف۔ ہرانا بھلا سوب ریاستی ہڷ تور ءِ، اندا سوب آن نہ بیرہ بلوچ نوشتہ کار آتا است کٹئی مننگے بلکن ریکارڈ ہم شیکی دروشم ئٹی ءِ۔ اندا خواست ء مونا تخیسہ ٹی بی پی پبلیکیشنز آ ادارہ پامداری تون کاریم کننگے۔
داڑان بیدس پوسکنا دور نا خواستے آتون ہم کوپہ مننگ کن ادارہ تینا مرغن وخت اکن پالیسی تیٹی ٹی بی پی ریڈیو و ٹی بی پی آن لائن ٹی وی نا ٹہیفنگ کن منصوبہ بندی کننگ ءِ۔
ٹی بی پی و نم
دی بلوچستان پوسٹ میڈیا نیٹورک روزگاری لائخی تخوک صحافی تا ٹیم ئسے۔ ہرا اُست ئنا ہُب و خواری تون نن و دے کاریم کیرہ ولے ادارہ نا سرسوبی نا تیوہ غاتیان بھلا سوب ادارہ نا خوانین، نوشتہ کار‘ رضا کار حوالکار آکو۔
ننا خوانوکاک ہر وخت ادارہ نا است بڈی کریر، او ہم اندنو وخت اسیٹی ہراتم ادارہ نا ویب سائٹ بلوچستان ئٹ ریاستی ادارہ غاتا پارہ غاک بلاک کننگار، واہم ننا خوانوک آتا کچ ئٹی ہچو کمبوتی اس بتو۔ جتا ذریعہ غاتے کاریم اٹ ہتیسہ ہم خوانوکاک ٹی بی پی اسکان تینے سر کریسہ کریر۔
ادارہ ءِ دا وخت لائخی تخوک نوشتہ کار آتا بھلو کچ ئسے نا است بڈی دوئی ءِ، ہرا ہڑدے جتا سرحال آتیا، چار آ بولی تیٹ نوشتہ کریسہ دی بلوچستان پوسٹ ءِ رادہ کیرہ۔ ہرا ادارہ ءِ طاغت بشخک۔
ٹی بی پی حوال اکن گوڑیفنگ و بریکنگ حوال نا دود آ یخین تخپک۔ اندا خاتر ہر حوال ءِ پک کننگک و دوارہ اودے گچین ءُ ڈول اسیٹی نوشت اٹ ہتنگک۔ ادارہ ءِ بلوچستان نا گواچنی ساڑی حالیت آتیان پک حوال سر کننگ ئٹ، ادارہ نا حوالکار آتا بھاز بھلو کڑد ئسے۔ ٹی بی پی حوالکار آک ادارہ نا مُخ ئنا ہڈ آنبار ءُ۔
ادارہ تینا خوانوک، نوشتکار‘ و حوالکار آتامنتوار ءِ۔ نن امیت کینہ پین شابیتی، بڑز آ معیار‘ و جہانی پڑ نا حوالکار نا ہند آ سر مننگ نا مسخت نا دوئی کننگٹ ننے نما کمک و اسٹ بڈی دوئی مرو ءِ۔
