جرمنی نا نیمہ آبادی کورونا نا ایلو لڑ ئنا بننگ آ بیم ئنا گواچی، داسکان زیات بندغ آتا گمان ءِ کہ یورپی یونین نا صدر نا حیثیت ئٹ جرمنی نا مونا کورونا وائرس تو مون تننگ کن ماحولیاتی بدلی تیوہ آتیان زیات بھلا ویل ءِ۔

حکومتی شینکاری ادارہ اے آر ڈی کن ڈیوش لینڈ ٹرینڈ نا پارہ آن کروکا سروے، ہرا پنچ شمبے آ شینک کننگا، نا رد ئٹ جرمنی نا نیمہ آبادی کورونا نا ایلو لڑ نا بننگ آ زیات بیم ئنا گواچی ءِ۔

سروے نا رد ئٹ 13 فیصد بندغ آک دا ہیت آن زیات خلیس ٹی ئسر کہ بروکا ہفتہ آتا نیام ئٹی انفیکشن ٹی زیات ودکی مرو، اندن 37 فیصد بندغ ءِ ودکی نا بابت خلیس پلویڑ کرینے۔ 32 فیصد بندغ کورونا وائرس نا ایلو لڑ نا بابت مچے فریشان ءُ، اندن 17 فیصد بندغ مچے ہم فریشان افس۔

ولے داسکان کورونا تون مون تننگ نا بابت مخلوق نا رویہ ٹی بھاز بدلی مسونے۔ کم و ود 89 فیصد نا پاننگ ءِ کہ او مالو آن داسا بھاز وار دو سلیرہ۔ 88 نا پاننگ ءِ او اسٹ ایلو آن زیات مُر مری تخیرہ۔ 72 فیصد جرمن تا پاننگ ئس کہ وہ تینا سنگت و سیال آتیا بھاز آلمی مننگ آن گُڈ خننگ کن کارا۔

نیمہ آن زیات 57 فیصد جرمن شاری تا پاننگ ئس کہ وہ دا سال باسنی نا رخصتی تیٹ ہچ جاگہ ہنوفس داسکان 39 فیصد دا جلہوی دین ئنا مننگ آن بیدس رخصتی تا وختا سیل سوات آ ہننگ نا فیصلہ کرینو۔

جرمنی ٹی ہراڑے ہم المی ءِ اوڑے زیات تر بندغ آک ماسک بینیرا۔ واہم 80 فیصد نا پاننگ ئس کہ اگہ ماسک بینگ قانودی آلمی متوکہ گڑا او ماسک بیننگ ءِ خوش کتاوس۔

سروے ٹی 1003 بندغ بشخ الکنو۔

جرمنی آ یورپی یونین نا صدارت نا وختا ماحولیاتی بدلی آ پامداری کروئی ءِ۔

سروے تا وختا بندغ آتیان دا ہریفنگا کہ یورپی یونین نا صدارت رسینگ آن گُڈ داسا جرمنی نا ایلو شش تو اکن ایجنڈا انت مرے ۔ یاتی مرے کہ جرمنی یک جولائی آن یورپی یونین نا صدارت ءِ سنبھالانے۔

سروے آتیٹ بشخ ہلوکاتیٹ کم و ود 50 فیصد نا پاننگ ئس کہ جرمنی ءِ یورپی یونین کونسل نا صدارت نا وختا ماحولیاتی رکھنگ آ زیات پام کروئی ءِ۔ داسکان 39 فیصد نا گمان ئس کہ جرمنی ءِ کورونا وائرس نا دین آن ودی مروکا حالیت تون مون تننگ کن پامداری نا خواست ءِ۔

جرمنی نا یورپی یونین نا صدر نا حیثیت ئٹ ایلو بشخ تا بابت مخلوق ئٹ زیات جوزہ خننگتو۔ 33 فیصد بندغ یورپی یونین ٹی قانود نا حکمرانی نا ردئٹ خلیس نا درشانی کریر۔ 25 فیصد بندغ ڈیجیٹائزیشن نا لڑئٹی فکرمندی ئسر، 24 فیصد یورپی یونین بروکا وخت نا بجٹ کن فکر مند مسونو اندن بیرہ ہفت فیصد بندغ برطانیہ تون اوار جرمنی نا بروکا وخت نا تعلقداری تا بابت خلیس نا درشانی کرے۔

سرکاری ہسپتال آتا حالت بھاز بد ءِ، حکومت بے پام ءِ ۔ بلوچستان ہائی کورٹ

بلوچستان ہائی کورٹ ٹی جسٹس کامران ملاخیل و جسٹس حمید بلوچ تون اوار بینچ آ عبدالروف نا پنٹ حکومت بلوچستان نا راہ بندی درخواست نمبر 83/2018 نا پیشی نا وختا فیصلہ تریسہ بلوچستان حکومت ءِ ایئر ایمبولینس نا ہلننگ آن تورے۔

او پارے کہ صوبہ نا بھلا شار نا ہسپتال ٹی اسے اسسٹنٹ کمشنر اس آکسیجن نا کمی نا سوب آن بیران مریک ولے صوبائی حکومت ایئر ایمبولینس ہلننگے۔

پیشی نا وختا ایڈوکیٹ منیر احمد کاکڑ، ایڈوکیٹ ثناء اللہ ابابکی و شکیل زعمرانی عدالت آ پیش مسر۔ منیر احمد کاکڑ ایڈوکیٹ کیس ٹی سی ایم اے نا ردئٹ فریق جوڑ مننگ نا چٹی تریسہ عدالت ءِ پارے کہ اسے پارہ غان حالیت آک دادو کہ شیخ زید ہسپتال کوئٹہ ءِ صوبائی حکومت ایمرجنسی نا بنیات آ کورونا سینٹر جوڑ کرے ولے بے بختی ءِ کہ اسے حاضر سروس ءُ اسسٹنٹ کمشنر اس آکسیجن پریشر مفرننگ آن بیران مریک۔

ایڈوکیٹ جنرل عدالت ءِ پارے کہ دا وخت اسکان دا صوبائی گورنمنٹ نا بیرہ صلہ ئسے۔ دائسکان حکومت بلوچستان نوشت و خوان وڑاٹ ایئر ایمبولینس ہلننگ نا ہچو فیصلہ کتنے۔

جسٹس کامران مندوخیل پارے حکومت تون مہالو آن مسے جہاز اریر اندا سوب آن صوبائی گورنمنٹ ءِ حکم تننگ مریک کہ او پوسکنو جہاز یا ایئر ایمبولینس ہلپس۔

بھارت ٹی کورونا وائرس نا کیس آک شش لکھ آن زیات مسونو، او داسا جہان نا مسٹمیکو تیوہ آتیان زیات زیمی روس آن دیخہ پد سلوک ءِ۔

تدوکا 24 گھنٹہ ٹی نوزدہ ہزار آن زیات پوسکنو کیس تون اوار بھارت ٹی کورونا وائرس آن زیمی تا کچ شش لکھ پنچ ہزار 472 مسونے، اندن جہان ٹی مُسٹمیکو تیوہ آتیان زیات زیمی ملک روس ٹی زیمی مروکا تا کچ شش لکھ 54 ہزار 405 ءِ۔

برازیل 14 لکھ آن زیات کیس تون اوار ارٹمیکو نمبر آ ٹے و امریکا 27 لکھ آن زیات کیس تون اوار اولیکو نمبر ئٹی۔ دُن بھارت روس آن 50 ہزار آن ہم کم کیس ٹی پدی ءِ۔ ولے بھارت ٹی ہڑدے کم و وَد 20 ہزار پوسکنو کیس مونا بننگ ءِ دا حساب ئٹ اریس دا بروکا منہ دے ئٹی روس آن گدرینگک۔ داسکان بھارت ٹی کورونا آن مروکا مرگ آتا کچ روس آن اِرا اموخس زیات ءِ۔ بھارت ٹی دائسکان 17 ہزار 850 بندغ مرگ نا گواچی مسونو اندن روس ٹی دا کچ 9536 ءِ۔

بھارت ٹی تدوکا 24 گھنٹہ ٹی 19148 پوسکنو کیس مونا بسونے و 434 بندغ مرگ نا گواچی مسونو۔ داسکان کووڈ نوزدہ آن دُراخ مروکا تا کچ مسہ لکھ 59 ہزار 860 ءِ۔ یعنی 59.51 فیصد بندغ دُراخ مسونو۔

بھارت ٹی تدوکا گڑاس ہفتہ نا نیام اٹی کورونا نا کیس آتیٹ ترندی ئٹ ودکی مننگ ءِ۔ اندن 30 جنوری آ اولیکو کیس نا پاش مننگ آن گُڈ زیمی تا کچ اسہ لکھ آ سرمننگ ئٹی 110 لگاسس ولے 19 مئی آن گُڈ ہڑدے ریکارڈ ٹی ودکی مننگ ءِ۔ مسہ جون آ بھارت ٹی زیمی مروکا تا کچ ِارا لکھ آن زیات گدرینگاسس اندن بروکا دئے دے ٹی دا مسہ لکھ آن زیات مرور۔ مالو نا یانزدہ دے تیٹ پین اِرا لکھ پوسکنو کیس نوشت کرینو۔ اندا وڑ بھارت شش لکھ پنچ ہزار آن زیات کیس تون اوار دا وخت جہان ٹی تیوہ آتیان زیات زیمی مروکا چارمیکو ملک ءِ۔

بھارت نا راجی دارالحکومت دہلی و اقتصادی دارالحکومت ممبئی زیمی شار آتا لڑ ئٹی ءُ۔ دہلی ٹی زیمی آتا کچ نوزدہ ہزار آن خڑک سرمسونے، اندن 2803 بندغ مرگ نا گواچی مسونو۔ ممبئی ٹی زیمی تا کچ 80 ہزار آن خڑک ءِ و مرگ نا گواچی مروکا تا کچ 4631 ءِ۔

کورونا وائرس ءِ تالان مننگ آن توننگ کن بھاز ریاست آک لاک ڈاون ءِ ودیفیسہ 31 جولائی کرینو۔ اوفتیٹ مہاراشٹر، تمل ناڈو، مغربی بنگال، منی پور و ناگالینڈ اوار ءُ۔

بھارت ٹی کورونا وائرس ٹی ہراڑے کہوکا تیٹ ودکی مننگ ءِ۔ ہموڑے مرگ نا گواچی مروکا تون انسانی ہد آن چپ خراب ءُ است کشوک واقعہ غاک ہم پاش مننگ ءِ۔

تدوکا دے تیٹ سویلی ریاست کرناٹک نا بیلاری شار ٹی اسہ گاڑی آن جون آتے دڑفسہ کڈ اسیٹ بٹنگ نا ویڈیو مونا بسوسس۔ ہراڑا بھاز توار توار مس۔ اوکان گُڈ ریاستی حکومت جون تون بندغی ہد آن چپ گندہ ءُ چم کننگ کن تومت ٹی شش سرکاری کارندہ معطل کننگا۔

پوسکنا ویل دے کہی ہلگوک بنگال نا دارالحکومت کولکتہ نا ءِ۔ ہراڑے کورونا آن اسہ 71 سال ئنا بندغ ئس مرگ نا گواچی مننگ آن گُڈ سرکاری کوالخواہ تا پارہ آن کڈ کننگ کن ہچ ءُ کمک رسینگتو ہرانا سوب آن اُرا والاتے جون ءِ 48 گھنٹہ اسکان اُرا ٹی فریج ٹی تخوئی تما۔

نیشنل پارٹی نا صوبائی ترجمان شینک کروکا بیان ٹی سیندک پروجیکٹ نا معائدہ ٹی شابیتی آ ترند لوز آتیٹ مذمت کریسہ پارے کہ مائننگ نا موکل تننگ نا واک صوبائی حکومت نا دوٹی ءِ، ہرادے صوبہ نا مفاد کن کاریم ئٹ ہتنگے ولے حکومت اسمبلی ئٹ ہتنگ آن بیدس معائدہ ٹی شابیتی کریسہ بلوچستان تو دژمنی ئس کرے، ایلو پارہ غان اسمبلی ٹی ساڑی ہرا سیاسی جماعت آتا باسک آتا خن تری و ڈودار کڑدار سوج بش کیک۔

بیان ئٹ پاننگانے کہ نیشنل پارٹی معاہدہ ٹی شابیتی آ پبی وڑئٹ توار ارفو، سیندک بلوچستان نا ءِ و دانا کٹیا ہم بلوچستان ءِ رسینگے ولے داڑان چَپ سیندک تون اوار تیوہ آ ضلع چاغی زیات پدماندہ ءُ علاقہ ئسے، سیندک نا کٹیا ءِ بنجا و چین دیرہ۔ بلوچستان ءِ ہچ ئس رسینگ پک۔

بیان ٹی پاننگا کہ ساڑی حکومت لس مخلوق نا مڈی ءِ لس مخلوق آن ڈکیسہ معاہدہ کرے و دا معاہدے ٹی 15 سال نا شابیتی نا برخلاف نیشنل پارٹی پبی ہیت کرو، وا دانا پد بٹنگ کن ہر وڑ ئنا برانز نا کسر ارفو۔

داستان ءِ عرب، براہوئی مزحمتی ادب نا پنہ غا

نوشت: محبوب شاہ

دی بلوچستان پوسٹ

مُست آن  برجاء۔۔۔۔۔۔۔۔۔۔۔۔۔

ابو جہاد کیمپ آن رخصت کریسہ پارے سنگت آک اللہ کمک۔ اونا ہندا آخری لوزآک خفتیٹی پنار، اننگ آن مست او تیناطوفکء ِ ہموڑے اِلا پارے کنتو گڑاس دستی بم او اسے ولاہتی او پشٹول اس ارے جنگ اٹ زیات باریم لخ آنا لوپ او نت تا زمزیر جوڑ مریرہ ۔ خیال آتا ویل و ڈکھ آک اودے اونا زند او مرک ئنا مقصد آن بے سما کریسر ۔ امیر نا حکم ءِ او تینا پھلو آ تفیسس، اودے اسے پول اسے دنز تننگ کن پاننگاسس ہراڑان کے دشمن ءِ کمک دو بسکہ ولے پول دنز تننگ نا وخت آ کنا سوچ او فکر اٹ ابوجہاد نا طوفک اسکہ ہراڑا کہ رنگی آ پھل آتا نقش نگار کننگاسس ہرانا پٹہ غا زیبا غا دسک آتیٹ اونا دشتار کشیدہ کریسس۔ اسے وار ای اوڑان اریفیس اٹ کیمپ اٹ پوسکنو طوفک وڑ وڑ ئنا سلہہ بسونے نی پوسکنو طوفک اس انتئے گچین کپیسہ؟
پارے کنا پنت اس یات تخس طوفک او زائیفہ ءِ وخت اس ہم بدل کپیس۔ دا ہڑتوماک وفادار مریرہ، دا طوفک کنا آزموندہ کروکا سنگت آمبارے دا وخت اس ہم بے وفائی کتنے، دانا پٹہ غا کشیدہ کروکا اسے اسے پھل کنے کنا دشتار نا مہر آن خڑک کیک ایہن ہم سُم خن تیان پیشتمک طوفک تو سلہہ نا پن ءِ، سلہہ انتس کہ مرے وخت انا کاٹم آ کاریم برے، دنکے زغم او کاٹار ہم طوفک آمبارے ہرانا دستہ سنگت نا دو آمبار قول انا پک و باسن مریک ، بدر نا دو آمبار یخ مفک
سہیل آن مست کنا کیمپ اٹ بننگ نا اولیکو صوب ہم کنے بھاز جوان یات ءِ ہراتم امیرے کمندان تینا لیپ ءِ مُچ کننگ وخت آ لیب انا تہے آن اسے بھلو سیاہ مار اس پیشتما شینک کرے،
ای طوفکءِ ارفیٹ دشمن نا کاٹم ءِ جگیو، امیرےکمندان بشخندہ کریسہ کنے تورے کنے ہنین او لہجہ اسیٹی پنت تس پارے سنگتء دیر خلیک۔ ای ہیت کننگ خواہاٹہ کہ امیر دُو ءِ تینا کنا کوپہ غا تخا او اہیتءِ کنا با آن پلا پارے کنے سما ءِ دوشتہ دشمن ءِ اونا کاریم ہرکس ءِ ڈنگ خلنگ ءِ ولے داتو استونا ءِ سنگتی کرینے کنے تغ اٹ ڈنگ خلنگ کریکہ۔ اسے بھلو زمانہ سیان ہند اتیلٌ او دوشہ غا تیتون اوار اُن اینو اسکان ننا اسے سنگت اسے ہم ڈنگ خلتنو، امیر اسے زیباؤ ٹاکو سیٹی پارے اے ابو جہاد دا دوشہ ہمو آستونک نا دوشتہ غاتیان بھاز جوان ءِ ہراکہ کنا وطن نا مال و مڈی ءِ ننا چناتا باہ آنا باخو ءِ اوتا باہ آن پلیسہ پارہ نن کل ایلم ان کل اسے قوم اسے اُن نن نم کل اسٹ اُن۔
مش تا تلار اٹ ای ہم خیال آتیٹی گم او گار مش انا خل اسیے آ جوکہ اسٹ، برف ہستین کسرکے گو آسس، سما اف او ہرا طاقت اس ہرا قومی آ غیرت اس کہ کنے نہ ولد آ کسر تیان ولد کریسس وطن نا مہر یا غیبی آ طاقت مش اٹ برف او یخ آن تفوکا نک کنے کنا مزل اسکان سر کننگ کن دلیل اٹ کسر پٹارہ دنکے کور لٹ انا کمک اٹ دلیل اٹ تینکے کسر پٹک

تربت ٹی داڑیلی و دزی نا ویل آتا لڑ برجاء، ہفت دے ئٹی چار دکان ٹی توفک نا زور آ دزی کننگانے، مسہ چار موٹرسائیکل آتا دزی نا حوال اس ہم ارے، داڑیلی و دزی نا ودوکا ویل آتیان شاریک خلیس نا گواچی ءُ۔

تدوکا شام اسٹار پلس ٹی کُن خور نا دکان آن داڑیلک دئے آن پانزدہ ہزار رپئی توفک نا زور آ دزی کرینو نرانو، اندن چاہسر ایئرپورٹ کراس آن داڑیلک کُن خور نا دکان آن بیست و پنچ ہزار رپئی پلیسہ نرانو۔

اندن دشتی بازار آن اسہ میڈیکل اسٹور ئسے آن داڑیلک بیست و پنچ ہزار زر و موبائل فون توفک نا زور آ دوزی کرینو، رسینگوک حوال تا رد ئٹ تربت شار اللہ والہ مارکیٹ نا مونا دزاک اسہ ہفتہ ٹی اِرا موٹرسائیکل دزی کریر ہنار۔ شار ٹی ودوکا داڑیلی و دزی نا ویل آتیان لس شاریک و سوداگر مخلوق ٹی خلیس خننگک۔

مخلوق نا پاننگے کہ ہندی پولیس مُرو آنبار تنگان ءِ، اوفک دا بابت ہچس کننگ افس۔مم

بولی نا خواست

نوشت: سمیہ بلوچ

دی بلوچستان پوسٹ

۱۱۔اگست 1947 ئٹ بلوچستان ءِ انگریز آتیان آجوئی رسینگا سس (اسیکہ وا 27 مارچ 1948 پاکستان بلوچستان آ کوزہ کرے) ولے اینو ہم بلوچستان پاکستان نا کوزہ ٹی ءِ، جہان نا مون آ تو بلوچستان پاکستان نا اسہ صوبہ ئسے ولے بلوچستان تینٹ اسہ ملک ئسے۔

دا دغار او اف ہرادے اینو پگہ نا نشخہ آتیٹ بلوچستان نا پن اٹ نشان تننگک، دا گواچن ئٹ بلوچستان نا ہمو بشخ ءِ ہرادے بلوچ قوم نا تدوکا 500 سال نا تاریخ ٹی مرکزیت نا شرف دوئی ءِ، ولے دا تیوہ آ بلوچستان اف دادے تو برطانوی حکومت تینا سامراجی مسخت آتا دوئی کننگ کن بلوچستان نا ڈغار ءِ مسہ بشخ ٹی جتا کرے، اسہ بشخس ایران و اسٹ افغانستان ءِ تس۔ پدا انگریز آتا ہننگ آن گُڈ 11 اگست 1947 آ بلوچستان ءِ آجوئی رسینگا۔ و 14 اگست پاکستان ءِ و 15 اگست ہندوستان ءِ۔ (1)

براہوئی بلوچی ننا راجی بولیک ءُ ولے اینو نا تاریخ ٹی ننا بولی ننے آن گم مننگ ءِ، دا بھاز بھلو بے سہبی ئسے اسہ قوم اسیکن کہ او تینا بولی ءِ نوشت و خواننگ کپک۔ اینو بھاز آ بندغ آک اریر ہرا براہوئی خوانپسہ اسہ راج اسیکن دا بھاز بھلو بے سہبی ئسے۔ جہان نا ہرا راج غلامی ٹی مسونے اودے علم آن مر تخنگانے دا تاریخ ٹی مسونے کہ ہرا وخت اسے ملک ایلو ملک آ کوزہ کرینے اونا اندا کوشست مسونے کہ او اوفتا بولی ءِ ایسر کے و دا گڑا ننا قوم ئتو ہم مننگ ءِ، ننا مخلوق تینا بولی ءِ ایسر کننگ ٹی دژمن ءِ تینٹ کمک کننگ ءِ۔

اینو ننا بلوچ راج نا حالیت دادے کہ اگہ نی کس ئسے آن اریف کہ نی انتے براہوئی نوشت و خوانپیسہ او اندا پائک کہ نن غلام ءُ راج ئسے اُن، ننے اسکول اف، ننے کتاب اف۔ منینہ اگا نن تو خواننگ نا ہمو خواست و آسراتیک افس ولے سوشل میڈیا تو ارے، اوکان علم ہلنگ کینہ۔ نن کہ اینو بھاز براہوئی ٹی نوشتوک کتاب آک اریر، نوشت، نغد کاری نا بابت نوشت و افسانہ آک ہم اریر، اندن براہوئی لکھ وڑ نا بابت ہم کتاب ساڑی ارے (اوفتا کچ کم مرو ولے نن اوفتیان ہم فائدہ ارفنگ افن۔) اگہ براہوئی خواننگ نوشتہ کننگ خوان تو نن دافتیان ہیل کننگ کینا ولے ننا مخلوق دا گڑا تیا پام تفک اوفک نیمون کیرہ کہ نن براہوئی پوہ مفنہ گڑا سوج دا ودی مریک کہ نم انگلش، اردو خواننگ امر ہیل کریرے، نن خنانن کہ انگلش ہیل کننگ کہ ننا مخلوق اخس در خواری کیک۔

ننا بھلاک خوانانو، اوفتا حق مریک کہ او گڑاس نوشتہ کیر۔ اینو اوفک دن کریر گڑا ننا بروکا زنک انت ئس ہیل کرو، او وخت اسکان بلکن ننا بولی نا وجود مروف، براہوئی ہچ ءُ بولی اس مروف و دا ننا دژمن نا سرسوبی و ننا بے سہبی مرو۔

بلوچی ننا راجی بولی ءِ، بلوچی ٹی واہم خواننگ مریک، مخلوق جوان ءِ بلوچی ئٹ نوشت و خواننگ نا کوشست کیک ہیت دادے براہوئی ٹی کس اس ہم کوشست کپک، دیمروی نا ہرکس ہیت کیک ولے نن چانہ ہر گڑا تیار رسینگپک اوڑکن کوشست کروئی تمک ولے ننا مخلوق ٹی دا حال اف۔ اگہ او خوانپسہ جتا ءُ ہیت ئسے ولے دا ہیت ءِ کپس کہ نن تون اینو آسراتیک افس یا نن غلام اُن ننا بولی پد بٹنگانے۔

حوالہ:
-1 تاریخ بلوچستان، میر گل خان نصیر

پاکستانی بالی کمپنی پی آئی اے نا یورپی یونین ٹی آپریشنز آ شش توہ ئنا پابندی۔

یورپی یونین نا باسک ملک آک دا کڑدہ نا پیشن نا سیم آتے چار شمبے یک جولائی آن واپس ملینگ نا فیصلہ کرینو۔ ولے داڑ تون اوار پاکستانی بالی کمپنی پی آئی اے نا یورپی یونین ٹی آپریشنز آ شش تو ئنا پابندی ہم لگانے۔

بیلجیم نا دارالحکومت برسلز ٹی یونین نا کونسل نا کنڈان دا بلاک نا پیشن نا سیم ءِ ملنگ نا فیصلہ سئے شمبے اسے جون آ کننگا۔ دا فیصلہ آن گُڈ یورپی کونسل نا کنڈان اسے پڑو ئس کننگا کہ یونین آن پیشن نا ‘مسٹمیکو ریاست آک‘ پاننگوکا ہرا 15 ملک آتا شاری تیا یونین ٹی پیہنگ آ پابندی خلنگاسس، او یک جولائی آن ایسر مرو۔

المی ہیت دادے کہ او ملک آتیٹ چین اسہ اندن ءُ ملک ئسے، ہرا نا شاریک داسا اندا شڑت آ یورپی یونین ٹی پیہنگ کرور کہ اسیکہ بیجنگ حکومت ہم تینا کنڈان پابندی ءِ ایسر کہ، ہرا نا ردئٹ یونین نا شاریک داسکان چین ٹی پیہنگ  کپسہ۔

یورپی یونین تینا پوسکنا فیصلہ نا بیدس ہمو ملک آتا شاری تے تینا ملک آ بننگ نا موکل تننگ آن پدے مسونے، اندن پوسکونا کورونا وائرس نا دین داسکان ہم ترندی ئٹ تالان مننگ ءِ۔ دُن انگا ملک آتیٹ امریکا، برازیل و روس گچین وڑ ئٹ پاش ءُ۔

یورپی یونین جہانی سطح آ ترندی ئٹ تالان مریسہ کورونا وائرس نا دین نا وڑ ءِ اریسہ مارچ نا تو ئٹی تینا سیم آتے بند کرسہ پاریسس کہ اگہ اسے پیشن ملکی ئسے نا یونین نا باسک ریاست ئسے نا دورہ بھاز المی مف گڑا ‘مسٹمیکو اسٹیٹ‘ تون سیالی تخوکا اسہ غیر یورپی شاری ءِ یونین ٹی پیہنگ نا موکل مفرو۔

ہرا 15 ملک آتا شاریک داسا یورپی یونین ٹی پیہنگ کرور، او دا وڑ ٹی ءُ؛ الجزائر، آسٹریلیا، چین، کینیڈا، جارجیا، جاپان، مونٹی نیگرو، مراکش، نیوزی لینڈ، روانڈا، سربیا، جنوبی کوریا، تھائی لینڈ، تیونس و یوروگوائے۔

بلوچستان حکومت چینی کمپنی مائننگ لیز نا معائدہ ٹی 15 سال ودکی کرے۔

بلوچستان حکومت سیندک پروجیکٹ ہراکہ چین کمپنی ءِ معائدہ ٹی تروک ءِ، دا معائدہ نا ایسر مننگ آن مست بلوچستان حکومت چینی کمپنی مائننگ لیز نا معائدہ ٹی 15 سال ودکی کریسہ محکمہ توانائی پیٹرولیم ڈویژن ءِ دانا تفصیلات آن سمائی کریسہ دانا نوٹیفکیشن ءِ بنجائی حکومت و چینی کمپنی ءِ راہی کننگانے۔

یاتی مرے دا وختا چائنا نا کمپنی ایم سی سی Metallurgical company of China سیندک ٹی گولڈ کاپر مائننگ منصوبہ غا کاریم کننگ ءِ۔ چائنا کمپنی نا دا معائدہ 2022 ٹی ایسر مریک۔ اوکان پد دا کمپنی مونی دا منصوبہ ءِ برجاء تخننگ کن وفاقی حکومت آ کائک۔

ولے بلوچستان گورنمنٹ معائدہ نا ایسر مننگ آن مست 15 سال نا ودکی کرے۔

بلوچستان حکومت نا پاننگ ءِ کہ دا معائدہ نا ردئٹ چائنا کمپنی مونی 45 ملین ڈالر نا سوداگری کننگ کیک۔

گدرینگوک آ 30 سال آن سیندک ٹی خیسن، چاندی و کاپر نا مائننگ کننگ ءِ۔ دا وختا سیندک ٹی خیسن، چاندی و تانبہ نا بھاز بھلو کوڑ ارے۔