جہانی دین کرونا وائرس نا سوب آن بند انگا خوانندہ جاہ آتے ستمبر نا اولیکو ہفتہ غا ایس او پیز نا ردٹ ملنگ نا فیصلہ کننگا۔

دا فیصلہ بنجائی وزیر تعلیم شفقت محمود نا کماشی ٹی بین الصوبائی وزرائے تعلیم کانفرنس ٹی کننگا۔ ہراٹی غٹ صوبہ غاتا وزیر تعلیم آک اسے جاہ دا فیصلہ کریر کہ ستمبر نا اولیکو ہفتہ غا خوانندہ جاہ آتے ملننگ مریک۔

احوال نا ردٹ کہ اجلاس ٹی دا ام فیصلہ کننگا کہ خوانندہ جاہ آتے ملننگ آن مست کووڈ 19 نا وڑ ڈول و دا ناجوڑی نا جائزہ ہلنگ مریک۔

خوانندہ جاہ آتے ملننگ نا فیصلہ نا موکل تننگ کن پگہ دا فیصلہ ءِ نیشنل کمانڈ اینڈ آپریشن سینٹر (این سی او سی) آ راہی کننگ مریک۔

بنجائی وزیر تعلیم نا پاننگ نا ردٹ کہ ستمبر ٹی خوانندہ جاہ آتے ملننگ آن مست غٹ صوبابہ غاتا وزیر تعلیم آتا ارا مچی پین اڑ ایترہ۔

دا مچی دا گڑا آ ام موکل تننگانے کہ خوانندہ جاہ آتے ایس او پیز نا ردٹ امتحان آتے الننگ نا موکل مروئے۔
 
یاتی مرے خوانندہ جاہ ملننگ نا بابت بنجائی وزیر تعلیم شفقت محمود 2 جولائی آ بین الصوبائی وزراء کانفرنس بٹنگا ولے بنجائی وزیر تعلیم نا باوہ نا کذیت نا سوب آن او پدی مس اینو 7 جولائی آ بنجائی وزیر تعلیم نا کماشی ٹی مس۔ دا مچی ٹی چار انگا صوبہ غا وزیر تعلیم آک و آزاد کشمیر، گلگت بلتستان نا وزیر تعلیم آک ام اوار اسر۔ ہراڑے غٹ آک اسے جہی فیصلہ کریر کہ ستمبر نا اولیکو ہفتہ ٹی ایس او پیز نا ردٹ خوانندہ جاہ آتے ملننگ مریک۔

داستان ءِ عرب، براہوئی مزحمتی ادب نا پنہ غا

نوشت: محبوب شاہ

دی بلوچستان پوسٹ

مُست آن  برجاء۔۔۔۔۔۔۔۔۔۔۔۔۔

اسے وار اسیتون جلہو اسے نا توار مس دنکے نا گمان اسے مَست او سانڈ اس پاش کے تلار نا زی آن خلیغا آمبار جپ اس خلک او پد آن اسے تیز او کاٹار اس کنا لخ آ تخا ولے ای فلسطین نا تحریک اٹ اوار تمنگ نا وخت تینا لمہ جیجا نا کاٹم نا سوغندء ارفیسٹ کہ دشمن نا مونا ای سلہہ بٹپرہ ایلو کماش مدام کنے سماٹی مننگ نا پنت تسسس۔ دیسکہ ای فیصلہ کتویس اٹ کہ ہرا وڑ اوڑتون مون ایتیو کہ تیز انگا کاٹار کنا گٹ آن ارفنگا او اسے گونڈو توار اس کنا خف تیٹی پنا، سنگت مش اٹ خنکے پٹہ گڑا چرینگ نی امر ءُ جانباز اسے اس پدان چک خلکٹ اُراٹ خوش او توار اسے ٹی پاریٹ اڑے ابو داؤد نی اس ولے او زو تینا جوڑ تیا تینا ہںورءِ تخا پارے کرار سنگت کرار، اشارہ ٹی ہیت کریسہ کنا خفٹ اٹ باہ ءِ تینا تس پارے بہ خیرٹ سنگت خدا اتینے، کنے کنا خن تیا یخین الو وڑ وڑ انا سوال ارفنگ کن کنا جوڑک ملاس اسور او کنے تینا رند اٹ اسے تنک او غار اسیٹی بننگ کن کتی کرے۔ غار آنا تہٹی برف انا رند اٹ دے ٹک نا روشنائی، چانڑدہ نا طوبے نا ڈیک ءِ تسکہ۔ ہیت ہیت آن توار مش تیٹی پناکہ۔ ابو داؤد کرار آ کنا خف اٹ پارے سنگت دشمن نا مثال گند کشوکا کچک و اڑی آ خرما نا ءِ، ہیت ہیت آن خفک تے شِک مریرہ اونا اسے خف دے ٹک ایلو خف تے دیکی ہلنگ آ مریک او ہڑتوما خف تا نیام اٹ اونا خونی آ ملیءِ۔ او کنا سینہ غا تینا مُچ ءِ خلیسہ پارے داڑے ننا حالیت دا وڑ اٹی نا سینہ ٹی نا ساہ انا توار او کنا سینہ ٹی کنا سینہ ناتوار ننا اُست انا حوال ءِ دشمن آ سر کننگ کیک۔ دتر کنوکا دشمن ننا رندے گند کشوکا نہار آمبار ہلیک۔ او اودے مہمان نا خیال بس، اسے پدین ءُ آسڑدہ اس کشسا پارے ابوئے ابوئے ایلم داڑے تو نیکن پیالہ اس چاہ انا ہم کننگ کپرہ انتئے کہ درو و دیوال نا خف تیامبار مول ننا جاسوسی کیک۔ گپ گپ آ اونا مہر اٹ اونا خن تا روشنائی اٹی تینا اسے متکنو سنگت اسے نا عکسء ِ خناٹ خیسن آ خن تا ڈلگا غیرتی آ خڑینک آتیٹی اونا بشخندہ کنا مونا بس ولے بھاز زو تہار آ غار اٹ خن تیان اودیم مس، بے تیل آ ڈیوہ غامبار پڑکیسہ دم تس اونا باہ آن اسے دم دروکو ڈوکھیا او توار اس کنا خف تیٹی پنا پارے ابوئے قسمت اونا گپءِ کپیس، شیخ باسط نا پاسہ اونا بخت اونا کڑد اونا شہادت ایہن ہم شہادت نا ٹیکی وطن نا مہروان آ نیک بخت آ کے دو بریک ولدا ابو داؤد تینا خن تیان یلہ مروکا خڑینکءِ تینا ہور اٹ صفا کریسہ دنکے اودے اسے گیرام کروکو ہیت اس یات برے، اونا ڈکھی آ توار زوراک مس، بروت آکے تینا ول تریسہ پارے او اخس دشمن آتا کاٹمء ِ کنگ اخسے مِش تا گواچی کرے اخس ظالم آتا سنگر آکے اخس دشمن نا پول آکے دنز تس اخس لاری تباہ کرے، اللہ کریس تو اسے دے شہادت ننا۔۔۔۔ ولے زو چپ کرے دوتے تینا پیشانی ٹی خلک انت کہ اللہ ءِ منظور۔ خنک وطن نا شہادت آ ولدا پالسر ڈکھی و توار آسیٹی اے وطن نصیب ننے نا ہرا تل اٹ آسودہ ءِ خاک کے ءِ۔ او بندا سنگت نا یات اٹ تینا ہیتء گیرام کرے اونا ڈلگا خن تا چاگرڈ اٹ چولا غا کرنچ آتیٹی دے ٹک نا باسنی مخیسہ پاریکہ شہادت نا مزل مُر اف ابو داؤد جک سلیس پارے بشخس سنگت بش مس غار اٹ ٹنگوکا لوت آن کنے چنک اس بگوڑا مکھی نا دانہ گڑاس اِلار گڑ انا اسے ڈک اس کنا کٹ اٹ شاغا پارے سنگت دا مڈی ءِ مش تیٹی اسے میل خوافوکو ایڑ اس مدام توں اِرا توں آن پد ایتک، او تینا راستی کو دو انا پارہ غا اشارہ کرے پارے دا تاویتء کنکے بُزرگ اسیان ہلکونے، ای دشمن نا سم تیان بچیو۔ اونا ہیت آتیان سما تما کہ او دشمن نا لشکر نا چاری ءِ ہراکہ توفک او جنگی ساز و سامان آن پُر ٹرک آک شیف سڑک آ بننگ نا گمان اسکہ ہمو پول ہم ہندا سڑک نا زی آ جوڑ اس ہرات دنز تننگ نا اودے پاننگاسس اس۔ مقصد ہڑتوماتا اسٹ اس داسہ ہڑتوماک فیصلہ کریر کہ دشمن نا لشکرے او پول اے اسہ جاہ اسے وار اٹ بس کروئی ءِ۔

بلوچستان نا ونڈ آ وفاقی محکمہ تیٹی مروکا ملازم آتا لوکل تا جانچ ہلنگ نا عمل برجاء ءِ۔ کوئٹہ آن دوئی مروکا 122 لوکل تا دروغ انا بنماس آ پد بٹنگارک۔

ڈپٹی کمشنر کوئٹہ اورنگ زیب بادینی میڈیا حوالکار آتیتون ہیت کریسہ پارے کہ بلوچستان نا ونڈ آ بنجائی محکمہ تیٹی  مروکا ملازم آتا لوکل تا جانچ ہلنگ وختا کوئٹہ آن دوئی مروکا 122 جعلی لوکل پد بٹنگار۔

ایلو لوکل تا جانچ ہلنگ نا عمل برجاء ءِ۔ ارا دے مست بلوچستان نا سر وزیر جام کمال تینا اسہ ٹوئیٹ اسیٹی پاریسس کہ جعلی لوکل آتے آ بلوچستان نا بشخ آ بنجائی ادارہ تیٹی ملازمت کروک آتا لوکل تے پد بٹنا۔

یات مرے کہ ساڑی آ صوبئی حکومت نا جعلی لوکل آتا پد بٹنگ نا فیصلہ دا رد ئٹ اولی گام ءِ۔ بلوچستان نا کل ڈپٹی کمشنر تے برجاء لوکل آتا اسکروٹنی نا ہدایت ء شینک کننگانے۔

داڑان مسٹ ڈپٹی کمشنر مستونگ 400 جعلی لوکل تے پد بٹیس۔

انجمن تاجران نا پگہ اسیکہ وا بازار ٹی پورو شٹر ڈاون ہڑتال، تیوہ آ مارکیٹ و کاروباری ہند آک بند مرور۔

تدوکا دے فوڈ اتھارٹی بازار ٹی کاروائی کریسس و بند انگا دوکان تا خواجہ آتے ہم ڈنڈ کریسس ہرانا برخلاف تاجر یونین سلطان شہید چوک آ برانزی مچی کریر، برانز آن تاجر یونین نا صدر غلام سرور شاہوانی میراورنگزیب قمبرانی، نیشنل پارٹی نا صدر نواز بلوچ، میر سکندرخان ملازئی، بلوچستان نیشنل پارٹی نا میر غفار مینگل، بی ایس او نا مرکزی کمیٹی نا ممبر جہانگیر منظور بلوچ، بی ایس او پجار نا ناصر بلوچ و ایلوفک تران کریسہ پاریر کہ انتظامیہ دکاندار آتے دزگیر کریسہ اوفتان زر ہلیرہ، ہرانا ہچ ءُ رسید اس تفسہ و تیوہ آ زر ءِ کرپشن اٹ زوال کننگو۔

او پاریر کہ تاجر یونین اسسٹنٹ کمشنر نا رویہ بھاز بد و بے شرفی اس ہرانا خلاف سخت برانز برجاہ مرو۔ ہڑتال نا وختا شار نا تیوہ آ تجارتی و کاروباری کُن خوری، بیکری، میڈیکل تون اوار تیوہ آ دوکان آک بند مسو۔

انجمن تاجران بازار یونین راہشونک و نیشنل پارٹی بی این پی و پی ٹی آئی چیف سکیریٹری بلوچستان آن خواست کرینے کہ اسسٹنٹ کمشنر مستونگ نا قانود آن چپ رکھوک گام و چیف آفیسر مستونگ نا بے لائخی نا نوٹس ہلیسہ ہڑتوما پن کروکا آفسر آتے دمدستی وڑ ئٹ مستونگ آن بدلی کیر، نئے تو ننا دا برانز نا لڑ برجاء مرو۔

بلوچستان نا سیمی آ علاقہ چمن ٹی تالاف ٹی زاری ءُ گیس مننگ آن 7 بندغ مرگ نا گواچی۔

پولیس نا رد ئٹ ویل بلوچستان نا سیمی آ علاقہ چمن ٹی ٹرنچ روڈ آ دوکان ٹی مونا بس، تالاف ٹی چُناتے بچیفنگ نا سوب آن تالاف ٹی ہننگ آن تیوہ آ بندغ آک مرگ نا گواچی مسر۔

مرگ نا گواچی مروکا جون آک دمدستی وڑ ئٹ سول ہسپتال آ سر کننگار اندن جون آتے دوئی مننگ آن گُڈ خاہوت آتا دو ٹی تننگانو۔ ویل ئنا رد ئٹ پٹ و پول برجاہ ءِ۔

دا احوال آتیان گُڈ کہ افغان طالبان روس آن زر ہلیسہ امریکی فوجی تے ٹک کرینے، امریکا ٹی نغدکار آتا پاننگ ءِ کہ افغان معاہدہ نا رد ئٹ طالبان آ یخین کننگ مفک۔

دا تُمت نا طالبان و امریکا نا نیام ئٹی ڈیل آ ہچ ءُ فرخ ئس تمتو و صدر ڈونلڈ ٹرمپ افغانستان آن امریکی فوجی تا پیشن مننگ نا پروگرام ٹی ہچو بدلی ئس کتو۔ 

امریکی میڈیا نا رد ئٹ امریکی فوجی تے طالبان نا دو آن کسفنگ ٹی روس نا کڑدار نا رسینگوک حوال تا ردئٹ انٹیلیجنس کارندہ صدر ٹرمپ ءِ برجاہ سال ٹی بیست ہفت فروری آ اسہ ہردے ئی حوال تننگ نا وختا تس۔ ولے امریکا ولدا ہم اِرا دے آن گُڈ خلیجی ریاست قطر نا دارالحکومت دوحہ ٹی طالبان تون ڈیل آ دستخط کریسس۔

دا گمان ودی مس کہ امریکا نوزدہ سال آن برجاہ جنگ ءِ ایسر کریسہ پیشتمنگ کیک۔ معاہدہ نا مسہ دے آن گُڈ مسہ مارچ آ امریکی صدر و طالبان آتا لیڈر ملا عبدالغنی برادر نا نیام اٹی ٹیلیفون آ 35 منٹ اسکان ہیت وگپ مس۔

معائدہ نا رد ئٹ طالبان تینا جلہو تے کم کننگ نا پابند ئس۔ او دانا ہم وعدہ کرینے اونا کوزہ کروکا علاقہ غاتیٹی شدت پسند ٹولی تے ودشت کن ہلنگپرو۔ دا وختا نیمہ نا کچ افغان علاقہ غاک طالبان آتا دوٹی ءِ۔ ولے سوغبد آتیان چپ ملک ٹی بے دادی ٹی ودکی مسونے۔

دا معائدہ نا ناقدین ٹی اوار امریکی کانگریس نا ریپبلکن باسک مائیک والز نا پاننگ ءِ کہ معائدہ بیرہ امریکی فوج نا پیشن مننگ نا نیمون ئسے۔ والز نا پاننگ نا ردئٹ کہ طالب آتا پارہ غان بھاز وخت بے دادی کننگ آن دا گڑا پاش مریک کہ او معائدہ غا عمل کننگ آ بے پام ءِ۔

افغانستان ٹی امریکی فوجی آپریشن نا رکھ کروکا میرین جنرل فرینک میکینزی جون نا نیام اٹی پاریسس کہ اودے یخین اف کہ طالبان آک ڈیل آ پورو عمل کیرہ اندا سوب او امریکی فوج تا زو واپس بننگ نا حق اٹی اف۔ امریکی ڈکوک ادارہ سی آئی اے نا تدوکا ڈپٹی ڈائریکٹر مائیک مورل بیست چار جون آ ایوان نمائندگان نا انٹیلیجنس و انسداد دہشت گردی نا کمیٹی ِء پاریسس کہ افغان طالبان سن 2001 نا مقابلہ ٹی داسا عسکری و سیاسی وڑ ئٹ سوگو خننگک۔

بھاز آ فوجی چاہندار آتا پاننگ ءِ کہ طالبان ءِ امریکی فوجی تے کسفنگ کن روس نا کنڈان مالی کمک نا ہچ گرج اف۔ افغان امور نا اسے چاہندار اس و امریکی انسٹیٹیوٹ برائے امن تون تفوک اسکاٹ اسمتھ نا خیال ء کہ گواچن ئٹ دا ہیت اہم کہ انت طالب آک معائدہ نا ٹک آتے برجا تخرہ یا نہ۔ ریپبلیکن و ڈیموکریٹک پارٹی تون اوار اوار رکھوک چاہندارک آتا پاننگے کہ داسکان طالبان چار توہ مہالو مروکا معاہدے غا پورو بننگ اف۔

طالبان امریکا معاہدہ نا رد ئٹ امریکا ءِ مئی سن 2021 اسکان افغانستان آن تینا فوج نا کشنگ ءِ پورو کروئی ءِ۔ دا وخت اسکان امریکا افغانستان ٹی تینا فوجی تا کچ ءِ یانزدہ ہزار آن کم کریسہ ہشت ہزار شش سد کرینے۔ فوج نا کچ ء کم کننگ نا دا عمل شیڈول نا حساب ئٹی ءِ۔ لس تاثر دادے کہ صدر ٹرمپ ہر وڑ ئٹ دا جنگی آ ملک ٹی تینا فوجی تا کچ ءِ کم کننگ خوائک۔

ہسپتال آتا بابت ٹی بے پامی نا رد ءُ حوال شینگ کننگانے ۔ بلوچستان حکومت

بلوچستان حکومت نا ترجمان لیاقت شاہوانی احوال کار آتون ہیت و گپ کریسہ پارے بلوچستان نا بھلا شار کوئٹہ تون اوار ایلو شار آتیٹی بندغ آک خیال داری کننگو ولے بھلا عئید نا وخت آ کرونا وائرس نا زیات تالان مننگ نا خلیس ارے۔اگہ عئید نا وختا شاریک مال ہلننگ آ خیال داری کتور تو دا ناجوڑی نا زیات مننگ نا خلیس مریک۔

او مونی پارے کہ مال آتیٹی کانگو وائرس نا ہم خطرہ ارے اندا سوب آن صوبائی حکومت مال تا پڑی تے شارتان پیشن کننگ نا فیصلہ کننگانے۔

لیاقت شاہوانی مونی پارے کہ مال آتا پڑی تے مسہ جاگہ غا بشخ کننگ مریک۔ مال بہا کروک آتیکن ام ایس او پیز آ عمل کننگ مریک۔ ایس او پیز آتیان چپ ہنوک آتا خلاف کاروائی کننگ مریک۔

او پاریر عئید نماز کن ام ایس او پیز جوڑ کننگ مریک۔

ترجمان بلوچستان حکومت پارے کہ گدرینگوک آ ہفتہ ٹی کرونا نا کیس آتیٹی کمبوتی مسونے۔ دُراخ مروکا بندغ آتیٹی گیشتری بسونے دا اسے جوانو ہیت ئسے ولے کیس آتا کمی نا سوب آن بندغ آک ٹیسٹ کننگ ءِ کم کرینو۔