چمشانک
ناول – راجہ گدھ

نوشت: غنی بلوچ

دی بلوچستان پوسٹ

اگہ نن اردو ادب ٹی شاہکار یا بھلا تخلیق آتا زیہا ہیت کین و خاص کر ناول آتا بارہ ٹی ۔ گڑا گڑاس اندنو ناول ءُ ہرا اردو ٹی بھلو تخلیق یعنی شاہکار پاننگرہ۔

دُنکہ قرتہ العین حیدر نا ’’آگ کا دریا “، عبداللہ حسین نا ’’اداس نسلیں“، مرزا اطہر بیگ نا ’’غلام باغ “، بانو قدسیہ نا ’’راجہ گدھ “۔ دا چار ناول امو ناول آکو ہرا اردو ادب ٹی غٹ آن بھلا تخلیق پاننگرہ۔ ولے داڑے نن ہیت کینہ بانو قدسیہ نا ناول ’’راجہ گدھ “ نا بابت ئٹ۔

دا ناول ءِ بلکن 1980ء ٹی بانو قدسیہ نوشتہ کرینے۔ دا ناول ٹی بنداوی بحث چاگرد نا ویل آک، تپئی چک تاڑ آتا بارہ ٹی ءِ۔ دا ناول ٹی گچین انگا کڑدارک سیمی شاہ اونا ہم جماعت قیوم ءُ۔

ننا چاگرد ٹی اسے ویل اس بھلا تپہ یعنی ’’اپر کلاس“ و او شیفکو تپہ یعنی ’’لوئر کلاس‘‘ نا ءِ۔

سیمی شاہ؟
( “ وہ گلبرگی معاشرے کی پیداوار تھی “ ناول آن اقتباس )

قیوم؟ خلق سے آن بروکا شیفکو تپہ یعنی لوئر کلاس آن تعلق تخاکہ۔

آفتاب؟
( “امریکی فلموں کا آہستہ آہستہ چڑھتا سورج۔۔۔۔ موسیقی اور لے کے ساتھ ۔۔۔۔ روشن کرتا ہوا۔۔۔۔ گرمی پھیلاتا ہوا۔۔۔۔ اس سکس ملین ڈالر مین نے بھاری آواز میں کہا میرا نام آفتاب ہے“۔ ناول آن اقتباس )

یعنی آفتاب ہم بھلا تپہ غان تعلق تخاکہ۔

سیمی شاہ گلبرک نا رہینگوک، ہراڑے مادیت پرستی تینا تیوی زور ٹی ءِ۔ او ہرا گڑا نا است خواہی تخر اونا ہلنگ بھاز ہڑزان ءِ۔ اگہ کبین ارے تو او ذہنی ایشکامی ءِ۔ سیمی شاہ ہراڑکن کلاس ٹی ہر مار تون مخنگ، ہیت کننگ ہچو ویل اس اف۔ اندن سیمی شاہ ءِ تینا کلاس نا مار آفتاب تون عشق مریک۔ او ہم عشق لا حاصل۔۔۔۔۔

آفتاب ہرا کہ تینا ذات خود فریبی ٹی ءِ۔ ہرا مدامی تینکن آسرات ءُ کسر پٹک یا پٹننگ نا کوشست کیک۔ آفتاب مدامی اندا سرپد مریک کہ کنا نیام ٹی ہر فیصلہ مالو آن مسونے۔ اندا سوب آن کنتون ہر ہمو گڑا یا ویل مریک ہرانا فیصلہ مالو آن مسونے۔

دا ناول چاگرد نا تپئی ویل آتون اوار نفسیاتی ویل آتا ہم ءِ کیک ۔ اندن کہ چاگرد ٹی اسے نفسیاتی ویل اس وت کشی نا ءِ۔

( “ پھر سیمی شاہ اٹھی اور بولی۔۔۔ سر آپ کا کیا خیال ہے کہ اگر معاشرہ آئیڈیل ہو تو پھر کیا کوئی فرد کبھی خود کشی کر سکتا ہے “۔ ناول آن اقتباس )

انداٹی اسے شرہ اس چاگرد ئٹ تینے تینٹ کسفنگ یعنی وت کشی نا بابت بش مریک۔ ایسر ٹی ہیت داڑے سر مریک کہ وت کشی چاگرد ٹی اسے ویل ئسے نا گڈیکو ورندی ءِ۔ گواچن آ سوب ابدال مننگ ءِ۔ ابدال بے آسودہ آ است خواہی تا سوب آن مریک۔ ہرا مثبت ہم مننگ کیک، منفی ہم مننگ کیک۔ 

ناول نا بنا ٹی اسے کڑدار اس پروفیسر سہیل ہم ارے۔ ہرا روایتی بندغ ئسے نا مننگ نا جاگہ غا کتاب آتا شونک تخیسہ ہم  تینا تہہ ئنا اَنا ءِ زندہ تخانے۔ حلال و حرام نا تھیوری تروکا پروفیسر سہیل بنداوی وڑٹ حرام ءِ ہم دیوانگی نا سوب پائک۔

قیوم!
گدھ جاتی یعنی ڈھونڈ خور ذات نا ہمو انسان ہرا بُنداوی وڑٹ اسے گڑاسیکن ہم اولیکو گام ءِ ارفپک او مدامی ہر ہمو گڑا نا پاراغا کائک ہرا اوڑا حرام کننگانے اندا گڑا قیوم تون سیمی شاہ نا معاملہ ٹی ہم مریک۔ ہرا وختا کہ سیمی شاہ کذیت کیک۔ انداکان قیوم نا اسے پین پوسکنو دورئس بناء مریک۔ 

اردو ٹی پارہ ’’وہیں پر پہنچا جہاں کا خمیر تھا“ اندا نا ڈول قیوم نا اوڑدئی عابدہ تون مریک۔ قیوم ہرا بے سوبی عشق نا سوب آن حرام نا پٹ و پول ٹی سرگردان ء، اسے وار پدی قیوم نا زند ٹی ’’امتل‘‘ بریک۔ روح نا حرام کنوکائے حرام رزق کنوک اس رسینگک ولے امتل و قیوم ٹی دا گڑا اسہ وڑ ءِ کہ ہرتوماک حرام کننگ آ بھلن مسونو۔ قیوم حرام کنوکا ہمو ڈھونڈخور کہ امتل ہم اونا سنگتی آ پورو بتو ایسر ٹی اونا ہم خون مریک۔

اندن راجہ گدھ یعنی قیوم برام نا است خواہی کیک ولے حرام کنوکائے اوڑے ہم ہمو ورندی رسینگک ہرا بناء آن رسینگسٹ برسہ ءِ۔ برام حلال ءُ گڑاس ءِ دانا حرام تون اواری مننگ کپک۔

 دا ناول ٹی بانو قدسیہ پاش آ بندغ آتا کڑدار آتا زیہا شرہ کرینے ولے بندغ آتا جاگہ غا چُک آتا جہان نا کُمک ہلیک۔

 چکاک ہرا ڈھونڈ خور نا ابدالی ءِ اونا حرام کُننگ نا سوب سرپد مریسہ ڈھونڈ خور ءِ بندغ گوندرہ۔ چُکاک ڈھونڈ خور ءِ جنگل آن اندا سوب آن کشنگ خوارہ کہ ڈھونڈ خور نا کُننگ نا عمل گواچنی خواری اس اف بلکن خواری آن مُر نریسہ رزق ہلنگ نا ہمو آسرات آ کسر ءِ ہرا حرام نا پارہ غا دیک، ہرادے ڈھونڈ خور ہم انسان آن ارفینے۔ گڑا دُن ڈھونڈ خور ءِ جنگل آن کشوئی ءِ کہ اونا سوب آن ایلو چکاک ہم ابدال مریرہ و حرام نا پارہ غا کارہ ۔

بلوچستان نا جتا علاقہ غاتیٹ کینسر نا مرض آن دا وخت اسکان سد آ بندغ آک کذیت کرینو۔ ہردے کس ئسے نا مرض آن کہنگ نا دا حوال اسہ لس ءُ ہیت مسونے۔

ضلع نوشکے ئٹ کینسر نا گواچی مریسہ کذیت کروک آتا پن تا بھلو لڑ ئسے۔ دا کہوک آتیٹ چنا و بھلا تیتون اوار ورناک ہم اوار ءُ۔

اینو نوشکی نا علاقہ جورکین آن تعلقدار جہانزیب مینگل کینسر آن کذیت کرے۔ جہانزیب کراچی نا ہسپتال اسیٹی کینسر تون جنگ تننگ ئس۔

چار دے مالو خضدار آن تعلقدار چنک سن آفتاب موسیانی ہم کینسر آن کذیت کرے۔ داکان مالو تدوکا توہ نا 30 اپریل آ مند نا علاقہ اپسی کہن ٹی سم کاری نا واقعہ اسیٹی کینسر نا گواچی مروک چنک سن آ امام‘ مار شیر محمد نا کذیت کرے۔

علاقائی مخلوق نا پاننگے کہ امام تیل ڈوہوک گاڑی تیتون تد ئس کہ فورس ئنا کارندہ غاک اوفتیا فیرنگ کریر ہراڑان او بیران مس۔

بلوچستان ئٹ کینسر نا ناجوڑ آتا کہینگ نا زیاتی نا سوب آتیٹ ہسپتال تا مفرنگ اوارے۔ غریب آ اراتیان تعلقدار مخلوق تینا  ناجوڑ آتے بھلا شار و ہسپتال آتیٹ علاج کرفنگ کپسہ۔

حکومت نا پارہ غان بلوچستان ئٹ کینسر تون مون تس کن ہسپتال ٹہیفنگ نا پاننگانے ولے دائسکان پاش وڑٹ ہچ خننگپک۔

بلوچستان بیوس

کنا تو پن بلوچستان بیوس
کروءِ کنکہ پا ارمان دیرَس

کنے جن مادری نا غمک کُنگُر
کناءِ کَٹیا کُل کیرہ او چَس

برک نے راسکو آ دیو ارِّف
گچینا رنگ نا سوزا امر مس

چڑہ مورینک نا ماتن کناءِ
کنے لتاڑسا او کار پاپس

نہ بجلی گیس نئے کہ دیر کنتو
اَرا سے غم اَرا اف کنتو ویلس

کروناءِ کنے چَٹی کریرک
رقیباتے کنا مولا خَلے بَس

کنے خیسُن تا خواجہ پارہ لیکن
ہتے ایتے کنے حقءِ کنا کس

ظہوری حقنا ایتے کروکا
کنا ایلم نا افک انتکہ ڈس

ظہورصدیقی

خوانندہ غا جنگول

دی بلوچستان پوسٹ سرگپ

اولیکو مئی آ دی بلوچستان نیوز ڈیسک قلات نا مشی آ علاقہ ئٹ اسہ سلا بند مڑ تس ئسے نا حوال ءِ تس، ہراٹی ہڑتوما پارہ غاتیان جانی نسخان نا دعویٰ کننگا۔ ایلو دے بلوچ سلاء بند گَل بلوچ لبریشن آرمی تینا اسہ شینک کروک حوال اسیٹی دا پک کریسہ پارے کہ دا سلاء بند مڑ تس پاکستانی فوج و اوفتا گَل نا نیامٹ مسونے، و گھنٹہ آتے اسکان برجاء مروک دا مڑتس ئٹ اوفتا اِرا سنگت شاہ داد بلوچ و احسان بلوچ کذیت کرینو۔

گَل دعویٰ کرے کہ ہڑتوماک احسان و شاہ داد تدوکا اسہ سال آن بی ایل اے نا بشخ ئسر۔ دوارہ دا شابیت آ حوالک مونا بسر کہ ہڑتوما ورناک بھاز خوانندہ ئسر، و پاکستان نا اسہ پنی خوانفنگ نا ادارہ قائد اعظم یونیورسٹی آن ماسٹرز کریسر و دافتیان اسٹ کرونا دَین آن مُست ایم فل ہم کننگ ئس۔ دا حوال اوفتا سنگت، ہم جماعت، استاد و خلقت کن گوڑیفوک ئس۔ بلوچ مخلوق دا ہیت آ الّمی گوڑینگوک ئس کہ داخہ مرغنو وختس او امر سرسوبی تون اسہ سلاء بند تنظیم ئسے ٹی اوار منننگ و کاریم کننگ ءِ ڈھکنگ ئٹ سرسوب مسر، واہم داڑا گوڑینگوک الور کہ اوفتون بھلو ڈگری ئس۔

اندن پاکستانی مخلوق دا ہیت آ گوڑینگوک ئس کہ امر اِرا بڑز تعلیم دوئی کروک ورنا اسہ اندنو سلاء بند گَل ئسے نا بشخ مسر، ہرا پاکستان نا برخلاف بلوچستان نا آجوئی کن جنگ کننگے۔ اوفتا دا بے باوری کیفیت، گواچن ئٹ بلوچستان ئٹ بیست سال آن برجاء آجوئی نا تحریک آن ناولدی و دانا گواچن آتیان بے سمائی آ تالان ءِ۔ دا ہیت آ شرہ کننگ مریک کہ بلوچسات نا حالیت آتیان مخلوق نا بے سمائی اسہ رزا نا خف پُر کننگ ئسے، کہ مخلوق ءِ تینا اُرانا تلہ اسکان نا ہم چاہنداری دوئی مف۔

پاکستان نا خوانندہ تپہ ءِ دا ہیت بائدے سما مرے کہ احسان و شاہ داد اولیکو بھاز خوانوک بلوچ افس ہرا آجوئی نا تحریک نا بشخ ءُ۔ بلوچسان ئٹ برجاء تحریک زیات خوانندہ بلوچ سیاسی باسک و جنگول آتیا تالان ءِ۔ داڑ اسکان کہ بلوچساتن نا تیوہ غاتیان بھلو اِرا سلاء بند گل آتا سرکماش آک ہم اندن بھاز خوانندہ بلوچ ءُ، ہرافک خواننگ آن گڈ روزگاری زند ئسے نا گچین کننگ نا جاگہ غا برجاء تحریک نا بشخ مسر۔ دافتیٹ بلوچستان لبریشن فرنٹ نا سرکماش ڈاکٹر اللہ نظر بلوچ، ہرا اسہ گولڈ میڈلسٹ ایم بی بی ایس ڈاکٹر ئسے و بلوچ لبریشن آرمی نا سرکماش بشیر زیب بلوچ ہرا بلوچستان یونیورسٹی آن ماسٹرز کرینے، اوار ءُ۔ چَس کروکا ہیت دادے کہ ہڑتوماک خوانندہ سیاست ئٹ مون ئٹ ئسر، و بلوچستان نا تیوہ غاتیان بھلا خوانندہ گل بلوچ اسٹوڈنٹس آرگنائزیشن نا چیئرمین گدرینگانو۔ لس آ دود آتیان چپ قبائلی سردار ہم افس بلکن نیام تپہ نا اُرا تیان تعلقداری تخرہ۔

دا ہیت ءِ سرپد مننگ پَکار ءِ کہ بلوچستان نا خوانندہ ورناتے کس ریفسہ اسہ طاغت تخوک لشکر ئسے نا مونا مڑ تننگ کن بلوچ آجوئی نا تحریک ئٹ اوار کننگ اف، بلکن دا تحریک ءِ تینٹ خوانندہ ورناک بناء کرینو۔

ساڑی آ حکومت نا بے پامی نا سوب آن خواننگ نا ادارہ غاک بدحالی نا گواچی ءُ – ترجمان

بی ایس او پجار نا مرکزی ترجمان تینا بیان اٹی پارینے حکومت نا تعلیمی ادارہ غاتیا خن تر کروکا نظریہ آک بے وسی نا علامت ءُ۔ خضدار ویمن یونیورسٹی و سکندر یونیورسٹی نا بند کننگ تون اوار تربت نا تعلیمی ادارہ نا دفتر ءِ ہُشنگ سگ آن پیشن ءِ۔ خواننگ نا ادارہ غاتے ٹک کننگ حکومت نا پوسکنو کڑدار اس اف، پنڈوخ آ حکومت و استحصالی آ تپہ نا نمائندہ غاتا اولیکو دے آن کوشست مسنے بلوچستان ءِ خواننگ نا آسراتی تیان بے مراد کے۔

او پارے بلوچ سرخیل آتا بھاز آ کوشست آتے آن بلوچستان یونیورسٹی، بولان میڈیکل کمپلیکس، وومن یونیورسٹی تون اوار کالج آک بلوچستان ءِ دوئی مسر ولے ساڑی آ حکومت نا بے پامی نا سوب آن دا ادارہ غاک ہم پد تمنگ نا نیمہ غا مُستی ہننگ ءُ۔ بلوچستان یونیورسٹی نا است ہسون کروکا اسکینڈل نا سوب آک دائسکان مونی بتنو و بی ایم سی کالج نا بد آ حالیت آتے آن اندا خننگک کہ ساڑی آ حکومت خواننگ نا ادارہ غاتا بدحالی و ادارہ تے بند کننگ نا پاش وڑٹ ذمہ وار ءِ۔

ترجمان پارے کہ اسمبلی ٹی تولوکا اپوزیشن خالی تنیا پن نا اپوزیشن نا کڑدار ءِ ایسری تننگے۔ خواننگ نا ویل تا بابت آ اپوزیشن گام ارفتنے۔ اپوزیشن نا فرض مریک بلوچستان نا خواننگ نا ادارہ غاتے بند کننگ نا چم بازی آتا برخلاف خوانندہ غاتون کمک مرے۔

اوفک پاریر کہ مست ئنا حکومت نا پارہ غان بھاز انگا خواری و کوشست آتے آن پد بلوچستان نا ہر علاقہ ٹی کالج، یونیورسٹیک و وومن یونیورسٹی نا موکل تننگ مس۔ دا بلوچستان کن اسہ بھلو کاریم ئسے آن کم الو۔ دا کالج و یونیورسٹی تیان بزگ آ خلقت نا چناک تعلیم دوئی کرینو و دا ادارہ غاتا بند کننگ لائخ آ خوانندہ غاتا کسفنگ نا وڑ ءِ۔ و دا وڑنگا غزہ آ تیان ورناک است کٹہ و ملی ٹی بد ءُ خیال شاغسہ ہچ وڑ نا گام ارفنگ آن خلپسہ۔

ترجمان نا مونی پاننگ ئس کہ خواننگ ہر اسٹ نا بنماسی آ حق ءِ۔ دا حکومت و خلقت نا نمائندہ غاتا فرض ءِ کہ اوفک تینا ایب کیب یا خڑک ئنا تعلیمی ادارہ تا بچیفنگ نا خاتر گام گیچ کیر و خواننگ نا ادارہ غاتے تینا چناتا بروکا وخت سرپد مریسہ ساڑی آ چم بازی تیان بچفر۔ بی ایس او پجار خواننگ نا ادارہ غا تا بند کننگ نا چم بازی ءِ ہچ وڑ منیپک و ہمیش آئن نا دیوال تا وڑ مون ایتو۔

گیشتری حوال آتا رِد ئٹ پنی قبائلی شخصیت میر عطاء محمد مینگل تعلقداری غلام پڑینز و اونا مار میر مصری خان مینگل نا تدوکا دے تیٹ طب خراب مننگ نا سوب آن او تینا کورونا ٹیسٹ ءِ کریر، ہفتہ نا دے رزلٹ تا پازیٹو بس و ہفتہ نا دے آن او شیخ زید ہسپتال کوئٹہ ٹی رکھ کننگانو۔

ریسنگوک حوال تا رد ئٹ اونا مخلوق پارے نن محکمہ جانجوڑی و شہید نواب غوث بخش رئیسانی ہسپتال آ ہنان کہ ننا خاہوت نا ایلو بندغاتا ٹیسٹ ءِ ہلیر ولے محکمہ جانجوڑی نا کوالخواہ تا سوب آن ہچو پام تننگتو و نا اوفتا ٹیم ننا اُراغا بننگ کرے۔

او پارے کہ شہید غوث بخش ہسپتال آن ننے تینا مُچ خاہوت نا بندغا تے ہسپتال ہتنگ نا پاریر کہ نن ہسپتال ٹی نمونا الون ولے خاہوت ٹی چنکو چُنا ہم ارے و کچ ہم زیات ءِ۔ ہسپتال اسکان ہتنگ آ سختی بھاز مننگ کیک۔

او پاریر کہ نن صوبائی حکومت نا ترجمان تون حوال کننگ اُن، و محکمہ جانجوڑی نا کولخواہ نا کمک نہ کننگ نا بابت حوال ترون۔

پرائیویٹ اسکولز ایسوسی ایشن نوشکے نا کماش جعفر علی بادینی، عبیدللہ مینگل ءُ سید حق نواز شاہ 28 پرائیویٹ اسکول آتا نمائندہ غاتا اَواری ٹی نوشکی پریس کلب ئٹ تران کریسہ پاریر کہ بلوچستان نا وڑنگا پد تموکا صوبہ ٹی پرائیویٹ اسکول آک حکومتی کمک آن بیدس ہفت ءُ نیم لکھ مار و مسنتے  خوانفنگو۔ اُوڑتون اَوار اَوار سی ہزار استاد آتے روزگار ہم رسینگانے۔ دا جہانی وبا کرونا وائرس آن کہ ہراڑے زند نا ہر بشخ دانا گواچی مسونے ہموڑے پرائیویٹ اسکول آک ہم بھاز آ سختی تا گواچیءُ۔

مونی تران کریسہ اوفک پاریر کہ لاک ڈاؤن نا سوب آن اسکول آک بند ءُ چناتا لُمہ باوہ غاک فیس جمع کننگ نا طاغت تخپسہ اندا سوب آن ہزار آ استاد آک بے روزگار مریسہ بدحالی نا زند گدریفسہ ءُ۔ ایلو پارہ غان بلوچستان حکومت ہم پرائیویٹ اسکول آتا پارہ غا خف تننگ اف۔

اوفک مُستی پاریر کہ پرائیویٹ اسکول والاک وفاقی ءِ صوبائی حکومت نا دا وعدہ نا سوب آن وام ہلننگ آ گزارہ کریرہ کہ 1 جون آن اسکول آتیٹی خواننگ ءُ خوانفنگ نا بنا مریک، حالیت آک ولدا جوان مریرہ ولے داسا پرائیویٹ اسکول آتا صلہ آن بیدس پانزدہ جولائی اسکان اسکول آتے بند تخننگ نا پڑو کننگا و دا ہم پارہ کہ پانزدہ جولائی آن پد ہم حالیت آک پاش افس کہ امر مریر۔

اوفتا پاننگ ئس کہ دا فیصلہ نا مونا پرائیویٹ اسکولز ایسوسی ایشن تیوی مُلک ٹی احتجاج کننگ ءِ۔ نن ہم نوشکی آن حکومت نا دا فیصلہ ءِ منیپنہ۔

مون مُستی پاریر کہ نوشکے ٹی ہراڈے دائسکان کرونا وائرس نا اَسے ہم کیس اس متنے داڑے ہم اسکول آتے بند کننگ سرپدی آن پیشن ءِ۔ فروری نا توہ آن خوانندہ جاہ آتے بند کننگانے ولے بازار ٹی لاک ڈاؤن نا بیرہ پِن اَرے پین ہچ اف۔

تران نا ایسر ٹی پاریر کہ حکومت نا پارہ غان امتحان آن بیدس چناتے پاس کننگ تعلیم دشمنی ئسے۔ نن حکومت ءِ دا پاننگ خوانہ کہ اگہ او پرائیویٹ اسکول والاتے تینا صلہ ٹی اَوار کتو گُڑا پرائیویٹ اسکول والاک حکومت نا فیصلہ نا پابند افس۔ و نن نوشکے ٹی 1 جون آن پرائیویٹ اسکول آتے ملون خواننگ و خوانفنگ نا بنا مرو ۔

نیشنل ڈیموکریٹک پارٹی نا راہشون ڈاکٹر عبدالحئی بلوچ پارینے کہ بلوچستان معدنی دولت آن سیر ءِ داڑان بیدس ہم اودے خواننگ آن مُر توننگ نا ہرا زوراک آ پالیسیک ٹہیفنگسہ ءُ داڑان زیات ظلم و زوراکی انت مرو۔

اونا پاننگ ءِ کہ خضدار بلوچستان نا ارٹمیکو بھلا شار ءِ۔ تینا ایب کیب آن مکران، رخشان، قلات ڈویژن ءِ اوار شاغک۔ داڑے پین زیات خواننگ نا ادارہ غاتا خواست ءِ۔ حکومت، خضدار میڈیکل کالج نا ماڑی ءِ ضلعی بست و بند ءِ مُستی دروکاتے تننگ ءِ، بلوچستان حکومت تینا پالیسی نا اسیکہ وا جاچ اس ہلے۔

ڈاکٹر عبدالحئی بلوچ نا مُستی پاننگے کہ حکومت نا بلوچستان خضدار ویمن یونیورسٹی ءِ بند کننگ زوراکی ئسے۔ نن خوانہ بائدے تیوی ضلع غاتیت پین خواننگ نا ادارہ و کسب ہیل تس نا ادارہ ملنگے۔

او پارے کہ حکومت خواننگ تون تینا دشمن داری ءِ ایسر کے۔