بلوچستان نا ضلع دکی ئٹ نادرست بندغ آک کولا کانڑ ئٹ کاریم کروک مزورکار تیا جلہو کرینو ہرانا سوب آن کم آن کم 20 مزورکار مرگ ئنا گواچی و ہفت ٹپی مسونو۔
تدینی نا برخلاف آل پارٹیز نا خواست آ شٹرڈاؤن ہڑتال مننگ ءِ۔ مزورکار تنظیم آک ہم کوئٹہ شار نا بنجائی باچا خان چوک آ تخیسہ برانز بناء کرینو۔
کوالخواء تا رِدئٹ تدینی کوئٹہ آن کم و وَد 220 کلومیٹر مُر ضلع دکی ئٹ پنچ شمبے و جمعہ نا نیامئی نن مس۔
ایس پی دکی آصف شفیع میڈیا نمائندہ خاتے پارے کہ سی آن چِل ئنا کچ ئٹ سلہہ بند جلہو کار آک دکی شار آن کم و وَد ہشت آن دئے کلومیٹر مُر جنید کول کمپنی ایریا ئٹ کولا کانڑ ئٹ کاریم کروک مزورکار تا رہائشی کوارٹر تیا جلہو کریر۔
پولیس افسر نا رِدئٹ جلہو نا وخت زیات کانڑ مزورکار آک کانڑ آن پیشن مریسہ تینا کچہ غا کوٹی تیٹ خاچنگ ئسر۔
او پارے کہ جلہو کار آک ٹولی تا دروشم ئٹ جتا رہائشی کوارٹر تیا ہنیسہ مزورکار تے تینا سُم تا گواچی کریر۔
ایس پی نا رِدئٹ مزورکار تا رکھ آ مروک سلہہ بند ٹولی نا بندغ آک دیخہ جنگ تسر ولے جلہو کار آتیتون پوسکنا سلہہ، راکٹ و چغلی بمب ئس ہرانا سوب اوفک زور تمار۔
ایس پی نا پاننگ ءِ کہ سُم کاری و تراک نا دا لڑ یک و نیم گھنٹہ اسکان برجاء مس۔
ایس ایچ او دکی ہمایو ناصر نا رِدئٹ جلہو کار آک کیہی انجن آتیتون اوار کولا کشنگ ئٹ کاریم اٹ ہتوک مشین تے ہم خاخر تسر۔
ایس پی دکی آصف شفیع بیست مزورکار نا کہنگ و ہفت ئنا ٹپی مننگ ءِ پک کرے و پارے کہ ٹِک مروک تیوہ غا مزورکار آک پشتون ءُ۔
ایس پی نا رِدئٹ کہوک آتیان مُسٹ افغانستان و ایلوفک بلوچستان نا پشتون ضلع ژوب، قلعہ سیف اللہ، لورالائی، پشین، موسی خیل و کوئٹہ آن ئسر۔
ڈسٹرکٹ کونسل دکی نا چیئرمین حاجی خیر اللہ ناصر ہرا کولا کانڑ نا مالک ہم ارے، میڈیا نمائندہ غاتے تدینی نا حوال تس۔ او پارے دا جلہو ننکان یانزدہ ءُ نیم بناء مس و کم و وَد دو بجہ اسکان برجاء مس۔
اونا پاننگ ئس کہ جلہوکار آتیتون نہ بیرہ پوسکنا سلہہ، راکٹ لانچر بلکن ڈرون ئس ہرانا کمک ئٹ اوفک بوچ و درخت آتیٹ ڈھکوک مزور کار آتے ہم پٹنگ ئسر۔
اونا پاننگ ئس کہ جلہو آن گڈ دمدستی تون اوفک ضلع ئٹ ساڑی اعلیٰ سیکورٹی افسر آتے و آئی جی پولیس اسکان حوال کریر ولے علاقہ بیرہ یک و نیم کلومیٹر مُر مننگ آن گڈ ہم سہب ئنا روشنائی اسکان پولیس و سیکورٹی فورسز آک تدینی ہند آ سر متور۔
اونا پاننگ ئس کہ تیوہ نن شار فائرنگ و تراک آتیان ٹکا کریسہ کرے ولے کس مزورکار تا کمک اکن بتئو۔
حاجی خیر اللہ نا پاننگ ئس کہ مزور تا جون و ٹپی تے ہم اوفک تینٹ ہنیسہ ہسپتال آ سر کریر۔
سول ہسپتال دکی نا میڈیکل سپرٹنڈنٹ ڈاکٹر جوہر خان شادوزئی پارے کہ مزور تا کاٹم و بدن تا جتا بشخ آتیا نہ بیرہ سُم کاری کننگاسس بلکن اوفتا بدن تیا چغلی بمب ئنا ٹکر لگنگ نا نشانک ہم ئسر۔
او پارے کہ کیہی مزور تے اسٹ آن زیات سم کاٹم تیٹ خلنگاسس ہرانا سوب اوفتا مرگ ہند آ مسوسس۔
ایم ایس نا ردئٹ زیات ٹپی تے ہم بھلو ٹپ بسونے ہرافتے بنائی جانجوڑی کمک تننگ آن گڈ مُستی علاج کن کوئٹہ غا دننگا۔ اسہ ٹپی ئسے نا حالیت بھاز خراب ئس۔
ایڑے تدینی نا برخلاف دکی نا تاجر و آل پارٹیز نا کنڈ آن شٹرڈاؤن ہڑتال برجاء ءِ۔
پاکستان ورکرز فیڈریشن، نیشنل لیبر فیڈریشن و ایلو مزور تنظیم آک ہم برانز ئنا پڑو کرینو۔ پاکستان ورکرز فیڈریشن نا ضلعی صدر شیر محمد کاکڑ نا پاننگ ءِ کہ بے گناہ و دو خالی مزور تے بے دادی تون ٹِک کننگانے ہرا تینا چُنا تیکن بیرہ اِرا وخت ئنا باخو اس کھٹنگ داڑے بسوسر۔
او پارے کہ دکی 15 ہزار نا کچ کانڑ مزورکار کاریم کیرہ ہرافک بدامنی آن زیمی ءُ۔
حاجی خیر اللہ ناصر نا پاننگ ئس کہ دکی ئٹ اسہ ہزار آن زیات چُنکو بھلو کان ءُ داڑے تُوہ ئنا 20 ہزار ٹن کولا کشنگک۔ ہڑدے 120 گاڑی کولا ارفیسہ پنجاب و ملک ئنا ایلو صوبہ آتیکن کارہ۔
او پارے کہ کولا کانڑ مالک آک سیکورٹی نا پن آ فی ٹن 220 روپئی نا حساب آ توہ ئنا کم و وَد مُسہ کروڑ روپئی سیکورٹی فورسز ءِ ایترہ ولے داڑان بیدس ہم ننے رکھ دوئی اف، نن سیکورٹی آن اُست جم افن۔
