بلوچستان نا ضلع کیچ آن پاکستانی لشکر اسہ بندغ ئسے دزگیر کریسہ بیگواہ کرینے۔
بیگواہ کننگوک بندغ نا چاہنداری عبدالواحد نا مار جاوید نا پن ئٹ مسنے۔ ہرا تربت نا علاقہ گوکدان نا ہندی ئسے۔
بیگواہ کننگوک بندغ نا لمہ نا پاننگ ءِ کہ کنا مار، ہرا مزور ئسے، تینا کاریم ئٹ سیٹلائٹ ٹاؤن ہناسس ہراکان اودے دزگیر کننگانے و اوکان پد او بیگواہ ءِ۔
لمہ نا پاننگ ءِ کہ کنا مار ءِ آجو کننگہ اگہ اوڑا اسہ دوبہ اس ارے گڑا اودے عدالت ئٹ ہتنگہ دا وڑ اودے بیگواہ کریسہ ننے اذیت تننگ مف۔
حوال تا رد ئٹ گوادر آن پاکستانی لشکر اسہ ورنا ئسے دزگیر کننگ آن گڈ بیگواہ کرینے۔ اندن کراچی نا لی مارکیٹ آن ڈھکوک ادارہ و پولیس نا دو آن اِرا ورنا دزگیری آن گڈ بیگواہ کننگانو۔
شابیتی حوال تا رد ئٹ بلوچستان نا دریابی شار گوادر آن پاکستانی لشکر و کاؤنٹر ٹیررزم ڈپارٹمنٹ دکان آن اسہ ورنا ئسے دزگیر کننگ آن گڈ بیگواہ کرینے۔
بلوچ یکجہتی کمیٹی خاران نا بیان نا رد ئٹ خاران نا ہندی نصیب اللہ ولد حاجی نذیر احمد کلی چبی آن تعلقداری تخک ہرادے گوادر آن پاکستانی لشکر گوادر گرائمر اسکول نا مونا پرچون نا دکان آن دزگیر کرسا بیگواہ کرینے۔
بی وائی سی خاران نا رد ئٹ نصیب اللہ اسہ مسکین ءُ دکاندار ئسے و اودے تدوکا دے تیٹ راچی مچی نا وختا دکان ءِ ملنگ نا سوب آن بیگواہ کننگانے۔
تنظیم و خاہوت تا پاننگ ءِ کہ نصیب اللہ بلوچ ءِ دمدستی آجو کننگ مرے نہ تو سخت برانز کننگ نا پڑو کرون۔
ایلو کنڈ آن کراچی نا ہند آٹھ چوک آن درو شام ئنا نُہہ بجہ نا وختا کراچی پولیس و پاکستانی ڈھکوک ادارہ غاتا کارندہ آک اِرا ورنا ئے زوراکی ئٹ بیگواہ کرینو۔
بیگواہ کننگوک ورنا تا چاہنداری بلوچ آباد مند کیچ ئنا ہندی خالد نا مار حسنین و دے کہی بلوچستان پیشین نا ہندی اسلم نا مار رحمان نا پن ئٹ مسنے۔
خاہوت آتا پاننگ ءِ کہ نن دزگیر مروک ورنا تا بارث ئٹ معلومداری کن ہندی تھانہ غا ہنان ولے پولیس نا پاننگ ءِ کہ ورنا تے ڈھکوک ادارہ آک دروک مرور۔
خاہوت آتا پاننگ ءِ کہ تومکا تا فون نمبر آک جھٹ ئس یلہ مریرہ ولدا بند مریرہ۔
بیست و پنچ اگست نا نن بلوچ لبریشن آرمی جیونی ٹی گبد نا ہند آ کسر آ کوزہ کریسہ آپریشن ھیروف نا بناء ءِ کرے، ہراڑان پد چین پاکستان اقتصادی راہداری نا مین کسر ءِ ہیرونک نا ہند آ، کراچی آن کوئٹہ آر سی ڈی ہائی وے ءِ قلات و بلوچستان ءِ پنجاب تون گنڈوک کسر ءِ راڑا شم نا ہند آ کوزہ کریسہ دوانزدہ گھنٹہ اسکان کسر تیا ناکہ بندی برجاء تخنگا، دا وخت آ بلوچستان ءِ سندھ، پنجاب و ایران تون گنڈوک اہم کسرک بی ایل اے نا کنٹرول ئٹ مسر، ریلوے پول آک بھس کننگار، عسکری چوکیک ٹک کننگار و لسبیلہ ٹی فوجی کیمپ آ مجید بریگیڈ نا جند ندر آک جلہو کریسہ بیست گھنٹہ اسکان فوجی کیمپ ئٹ جنگ برجاء تخار، ہراڑان پاکستانی لشکر بھلو نسخان ئسے نا گواچی مس۔
برجاء بلوچ آجوئی نا جہد ئنا دیہاڑ آن واخب جاچ ہلوک آتا ردئٹ بلوچستان ئٹ اِرا دہائی آن زیات برجاء آجوئی نا تحریک ئٹ آپریشن ھیروف سلہہ بند گل بلوچ لبریشن آرمی نا کل آتیان بھلا آپریشن ءِ، ہراٹی مکران آن کوہ سلیمان اسکان اہم کسرک دوانزدہ گھنٹہ اسکان بی ایل اے مجید بریگیڈ، ایس ٹی او ایس و فتح اسکواڈ نا کوزہ ٹی مسر۔
دا منہ سال ئٹ بلوچ لبریشن آرمی نا چین و پاکستان نا زرگزرانی مفاد آتیا جلہو و آپریشن ھیروف آن پاش ءِ کہ بی ایل اے جدت دوستی نا پارہ غا روان ءِ و تینا حکمت عملی تیٹ بدلی ہتیسہ روایتی گوریلا جنگ ئتون اوار اوار اہم عسکری و زرگزرانی ہدف آتے ٹک کننگ کن ڈٹ بند کمپلیکس جلہو کننگ نا لائخی تخک۔
بلوچ لبریشن آرمی تینا بیان ئٹ پارینے کہ آپریشن ھیروف بلوچ ڈغار آ دوارہ کنٹرول دوئی کننگ نا تیاری تا اولیکو بشخ ئس، ہراڑان نتیجہ پیشتمنگ کیک کہ بروک وخت ئٹ بی ایل اے آپریشن ھیروف آن ہم بھلو عسکری ہدف دوئی کننگ نا ارادہ تخک۔
عسکری نسخان آتیان چپ بلوچ لبریشن آرمی نا آپریشن ھیروف بلوچستان نا آجوئی نا جنگ ئٹ کمپلیکس جلہو تیٹ ودکی نا سوب جوڑ مرو۔ بلوچ سلہہ بند گل آک تینا لائخی و طاغت ئٹ ودکی کننگ ءُ و دن انگا بھلا جلہو تے توننگ ئٹ پاکستانی لشکر نا بے سہبی بروک وخت ئٹ آپریشن ھیروف آن ہم بھلن جلہو تا کسر ءِ مَلو، ہراڑان بلوچستان نا آجوئی نا جنگ ئنا ترندی ٹی ودکی خننگ کن رسینگو۔
بلیدہ گردانک ئٹ سلہہ بند بندغ آک اسہ بندغ ئسے برمتہ کننگ آن گڈ کھسفیر۔
ہندی حوال تا رد ئٹ 26 اگست نا نن 9 بجہ نا وخت آ سلہہ بند بندغ آک بلیدہ گردانک ئٹ دکان ئٹ پترینگسہ حکیم ولد علی مراد ءِ توفک نا زور آ برمتہ کرسہ تینتون اوار دریر وختس کہ بیست منٹ آن گڈ سم تیان بروے اونا جون خننگا۔
ہندی بندغ آک ہمو ہند آ جون ئنا احوال ءِ ہندی بست و بند ءِ تسر وختس کہ کھسفنگوک نا جون ءِ اسپتال آ سر کرینو۔
ہندی بندغ آتا رد ئٹ حکیم بلوچ اسہ خوانندہ و کاروباری ءُ بندغ ئس اس ہرا تدوکا دہ سال آن دکانداری ئٹ آختہ ئس، پاکستانی لشکر نا سروکی ٹی چلوکا ہندی ڈیتھ اسکواڈ نا کارندہ غاک اودے برمتہ غان گڈ کھسفیر۔
ہندی بندغ آک خواست کرینو کہ کالخواہ حکیم بلوچ نا کھسفوکا تان حساب ہلسہ خاہوت ءِ انصاف تے و علاقہ ٹی گندہی تالان کروک بندغ آتا برخلاف کاروائی کہ۔
بلوچستان نا جتاء علاقہ غاتیان چار بندغ نا جونک خننگار۔
حوال آتا رد ئٹ بلوچستان نا بنجاہی شار کوئٹہ نا علاقہ دشت سپیزنڈ ئٹ بھٹے نا خڑک آن چار بندغ نا جونک خننگانو۔ ہرافتان اسٹ نا چاہنداری 22 سالی آ جواد علی ولد محمد گل استا محمد نا ہندی ئسے نا پن ئٹ مسنے۔
کوئٹہ اسپتال حوالی نا رد ئٹ پن کروک ورنا ءِ سم کاری کرسہ کھسفینو۔
ایلو پارہ غان بلوچستان نا ضلع نصیر آباد نا علاقہ مانجھو شوری آن ہندی بست و بند ءِ سم تیٹ کھسفوک مسہ بندغ نا جون رسینگانے ہرافتے چاہنداری کن اسپتال آ سر کرینو۔
نصیر آباد آن رسینگوکا جون آتا چاہنداری نا عمل برجاء ءِ وختس کہ تدینی تا سوب آتا باروٹ شابیت حوال مستی برو۔
چینی وزیر خارجہ درو بلوچستان ئٹ مروکا جلہو آتا مذمت ءِ کرینے۔
حوال آتا رد ئٹ چین درو بلوچستان نا جتاء جتاء ضلع غاتیٹ مروکا جلہو آتا مذمت ءِ کرسہ پارینے کہ پاکستان نا پھبی کمک کرون۔
چینی وزیر خارجہ نا پارہ غان شینک کروک بیان ئٹ چین بلوچستان ئٹ سلہہ بند گًل آتا برخلاف کاروائی تیٹ پاکستان نا مخ تفی نا پڑو ءِ کرینے۔
یاتی مرے کہ اینو پاکستانی وزیر اعظم بنجاہی وزیر آتا دیوان ئسے نا وخت آ بلوچستان ئٹ آپریشن نا پڑو ءِ کریسس وختس کہ پاکستانی حکومت نا بڑزکو وفد ئس ہم دا وخت آ کوئٹہ ٹی ساڑی ءِ۔
ضلع کیچ نا علاقہ تربت ئٹ سم کاری نا اسہ تدینی اسیٹی زوراکی نا بیگواہی آن پد آجو مروک ورنا ٹپی مس۔
پولیس نا ردئٹ آپسر مہرے ہوٹل آن خڑک درو نادرست سلہہ بند بندغ آک سم کاری کریسہ اسہ بندغ ئسے بھاز ٹپی کریر۔
پولیس نا ردئٹ ٹپی مروک ورنا نا چاہنداری وشدل نا مار عابد ہند آپسر نا پن ئٹ مسنے ہرا پنکچر نا دکان آ کاریم کریکہ۔
یاتی مرے پن کروک ورنا ءِ 2023 ئٹ پاکستانی لشکر زوراکی ئٹ بیگواہ کریسس ہرا دئے توہ آن آجو مریسہ تینا اُرا ءِ سر مسوسس۔ ہندی بندغ تا ردئٹ جلہوکار آتا تعلق حکومتی مُخ تف ٹولی آن پاننگک۔
یاتی مرے تدوکا اِرا توہ ئٹ کیچ آن دا مسٹمیکو تدینی ءِ کہ زوراکی نا بیگواہی آن پد آجو مروک بندغ یا چاگڑدی بابت کاریم کروک ورنا تے ٹارگٹ کلنگ نا گواچی کننگسہ ءُ۔
جیونی ٹی کوسٹل ہائی وے آ سلہہ بند بندغ آتا ناکہ بندی، پولیس چیک پوسٹ آ جلہو کریسہ کارندہ دزگیر کننگ تون اوار سلہہ تے دوئی مسر، اندن مڈی دروک گاڑی تے بھن تسر۔
بلوچستان نا ضلع گوادر نا علاقہ جیونی ٹی سلہہ بند بندغ آتا بھلو کچ اس کوسٹل ہائی وے گبد کراس نا ہند آ ناکہ بندی کریسہ گاڑی تے پَٹنگ ءُ۔
حوال تا ردئٹ سلہہ بند بندغ آک پولیس چیک پوسٹ آ جلہو کریسہ ہموڑے ساڑی غٹ کارندہ تے دزگیر کریر و اوفتا سلہہ و گولہ بارود آتے ہم کوزہ کرینو۔
ہندی حوالکار تا ردئٹ ناکہ بندی نا وخت آ پن کروک بندغ آک مڈی دروک کم آن کم چار گاڑی ہم ہُشانو۔
حوالکار تا ردئٹ اسہ گھنٹہ ئسے آن زیات کوسٹل ہائی وے آ ناکہ بندی برجاء ءِ۔ کوالخواک دائسکان دا بابت ہچو ہیت اس مونا ہتنو۔
برجاء سال بلوچ لبریشن آرمی نا سرمچار آک نوشکے ٹی اندا ڈول نا اسہ کارروائی اسیٹ شار آن خڑک بنجاہی کسر آ ناکہ بندی کریسہ بس آتیٹ سفر کروک نو بندغ ءِ چاہنداری آن پد مرگ ئنا گواچی کریسر۔
بی ایل اے نا ترجمان جیئند بلوچ نا پاننگ ئس کہ پن کروک بندغ آک پاکستانی ڈھکوک ادارہ تا کارندہ ئسر ہرافتے ڈھکوک حوال آتیا کارروائی اسیٹ مرگ ئنا گواچی کننگا۔
اسہ پین کارروائی اسیٹ بی ایل اے نا سرمچار آک برجاء سال کوئٹہ آن خڑک شعبان ئٹ دئے بندغ دزگیر کریسر۔
ہنوک وخت ئٹ کوسٹل ہائی وے آ بلوچ سلہہ بند گل آتا سیوت براس اِرا جتا کارروائی تیٹ پاکستانی لشکر، تیل و گیس کمپنی تا کارندہ تیتون اوار پاکستان نیوی نا کارندہ تے ترند حالیت نا جلہو تیٹ ٹک کرینے۔
کوسٹل ہائی وے آ اینو نا مروک دا کارروائی نا ذمہ واری ءِ دائسکان کس ارفتنے۔
بلوچستان نا ضلع نوشکی ٹی سم کاری نا تدینی ٹی اسہ بے ہندی بندغ اس مرگ ئنا گواچی مس اندن پن کروک جلہو نا ذمہ واری ءِ بی ایل اے ارفے۔
حوال تا ردئٹ ضلع نوشکی نا بازار مل اڈہ نا ہند آ سلہہ بند بندغ آک سم کاری کریسہ اسہ بندغ ئسے مرگ ئنا گواچی کرینو۔
حوال تروکا تا پاننگ ءِ کہ مرگ ئنا گواچی مروک بندغ نا تعلقداری سندھ آن ءِ ہرا نوشکی ٹی ٹوپ بہا کننگ نا کاریم کریکہ۔
پن کروک جلہو نا ذمہ واری ءِ بلوچ لبریشن آرمی نا ترجمان جیئند بلوچ ارفیسہ پارے کہ ننا سرمچار آک اینو نوشکی ٹی کوزہ گیر پاکستانی لشکر نا اسہ کمکار ئسے سم کاری کریسہ مرگ ئنا گواچی کریر۔
ترجمان پارے کہ سرمچار آک نوشکی شار ئٹ مَل اسٹاپ نا ہند آ سم کاری کریسہ پاکستانی لشکر نا کمکار عبداللہ بابر نا مار عبدالوحید ہند سندھ ءِ مرگ ئنا گواچی کریر۔
او پارے کہ بی ایل اے نا سرمچار آک پن کروک بندغ آ بھلو وخت ئسے آن نظر تخوک مسنو ہرا دروشم بدل کریسہ نوشکی شار ئٹ مخبری نا کاریم سر تننگ ئس۔
جیئند بلوچ پارے کہ بلوچ لبریشن آرمی دا جلہو نا ذمہ واری ءِ ارفک۔ کوزہ گیر پاکستانی لشکر و اوڑتون اوار مروک آتیا ننا جلہوک برجاء مرور۔
بلوچ یکجہتی کمیٹی نا سروک ڈاکٹر ماہ رنگ بلوچ جمعہ نا دے کوئٹہ ئٹ ہیومن رائٹس کمیشن پاکستان نا سروکی ٹی مروک مجلس ئٹ تران کریسہ پارے کہ سیاسی پڑ اسہ پارٹی، یونین نا آخہ بلکن تیوہ راج ئنا مریک، دانا پاش مثیل بلوچ راجی تحریک ءِ، ہراتم نیپ جوڑ مسوسس یا اوکان مالو دا پیشن گوئی کننگاسس کہ ہرا حکومتی ڈول ئٹ دا ریاست کاریم کننگ ءِ دا ریاست چلنگ کپرو۔ او وخت اوفک بیرہ بلوچ نا ہیت ءِ کتوسر بلکن دا ریاست ئٹ رہینگوک ہر بندغ نا ہیت ءِ کریسر۔ اینو دا ہیت پاش مسنے کہ بلوچ او وخت ہم راست ئس و داسہ ہم راست ءِ۔ دا ریاست ہرا غاو و تادی تے بلوچستان، سندھ یا خیبر پختونخواہ ٹی کرے او اینو پنجاب اسکان سر مسنو۔
او پارے کہ نن بلوچستان تون اوار ہر مظلوم تحریک تون ہمکوپئی کینہ نن دا فرخ کپنہ کہ دا کنا تحریک ءِ، دا ہزارہ، پشتون تحریک یا مزدور تحریک ءِ نن کل ءِ اوار مریسہ جہد کروئی تمو داڑے ہر مظلوم راج ئتون اوار لس بندغ نا بنداوی حق آک پُلنگانو۔
ماہ رنگ بلوچ پارے کہ ریاست آک دا خاطر جوڑ کننگانو کہ او شاری تے رکھ تننگ کیر، اگہ ریاست آتون مخلوق نا تعلق ایسر کننگہ گڑا ہچ اس رکھنگوف، الس ہی ریاست ءِ برجاء تخک طاغت الس ئنا مریک۔ ویل دادے کہ ہرا الس اینو چپ کرفنگانے اودے دا سماء اف کہ طاغت اودے۔
او پارے کہ اینو بلوچستان ئٹ ہر تپہ تادی نا گواچی ءِ، چاہے او راجی تحریک تون تفوک مرے یا نہ اودے چپ کرفنگسہ ءُ ولے دا ہیت ءِ کس کپرو انتئے کہ کل ریاست نا کنٹرول ئٹی ءُ دا میڈیا ہم ریاست نا کنٹرول ئٹی ءِ۔
”السی تحریک آتیکن المی ءِ کہ او صلہ کپس، بلوچ یکجہتی کمیٹی دا ریاست کن اندا خاطر کاٹم نا خڷ جوڑ مسنے کہ نن تینا سیاسی اصول آتیا ہچو سودا بازی اس کتنون و مُستی ہم کپرون۔“
ماہ رنگ بلوچ پارے کہ نن ریاست نا ہر تادی ءِ جہان نا مونا تخانن۔ ریاستی تادی اسہ برانز ئسے تحریک اس جوڑ کرینے۔ بلوچستان ءِ اسہ فوجی قانود ئسے نا ردئٹ دریسہ ءُ، ہرا وڑ بلوچستان ءِ بند کننگا ہرا وڑ گوادر شار ءِ 27 جولائی آن دئے اگست اسکان پلویڑ کریسہ سیل کننگا، گوادر ئٹ اسہ زالبول اس ہوغسہ ننے آ بس کہ فورسز آک اوفتا اُرا ٹی پترینگسہ اونا مسڑ نا برام نا زیور، پیسہ و فریج اسکان ارفینو درینو۔ ننے بلوچ، پشتون، و ہزارہ ہر مظلوم راج ئنا نیام ئٹ گیشتر ہمکوپئی بکار ءِ۔ بلوچ یکجہتی کمیٹی جمہوری سیاست و آئینی جہد آ باور کیک ولے ریاست آن دا سوج ءِ کہ او اراتم جمہوری جوڑ مرو یا او ننے پائے کہ راہبند نا ہرا شق ءِ ہراڑا بلوچستان ئٹ عملدرآمد مننگ ءِ۔
او پارے کہ گوادر ئٹ ایف سی بیدادی نا کسر ءِ دوئی کرے، بندغ آتے خلک، ایف سی آ ایف آئی آر ہم کننگتو اوفتا کوشست ءِ کہ نن بیدادی نا کسر ءِ دوئی کین اینو ہم ننا سنگت و دوستخواہ تے جتا ڈول تیٹ تنک کریسہ ءُ۔ نن کل ءِ جہد کروئی تمو اینو بلوچستان ئٹ مزاحمت مننگ ءِ و دادے الس لیڈ کننگ ءِ۔ طاغت ریاست تون آخہ الس تون مریک۔
