سال 2024 کن ادب نا نوبیل داد جاندمی کوریا غان تعلق تخوک نوشتکار ہن کانگ کٹانے۔

ادب نا نوبیل داد ئنا فیصلہ کروک رائل سوئیڈش اکیڈمی تینا پڑو ئٹ پارینے کہ ہن کانگ ءِ دا داد اونا ”مارشت آن پُر شاعرانہ نثر کن تننگک ہرا ٹی دیہاڑی صدمہ و بندغی زند نا بے پائیداری درشان کننگانے۔“

ہن کانگ 1970 ٹی جاندمی کوریا نا شار گوانگجو ئٹ ودی مس و نو سال نا سن ئٹ بنجاہی شار سول ئٹ ہندی مسوسس۔

رائل سوئیڈش اکیڈمی نا ویب سائٹ نا ردئٹ ہن کانگ ادبی پد ندارہ اسیتون تعلق تخک۔ اونا باوہ ہم ناول نگار اس ئس۔

ہن کانگ نوشت و تصنیف تون اوار اوار ساز و زیمل نا ہم شوق تخک و اونا ادبی نوشت آتیٹ دانا زیم خننگک۔

ہن کانگ 1993 ٹی شاعرہ نا دروشم ئٹ تینا ادبی زند ءِ بناء کرے و اِرا سال آن پد اونا گؤنڈ کسہ غاتا مجموعہ شینک مس۔

سال 2007 ئٹ او تینا ناول ’دی ویجیٹیرین‘ نا سوب آن جہانی تلہ غا پنی مس۔ دا اونا اولیکو ناول ئس ہرا انگریزی ٹی مٹ کننگا۔

پدان 2010 ئٹ اونا ناول ’دی ونڈ بلوز‘، 2014 ئٹ ’ہیومن ایکٹ‘، 2017 ئٹ ’دی وائٹ بک‘ 2021 ئٹ ’وی ڈونٹ پارٹ‘ 2023 ئٹ ’گریک لیسن‘، شینک مس۔

خیال ئٹ مرے نوبیل داد دوئی کروک آتے کم و ود 10 لکھ ڈالر ہم تننگک۔ دا زر آک داد بناء کروک سوئیڈش نا مڈی آن تننگرہ۔

داڑان مالو دو شمبے آ طب، سئے شمبے آ فزکس و چار شمبے آ کیمسٹری نا نوبیل داد آتا ہم پڑو مسنے۔ امن کن نوبیل داد نا پڑو جمعہ و معاشیات کن 14 اکتوبر آ پڑو کننگو۔

داد دوئی کروک آتے 10 دسمبر آ الفریڈ نوبیل نا سال دے آ اڈ تروک مجلس ئٹ داد دوئی کننگ کن بَٹنگو۔

پاکستانی لشکر اِرا بلوچ خوانندہ تون اوار مُسہ بندغ دزگیر کننگ آن گڈ بیگواہ کرے۔

پاکستانی صوبہ پنجاب آن حوال تا رد ئٹ استو نیمہ غا پاکستانی فورسز آک اسہ ہاسٹل ئسے آ چھاپہ خلیسہ بلوچستان نا ہندی اِرا خوانندہ ءِ دزگیر کننگ آن گڈ بے ڈس ءُ جاگہ ئسے آ دریر۔

بلوچ کونسل پنجاب نا رد ئٹ پاکستانی لشکر پنجاب یونیورسٹی نا خوانندہ اکرام مینگل و سپیریئر یونیورسٹی لاہور نا خوانندہ شمریز بادینی ءِ بے قانودی بیگواہ کرینے۔

او پاریر کہ نن بلوچ خوانندہ غا تا برخلاف دننگا بے قانودی کارروائی تا مذمت ءِ کینہ و تینا سنگت آتا آجوئی نا خواست کینہ۔

بلوچ خوانندہ غا تا کنڈ آن پاکستانی فورسز و پنجاب پولیس نا دو آن تومکا ورنا تا زوراکی نا بیگواہی تا ویڈیو فوٹیج ہم شنگ کننگانے ہراڑے پنجاب پولیس و سول پُچ بینوکو سلہہ بند بندغ خننگ مریک۔

واہم ولدا پاکستانی لشکر اکرام مینگل ءِ یلہ کرے ولے شمریز بادینی دائسکان بیگواہ ءِ۔

دانگان بلوچستان نا ضلع خضدار آن حوال تا رد ئٹ درو سہب ئنا 11 بجہ غا پاکستانی فورسز آک خضدار کوڑاسک نا ہند آن اسہ ورنا مسلم ولد اختر سمالانی ءِ دزگیر کرسا بیگواہ کرینو۔

درو ہم بلوچستان نا صنعتی شار حب چوکی آن اِرا ورنا پاکستانی فورسز آتا دو آن بیگواہ کننگار۔

حب چوکی آن بیگواہ کننگوک ورنا تا چاہنداری جنید ولد عبدالحمید و عمران ولد محمد اقبال نا پنا مسنے۔

پاکستانی فورسز نا تدوکا دے تیان ڈیرہ بگٹی نا جتا علاقہ آتیٹ آپریشن برجاء ءِ ہراٹی فوجی ہیلی کاپٹر و ڈغاری فورسز بشخ ہلنگ ءِ ￵۔

ڈیرہ بگٹی آن رسینگوک حوال تا ردئٹ پاکستانی فورسز نا بھلو کچ اس علاقہ ئٹ ہن و بر کننگ ءِ ￵ اندن جتاء ہند آتیا سلہہ بند بندغ آک و پاکستانی فورسز نا نیامٹ جھڑپ آتا ہم حوال آک ءُ۔

پاکستانی فورسز نا آپریشن ڈیرہ بگٹی نا تحصیل سوئی نا ایب کیب ئنا علاقہ آتیٹ برجاء ءِ اندن منہ بندغ ءِ دزگیر کننگ آن گڈ نا درست ہند آ دننگ نا ہم پک مفروک حوال ءِ۔

ڈیرہ بگٹی آن حوال تا ردئٹ پاکستانی فورسز نا ہیلی کاپٹر آتا آپریشن نا وخت سوئی نا جتاء علاقہ لنجو و سگھاری ئٹ شیلنگ آن ہشت ہندی ٹپی مسونو ہرافتیٹ 3 زالبول و 5 چنا اوار ءُ ￶ ۔

 علاقہ ئٹ آپریشن و کسر تا بند نا سوب شیلنگ آن ٹپی مروک آتا کمک مفننگ ءِ۔

ڈیرہ بگٹی و سوئی ٹی پاکستانی فورسز نا آپریشن نا نیام ئٹ بلوچ آزادی دوست پارٹی پاکستانی فورسز آ لس آباتی تے ٹک کننگ نا دوبہ خلنگا ۔

بلوچ سیاسی پارٹی و بندغی حق آتا ادارہ آتیان خواست کرینے کہ او ڈیرہ بگٹی تون اوار بلوچستان ئٹ برجاء فوجی آپریشن آتا برخلاف پاکستانی حکومت آ زور شاغنگ و لس آباتی تے ٹک کننگ آ پاکستانی فورسز آن حساب ہلینگے ۔

پاکستانی ڈھکوک ادارہ آک اِرا ورنا ءِ دزگیر کننگ آن گڈ بیگواہ کرینو۔

بلوچستان ئٹی زوراکی نا بیگواہی تا لڑ برجاء، بلوچستان نا صنعتی شار حب چوکی آن حوال رسینگانے کہ پاکستانی فورسز و ڈھکوک ادارہ آک نن نیمہ غا حب بھوانی شاہ پمپ ئنا خڑک آک اسہ ہوٹل ئسے آن اِرا بندغ ءِ سلہہ نا زور آ گاڑی ٹی سوار کرسا تینتو درینو۔

پاکستانی ڈھکوک ادارہ آتا دو آن بیگواہ کننگوک بندغ آتیٹ عمران بلوچ ولد محمد اقبال ہند امیر آباد و جنید حمید ولد عبدالحمید ہند بھوانی اوار ءُ۔

حوال تروکا تا رد ئٹ جنید ولد عبدالحمید ہندی کمپنی اسیٹی مزوری کریکہ و عمران نا باوہ مسکوہی ہندی کونسلر ئسے۔

ژوب کوئٹہ بنجائی کسر آ ایف سی چیک پوسٹ آ درست بندغ آک جلہو کریسہ ٹک کریر ۔

ژوب آن حوال آتا ردئٹ نا درست سلہہ بند بندغ آک پاکستانی فورسز ایف سی نا چیک پوسٹ ئسے بھلو جلہو اسیٹ ٹک کریر و چیک پوسٹ نا تہہ ئٹ ہننگ نا کوشست ہم کننگا ۔

سلہہ بند بندغ آک چیک پوسٹ ءِ ￵ چارمہ کنڈان جلہو ئٹ ٹک کریر و راکٹ فائر ہم کننگا اندن ہمو وخت چیک پوسٹ نا بنجائی دروازہ آ گمانی وڑ ئٹ خود کش جلہو ہم کننگا ۔

پاکستانی فورسز نا چیک پوسٹ آ جلہو ئٹ دائسکان پاکستانی فورسز نا اسہ کارندہ ئسے نا کہنگ و 11 نا ٹپی مننگ نا پک کننگانے ۔

تدینی آن گڈ پاکستانی فورسز نا بھلو کچ اس کوئٹہ و خڑک ئنا جا تا پارہ غا روان مسر واہم دا بابت دائسکان سرکاری احوال مونا بتنے  ۔

بلوچ لبریشن آرمی نا ترجمان جیئند بلوچ میڈیا غا شینک کروک بیان ئٹ پارینے کہ بی ایل اے نا سرمچار آک درو مستونگ نا علاقہ اسپلنجی ٹی قوضہ گیر پاکستانی لشکر ءِ اِرا جتاء جلہو تیٹ ٹِک کریر، ہرافتیٹی پاکستانی لشکر نا 8 کارندہ مرگ ئنا گواچی و مسٹ ٹپی مسر وختس کہ اسہ بکتر بند گاڑی اس بُھس و چار گاڑی ءِ بھاز نسخان رسینگا۔

او پارے کہ اسپلنجی نا علاقہ گونڈین مَرو ئٹ بلوچ لبریشن آرمی نا سرمچار آک سنگر ہلسہ قوضہ گیر پاکستانی لشکر نا قافلہ ءِ بھلا و خودکار آ سلہہ تیٹ ٹِک کریر، دژمن لشکر نا اسہ ٹرک اسیتون اوار چار گاڑی جلہو نا دَک ئٹ بسر، ہرانا سوب دژمن لشکر نا ہشت کارندہ مرگ ئنا گواچی مسر وختس کہ اِرا گاڑی ءِ بھاز نسخان رسینگا۔

ترجمان پارے کہ ایلو پارہ غان جلہو نا دک ئٹ بروکا قافلہ نا کمک کن سر مروکا دژمن لشکر نا اسہ بکتر بند گاڑی ئسے بلوچ لبریشن آرمی نا سرمچار آتا اسہ کڑدہ اس ریمورٹ کنٹرول آئی ای ڈی جلہو اسیٹی ٹِک کریر ہرانا سوب بکتر بند تیوہ بھس مس، وختس کہ اوٹی تولوک مسہ کارندہ بھاز ٹپی مسر۔ آئی ای ڈی جلہو نا سوب دژمن لشکر ہن و بر ئٹ بے سہب مس۔

او پارے کہ جلہو آن گڈ پن کروک علاقہ ٹی دژمن لشکر نا ہیلی کاپٹر آک سر مسر، واہم بلوچ سرمچار آک سوگوْ آ ڈٹ بندی تا رد ئٹ جلہو آتیان گڈ تینا رکھ انگا جاگہ غاتیا سر مسر۔

جیئند بلوچ پارے کہ بلوچ لبریشن آرمی دا جلہو نا ذمہ واری ءِ ارفک و دا پک امیت تخک کہ بلوچ ڈیہہ ئنا آجوئی اسکان ننا سلہہ بند مزاحمت برجا مرو۔

چینی مفاد آک جلہو تا دک ئٹی – ٹی بی پی سرگپ

ہفت اکتوبر نا نن کراچی بالی پٹ آ چینی انجینئر آتیا بلوچ لبریشن آرمی نا مجید بریگیڈ و زراب (Zephyr Intelligence Research & Analysis Bureau) جند ندری جلہو کریر۔ پاکستان ئٹ چین نا سفارت خانہ تینا ویب سائٹ آ تراک ئٹ بن قاسم پورٹ ئتون تفوک چینی انجینئرز، لی جون، وہ چون زن و لی زہااو نا مرگ ئنا گواچی مننگ ءِ پک کرے۔ بی ایل اے نا ردئٹ چینی سرمایہ کار آتیا جند ندری جلہو شاہ فہد عرف آفتاب کرینے۔

پاکستان ئٹ چین نا ہندی تیا کراچی ٹی دا ارٹمیکو بھلا جلہو ءِ، ہراٹی چین تینا شاری تا مرگ ئنا گواچی مننگ ءِ پک کرینے۔ داڑان مالو اپریل اِرا ہزار بیست و دو ئٹ مجید بریگیڈ نا اولیکو زالبول جند ندر شاری بلوچ کراچی یونیورسٹی ٹی کنفیوشس انسٹی ٹیوٹ نا چینی استاد آتیا جلہو کریسس، ہراٹی مُسہ چینی شاری مرگ ئنا گواچی و اِرٹ ٹپی مسوسر۔

بلوچ لبریشن آرمی اِرا ہزار ہژدہ غان چرجوئی ئٹ چین نا معاشی و عسکری مفاد آتے ٹک کننگ ءِ و کراچی ٹی سخت نازرک ہند آ سخت سکیورٹی پلویڑ ئٹ چین نا انجینئرز آتیا بی ایل اے فدائین یونٹ مجید بریگیڈ و انٹیلیجنس کڑدہ زراب نا سرسہب جلہو آن پاش مریک کہ تنظیم تیوہ پاکستان ئٹ ہر جاگہ غا چین نا مفاد و ڈٹ آتیا جلہو کننگ نا لائخی تخک۔

شنگھائی تعاون تنظیم نا مجلس آن مالو چین نا انجینئرز آتیا جلہو ئٹ بی ایل اے چین و جہان ءِ کلہو تننگ ءِ کہ بلوچستان ئٹ بلوچ راج نا منشاء غان بیدس لٹ و پل کروک ڈٹ بندیک منّنگ نا لائخ افس۔ بلوچ لبریشن آرمی نا ڈٹ بند جلہو آتیان اونا حکمت عملی تیٹ بدلی نا پاش اشارہ غاک رسینگرہ، و دا جلہو تیان گمان کننگ مریک کہ بروک وخت ئٹ دن انگا ڈٹ بند جلہوک برجاء مرور۔

بلوچستان اِرا دہک آن جنگ زدہ ءِ، ہرانا سوب آن جہانی سرمایہ کاری نا گمانک کم ءُ و پاکستان نا جہانی سرمایہ کار آتے رکھ تننگ نا دعویٰ غاک راست پاش مننگ افس۔

دا حالیت آتیان دا ہیت پاش مریسہ ءِ کہ بلوچ راج نا مرضی و منشاء غان بیدس بلوچستان ئٹ پیشن نا سرمایہ کار آک رکھوک مننگ کپسہ۔ داسہ دا خطہ نا غٹ اسٹیک ہولڈر آتے دا ہیت ءِ سوبری ئٹ منوئی تمو کہ بلوچ راج نا گواچن نمائندہ تے باور ئٹی ہتنگ و اوفتا خُلیس آتے مُر کننگ آن بیدس دا ڈیہہ ئٹ ہچو ڈٹ بندی اس سرسہب مننگ کپک۔

بلوچستان نا ضلع خاران ئٹی سلہہ بند بندغ آک سم کاری کریسہ اسہ بندغ ئسے کھسفینو۔

سم کاری ٹی کہوکا بندغ نا چاہنداری کلشنان کلگ نا ہندی شفیع محمد ولد محمد کرم یلانزئی نا پن ئٹ مسنے۔

سم کاری نا تدینی چیف چوک ئنا ہند آ مسنے و تدینی آن پد جون ءِ اسپتال آ رادہ کننگانے۔ تدینی نا سوب دائسکان سما تمتنے۔

کوئٹہ ٹی ٹہیفوک بے گواہ آ بندغ آتا خاہوت آتا تنظیم وائس فار بلوچ مسنگ پرسنز نا بین برانزی کیمپ ءِ نا درست آ بندغ آک خاخر تسر ہراڑان کیمپ ئنا اسہ بشخ ئس ہشنگسہ ہِس مس۔

وی بی ایم پی نا وائس چیئرمین ماما قدیر بلوچ کیمپ آن ویڈیو کلہو ئس شینک کرسہ پارے کہ او کیمپ ئٹ ہڑدے نا وڑ تولوک ئس کہ پدان اسٹ ئس کیمپ ءِ خاخر تس و نرا۔

او پارے کہ او پولیس ءِ احوال تسنے و ڈوہ دار آتا جم وڑ ئٹ دزگیری نا خواست ءِ کیک۔

یاتی مرے کہ وائس فار بلوچ مسنگ پرسنز نا بین برانزی کیمپ چانڑدہ سال آن برجا ءِ ہرا زوراکی ئٹ بیگواہ آ بلوچ آتا یلہ مننگ کن کاریم کننگے۔

بلوچ ریپبلیکن آرمی نا ترجمان سرباز بلوچ میڈیا غا شینک کروک بیان ئٹ پارینے کہ اینو سہب ئنا بلوچستان نا علاقہ ڈیرہ بگٹی نا تحصیل سوئی نا علاقہ رئیس توخ و لنجو ٹی لس آباتی تا برخلاف آپریشن ئٹ اختہ پاکستانی لشہر آ مسہ جتاء جتاء ہند آتیا جلہو کریر، ہرافتیٹی جمعی وڑ ئٹ دوانزدہ کارندہ مرگ ئنا گواچی و پانزدہ غان زیات ٹپی مسر۔

سرباز بلوچ نا پاننگ ئس کہ سرمچار آک اولیکو جلہو ءِ رئیس توخ نا علاقہ ٹی سنگر ہلیسہ بھلا سلہہ تیٹ کریر ہراڑے پاکستانی لشکر نا کارندہ غاک آباتی تیا بیدادی ٹی اختہ ئسر، دا جلہو ئٹ چار کارندہ ہمو ہند آ مرگ ئنا گواچی و ہشت ٹپی مسر۔

ارٹمیکو جلہو ئٹ سرمچار آک پاکستانی لشکر نا قافلہ ءِ ہمو وخت آ سنگر ہلیسہ راکٹ و بھلا سلہہ تیٹ ٹِک کریر ہراتم اوفک لس آباتی تیا بیدادی کننگ کن ہننگ ئسر، ہرانا سوب پاکستانی لشکر نا اسہ بکتر بند گاڑی اس مچا بھس مس وختس کہ پنچ کارندہ مرگ ئنا گواچی و شش ٹپی مسر۔

سرباز بلوچ نا پاننگ ئس کہ مسٹمیکو جلہو ئٹ سرمچار آک شاخ نمبر چار آ فورسز نا کارندہ غاتے بھلا سلہہ تیٹ ہمو وخت ٹِک کرے ہراتم اوفک تینا سنگت آتا کمک کن سر مننگ ئسر۔ دا جلہو ئٹ مسہ کارندہ مرگ ئنا گواچی و کہییک ٹپی مسر ٹپی آتیٹی اسہ افسر اس ہم اوار ءِ ہرانا چاہنداری میجر حمزہ نا پن ئٹ مسنے۔

ترجمان پارے کہ سرمچار آک پاکستانی لشکر نا اِرا سرویلنس ڈرون ہم خلکر بٹیر، ہرا جنگ ئنا وخت آ بلوچ مزاحمت کار آتا پٹ سٹ ءِ کننگ ئسر۔

سرباز بلوچ مستی پارے کہ پن کروک علاقہ غاتیٹ پین فوجی کڑدہ سر مننگے، ہرافتیان رکھنگ کن جنگی حکمت عملی جوڑانن۔ بزگ آ بندغ آتیا ظلم کروکا زوراک آ ریاستی کارندہ غاتے جوانو سبخ ایتون ترون۔