ہراتم ہمو دے برو
نوشت: سفر خان بلوچ (آسگال)
مٹ: گواڑخ
دی بلوچستان پوسٹ
ہمو دے برو، ہراتم جنگ تینا ترندی ءِ سر مروک مرو و ہمو دے جنگ ئنا اسہ پوسکنو دروشم اس مرو، جنگ ئنا ایسری نا دیک مرور، ڈغار آن دتر نا جوک وہور، ہمو بیر ہلنگ نا دے مرو۔ او اسہ پوسکنو سہب اس مرو ہرا زمزیر آتے پرغنگ نا کلہو ہترو۔
ہمو دے آ شکست کنوک دژمن تینکن کسر پٹنگ مرو، چارمہ کنڈ آن دژمن آ سم تا ژونگارہ مرو، تراک آتا توار آن ڈغار چنڈہ ٹی برو، ہمو دے آ دژمن تون نرّنگ آن بیدس پین ہچو کسر مفرو، ہراتم ہمو دے برو۔
ہراتم ہمو دے برو، ظلم ئنا تارمئی تینا ایسری آ سر مروک مرو۔ ہموزدے اکن دے گل و بال مریسہ ٹِک ایتو، شہید آتا وہوکا دتر ہمو دے آ رنگ ہتو، جہد ئنا ترندی ئٹ مزل ءِ دوئی کننگ نا دے مرو و دژمن کن غٹ کسرک بند مرور، ننا تُغک راست مننگ ئٹی مرور، ہراتم ہمو دے برو۔
ہراتم ہمو دے برو، سرمچار آک دژمن ءِ شکست تریسہ اُرا تیا برور، اوفتیا زر شنکی مرو، لمہ و ہیڑک غٹ اسہ چر ئٹ سلوک ودار کننگ مرور، سال تیان تولوک محبوبہ غاک تینا محبوب آتا بننگ نا خوشی ٹی تینا دو تیا ہِنام تخور، ہمو دے آ اسہ مرغن تہار ءُ نن اس تینا ایسری آ سر مروک مرو۔
شہید آتا چناک ہموزدے آ بھاز گمر ئٹ بلوچستان نا بیرک ءِ بڑز کریسہ آزاتی ئٹ پیری کرور، شہید آتا مزار آتیا جشن ئنا دید مرو، ہراتم آجوئی نا دے آن بندغ آتا دروشمک روشن مرور، راج ئنا باہ غا جہدکار آتا قربانی و دلیری نا کسہ غاک مرور، ہراتم ہمو دے برو۔
چناک آجوئی نا مستائی ہلنگ کن تینا بھلا تیا ہنور، شکست کنوک دژمن نا کسہ ایسر مرو و بلوچ مڷ آتا دلیری نا کسہ غاک ہر زبان آ مرور۔ کل ئنا خن تیٹ گروشک و پیشانی آ نور مرو، غٹ امیت آک روشن مرور، بے امیتی نا دے کیہلینگوک مرو، ہراتم ہمو دے برو۔
ہراتم ہمو دے برو، راسکوہ، ریکوڈک و سیندک زمزیر آتے پرغوک مرور، ٹپی آ سینہ تون او ہم بال کننگ مرور و آجوئی نا تہو ئٹ پیری کریسہ ناچ کرور، بولان و زامران نا کسہ غاک دیہاڑ نا بشخ مرور و نن اوفتا دلیری آ ناز کرون، راج ئنا کماش آک ورنا تیتون دو پہ دو مریسہ اوفتیتون ہمگام مرور۔
ہمو دے آ شہید آتا روحک آسمان آ پاش مرور، تینا ڈیہہ ئنا بندغ آتیتون مزل نا دوئی مننگ نا خوشی ئٹ اوار مرور۔ بلوچ الس کاٹم تے شیف کریسہ اوفتے سلام کرور، کل ئنا خنک خڑینک آن پُر مرور ولے او خڑینک آک خوشی نا مرور۔
ہموزدے آ منہ ٹپ اندنو مرور کہ اوفتے دراخ کننگ کن کرن آک لگور، منہ تادی کروک تغ، گڑاس دڑد آن پُر ءُ ودار، بلکن ہمو دے آ ہم ایسر مننگ کپس، مزل نا دوئی مننگ آن پد ہم ودار نا دڑدی آ ساہت آک مرور ولے ہمو دے آ رسینگوکا خوشی وخت ئتون اوار کڑمب آ غٹ ٹپ آتے درمان کرو۔
ہراتم ہمو دے برو و نن آجو مرون، بلوچ ڈغار آ بلوچ راج مرو، ننا ڈغار آ اسہ پوسکنو دے اس ٹک ایتو۔ ہئو ہمو دے الم برو ہراتم نن آجو مرون۔
