امریکی سلہہ — ٹی بی پی سرگپ
امریکی اخبار واشنگٹن پوسٹ تینا 14 اپریل نا شمارہ ٹی اسہ رپورٹ اس ”افغان جنگ اکن امریکی سلہہ غاک پاکستانی عسکریت پسند آتے بھلو سواد تننگ ءُ“ نا سرحال آ شینک کرینے۔ رپورٹ نا ردئٹ پاکستانی کوالخواک اخبار ءِ مُسہ امریکی رائفل نا سیریل نمبر آتے تسنو، ہرافتے گمانی وڑئٹ بولان ئٹی جعفر ایکسپریس آ جلہو کروک بندغ آک کاریم ئٹ ایسنو۔ رپورٹ ئٹ پین پاننگانے کہ جلہو کار آتیتون اسہ ایم فور اے وَن رائفل اس ہم ئس، ہرادے امریکی سلہہ جوڑ کروک کمپنی کولٹ تیار کریسس۔
پاکستانی بنجاہی وزیر و بھاز آ تجزیہ نگار آک، بلوچ جنگ آزادی ٹی داسہ نا پوسکنی و ترندی ءِ اندا امریکی سلہہ تا کاریم ئٹ ہتنگ تون تفرہ، دے اس کہ افغانستان تدوکا چِل سال آن سلہہ تا اسہ جہانی منڈی اس جوڑ مسنے۔ سوویت یونین نا بننگ آن پد ہی نہ بیرہ افغانستان بلکہ تیوہ خطہ ئٹ سلہہ تا فراوانی اسہ لس کاریم اس جوڑ مسنے۔
امریکہ و ایلو جہانی طاغت آتا افغانستان ئٹ ساڑی مننگ نا وخت آ ہم امریکی سلہہ غاک بلیک مارکیٹ ئٹ رسینگانو۔ دا سلہہ غاک بیرہ بلوچستان یا خیبر پختونخوا اسکان افس، بلکہ کشمیر و نیامئی ایشیائی تنازعہ تیٹی ہم کاریم ئٹ ہتنگ مننگ ءُ۔ پاکستان نا بلیک مارکیٹ ئٹ ہم دا سلہہ غاک اڑزانی ئٹ رسینگرہ۔
واہم، بلوچ جنگ آزاتی ٹی بروک پوسکنی و ترندی نا بنماسی سوب امریکی سلہہ غاک افس، بلکہ جہانی و علاقائی حالیت آتیٹ بروک بدلی تا سوب آن بلوچ سلہہ تنظیم آتا بدل مروک حکمت عملی، ودوک جنگی لائخیک و لائخ آ ورنا تا بھلو کچ اسیٹ اوار مننگ ءِ۔
تدوکا منہ سال ئٹ بلوچ سلہہ بند تنظیم آک، خاص وڑئٹ بلوچ لبریشن آرمی و بلوچستان لبریشن فرنٹ، تینا سلہہ تا خواست آتا بھلو کچ اس پاکستان نا سکیورٹی فورسز، فوج ئتون اوار فرنٹیئر کور، پولیس و لیویز آن اوفتا سلہہ تے پُلیسہ پورا کرینو۔ جنگ آتیٹ سلہہ نا اہمیت راست ئسے، ولے فیصلہ کن کڑد جنگی ادارہ تا پالیسیک، حکمت عملی و اوفتا عملی لائخیک سر ایترہ۔
بد بختی آن پاکستان نا پالیسی جوڑ کروک قیادت بلوچ ویل ئنا گواچن ءِ پہہ متنے۔ اندا سوب ءِ کہ او وختس دا ویل ءِ سلہہ بند تنظیم آتا سلہہ تیتون تفرہ، و وختس دادے پیشن ملکی طاغت آتا چم پاریسہ السی بیانیہ جوڑ کننگ نا کوشست کیرہ۔
بلوچ راج حق حاکمیت و آجوئی کن جہد کننگ ءِ۔ امریکی سلہہ تے دا جہد اتون تفسہ اسہ خاص بیانیہ اس جوڑ مننگ کیک، ولے داڑان زمینی گواچنیک بدل مننگ کپسہ۔ بلوچستان ئٹ آجوئی نا جنگ ئٹ ترندی و پوسکنی نا اصل سوب اندادے کہ بلوچ سلہہ بند تنظیم آتا جنگی حکمت عملی ٹی پاش بدلی بسنے۔