پنجگور ڈسٹرکٹ ٹیچنگ ہسپتال ئٹ استو پنچ بندغ نا جون سر کننگا ہرافتیٹی اِرا بندغ نا چاہنداری مسونے ہندن ایلو مُسٹ نا چاہنداری نا عمل برجا ءِ۔
ہسپتال احوالکار آتا رد ئٹ 19 اگست نا نن کم و ود یانزدہ نیم آ پنچ بندغ نا جون آک ڈسٹرکٹ ٹیچنگ ہسپتال آ سر کننگانو۔ ہسپتال بست و بند جون آتا دوئی کننگ نا پٹ و پول ءِ کریسہ قانونی کاروائی بنا کرے۔
ہسپتال احوالکار آتا رد ئٹ کہوک بندغ آتیٹ ظاہر ولد ناصر ہند پروم و حافظ عمران ولد منظور احمد ہند وشبود اوار ءُ۔
بست و بند نا رد ئٹ مُسہ بندغ نا چاہنداری دسکان مننگ کتنے و اوفتا چاہنداری نا عمل برجا ءِ۔
ہسپتال بست و بند نا پاننگ ءِ کہ تدینی نا نوعیت و ایلو شابیت نا بابت ئٹ پین پٹ و پول مون آ بننگ نا ڈس ترون نمے۔
یاتی مرے کہ برجا توہ پنجگور نا علاقہ چیدگی ئٹ پاکستانی لشکر اسہ آپریشن اسیٹ پنچ بندغ ءِ خلنگ نا دعوی کریسس واہم پدان اوفتیٹ مُسہ بندغ نا چاہنداری مالو آن بیگواہ بندغ آتا رد ئٹ مسوسس۔