بلوچستان نا ضلع کیچ ٹی پاکستانی فورسز ءِ اسہ پین بمب جلہو اسیٹ ٹک کرینو ۔
ضلع کیچ نا علاقہ زامران ٹی پاکستانی فورسز نا ٹولی ٹی اوار مروک الاخ ءِ بمب تراک ئٹ ٹک کرینو ۔
علاقائی ذرائع نا ردئٹ تراک ٹی فورسز ءِ نسخان آتیتون مون تروئی تمانے واہم کوالخواہ دائسکان دا بابت ئٹ ہچو شابیتی احوال ئس فراوان کتنے ۔
یات مرے کہ داکان مالو کیچ نا علاقہ بلیدہ ٹی پاکستانی فورسز آ بمب ڈسپوزل اسکواڈ نا کارندہ آتے اسہ وخت آ اِرا بمب تراک آتیٹ ٹک کننگا ہرانا سوب ٹی اِرا کارندہ نا مرگ ئنا گواچی و گیشتر نا ٹپی مننگ نا احوال آک اریر ۔
بلیدہ ٹی تراک آن گڈ ہیلی کاپٹر آتا بال کننگ خننگ ئٹ بس ۔ علاقائی ذرائع نا ردئٹ ہیلی کاپٹر آتا زریعت ئٹ کہوک و ٹپی کارندہ آتے تربت آ دننگانے ۔
پن کروک دے تیٹ علاقہ آتیٹی سلہہ بند آزادی دوست تنظیم آک اوار ءُ ہرا جتاء وڑ ئنا جلہو تیٹ پاکستانی فورسز نا کارندہ آتے ٹک کریسہ بسونو ۔ دا جلہو تا زمہ واری دائسکان کس ارفتنے ۔
اِرا دے مالو بلوچ لبریشن آرمی بلوچستان نا ہشت جتاء ضلع آتیٹ 10 کاروائی نا زمہ واری ءِ ارفیسس ہرافتیٹ بمب تراک ، فورسز نا چوکی تیا کوزہ اوار ئس ۔
برجاء تُو بلوچ لبریشن آرمی نا پارہ غان بولان و نوشکی ٹی اِرا بھلو جلہو کننگا ہراٹی سد آتا کچ پاکستانی لشکر نا کارندہ غاک مرگ ئنا گواچی مسر ۔ دا ہڑتمکا کاروائیک بی ایل اے نا ‘ جند ندر ‘ یونٹ مجید برگیڈ و خاص انگا دستہ غاک سر تسر ۔