بلوچ راجی مُچی
ٹی بی پی تیدری
نوشٹ: گندار بلوچ
“بلوچ راجی مُچی” بلوچ یکجہتی کمیٹی نا کنڈ آن برجاء، بلوچ زنک ایسری نا برخلاف تحریک نا پنجمیکو بشخ ءِ۔ و دا وختا بلوچستان ئٹ “بلوچ راجی مُچی” نا تیاریک ترندی ئٹ برجاء ءُ، و بی وائی سی نا باسک آک ریاست نا کنڈ آن جتا ہڑاند آتون مون تننگ ءُ۔
“بلوچ راجی مُچی” نا پڑو بلوچ یکجہتی کمیٹی نا کنڈ آن 30 مئی 2024 آ کوئٹہ ئٹ اسہ پریس کانفرنس ئسیٹی کننگاسس۔ پریس کانفرنس ئٹی بلوچستان ئٹ زوراکی نا بیگواہی نا ویل تون اوار ایلو بھلا ویل آتیا شابیتی ئٹ تران کننگ آن گڈ دا ویل آتون سیوتی ئٹ مون تننگ کن “بلوچ راجی مُچی” نا پڑو کننگاسس۔
راجی مُچی نا تاریخ نا پڑو ءِ ولدا اسہ وڈیو کلہو ئسے نا ذریعت ئٹ بلوچ یکجہتی کمیٹی نا راہشون ڈاکٹر ماہ رنگ بلوچ کرسا پارے کہ “بلوچی راجی مُچی” 28 جولائی 2024 آ گوادر شار ئٹ مرو۔”
بلوچ راجی مُچی نا مسخت:
بلوچ یکجہتی کمیٹی نا رد ئٹ بلوچ راج دا وختا اسہ منظم ءُ زنک ایسری ئسے نا گواچی ءِ۔ دا زنک ایسری زوراکی نا بیگواہ، ٹارگٹ کلنگ، کسر شکست، چُنکا بھلا ناجوڑی تیان بیرانی و ایلو دروشم تیٹ برجاء ءِ۔ داکان بیدس معاشی استحصال ہم بلوچ راج ئنا بھلا ویل آتیان اسٹ ءِ۔ ریکوڈک، سیندک، و سی پیک کون آ میگا بروجیکٹ آتا چادر نا پد آ بلوچ ڈغار و بلوچ راج ئنا مڈی تا لُٹ و پُل کیہی دہک آن برجاء ءِ۔ ولے دا غٹ ئنا برخلاف بلوچ ہچ وخت سیوتی ئٹ توار ہرفنگ کتنے۔
بلوچ یکجہتی کمیٹی نا کنڈ آن دا راجی مُچی نا مسخت آتا زی آ پریس کانفرنس، وڈیو کلہو، کتابُک، انٹرویو و ایلو زریعت ئٹ روشنائی شاغنگانے۔ بلوچ یکجہتی کمیٹی نا کنڈ آن دا پاش پاننگانے کہ دا راجی مُچی نا کُل آن بھلا مسخت بلوچ راج ئٹ سیوتی ودی کننگ و بلوچ راج ئنا کُل ویل آتون یکجاہ مرسا مون تننگ ءِ و جہان ءِ دا باور کرفنگ ءِ کہ بلوچ تینا زنک ایسری و تینا بنداوی بندغی و راجی حق آتا لتاڑ کن تیار اف۔
داکان بیدس دا راجی مُچی نا زریعت ئٹ بیگواہ غا بندغ آتا خاہوت اتون اواری نا درشانی کننگو، ہرا دا تحریک نا سوگو ءُ بشخ ئسے ءُ و دا تحریک نا کسر شونی ءِ کننگ ءُ۔
بلوچ یکجہتی کمیٹی نا راہشون ڈاکٹر ماہرنگ بلوچ راجی مُچی نا بابت ئٹ تران کرسا پائک کہ “ دا مُچی ریاست کن اسہ پاش کلہو ئس مرو کہ بلوچ داسا چُپ تولوف و ریاست ءِ تینا حق ءِ پھلنگ نا موکل ایتوف، و دا مُچی اسہ تاریخی ریفرنڈم ئس مرو۔”
ڈاکٹر ماہ رنگ تینا اسہ پین انٹرویو ئسیٹی پائک کہ “ ننا 28 جولائی نا مُچی گوادر ئٹ مننگ ءِ و دا اسہ السی مُچی ئس مرو ہرا بلوچ راج ئنا غٹ بنداوی حق آتیکن مرو۔ ہمو ویل آتیکن ہرافتے ہچ وخت ہم ہچو سیاسی جماعت ئس مونا ہتنگ کتنے، ہرافتے میڈیا ہم مونا ہتنگ کتنے و نن بلوچ راج ءِ اسہ تلہ ئسے آ ہتنگ خواہنہ، ہمو سیوتی ءِ تننگ خواہنہ ہرادے تدوکا ہفت دہ یک آن ریاست اوڑان پھلانے و اودے ونڈ کرینے۔”
بلوچ سیاسی باسک آتا کنڈ آن دا امیت نا درشانی مننگ ءِ کہ دا راجی مُچی بلوچ مزاحمت و جہد ئٹی سیوتی ودی کننگ نا کنڈ آ اسہ بھلو گھام ئس مرو۔
“بکوچ راجی مُچی” کن چاہنداری مہم و ریاستی ہڑاند آک:
“بلوچ راجی مُچی” نا پڑو آن گڈ بی وائی سی نا کنڈ آن دا بارو ئٹ چاہنداری مہم بناء کننگا۔ دا چاہنداری مہم ئٹ ترندی جولائی نا تُو ئٹ ہتنگا وختس کہ راجی مچی نا دے خُڑک بننگ ءِ۔ بلوچ راجی مُچی نا تیاری تیٹ اسہ کنڈ آن بی وائی سی نا باسک آک آختہ ءُ و ایلو کنڈ آن ریاست ہم تینا تاغت ءِ کاریم ئٹ ہتِسہ ہڑاند ودی کننگ ءِ۔
ریاست راجی مچی کن برجاء چاہنداری مہم و تیاری تے توننگ کن تاغت کارمرز کننگ ءِ ہراٹی بی وائی سی نا باسک آتا بیگواہی، چاہنداری مہم ئٹ بشخ ہلوکا تیا ایف آئی آر، باسک آتا دزگیری، ٹرانسپورٹر آتے دڑکو تننگ و کمک کروکا رضاکار تے بیم ئنا گواچی کننگ اوار ءِ۔
دا بارث ئٹ بلوچ یکجہتی کمیٹی نا راہشون ڈاکٹر ماہ رنگ بلوچ جہانی بندغی حق آتا گل آتے اسہ چھٹی ئس لکھِسہ پارینے کہ ننا باسک آتے پاکستانی ادارہ غا تا کنڈ آن بیم ئنا گواچی کننگ ءُ و اوفتیا دروغ ءُ ایف آئی آر کننگ ءُ ہرافتے توننگ و ننا باسک آتا رکھ کن نن بندغی حق آتا تنظیم آتیا خواست کینہ کہ او پاکستانی حکومت آ زور شاغر۔
کُل ہڑاند آتیان بیدس ہم بی وائی سی نا کنڈ آن چاہنداری مہم برجاء ءِ ہراڑکن جتا شار تیٹ کارنر میٹنگ اڈ ترسا وال چاکنگ، پمفلٹ بشخنگ، و موبلائزیشن کن تینا سنگت آتا ٹولی جوڑ کننگانے۔ گوادر تون اوار بلوچستان نا جتا شار شال، خضدار، نال، سوراب، حب، گڈانی، کیچ ئنا جتا ہند، منگچر، قلات، مستنگ کوہلو، ایلو شار تیٹ چاہنداری مہم ئٹ ترندی ہتنگانے۔ اندن کراچی نا جتا ہند آتیٹ و ڈیرا غازی خان ئٹ ہم دا مہم برجاء ءِ۔
اندن چاگڑدی حوالکاری میڈیا غا ہم چاہنداری مہم برجاء ءِ ہراٹی نہ بیرہ بی وائی سی نا سروک و سیاسی شخصیت آک “بلوچ راجی مُچی” نا بابت ئٹ چاہنداری تننگ ءُ بلکہ لس مخلوق ہم دا مہم ئٹ بشخ ہلنگ ءِ۔
اندن تربت آن گوادر آ ورنا تا پیدل لانگ مارچ بناء کننگانے ہراٹی بالاچ مولابخش نا ایلم و ایلو سیاسی باسک و ورناک اوار ءُ۔ او دا پیدل مارچ ءِ زیارت تون تعبیر کرسا پارینو کہ دا اوفتا مہر و عقیدت نا درشانی ءِ۔
