بلوچستان نا بنجاہی شار کوئٹہ نا پریس کلب ءِ بست و بند نا موکل آن بیدس سیمینار و کانفرنس آتے توننگ نا فرمان تننگانے۔ ضلع کوئٹہ نا ڈپٹی کمشنر نا پارہ غان شینک مروک اسہ نوٹیفکیشن اسیٹ پاننگانے کہ دا اعتراضی گام ”امن و امان نا ساڑی آ حالیت آتا سوب“ ارفنگانے۔ واہم، ریاستی ادارہ غاک مالو ہم پریس کلب ءِ فرمان تسنو کہ او پریس کلب ئٹ منہ پارٹی تا مہمانداری کپس و پریس کلب نا مونا تولوک برانز آتے تورِر۔
بلوچستان ئٹ صحافتی ادارہ غاک سخت رکھ آتیتون مون تننگو، تدوکا توہ روزنامہ انتخاب و آزادی نا اشتہار آک بند کننگار، اوفک بلوچ ویل آ نوشتہ کننگ نا تڑی تیتون مون تننگ ءُ۔ بلوچستان نا مزاحمتی سیاست ءِ کور کننگ آ صحافی عثمان کاکڑ ءِ بھیم نا گواچی کننگ کن اونا اُرا غا پولیس چھاپہ خلک و بارکھان ئٹ سکیورٹی نا بے سہبی آ سوج کننگ آ صحافی زوراکی ئٹ بیگواہ کننگا۔ بلوچ مزاحمتی طاغت آتے کوریج تننگ نا سوب کیہی صحافیک زوراکی ئٹ بیگواہ و کسفنگانو و صحافتی ادارہ غاک ریاستی تادی نا سوب بھاز سختی تا گواچی ءُ، ہراڑان خیال درشان کننگ نا آزاتی کچ ئٹ کننگانے۔
بلوچستان ئٹ اِرا دہائی نا وخت ئٹ چِل و دو صحافی کسفنگانو، پریس کلب آتیا رکھ خلنگانے و اخبار آتا شینک کاریک زور ئٹ بند کننگانو۔ جہانی صحافی تا بلوچستان آ بننگ ءِ محدود کننگانے و کیہی بلوچ صحافیک بلوچستان نا کاٹم ارفوک ویل آتیا نوشتہ کننگ نا سوب جلاوطن مننگ آ بیوس مسنو و بلوچستان ئٹ ساڑی آ صحافیک فوج و ڈھکوک ایجنسی تا بھیم ئتون مون تننگ ءُ۔
رپورٹرز ود آؤٹ بارڈرز نا شینک کروک ورلڈ پریس فریڈم انڈیکس ئٹ پاکستان نا اِرا درجہ شیف مسنے و 180 ڈیہہ تیان پاکستان 152 آ بسنے۔ پریس فریڈم انڈیکس ئٹ پاننگا کہ پاکستان صحافی تیکن جہان نا بھیم بش کروک ڈیہہ تیان اسٹ ءِ۔ اِرا ہزار بیست و چار نا اولیکو شش توہ ئٹ پاکستان نا ہشت صحافی کسفنگانو و دافتے کسفنگ ئٹ اثردار سیاستدان و ریاستی مقتدر ادارہ غاک اوار ءُ۔
انفارمیشن ٹیکنالوجی نا وخت ئٹ پریس کلب یا میڈیا ہاؤس آتے برانز کروک آتا خیال آتے شینک کننگ کن ریاستی موکل ہلنگ نا فرمان تننگ ئٹ بش مروک توار آتے توننگ مننگ کپک۔ ریاستی ادارہ تے دا بے دانشمند آ فیصلہ ءِ پدا ہلنگ نا بکار ءِ و کوئٹہ پریس کلب و بلوچستان نا اخبار آتے خیال درشانی نا آزاتی نا آئینی حق ئنا ردئٹ کاریم کننگ کن الوئی ءِ۔
