پاکستان نا اسلام آباد پنجاب، خیبر پختونخواہ تون اوار بلوچستان نا جتاء شار آتیٹ زمی جمب نا زیات چنڈی محسوس کننگا ہراناسوب دائسکان 4 بندغ مرگ نا گواچی مننگ و 100 آن زیات بندغ نا ٹپی مننگ نا حوال آک رسینگانے ۔

صوبائی ڈیزاسٹر منیجمنٹ اتھارٹی خیبرپختونخواہ نا ردئٹ محکمہ مُد نا پاننگ ءِ کہ زمی جمب نا کڑمبی 180 کلو میٹر ڈغار ئٹ ئس واونا زیاتی 6.8 ریکارڈ کننگا ۔

محکمہ مد نا ردئٹ زمی جمب پاکستانی وخت نا ردئٹ نن نا 9 بجہ و 47 منٹ آ مس، زمی جمب نا بنجائی افغانستان ٹی ہندوکش ناڈیہہ ئس ۔

زمی جمب نا چنڈیک ترکمانستان ، بھارت ، قازقستان ، تاجکستان ، ازبکستان ، چین ، افغانستان ، کرغزستان و بلوچستان ئٹ مارنگار۔

پاکستانی شار آتیٹ کوہاٹ، صوابی ٹی ہم زمی جمب نا زیات جھٹکہ محسوس کننگانے۔ اوکان بیدس بہاول پور، لودھراں، ڈی جی خان،میانوالی، خانیوال، ٹوبہ ٹیک سنگھ، پارا چنار، کرک ٹی ہم زمی جمب نا چنادیک گمان کننگار۔

زمی جمب  نا سوب دیوال نا تمنگ و گیشتر تدینی تیٹ 4 بندغ مرگ نا گواچی۔

اسپتال ذرائع تا ردئٹ لوئر نا علاقہ ڈھیری ٹی زمی جمب  آن اُرا نا دیوال تما ہراٹی نیاڑی اس مرگ نا گواچی مسونے ۔

ریسکیو ذرائع تا ردئٹ لوئر دیر ٹی لتاڑ آن اسہ بندغ ئس ہم مرگ نا گواچی مس اندن جتاء شکست آتیٹ 43 بندغ ٹپی مسونو ۔

ریسکیو ذرائع تا ردئٹ مانسہرہ نا علاقہ شنکیاری ٹی زمی جمب  نا وخت نیاڑی ئس اُست نا دورہ مننگ آن بیران مس ۔

داکان بیدس سوات نا علاقہ مدین ٹی اُرا نا دیوال نا تمنگ آن 13 سال نا مسڑ ئس مرگ نا گواچی مس ۔ سوات نا علاقہ شموزئی ٹی اُرانا چھت نا تمنگ آن اسہ بندغ ئس مرگ نا گواچی و ارٹ ٹپی مسو ۔

پولیس نا ردئٹ سیدوشریف اسپتال سوات ٹی زمی جمب  ٹی ٹپی مروک 50 بندغ ہتنگار اندن لوئر دیر ٹی زمی جمب نا وخت لتاڑ نا نیامئٹ 17 بندغ تمیسہ ٹپی مسر ہرافتے تمیر گرہ اسپتال آ دننگا ۔

خیبر پختونخواہ نا شار صوابی نا علاقہ شیخ جانہ ٹی زمی جمب نا سوب اُرا نا چھت نا تمنگ آن نیاڑی تون اوار پنچ بندغ ٹپی مسونو۔

ڈائریکٹر جنرل ریسکیو 1122 ڈاکٹر خطیر احمد نا پاننگ ئس کہ زمی جمب آن خیبر پختونخواہ نا 5 ضلع آتیٹ چھت و دیوال آتا تمنگنا حوال آک رسینگانے، ایمرجنسی کالز صوابی، چترال ، بونیر ، مردان و لوئر دیر آن دوئی مسر ۔

ایڑے کوہستان ٹی زمی جمب  نا سوب لینڈ سلائیڈنگ نا سوب ٹی شاہراہ قراقرم بند مسونے اندن کالام نا ہند کرکنڈی پل آ لینڈ سلائیڈنگنا سوب بحرین کسر بلاک مسونے ۔

اسلام آباد نا سیکٹر ای الیون ٹی اسہ بھلو منزلہ رہینگوک عمارت ئس زمی جمب  نا چبڈی تیٹ زیمی مسونے و اونا دیوال آتیٹ تَل تمانے۔ رہینگوک آک  فلیٹس آن پیشن مسر۔ ضلعی بست و بند بلڈنگ نا جانچ ءِ  کرو ۔

محکمہ مدح نا ردئٹ زمی جمب  نا آفٹر شاکس نا لڑ برجاء ءِ  و آفٹر شاکس نا زیاتی 3.7 ریکارڈ کننگا ۔

بلوچستان نا ضلع کیچ نا علاقہ بلیدہ گِلی ئٹ پاکستانی لشکر ءِ اسہ بمب جلہو اسیٹ ٹِک کننگا ہراڑان پاکستانی کارندہ تے نسخانارفنگ نا حوال مونا بسونے۔

پِن کروک جلہو نا ذمہ واری ءِ بلوچ سلہہ بند گل بلوچ لبریشن آرمی ارفینے۔ بی ایل اے نا ترجمان جیئند بلوچ شینک کروک بیان اٹ پارےکہ ننا سرمچار آک بلیدہ و خضدار ئٹ اِرا جتا جلہو تیٹ کوزہ گیر پاکستانی لشکر و اوفتا کمکار کارندہ ءِ ٹِک کریسہ جانی و مالینسخان تسر۔

جیئند بلوچ پارے کہ ننا سرمچار آک کیچ ئنا علاقہ بلیدہ، گِلی ئٹ کوزہ گیر پاکستان نا اسہ قافلہ ئسے شورہ تیٹ ٹِک کریر، سرمچارآک دژمن نا قافلہ ئٹ اوار اسہ گاڑی ئسے ہمو وخت ٹِک کریر ہراتم اوفک ننکان سُر پُر کننگ ئسر۔

“تراک نا دک ئٹ بریسہ گاڑی ئٹ سوار چار کارندہ ہند آ کسکر و اِرٹ ٹپی مسر۔”

جیئند بلوچ مُستی پارے کہ اسہ پین جلہو اسیٹ بی ایل اے نا سرمچار آک 19 مارچ 2023 آ خضدار نا علاقہ کھنڈ ئٹ کوزہ گیرپاکستانی لشکر و ڈھکوک ایجنسی نا اسہ کارندہ، مسکوئی ڈائریکٹر ریڈیو پاکستان سلطان احمد شاہوانی آ چغلی بمب جلہو اسکریر، پِن کروک بندغ “ایم آئی” نا مُخ تفی ئٹ خضدار شار ایب کیب ئٹ کاریم کننگے و کوزہ گیر لشکر نا پاننگا سرکاری مجلس ہڈتریسہ کرینے۔

او پارے کہ دا چغلی بمب اسہ تڑی اس ئس، سرمچار آک جانی نسخان تیان رکھ ئنا خیال تخار۔ سلطان احمد شاہوانی و اونا کمکارآتے پاش پانہ کہ اوفک بلوچ نا برخلاف کاریم تے ایسر کیر نئے تو ننا ایلو جلہو تُرند مرو۔

ایسر ئٹ جیئند بلوچ پارے کہ بلوچ لبریشن آرمی پِن کروک ہڑتوما جلہو تا ذمہ واری ءِ ارفک و و نن دا عزم ئنا اسیکہ وا درشانی کینہ کہدژمن لشکر نا پیشن مننگ اسکان ننا جلہوک برجاء مرور۔

بلوچستان نا ضلع پنجگور و خضدار ٹی سم کاری و گیشتر تدینی تیٹ ارا بندغ مرگ نا گواچی اندن شش بندغ ٹپی مسونو ۔

شابیت حوال تا ردئٹ پنجگور نا علاقہ بیٹاں کلگ ٹی ڈغار نا جیڑہ آ غلام حیدر ولد عبدالقادر ہند جیکب آباد سندھ سم لگنگ آن مرگ ناگواچی کننگا ۔

اندن پنجگور آن حوال آتا ردئٹ خانے تل ٹی زمین نا جیڑہ آ لٹ کٹ آن امیر بخش و میران بخش ولد محمد بخش و محمد عالم زیات ٹپیمسونو ۔

خضدار جھالاوان کمپلیکس نا ہند آ سم کاری نا اسہ تدینی ٹی عبدالحکیم سلاء بند بندغ آتا جلہو ٹی مرگ نا گواچی مس اندن خضداراللہ والا چوک آ تدینی جھالاوان موبائل سینٹر آ سلاء بند بندغ آک جلہو کریسہ دکان نا مالک عبدالصمد نوتانی ءِ  زیات ٹپی کریر ۔

بلوچستان نا علاقہ کولواہ ٹی فوجی آپریشن ئٹ پاکستانی فورسز کارندہ آتا  دوتیان پیر ءُ بندغ ئس کسفنگا و اِرا ایلم تون اوار مُسہبندغ زوراکی ئٹ بیگواہ کننگ نا حوال آکو ۔

ہندی بندغ آتا ردئٹ کولواہ نا جہاندمی مَشی علاقہ آتیٹ برجاء فوجی آپریشن نا وختا فورسز کارندہ آک اللہ داد ولد ابراہیم پِنی پیر ءُبندغ ئسے   زیات بے دادی نا گواچی کننگا ہراڑان پن کروک بندغ مرگ نا گواچی مس ۔

حوال تا ردئٹ آپریشن نا نیام ئٹ فورسز کارندہ آک ارا ایلم تون اوار مسہ بندغ ءِ زوراکی ئٹ بیگواہی نا گواچی کریسہ نا درست ہند آدریر ۔ ہراتا چاہنداری کٹو ولد بابیک ، سنجر ولد بشام و صدام ولد بشام نا پن آن مسونے ۔

ذرائع تا ردئٹ آپریشن نا وختا مرگ نا گواچی کروک اللہ داد نا جون ءِ  تدوکا دے فورسز کارندہ آک گیشکور لیویز نا حوالہ کننگا۔اندناونا مال مڈی  و ساہدار تے فورسز کارندہ آک دزگیر کریسہ تنزلہ نا ہند آ مروک فورسز کارندہ آتا کیمپ آ رادہ دننگانے ۔

واہم عسکری ذرائع تا ردئٹ علاقہ ٹی فوجی آپریشن نا رد ئٹ ہیت مونا بتنے ۔

بھارتی کوالخواک سکھ راہشون نا دزگیری کن پنجاب ریاست ئٹ انٹرنیٹ و موبائل نیٹورک آتیا رکھ ءِ شابیتی تسونو۔

پیشن ملکی احوال تروک ایجنسی ‘اے ایف پی‘ نا رِدئٹ بھارتی حکومت نا پارہ غان موبائل و انٹرنیٹ نا بند کننگ ئٹ ہمو وخت شابیتیہتنگا ہراتم پنی آ سکھ راہشون امرت پال سنگھ نا منوکاک لندن آن گڈ سان فرانسیکو ئٹ بھارتی قونصلیٹ ءِ گیڑ کریر، گڑاتے پرغار وبیرک ءِ شیف کریر۔

حوال تا رِدئٹ بھارتی ریاست پنجاب ئٹ سکھ راہشون امرت پال سندھ نا دزگیری کن آپریشن بناء کننگانے ہرا کہی تُوہ تیان سکھ آتیکنجتا مُلک ئنا خواست کروک ‘خالصتان تحریک‘ ئٹ پنی ءِ۔

پولیس نا پاننگے کہ دائسکان 144 بندغ ءِ دزگیر کننگانے ولے امرت پال سندھ نا ہچو احوال اس اف۔

ایلو پارہ غان انٹرنیٹ آ رکھ ئٹ بروک بیست و چار گھنٹہ اسکا ودکی کننگانے۔

راجی احوالکاری تلہ غا تالان ویڈیو تیٹ خننگ مریک کہ سان فرانسیکو ئٹ بھارتی قونصلیٹ ئٹ منہ بندغ گڑاتے پرغنگو و ماڑی نا پیشنتخوک تیوہ غا ہڑاند آتے مُر کننگو۔

بھارتی قونصلیٹ نا پیشن مُچ مروک برانز کروک آک ‘فری امرت پال سنگھ‘ نا کُوک خلکر۔

بھارتی کوالخواہ تا پاننگے کہ وزارت داخلہ ویڈیو غا پامداری تون اوننگے و لندن ئٹ بھارتی ہائی کمیشن نا مونا امرت پال سنگھ نامنوک آتا پارہ غا گڑاتے پرغن آ برطانوی سفارت کار ءِ خواہفینے۔

اے ایف پی ‘راستکی پٹ پول‘ نا پارہ غا پَک کننگوک ویڈیو ئٹ اسہ بندغ ئسے سفارت خانہ نا بڑز تلہ غا خلوک بھارتی بیرک ءِ شیفکننگ آ خننگ مریک ہراڑے مُچی خالصتانی بیرک ارفوک سلوک ءِ۔

بھارتی حکومت ساندہ پیشن ملکی حکومت آتیان سخت گیر سکھ باسک آتا کاریم تیا گلہ کرینے و دوبہ خلکونے کہ او شابیت پِڑ ئسے آمالی زور آ بغاوت ءِ بش کنن نا کوشست کننگو۔

زمغ، چاخو و توفک آتیتون امرت پال سنگھ و اونا منوک آک تدوک تُوہ اسہ پولیس تھانہ ئسے آ شولنگار، ہراڑے 30 سالہ سکھ راہشوننا کمکار تیان اسٹ ئسے اسہ گمانی جلہو و برمتہ کننگ نا کوشست نا دوبہ ئٹ دزگیر کننگاسس۔

امرتسر ئٹ پولیس نا ترند کاروائی نا وختا جھڑپ آتیٹ کہی کارندہ غاک ٹپی مسر ہرا کوالخوا تے پین ترندی نشان تننگ آ بیوس کرے۔

بلوچستان نا ضلع خضدار آن درو پاکستانی لشکر و ڈھکوک ادارہ غاک اِرا ورنا ءِ اوفتا اُرا غان زوراکی ئٹ بیگواہ کرینو۔

ٹی بی پی ءِ حوالکار آک پاریر کہ درو خضدار ئٹ کھنڈ ئنا علاقہ آن پاکستانی لشکر و ڈھکوک ادارہ تا کارندہ غاک محمد حسن نا مار خالد و عبداللہ نا مار آصف ءِ اوفتا اُرا غان دو بجہ نا وخت دزگیر کننگ آن گڈ نادرست جاگہ آ دریر ہراڑان گڈ اوفتا بابت ہچو معلومداری اس رسینگتنے۔

حوالکار تا پاننگ ءِ کہ زوراکی ئٹ بیگواہ خالد کراچی نا ہندی ئسے ہرا منہ دے مالو تینا سیال آتیا بسوسس اندن ہڑتوما ورناک خوانندہ ءُ۔ کوالخواک تدینی نا بابت ہچو ہیت اس مونا ہتنو۔

بلوچستان ئٹ زوراکی نا بیگواہی تا تدینیک بیم بش کروک حالیت اس الکنو ہراڑے ہڑدے نا بنداو آ زوراکی نا بیگواہی تا تدینیک رپورٹ مننگ ءُ۔

ٹی بی پی نا کچ و حساب نا رد ئٹ مارچ ئنا اولیکو اِرا ہفتہ ئٹ تیوہ بلوچستان آن 34 بندغ زوراکی ئٹ بیگواہی نا گواچی مسونو ہرافتیٹ یانزدہ یلہ کننگانو اندن اِرا ہفتہ ئٹ 3 بندغ نا جوْنک خننگانو۔

درو گوادر ئٹ حق دو تحریک نا زالبول برانز ئٹ ہم بیگواہ بندغ تا یلہ کننگ نا خواست کننگا۔ برانزیک ماہل بلوچ نا دزگیری نا مذمت کریر و اودے یلہ کننگ نا خواست کریر۔

اندا وخت ئٹ نیشنل ڈیموکریٹک پارٹی شال کوئٹہ ئٹ پریس کانفرنس کریسہ بلوچستان ئٹ تعلیمی و ایلو ویل آتون اوار ماہل بلوچ نا زوراکی ئٹ بیگواہی و دزگیری ءِ پاش کننگ نا بابت شابیت چاہنداری تسر۔

این ڈی پی راہشونک بلوچ زالبول نا چار وار ریمانڈ آ تننگ ءِ کانودی کاروائی نا پِن آ بے دادی پِن تسر۔

تربت یونیورسٹی نا خوانندہ آتا یونیورسٹی ٹی کہی دے تیان بجلی، دیر، انٹرنیٹ تون اوار خواست آتیکن یونیورسٹی آن ڈی بلوچ اسکاندپ درشانی و بھلا کسر آ گاڑی تا ہن و بر کن بند کننگا۔

دا وخت خوانندہ آک بست و بند نا برخلاف ترند نعرہ خلکر خوانندہ آتا پاننگ اس کہ تربت یونیورسٹی ءِ بجٹ رسینگ آن بیدس ہمآسراتی تا کمبوتی ءِ۔

خوانندہ آتا پاننگ ءِ تربت یونیورسٹی ٹی بلوچستان نا جتا ضلاع آتیان تعلق تخوک خوانندہ آک خواننگ ءُ ہراڑے ہزار آتا کچ ئٹی مر وپدماندہ علاقہ آتیان تینا اومیت، است خواہی ئٹ خواننگ ءِ ایسر کننگ نا جوزہ تون اوار داڑے بسونو تاکن او جوان خوانسہ بروکا وختئٹی تینا راج و علاقہ کن جوان ءُ کڑد اس ایسر کننگ کیر ولے داڑے بست و بند نا فرض آتون بے پامی نا سوب آن اوفتے بنماسی آسراتیو تعلیمی حق آتیان بے بشخ کننگ ءُ ہرانا سوب آن اوفتیکن جتا ویل آک ودی مننگ کیرا۔

برانز کروک خوانندہ آتا پاننگ اس تدوکا کہی دے تیان بجلی مفرینگ نا سوب آن ہاسٹل آتیٹ دیر و ایلو آسراتی تا کمبوتی ءِ ہرانا سوبآن خوانندہ آک بھاز زیمی ءُ–

اندن خوانندہ آتا پین پاننگ اس کہ یونیورسٹی بست و بند ویل آتا ایسر کننگ کن بے پامی کننگ ءِامتحان آک ہم خڑک ءُ، بڑز کوالخواکدمدستی وڑ ئٹ نوٹس الیر،اسکان خواست آتے پورو کتتنو ڈی بلوچ کسر ملینگوف۔

سعودی عرب و ایران نا گپ و تران، ڈیہہ آ زیمک

ٹی بی پی سرگپ

تدوکا ہفتہ چین ئنا سلا نا کوشست آتیان دے ٹکی نیامئی نا اِرا دژمن ملک سعودی عرب و ایران کیہی سال آتیان ایسر سفارتیتعلقداری تے بحال و بروک آ اِرا تُو ئٹ سفارت خانہ تے ملنگ نا پڑو کرینو۔ چین آن مالو عمان و عراق نا مہمانداری ٹی سعودی عرب وایران نا نیام ئٹ گپ و ترانک کیہی وار مسونو۔ سعودی عرب و ایران نا تعلقداری تا بحالی نا پاش یا اودیم زیم آک ننا ڈیہہ آ تمور۔

تعلقداری تا بحالی آن مالو دے ٹکی نیمائی ڈیہہ ئٹ کیہی دہائی تیان سنی اکثریتی سعودی عرب و شیعہ اکثریتی ایران نا نیام ئٹحالیت آتا خرابی برجاء مسونے و دے ٹکی نیامئی نا کیہی ملک آک دانا پلویڑ ئٹی ءُ۔ یمن، شام، عراق و لبنان ئٹ سعودی عرب و ایران نابڑزی کن جنگ مننگ ءِ و ہڑتوما ملک آک جتاء دژمن ٹولی تے کمک کننگ ءُ۔ ایران نا جوڑ کروک تنظیم آک دا ملک آتیٹ سعودی عرب کنسختی تیٹ ودکی کرینو و حوثی باغی تا کنڈ آن آرامکو نا تیل کمپنی تیا ترند جلہوک و امریکہ تون تعلقداری تیٹ بے مہری و ڈیہہ ئٹایران نا زیم تا ودکی آن گڈ سعودی عرب تینا پالیسی تے بدل کننگ و ایران تون تعلقداری تا بحالی نا بابت گپ و تران کننگ آ بے وسمسونے۔

ننا ڈیہہ و بلوچستان ئٹ ہم سعودی عرب و ایران تینا جوڑ کروک تنظیم آتا کمک ئٹ اسٹ ایلو کن سختی ودی کریسہ کرینو۔ سعودیعرب سنی انتہاء پسند تنظیم و مسیت آتا مالی کمک کننگ ءِ و دا تنظیم آک بلوچستان ئٹ شیعہ آباتی (خاص وڑ ئٹ ہزارہ کمیونٹی) ءِٹک کننگ ءُ و ایران نا دوبہ ءِ کہ اوفتا بر خلاف جنگ کروک سنی بلوچ تنظیم آتے ہم سعودی عرب مالی کمک کننگ ءِ۔

بلوچستان و پاکستان نا جتاء علاقہ تیٹ شیعہ آباتی ٹی ساڑی منہ بندغ و تنظیم آتے ایران کمک کننگ ءِ و ایران نا سروکی ٹی شیعہآباتی نا بھلو کچ اس جنگ کننگ کن شام، عراق و یمن آ ہنانے۔ پاکستان ئٹ شیعہ آباتی ءِ زینبیوں بریگیڈ و افغانستان ئٹ فاطمیونبریگیڈ ئٹ سوگوْ کننگ ءِ ہرا پاکستان و افغانستان ئٹ ایران نا سواد آتیکن کاریم کننگ ءُ و جہان نا ایلو ملک آتیٹ ایران آن ایمون جنگآتیٹ بشخ ہلنگ ءُ۔

دا ہیت وخت آن مالو ءِ کہ ایران و سعودی عرب دے ٹکی نیامی و ننا ڈیہہ ئٹ پراکسی تنظیم آتا کمک ءِ بند کرور یا چک تاٰڑ و حالیت آتاخرابی اندا وڑ برجاء مرو ولے دے ٹکی نیامی ئٹ ابراہیم گپ و تران آن گڈ ایران نا بر خلاف پوسکنو صف بندی مننگ ئس، دا حالیت آتیٹایران و سعودی عرب نا گپ و تران ایران نا بھلو سرسہبی اس خیال کننگو و چین ئنا کمک ئٹ گپ و تران دے ٹکی نیامی ئٹ چین ئناخارجی و اقتصادی ڈپلومیسی نا سرسہبی ءِ ہرا ڈیہہ ئٹ اونا کڑد ءِ ودفو ہرا نا زیم آک پاش یا اودیم بلوچستان آ ہم تمور۔

بلوچستان نا ضلع آواران ئٹ نوکاپ نا دیر اسہ گاڑی ئسے درے ہراڑان ہشت بندغ کسکر۔

تدینی تحصیل جھاو نا ہند سیڑھ ڈور ئٹ مسونے ہراڑے استو گاڑی ئسے پِر تیان گڈ دیر درے۔ علاقائی حوال تا رِدئٹ گاڑی ٹی سوار ہفتبندغ کسکنو ہرافتا جوْن تے جھاو بنجا ہسپتال آ سر کننگانے۔

حوال تا رِدئٹ اسہ چُنا اس دائسکان بیگواہ ءِ ہرانا بابت معلومداری اف کہ او زندہ ءِ یا کسکنے۔ کہوک آتا تعلقداری سوراب ضلعخضدار آن پاننگک۔

درو بلوچستان نا کہی علاقہ آتیٹ پِر بناء کرے، بھازا علاقہ آتیٹ شنزہ و ترونگڑ نا رِد برجاء مس۔ ضلع آواران ئٹ بھلو کچ اسیٹ ترونگڑو پِر نا احوالک درو بیگہ آن بسر۔

محمکہ مُد ئنا رِدئٹ بلوچستان نا کہی علاقہ آتیٹ اینو ہم پِر ئنا گمان ءِ۔

پاکستان فوج نا شعبہ احوالکاری (آئی ایس پی آر) آن شنک کروک بیان نا رد ئٹ بلوچستان نا ضلع چمن نا علاقہ بوغرہ روڈ آ ڈھکوکحوال تا رد ئٹ آپریشن ٹی دہشت گرد آتا جاگہ آن مچ کروک سلاء نا بھلو کچ اس خننگانے۔

“اندن دہشت گرد آک آپریشن آن مست علاقہ آن نرینگ ٹی سرسہب مسوسر۔”

آئی ایس پی آر نا رد ئٹ آپریشن نا وخت آ دہشت گرد آتا جاگہ آن نا بھلو کچ اسٹ سلاء خننگانے، ہرافتیٹ راکٹ، تینٹ جوڑ کروک بمب،گولہ بارود و پین گڑا ہم اوار ءُ ۔

بیان نا رد ئٹ آپریشن علاقہ ٹی دہشت گرد آتا ساڑی مننگ آ کننگا اندن دہشت گرد آک سکیورٹی فورسز، شاری تیا جلہو و تینٹ بمبجوڑ کروک بمب تخنگ ئٹ اوار ئسر۔

آئی ایس پی آر نا رد ئٹ دہشتگردی نا مواد آتا رسینگ آن کوئٹہ و ایلو شاری علاقہ آتیٹ دہشت گردی نا کاریم تے توننگ ٹی کمکرسینگانے–