ایران، اوغانستان و پاکستان نا جتا بشخ آتیا تالان ڈیہہ بلوچستان نا سیاسی و زمینی چِک و تاڑ نا مُرغن و غنجل دیہاڑ ئسے۔ دا تیدری ئٹ بلوچستان نا ونڈ کننگ نا بابت ئٹ کڑمبی تون چمشانک شاغنگانے، ہرا 1795 آن 1948 نا نیامٹ کہی ونڈ آتے جتا کالونیل طاغت و ریاست آتا ذریعت ئٹ ونڈ و اوار کننگا۔
دا تیدری ئٹ بلوچستان نا ونڈ کننگ نا سوب آک، جتا معادہ تیا چمشانک شاغنگو۔ دا ہم اوننگو کہ بلوچ قومپرست آک انتکن 27 مارچ ءِ ماتمی دے نا ڈول ئٹ ہڈ ایترہ، ہراتم پاکستانی حکومتی بست و بند قلات (بلوچستان) نا تیوہ غاتیان بھلا ریاست ءِ تینے ٹی اوار کریسس۔
داڑان بیدس، دا تیدری ڈیہہ ئنا دیہاڑی نشخہ آتے اوار کرو و بلوچستان نا ہر تشریح نا شابیتی درشانی ءِ کننگو، ہراٹی برطانیہ، فارسی و اوغان سلطنت آتے تروک علاقہ غاتیتون اوار اوار ہمو علاقہ غاک ہم اوار ءُ ہرافک دُوارہ پاکستان ئٹ اوار کننگار۔
ڈیرہ جات نا قلات آن پاکستان اسکان سفر
ڈیرہ جان اسہ اندنو ڈیہہ ئسے ہرانا زیات بشخ آک اینو نا دور نا پاکستانی پنجاب نا صوبہ ئٹی ءُ، ہراٹی ڈیرہ غازی خان، ڈیرہ فتح خان (تونسہ)، راجن پور، بھکر ، لیہ، و رحیم یار خان نا منہ بشخ اوار ءُ۔ داڑان بیدس صوبہ خیبر پختونخواہ نا علاقہ غاک ہرافتیٹ ڈیرہ اسماعیل خان، ٹانک و ایب کیب ئنا علاقہ غاک اوار ءُ، داڑتون اوار ساڑی بلوچستان و صوبہ سندھ ئنا سیمی علاقہ غاک ہم اونا ہد ہویل نا بشخ ئسر۔ ایلو بلوچ علاقہ غاتیان دیخہ در چُنک مننگ آن گڈ ہم دا تیوہ غاتیان زیات آبات مروک بلوچ علاقہ غاتیان اسٹ ءِ۔ ڈیرہ جات ئٹ بلوچ آباتی نا دیہاڑ پانزدمیکو صدی آن ہند تخک۔
1717 آن 1819 اسکان ڈیرہ جات نا دودائی فیڈریشن بلوچستان نا بنجائی حکومت خوانین قلات نا اختیار اٹ ئس۔ واہم، 1795 ئٹ ہمسایہ اوغانک ڈیرہ جات آ جلہو کریر و بیست و چار سال اسکان دا اوغان تا کوزہ اٹ مس۔ دا نیامٹ قلات حکومت تہہ و پیشن نا چِک و تاڑ تا سوب بدحالیت اٹ ئس ہرانا سوب ڈیرہ جات نا بلوچ قبائلی تے زَبر کمک کننگ متئو۔
1819 ئٹ اوغان تے سکھ سلطنت بدحالیت باہ تننگ نا گواچی کرے و ڈیرہ جات تون اوار کہی اوغان علاقہ غاک سکھ آتا کوزہ ئٹ ہنار ولے بلوچ آتا برجاء مزاحمت نا سوب سکھ آک بیرہ شار و قلعہ آتے اسکان توننگوک مسر، و ایلو ڈیرہ جات آک بلوچ جنگول آتا دوٹی ئسر۔ دا لڑ 1839 اسکان برجاء مس ہراتم سکھ آتے برطانوی لشکر بلوچ قبیلہ غاتا کمک ئٹ بے سُہب کرے۔
انگریز آک سکھ آتے بے سُہب کننگ آن گڈ دا علاقہ غاتے تینا دوٹی ہلکر۔ 1849 ئٹ برطانوی حکومت دا ڈیہہ ءِ اِرا ضلع ڈیرہ غازی خان و ڈیرہ اسماعیل خان ئٹ بشخا۔ دُوارہ، ہراتم پاکستان 1947 ئٹ ٹہیفنگا گڑا ڈیرہ جات نا علاقہ پاکستان نا بشخ جوڑ مس۔
1947 آن گڈ ڈیرہ جات نا منہ بشخ پاکستان نا ایلو صوبہ غاتیٹ ونڈ کننگار۔ منہ علاقہ ءِ ساڑی صوبہ خیبرپختونخواہ، سندھ و بلوچستان صوبہ آتیٹ اوار کننگا، و ڈیرہ جات نا زیات علاقہ غاک 1970 ئٹ پاکستانی صوبہ پنجاب ئٹ اوار کننگار۔
دے ٹکی و دے کہی بلوچستان نا ہد ہویل
دے ٹکی و دے کہی بلوچستان نا نیامٹ اٹ کشنگوک لیک اسہ اندنو سیم ئسے ہرا ایران و پاکستان نا جہانی سیم تے درشان کیک۔ دا 1871 ئٹ ٹہیفنگا و 1903 و 1905 ئٹ اِرا معاہدہ ئٹ دادے گولڈ سمڈ لیک و ہولڈز آربیٹریری نا ذریعت ئٹ باقاعدہ دروشم تننگاسس۔ گولڈ سمڈ لیک کوہ سیہان نا علاقہ آن گوادر خلیج نا رہی گواتر اسکان نا بشخ آتے ونڈ کیک، و ہولڈز آربیٹریری (تھامس ہولڈچ) نا رِدئٹ کوہ ملک سیاہ آن کوہ سیہان اسکان نا بلوچ علاقہ غاتے ونڈ کیک۔ 1938 ئٹ دے کہی بلوچستان ءِ پین پنچ صوبہ ئٹ ونڈ کننگا۔ سیستان و بلوچستان نا پن ئٹ اسہ پوسکنو صوبہ اس ٹہیفنگا، و دے کہی بلوچستان نا منہ بشخ ءِ کرمان، جاندمی خراسان و ہرمزگان اٹ ایسر کریسہ اوڑدہ کننگا و اسہ چنکو علاقہ اس رضوی خراسان ئٹ اوار کننگا۔
دا ہد ہویل آک و دانا سوب علاقہ نا پوسکن ٹہیفنگ ڈیہہ ئٹ غنجل دیہاڑ و ہد ہویلی سیاسی طاغت آتا درشانی ءِ کیک۔ دے ٹکی و دے کہی بلوچستان لیک ایران و پاکستان نا نیامٹ ٹہیفوک سیم، دا ڈیہہ ئنا سیاسی، زرگزرانی و چاگڑدی معاملہ غاتیا اینو ہم زیم شاغک۔
1959 ئٹ، پاکستان میرجاوہ و ایلو سیمی علاقہ غاتے ایران نا دوٹی تس، ہرانا نا سوب ہڑتوما ملک آتا نیامٹ بلوچستان نا سیم تیٹ چنکو بدلی کننگا۔ علاقہ غاتا دا تننگ ایران و پاکستان نا نیامٹ سیالی ءِ زَبر کننگ نا سفارتی کوشست اس ئس۔
عکس اٹ نشان تروک ہند آک گمانی ءُ و کچ سہی مننگ کپک۔ مُستی، الّمی اف کہ ہد آتا نمائندگی پک معلومداری آ تالان مرے۔
بلوچ-افغان-فارس سیمک
دیہاڑی رِد و شرہ ئی علاقہ
بلوچ علاقہ غاتے مسہ معاہدہ غاتا کمک ئٹ جاندمی دے کہی و دے ٹکی/دے کہی علاقہ غاتیٹ بشخنگاسس۔
تیوہ غاتیان اولیکو معاہدہ مسٹمیکو ثالثی نا کمک ئٹ کننگوک پیرس معاہدہ ئس ہرادے 1857 ئٹ مننگا ولے اودے 1872 و 1935 نا نیامٹ مُستی دننگا و ارٹمیکو سیمی معاہدہ ءِ میک موہن ایوارڈ پاننگک دا معاہدہ نا بناء 1872 ئٹ کننگاسس ولے قانودی دروشم 1903 ئٹ و 1905 ئٹ تننگا ہراڑان گڈ بلوچ علاقہ غاتیٹ اوغانستان ایران سیم ٹہیفنگا۔
مسٹمیکو سیمی بشخنگ ڈیورنڈ لائن 1893 ئٹ ٹہینگاسس، ہرا اوغانستان و ساڑی پاکستان ءِ جتا کیک، ہرانا قانودی ہند دائسکان شرہ تون ءِ۔ 1896 ئٹ، اوغان امیر نا پارہ غان ڈیورنڈ معاہدہ ءِ منپرنگ نا سوب بلوچ علاقہ غاتیٹ سیم تا بشخنگ کن اسہ پین معاہدہ اس کننگا ہرا وغان بلوچ سیم کمیشن ئٹ کیپٹن میک موہن نا کماشی ئٹ ٹہیفنگاسس، ہرا اوغانستان و پاکستان نیامٹ بلوچ علاقہ غاتے جتا کیک۔ واہم زیات بلوچ مورخین و کتاب نوشتکار آک میک موہن لیک ءِ ڈیورنڈ لیک آن جتا سرپد مریرہ۔
1929 ئٹ بلوچ علاقہ غاتے فراہ و قندھار نا صوبہ غاتیٹ اوڑدہ کننگا، 1968 ئٹ بلوچ علاقہ غاتے چار صوبہ؛ نمروز، قندھار، فراہ و ہلمند ئٹ اسیکہ وا بشخنگا۔ ڈیورنڈ لیک و میک موہن لیک نا شرہ ئی قانودی ہند ڈیہہ ئٹ جارات و سلامتی کن اسہ بھاز بھلو ءُ ہڑاند ئسے۔
یاتی مرے میک موہن لیک ساڑی بلوچستان و اوغانستان نا علاقہ غاتے بشخک، و میک موہن ایوارڈ بلوچ صوبہ نمروز و دے کہی بلوچستان نا علاقہ غاتے بشخک۔
کراچی، خانگڑھ، گوادر، میرجاوہ
کراچی
کراچی ٹی بلوچ آباتی نا اسہ شابیت ءُ دیہاڑ ئسے، سندھ ئٹ اسلام نا بننگ آن مالو ہم بلوچ آک دا علاقہ ئٹ آبات ئسر، پانزدہمیکو کرن ئٹ کراچی مکران نا بشخ اس مس و اوکان گڈ جتاء علاقائی تاغت آتا شیف آ ہم بسونے۔
1666 ئٹ مغل شہنشاہ اورنگزیب نا حکومت نا وخت ئٹ اودے رسمی وڑ ئٹ بلوچستان نا حکمران نا دوٹی تننگاسس۔ کراچی 130 سال قلات تون مننگ آن گڈ اسہ پین بلوچ حکومت، تالپور آتا دوٹی ہنا۔ فروری 1839 ئٹ برطانوی فوج بندرگاہی شار ئنا کنٹرول ءِ دوئی مس۔ ہرانا سوب آن اولیکو اینگلو-افغان جنگ آن مالو انگریز و قلات نا نیام ئٹ گپ و تران مس ہرا نا شرط آتیان اسٹ کراچی آ قلات نا تاغت ءِ بحال کننگ ئس ولے گپ و تران بےسہب مس و انگریز آک قلات آ جلہو کریر۔
خانگڑھ
1839 و 1849 نا نیام ئٹ بلوچستان نا علاقہ خانگڑھ آ انگریز آک کوزہ کریسر۔ خانگڑھ آ کوزہ نا سوب اونا ڈغار جوڑ مس ہرادے فوجی بارو ئٹ بھاز اہمیت دوئی ئس۔ انگریز آتا کوزہ ءِ سندھ، بلوچستان و اوغانستان اسکان اندا علاقہ آن شابیتی رسینگا۔ خانگڑھ نا پِن 1847 نا خڑک آتیٹ بدل مریسہ جان جیکب نا پن آ جیکب آباد تخنگاسس ہرا داسہ خراب مریسہ جیکم آباد پاننگک۔
گوادر
سال 1783 ئٹ ہراتم سید بن احمد بلوچستان نا حکمران نوری نصیر خان نا دربار ئٹ باہوٹ ہلنگ کن بس گڑا نصیر خان متکنا بلوچ دود باہوٹ نا شرف ءِ برجاء تخیسہ عمانی شہزادہ ءِ گوادر و اوڑان دوئی مروک کٹھیا ءِ تس۔ گوادر، عمان کن اسہ اسٹریٹیجک بندرگاہ و دریابی تجارت نا بنجاہ نا وڑ ئٹ کاریم کریسہ کرے۔ 1958 ئٹ گوادر ءِ بلوچستان ئٹ اوار کننگا۔
میر جاوہ
1959 ئٹ اسہ سیمی معاہدہ ئسے نا رد ئٹ او وخت ئنا پاکستانی آمر جنرل ایوب خان میر جاوہ و ایلو سیم ئنا علاقہ تا منہ بشخ ٹیکی نا وڑ ئٹ ایران ءِ تس۔ دا معاہدہ “گوادر-تہران معاہدہ” نا پِن ئٹ چائنگک۔
عکس اٹ نشان تروک ہند آک گمانی ءُ و کچ سہی مننگ کپک۔ مُستی، الّمی اف کہ ہد آتا نمائندگی پک معلومداری آ تالان مرے۔
برٹش بلوچستان
بلوچستان (قلات) و اوغانستان آن لیز آ تروک علاقہ تے اوار کریسہ برٹش بلوچستان نا اسہ صوبہ اس جوڑ کننگا ہرا بِسٹ انگریز آتا دوٹی ئس۔
لیز آ ہلوک علاقہ تا حوال
1879 ئٹ ارٹمیکو اینگلو افغان جنگ آن مالو کوئٹہ و کچلاک ءِ قلات آن لیز آ ہلنگاسس۔ اندا سال پشین و سبی اوغانستان آن لیز آ ہلنگاسر۔ سبی نا ایب کیب ئنا علاقہ غاک ہم اندا معاہدہ ئٹ انگریز آتا دوٹی ہناسر، ہرافتیٹ ہرنائی و زیارت ہم اوار ئسر۔ دا ہیت پام ئنا لائخ ءِ کہ سبی بست و بندی بارو ئٹ بلوچستان و اوغانستان نا نیام ئٹ بدل مریسہ کرینے ولے پانزدہمیکو کرن آن بنماسی وڑ ئٹ بلوچ علاقہ اس مسونے۔
1877 ئٹ مری و بگٹی علاقہ تیٹ برجاء بغاوت ءِ اسہ معاہدہ ئسے نا وڑ ئٹ ایسر کننگ آن گڈ مری و بگٹی علاقہ تے قبائلی علاقہ نا ہند تننگ تون اوار اوفتے برطانوی حکومت نا دوٹی تننگا ہرافتا بنجائی شار سبی ئس۔
1883 ئٹ بولان پاس (درہِ بولان) نا کسر ءِ انگریز آتے قلات لیز آ تس۔ 1890 ئٹ ژوب و کھیتران (بارکھان) نا علاقہ غاک اوغانستان آن لیز آ ہلنگاسر۔ سبی نا وڑ بارکھان ہم زیات بلوچ علاقہ ئسے ہرا معاہدہ نا وخت اوغان کوزہ ئٹی ئس۔
1896 ئٹ اے ایچ میک موہن ‘بارڈر ٹریٹی’ آن گڈ چاغی و سنجرانی قبائلی علاقہ تے لیز آ انگریز آتے تننگا۔ 1899 ئٹ نوشکے ءِ قلات آن لیز آ ہلنگا۔ 1903 ئٹ نوری نصیر خان نا پن آ تخنگوکگ علاقہ نصیر آباد ءِ قلات آن لیز آ ہلنگا۔ دا قلات آن برطانوی حکومت ءِ لیز آ تروک گڈیکو علاقہ ئس۔
1947 ئٹ برٹش بلوچستان نا لیز آ ہلوک علاقہ تے پاکستان ئٹ اوار کننگاسس۔ 1955 ئٹ دا علاقہ تے ون یونٹ ئٹ اوار کننگا و 1970 ئٹ دادے ایلو بلوچ علاقہ تون اوار کریسہ ساڑی بلوچستان نا صوبہ جوڑ کننگا۔
عکس اٹ نشان تروک ہند آک گمانی ءُ و کچ سہی مننگ کپک۔ مُستی، الّمی اف کہ ہد آتا نمائندگی پک معلومداری آ تالان مرے۔
الحاقِ بلوچستان نا دیہاڑ
اولی اینگلو اوغان جنگ آن مالو خان محراب خان و انگریز آتا نیام ئٹ گپ و تران اس مس ہرا بےسہب مس۔ خان ئنا سلہ ٹی اِرا اہم شرط ئسر ہرافتیٹ ڈیرہ جات بلوچستان نا علاقہ تے پنجاپی سکھ آتا کوزہ آن آزات کننگ ئٹ قلات ءِ برطانیہ نا مُخ تفی و کراچی ءِ قلات نا حکمرانی ٹی واپس تننگ ئس۔
1839 ٹی انگریز آک قلات آ جلہو کریر، ہرانا سوب آن قلات نا حکمران خان محراب خان تون اوار 300 نا کچ بندغ مرگ ئنا گواچی مسر۔ قلات آ برطانوی کوزہ نا مسخت بلوچستان آ کوزہ ئس، 1841 ئٹ جتاء قبیلہ غاک میر نصیر خان دوئم نا کماشی ٹی سیوت اٹ بسر۔ و انگریز آتے بے سہب کریسہ قلات ءِ دُتک حکومت آن آزات کریر۔ بلوچ قبیلہ آک 1841 ٹی قلات ءِ آزات کننگ ئٹ سر سہب مسوسر ولے انگریز آتا پارہ غان ترپ کروک شڑت آک اوفتا آزاتی ءِ کچ ئٹ توروک کریر۔
ایلو صدی نا وخت آ انگریز آک مدان مدان بلوچستان نا منہ بشخ آتے اوغانستان و ایران نا نیام ئٹ ونڈ کریر اندن منہ بشخ آتیان برٹش بلوچستان نا صوبہ جوڑ کننگا۔ 1947 ئٹ انگریز آتا قلات آن پیشن مننگ تون قلات تینٹ منہ پین ریاست آتون اوار آزات مس ، ہمو ریاست و علاقہ غاک ہرا برٹش بلوچستان نا بشخ الور (ہرافتیٹ قلات، مکران، خاران، لسبیلہ نا علاقہ غاک اوار ئسر)، او انگریز آتا پیش تمنگ آن گڈ تیوہ آزات مسر ولے دا آزاتی بیرہ نو تُو اسکان مس و بیست و ہفت مارچ 1948 ئٹ لشکر کشی آ الحاق آن گڈ اودے پاکستان ٹی اوار کننگا۔
1952 ئٹ، قلات، خاران، لسبیلہ و مکران نا ریاست آتے اوار کریسہ بلوچستان اسٹیٹس یونین نا بنا عمل ٹی بس، 1955 ئٹ پاکستان ون یونٹ اسکیم درستی راستی کننگا، ہراٹی بلوچستان اسٹیٹس یونین تون اوار دے کہی پاکستان نا صوبہ آتے اسہ یکہ ءُ بست و بندی یونٹ اسیٹ اوار کننگا۔ دا گام گیج گیشتر صوبہ آتون اوار بلوچستان ءِ ہم اوڑدہ ایسر کرے و اوفتے دے کہی پاکستان نا بھلا صوبہ ٹی اوار کننگا۔
1970 ٹی پاکستان نا دے کہی صوبہ ءِ ایسر کننگا و ساڑی بلوچستان نا صوبہ مسکوہی برٹش بلوچستان (ہرا کہ برطانوی حکومت نا وخت ئٹ بلوچستان نا مسکوہی چیف کمشنر صوبہ ئس) و مسکوہی بلوچستان اسٹیٹس یونین ءِ اوار کریسہ جوڑ کننگا۔
عکس اٹ نشان تروک ہند آک گمانی ءُ و کچ سہی مننگ کپک۔ مُستی، الّمی اف کہ ہد آتا نمائندگی پک معلومداری آ تالان مرے۔
اگہ بلوچستان اسہ آزات و سیوت ءُ ملک اس مسکہ
اگہ بلوچستان پدا اسہ آزات ءُ ملک اس جوڑ مریک گڑا اونا ڈغار کم و ود 731,000 مربع کلومیٹر مرو، ہرا اودے جرمنی، جاپان یا اٹلی آن اِرا کچ بھلو ملک اس جوڑ کرو۔ گیشتر، دا خطہ 1,100 کلو میٹر نا دریابی پٹی تخوکو ملک اس مسکہ، ہرا اودے دریابی واپاری و اسٹریٹیجک بارو ئٹ گیشتر اہمیت تخوک جوڑ کریکہ۔ بلوچستان نا ڈغار، ہرا کہ دریائے سندھ آن دے ٹکی نیامی و بحر ہند آن نیامی ایشیا تون اوار مننگ نا سوب آن اودے مننگ کروک واپاری بنجاہ نا وڑ ئٹ اونا اہمیت ءِ گیشتر زیات کرو۔
گیشتر، بلوچستان تیل، گیس و مڈی تون اوار قدرتی مال و مڈی آن پُر ءِ، ہرا اونا زرگزرانی دیمروی ءِ سوگوْی تننگ کیک۔ ڈیہہ ئنا جتاء علاقہ غاک سیل و سوات نا بارو ئٹ تینا مثیل تینٹ ءُ۔ بلوچستان نا ڈغار اودے تاغت دوئی کننگ نا بارو ئٹ ہم اسہ اہم ءُ بنجاہ اس جوڑ کیک۔
ایسر ئٹ، اگہ بلوچستان دوارہ اسہ ملک اس جوڑ مریک گڑا اوٹی دیمروی نا بھاز گمانک اریر۔ تینا شابیت ڈغاری و بحری ڈیہہ، و قدرتی مال و مڈی و ڈغار تون اوار دا ڈیہہ ئٹ علاقائی و جہانی معاملہ ٹی اسہ بھلو تاغت اس جوڑ مننگ کیک۔
