امریکا، برطانیہ و یورپی یونین آن گڈ نیوزی لینڈ ہم چین نا ایپ ٹک ٹاک آ رکھ ئنا پڑو کرے۔

نیوزی لینڈ کوالخوا تا پاننگے کہ پارلیمانی نیٹ ورک تون تفوک تیوہ غا ڈیوائس آتیا ٹک ٹاک کاریم ئٹ ہتنگ آ رکھ مرو۔

کوالخوا تا دا بابت پاننگے کہ پارلیمانی نیٹ ورک تون تفوک ڈیوائش آتیا ٹک ٹاک نا رکھ 31 ماچ آن مرو۔

یاتی مرے کہی ملک آتیٹ ٹک ٹاک آ رکھ خلوک ءِ۔ رکھ خلوک آتیان بھاز آتا پاننگے کہ ٹاک ٹاک ءِ چینی کوالخواک جاسوسی کن کاریماٹ ہتیرہ۔

خدو 24 نومبر آ برطانیہ چینی کمپنی تا تیار کروک کیمرہ تا کاریم اٹ ہتنگ آ ہم رکھ خلک۔ اندن امریکا ہم دا رِدئٹ رکھ خلکنے۔ دا رکھبرطانیہ نا سرکاری ماڑی تیٹ خلوک کیمرہ تیا خلنگا۔

جمعہ نا دے ہفت قبائلی بندغ نا کسفنگ نا برخلاف سوختہ قبائلی مخلوق ژوب نا رہی آ کوئٹہ اسلام آباد بھلا کسر ءِ بند کرے۔ خوْن تابرخلاف کسر پانزدہ گھنٹہ آن زیات بند مس۔

ضلع ژوب نا علاقہ غورلام ئٹ درو سم کاری نا سوب آن اسہ قبائلی سڑدار احمد کبزئی تون اوار ہفت بند کسکر۔ لیویز نا رِدئٹ تدینیقبائلی چِک و تاڑ نا سوب آن مسونے۔

برانز نا سوب بلوچستانءِ اسلام آباد تون اوڑدہ کروک الّمی کسر آ گاڑی تا اِن و بر بند مس۔ برانز کروک آک تدینی نا ڈوہدار تا دزگیرینا خواست کننگ ئسر۔

برانزی تیان اسٹ عبدالرحیم خواست کرے کہ نن خوانہ کہ حکومت دا تدینی نا ڈوہدار تے دزگیر کے۔ او پارے کہ قبائلی مخلوق ءِ دے پاکئٹ اسہ جلہو اسیٹ خلنگا و جلہو کروک آک دائسکان فرار ءُ۔

بلوچستان نا دریابی علاقہ گوادر، بولان و جعفر آباد ئٹ مونا بروک جتاء حالیت نا تدینی تیٹ چار بندغ مرگ ئنا گواچی مسر۔

شابیتی حوال تا رد ئٹ دریابی شار گوادر نا علاقہ پسنی آن خڑک ئنا علاقہ نوکاپ آن اسہ بندغ ئسے نا جوْن خننگانے ہرا نا چاہنداریشریف عرف گنگا نا پن ئٹ مسونے، ہرا باغ بازار وارڈ نمبر 3 پسنی نا ہندی اس پاننگک۔

ایلو پارہ غا ڈھاڈر آن خڑک دربی نا ہند آ پک اپ نا ڈک لگنگ آن موٹر سائیکل سوار ءُ اِرا بندغ کسکر پولیس جوْن تے دوئی مریسہ سولاسپتال ڈھاڈر آ درے۔

داڑے ڈیرہ اللہ یار ئٹ بجلی نا کرنٹ لگنگ آن واپڈا ملازم ہم ساہ تسونے۔ حوال تا رد ئٹ پن کروک بندغ لائن مین صدورا کٹبار بجلی ناکمبہ غا کنیکشن جوڑ کریسہ تما ہرا نا سوب آن او جانجوڑ متو، جوْن ءِ ڈی ایچ کیو اسپتال آ دننگا۔

بلوچستان ئٹ بروک دے تیٹ پِر ئنا پوسکنا رِد ئنا گمان ءِ ہراڑان کوئٹہ تون اوار بلوچستان نا زیات علاقہ آتیٹ ہورہ گروک تون اوار تُرند پِرو ترونگڑ نا گمان ءِ۔

حوال تا رِد ئٹ 16 آن 18 مارچ اسکان بلوچستان ئٹ پِر شلوک جمبرک پیہور ہراڑان بھازی علاقہ آتیٹ تُرند پِر و شنزہ نا گمانے۔

کوئٹہ، زیارت، مستونگ، نوشکی، چمن، لورالائی، سبی، باركھان، کوہلو، ڈیرہ بگٹی، سوئی، نصیرآباد، ڈیرہ اللہ یار، جھل مگسی، قلات،خضدار، بیلا، اتھل، خاران، واشک، آواران ئٹ 18 مارچ اسکان پِر مننگ نا گمان ءِ۔

ترکیہ ئٹ زمین جمب آن زیمی علاقہ آتیٹ نوکاپ نا سوب آن ٹینٹ و کنٹینر تیٹ ہندی چانڑدہ بندغ مرگ ئنا گواچی مسر ہراڑان گچینکاری آن مُست ملکی صدر رجب طیب اردوان آ سختیت زیات مسونو۔

پیشن ملکی حوالکاری ایجنسی ‘اے ایف پی‘ نا ردئٹ ترکیہ ئٹ زمین جمب آن زیمی علاقہ آتیٹ نوکاپ آن چانڑدہ بندغ مرگ ئنا گواچیمسونو و کہی بندغ آتے دیر درے۔

یاتی مرے تدوکا توہ بُھس کاری کروک زمین جمب آن ترکیہ ئٹ 48 ہزار آن زیات و ہمسایہ ملک شام ئٹ 6 ہزار بندغ مرگ ئنا گواچیمسر ہرا دا ڈیہہ ئٹ صدی نا تیوہ غاتیان بھلا زمین جمب گمان کننگاسس۔

زمین جمب ئٹ سلامت مروک لکھ آ بندغ آتے بنائی ٹینٹ و کنٹیز آتیٹ دننگا ہرا یانزدہ صوبہ اسکان تالان ءُ۔

زمین جمب آن گڈ شنزئی پِرک ہم دا علاقہ آتیٹ بے کچ نسخان تسونو ہراڑے مُد ئنا چاہندار تا پاننگے کہ دائسکان دا لڑ برجاء مرو۔

ترکیہ نا میڈیا نا پاننگے کہ نوکاپ نا سوب آن جتا علاقہ آتیٹ چانڑدہ بندغ مرگ ئنا گواچی مسونو ہرافتیٹ اسہ پالی چنا اس ہم اوارے۔

راجی حوالکاری تلہ غا تالان ویڈیو تیٹ خننگ مریک کہ نوکاپی دیر گاڑی و زمین جمب آن زیمی تیکن ٹہیفوک بنائی اُرا تے دننگے۔

کوالخواہ تا پاننگے کہ نوکاپی دیر اسہ ہسپتال ئسے نا اولیکو تلہ اسکان سر مسونے۔

ترکیہ نا صدر نا سختیک

ترکیہ نا صدر رجب طیب اردوان 14 مئی آ اسیکہ وا گچین کاری تیکن سختی تا پلویڑ ئٹی ءِ ہراڑے او تینا بیست سال ئنا حکمرانی ناتیوہ غاتیان بھلا آفت آ حکومت نا ہلہلئی ڈول آ نغدکاری تون مون تننگے۔

صدر کہی خلقتی بشخنداری شینک کرینے و داڑتون اوار دا ہیت آ زور شاغانے کہ ہچو راج اس دنو بھلو بُھس کاری اسیتون مون تننگکپک۔

رجب طیب اردوان چار شمبے نا دے حکمران جماعت نا باسک آتیتون پارلیمانی تران ئٹ پارے کہ بروک سال ئنا ایسر اسکان نن 3 لکھ19 ہزار اُرا جوڑ کرون۔

سندھ نا بھلا شار کراچی ئٹ رکھوک بست و بند ئٹ نزوری کننگ آ اسہ چینی ریسٹورنٹ ئسے بند کننگا۔

حوال تا ردئٹ رکھنگ پنت ءِ لتاڑنگ آ درخشاں پولیس نا پارہ غان ڈیفنس کھڈا مارکیٹ ئٹ چینی ریسٹورٹنٹ ءِ بند کننگانے۔

ترجمان ڈسٹرکٹ ساوتھ پولیس نا ردئٹ پن کروک ریسٹورنٹ ئٹ چینی شاری تا اِن و بر مریک و درخشاں پولیس نا کاروائی ریسٹورںٹئٹ نزور رکھوک  بست و بند نا سوب آن کننگا۔

یاتی مرے کہ دا کاروائی آن مالو ریسٹورنٹ خواجہ آتے رکھوک پنت ءِ پورو کننگ کن وار وار خواست کننگاسس۔

ژوب بھلا کسر آ داڑیلی نا بر خلاف برانزی وڑ ئٹ کسر بند کننگا، کوئٹہ آن ژوب بھلا کسر نسی نا ہند آ ڈرائیور آک برانز ءِ برجاہ–

گیشتر حوال تا رد ئٹ شام ئنا نن نیمہ غا ژوپ بھلا کسر آ داڑیل آک بھاز آ بس آتے لٹ پول کریسہ ڈرائیور تیان دئے لکھ رپئی پلار ہرانابرخلاف بس ڈرائیور آک تدوکا دئے گھنٹہ نا سے تولوک برانز کننگ ءُ–

برانز کروک آتا پاننگ ءِ ہڑ دے داڑیلی نا ویل آک مریرا بست و بند کوالخوا تون وار وار شکائست کننگ آن بیدس ہم دن انگا ویل آتا توننگکن گام ارفینگتنے، بس ڈرائیور و مسافر  آک بھلا کسر آ دزی نا سوب آن تولوک ءُ–

برانز نا سوب آن کسر آ گاڑی تا مرغنو لیک اس لگانے مسافر آک سخت تا گواچی مننگ ءُ–

برانز کروک آتا پین پاننگ اس اندن ڈی سی و بست و بند ننے اسکان یخین تتنو کہ ژوب بھلا کسر آ داڑیلی نا ویل آتے توننگ کن گواچنیبنماسی  گام ارفینگو، اسکان بس ڈرائیور و مسافر آک تینا برانز ءِ برجاہ تخور–

بلوچ لبریشن آرمی نا ترجمان جیئند بلوچ میڈیا آ تروکا تینا بیان ئٹ پارے کہ بی ایل اے نا سرمچار آک اِرا جتا کاروائی تیٹ کوزہ گیرپاکستانی لشکر نا اسہ آلہ کار ئسے کسفینو و قلات ئٹ اسہ احوالکاری ٹاور ئسے بھس کرینو۔

جیئند بلوچ نا پاننگ اس کہ بلوچ لبریشن آرمی نا سرمچار آک 18 فروری 2023 آ علاقہ کیلکور ئٹی گشت ئنا وخت آ اِرا شکبر ءُ بندغبہرام و علی جان ءِ دزگیر کریسر، سر و سوج نا وخت آ بہرام منا کہ او بلوچ سرمچار آتا دروشم ئٹی بلوچ آزادی پسند تنظیم آتیٹ اوڑدہمننگ خواہاکہ۔

ترجمان نا رد ئٹ بہرام ولد گل محمد سکنہ آبسر تربت منا کہ او تدوکا بھلو وخت ئسے آن کوزہ گیر پاکستانی لشکر کن مخبری وکمکاری کننگ اس۔ دشمن لشکر نا پاننگ آ او بلوچ آزادی پسند تنظیم آتیٹ اوڑدہ مننگ نا کوشست کننگ اس۔

او پارے کہ پن کروک مخبر دا ہم منا کہ او تربت و ایب کیب ئنا علاقہ آتیٹ بلوچ سرمچار آتا مخبری کریسہ کرینے، و منَہ وخت مُست اوتربت آن اِرا بے ڈوہ ءُ ورنا ءِ کوزہ گیر لشکر نا دو آن زوراکی ئٹ بیگواہ کرفنگ ئٹ ہم تُد اس۔

جیئند بلوچ نا پاننگ اس کہ سر و دوج نا وخت آ اونا تینا ڈوہ ءِ مننگ آن گڈ بلوچ قومی عدالت بہرام ءِ قومی غداری نا ڈوہداری ٹی مرکئنا سزا تس، ہراڑا تدوکا دے کیچ ئنا علاقہ ڈنڈار ئٹی فائرنگ اسکواڈ عمل کریسہ سُم کاری کریسہ قومی غدار ءِ کسفے۔ اندن ایلو دزگیرمروکا بندغ نا بابت ئٹ ہم قومی عدالت زوت فیصلہ کرو۔

جیئند بلوچ نا ودیک پاننگ اس کہ 8 مارچ 2023 آ بلوچ لبریشن آرمی نا سرمچار آک قلات نا علاقہ نیمرغ کنڈ آ خلوک یوفون کمپنی ناٹاور ءِ تراک کروکو مواد کھڈ کریسہ بھس کریر۔

ترجمان پارے کہ پن کروک ٹاور کوزہ گیر لشکر نا کنڈ آن شور پارود نا ایب کیب ئٹ تینا سواد آتیکن کھڈ کروک حال حوالی ٹاور آتیاناسٹ ئس اسک۔

ترجمان نا پاننگ اس کہ بلوچ لبریشن آرمی پن کروک جلہو تا ذمہ واری ءِ ارفک۔ کوزہ گیر لشکر نا تیوہ پیشتمنگ اسکان ننا کاروائیکبرجاء مرور۔

زالبول تا جہانی دے

ٹی بی پی سرگپ

جنگ زدہ بلوچستان ئٹ بلوچ زالبولک اِرا ڈول نا بے دادی تیان گدرینگو۔ اسہ پارہ غا زالبولک ہندی سڑدار و جاگیردار آتا زوراکی ئٹ تخنگوک بدحالیت متکنا دود آتا پلویڑ ئٹی ءُ، گڑا ایلو پارہ غا ریاستی بے دادی نا ہم گواچی ءُ۔

ہشت مارچ آ تیوی جہان ئٹ زالبولک تینا حق آتیکن سیاسی طاغت نا درشانی کیرہ و تینا حق آتیکن جہد ءِ سوگوْ دروشم تننگ نا کوشست کیرہ ولے بلوچستان ئٹ بلوچ زالبولک تینا حق آتا جاگہ غا زوراکی ئٹ بیگواہی تینا بندغ تا یلہ کرفنگ کن برانز کیرہ۔ بلوچ زالبولک دا سال ہشست مارچ اِرا ہزار بیست و سئے آ ہم دے کہی و دے ٹکی بلوچستان ئٹ زوراکی ئٹ بیگواہ مخلوق و ماہل تون اوار زوراکی ئٹ بیگواہ بلوچ زالبول تا یلہ کرفنگ کن کراچی، کوئٹہ و خاش ئٹ برانز کریر۔

بیگواہ آصف و رشید بلوچ نا ہیڑ سائرہ بلوچ نا لوز آک جنگ ئنا پلویڑ ئٹ بلوچستان نا زالبول تا درشانی ءِ کیرہ۔ سائرہ نا پاننگے کہ “نن تینا نرینہ تیان آزاتی نہ بلکن تینا نرینہ تا آزاتی ءِ خوانہ، ننا حق آتا لتاڑوک ننا نرینہ غاک آخہ ریاست ءِ۔” دا بیرہ سائرہ نا آخہ بلکن ہر ہمو بلوچ زالبول نا خیال آک ءُ ہرا پاش یا اودیم ریاستی زوراکی نا گواچی ءُ و تینا بندغ تا یلہ کرفنگ کن سال آتیان جہد کننگو۔

بلوچستان ئٹ مالو بیرہ نرینہ غاک زوراکی نا بیگواہی نا گواچی کننگارہ ولے داسہ بلوچ زالبول تا زوراکی ئٹ بیگواہی ئٹ ہم تُرندی بسونے۔ بلوچستان ئٹ زوت منہ وخت ئٹ تربت، کراچی، بولان و کوئٹۃ آن بلوچ زالبول تے زوراکی ئٹ بیگواہ کنگانے و ماہل بلوچ ءِ زوراکی ئٹ بیگواہ کننگ آن گڈ سی ٹی ڈی نا دوٹی تننگاسس، ہرا دائسکان اوفتون ءِ۔

بلوچستان نا آجوئی کن جہد کروک گل و جماعت آک ریاست آ دوبہ خلیرہ کہ سیاسی جدوجہد ئٹ بلوچ زالبول تا کڑد ءِ توننگ کن اوفتے زوراکی ئٹ بیگواہ کننگسہ ءِ و بلوچستان نا تحریک آزاتی تون تفوک بندغ آتا خاہوت آتے اشتماعی سزا نا گواچی کننگسہ ءی۔ آزاتی دوست کُڑدہ غاک دا خلیس نا درشانی ہم کننگو کہ بروک وخت ئٹ بلوچ زالبول تیا ریاستی زوراکی ئٹ ودکی مرو۔

پاکستان ئٹ بنماسی بندغی خواست آتے پورو کننگ کن ہم برانز نا کمک ہلوئی تمک و بلوچ زالبول تا پاکستان کوْن آ ریاست ئٹ سوگوْ تحریک آن بیدس حق آتے ہلنگ مننگ کپک۔ بلوچ زالبول تےحق دوئی کننگ کن تینا تحریک ءِ سوگوْ کننگ و برجا جہد نا خواست ءِ۔