بلوچستان نا دریابی شار گوادر ئٹ یک شمبے نا سہب ئتون نادرست بندغ آک پاکستانی لشکر نا اسہ گاڑی ئسے تراک ئٹ کریر۔ تراک گوادر ئٹ تربت روڈ آ ہمو وخت مس ہراتم لشکر اسہ پول ئسے آن گدرینگ ئس۔
تراک نا سوب آک پاکستانی لشکر نا اسہ گاڑی اس بُھس مس و اوٹی سوار کارندہ آتے جانی نسخان مس۔ و اندن پول ءِ ہم بھاز نسخان رسینگانے۔
کوالخواک تراک ئٹ اسہ کارندہ لائنس نائیک اللہ دتہ نا کہنگ ءِ پک کرینو و ٹپی کارندہ تیٹ صوبیدار خالد، حوالدار لطیف، ، سپاہی عثمان، سپاہی رمضان سپاہی قیصر عباس، سپاہی اسامہ، عباس اور سپاہی عثمان اوار ءُ۔
جلہو نا ذمہ واری ءِ بلوچ آجوئی دوست سلاء بند تنظیم بلوچستان لبریشن فرنٹ ارفینے۔ ترجمان میجر گہرام نا رِدئٹ ریموٹ کنٹرول تراک ئٹ پاکستانی لشکر نا اسہ گاڑی اس بُھس و پول بے کار مس اندن گاڑی ٹی سوار افسر تون اوار ہشت کارندہ کسکر و مسٹ آن زیات ٹپی مسونو۔
میجر گہرام پارے کہ سرمچار آتا پد مہ پد جلہو تیان دژمن لشکر بے حوصلہ مسونے ہرانا سوب آئی ایس پی آر تینا فوجی تا کہنگ و نسخان آتے ڈھکنگ کن راستکی تے مونا ہتپک کہ اوفتا بے حوصلہ غا فوجی تے اُست تننگ مرے۔
گوادر ئٹ جلہو آن مُست بلوچستان نا علاقہ پنجگور ئٹ رخشان کور نا ہند آ استو نادرست سلاء بند بندغاک پاکستانی لشکر نا اسہ پوسٹ ئسے آ جلہو کریر۔ علاقائی حوال تا ردئٹ جلہو نا وخت آ ترند تراک و سم تا توار تالان مس۔
علاقائی مخلوق نا پاننگے جلہو آن گڈ ڈرون ءِ آسمان ئٹ پیری کننگ آ خننگا واہم سرکار دا بابت ہچو حوال تتنے۔
پنجگور جلہو نا ذمہ واری ءِ بلوچ لبریشن آرمی ارفے۔ ترجمان جیئند بلوچ شینک کروک بیان ئٹ پارے کہ استو دئے بجہ نا وختا بی ایل اے نا سرمچار آک خودکار سلاء و گرنیڈ لانچر ئٹ گولہ خلیسہ پاکستانی لشکر نا پوسکن ٹہیفوک پوسٹ ئسے ٹِک کریر ہراٹی کم و وَد اِرا پاکستانی لشکر نا کارندہ ٹپی مسونو۔
جیئںد بلوچ مُستی پارے کہ بی ایل اے نا سرمچار آک اسہ پین کاروائی اسیٹ پنجگور نا علاقہ گچک آن تعلقدار مولا بخش نا مار شوکت ءِ دزگیر کننگ و سر سوج آن گڈ مرک ئنا سزا تسر۔
او پارے کہ شوکت سر و سوج ئٹ پاکستانی لشکر نا کمکار مننگ نا منانے و راجی غداری نا ڈو ئٹ اودے بلوچی قومی عدالت سزائے مرک تس ہرادے درو ایسری تننگا۔
بلوچستان ئٹ بلوچ سلاء بند تنظیم آک ہڑدے ئی حساب آ جتا علاقہ آتیٹ پاکستانی لشکر و اوفتا مخ تفی کروک بندغ تیا جلہو کننگو۔ فروری نا ایسری دے تیٹ خضدار شار ئٹ سپرٹنڈنٹ آف پولیس ریٹائرڈ پاکستانی نیوی اہلکار فہد خان نا قافلہ تون اوار اسہ پولیس گاڑی ئسے بمب تراک ئٹ ٹک کننگا۔
دا جلہو نا ذمہ واری ءِ بلوچ لبریشن آرمی ارفے۔ بی ایل اے نا ترجمان جیئند بلوچ پارے کہ پولیس و لیویز پاکستانی لشکر نا مخ تفی ءِ کریسہ بلوچ اُلس نا برخلاف کاروائی کننگو ہرانا سوب اوفتے ٹک کننگا۔
کوالخوا تا رِدئٹ دا تراک چسکی بمب ئسے نا کمک ئٹ کننگا و تراک ئٹ اِرا پولیس کارندہ مرگ ئنا گواچی و اسٹ ٹپی مس اندن اوفتا گاڑی بُھس مس۔
