بلوچستان نا ضلع کیچ و سبی ٹی نادرست بندغ آک پاکستانی لشکر نا کیمپ و فورسز آتے جلہو ئٹ ٹک کریر۔

حوال تا رد ئٹ استو کیچ ئنا علاقہ ہیرونک ئٹ نادرست سلاء بند بندغ آک پاکستانی لشکر نا کیمپ آ جلہو کریر۔

علاقائی حوالکار تا رد ئٹ جلہو نا وخت ترند سم کاری و بمب تراک آتا توار بِننگانے۔ حوال تا رد ئٹ جلہو ئٹی فورسز  آتے جانی نسخانتون مون تروئی تمانے واہم کوالخواہ تا ہیت دائسکان مونا بتنے۔

ایلو پارہ غا بلوچستان نا علاقہ سبی نا ہند تندوری ٹی نادرست بندغ آک پاکستانی لشکر ءِ بمب جلہو ئٹ ٹک کریر۔

حوال تا رد ئٹ فورسز کارندہ تے ہموتم ٹک کننگا ہراتم او علاقہ ئٹی پند آ گشت کننگ ئسر۔ ذرائع تا پاننگ ءِ کہ فورسز آتے دا جلہو ئٹنسخان ارفوئی تمانے۔

اندن پن کروک ہڑتوما جلہو تا ذمہ واری ءِ بلوچ لبریشن آرمی نا ترجمان جیئند بلوچ ارفیسہ پارے کہ بی ایل اے نا سرمچار آک کیچ وسبی ٹی اِرا جتاء جلہو تیٹ کوزہ گیر پاکستانی لشکر ءِ ٹک کریر، ہرافتا سوب آن دژمن نا چار کارندہ ٹپی مسر۔

او پارے کہ بی ایل اے نا سرمچار آک اولیکو جلہو ءِ استو کیچ ئنا علاقہ ہیرونک ئٹ کوزہ گیر پاکستانی لشکر نا اسہ کیمپ ئسے آ کم وود 9 بجہ سی منٹ آ گرنیڈ لانچر نا گولہ خلیسہ و بھلا سلاء تیٹ کریر، جلہو ئٹ سرمچار آک کم آن کم اِرا دژمن کارندہ ءِ ٹپی کریر اندناوفتے مالی نسخان تون ہم مون تروئی تما۔

او پین پارے کہ سرمچار آک ارٹمیکو جلہو ءِ اینو سبی ٹی تندوری نا ہند آ کریر، ہراڑے دژمن کارندہ تے ہموتم آئی ای ڈی جلہو ئٹ ٹککننگا ہراتم او پند آ گشت کننگ ئسر، تراک نا سوب آن اِرا دژمن کارندہ ٹپی مسر۔

ترجمان پارے کہ بلوچ لبریشن آرمی دا جلہو تا ذمہ واری ءِ ارفک۔ نن دا ہیت ءِ دوارہ کینہ کہ دژمن فوج ئنا تیوہ پیشتمنگ اسکان نناکاروائیک برجاء مرور۔

بلوچستان نا ضلع ہرنائی نا علاقہ شاہرگ پی ایم ڈی سی کوئل مائینز ایریا کولا کانڑ نمبر 94 ٹی زاری گیس تالان مننگ نا سوب آنتراک ٹی شش کانڑ مزور کار مرگ ئنا گواچی و پنج ٹپی مسونو۔

شاہرگ کولا کانڑ ٹی ارا مارچ آ ویگ ئنا وخت زاری آ گیس تالان مننگ نا سوب آن تراک مس و کانڑ تمینگ نا سوب آن 11 مزور کار کانڑنا تہٹی گٹ مسوسر ہراڑان گڈ ریسکیو ٹولیک و کانڑ مزور کار آک ریسکو آپریشن بناء کریر، کم و ود بیست و ہشت گھنٹہ ریسکوآپریشن برجاء مس، کہوک و ٹپی آک رورل ہیلتھ سنٹر شاہرگ آ دننگار۔

ٹپی آک بنائی درمان کننگ آن گڈ کوئٹہ آ دننگار و جونک المی کارروائی آن گڈ خاہوت آتا دو ٹی تننگار۔

بلوچستان ٹی مزور تنظیم آک حکومت و کانڑ تا خوامند آک ہڑتوما تے دا ویل ئنا ذمہ وار پاننگ ءُ۔

اوفتا پاننگے کہ کانڑ مالک آک لیز تے تینا پن آ کننگ آن گڈ تینٹ زیات کاریم کپسہ بلکن او اوفتے ٹھیکیدار آتا دوٹی تیرا واپس بھلاٹھیکیدار مونی پیٹی ٹھیکیدار آتے دا کاریم ءِ تیک۔

بلوچستان نا اِرا جتاء ضلع تیٹ مونا بروک اِرا جتاء شکست و تدینی تیٹ اسہ بندغ اس مرگ ئنا گواچی و ہژدہ بندغ ٹپی مسونو۔

شابیتی حوال تا رد ئٹ کان مھتزئی نا علاقہ ٹی مسافر دروک بس ئنا مونا بروک روڈ شکست ئٹ پانزدہ مسافر ٹپی مسونو، ہرافتیٹاسٹ نا حالیت خراب پاننگک۔

ایلو پارہ غا صنعتی شار حب چوکی آن حوال آک رسینگانو کہ حب چورنگی ایونٹ اسٹیل کمپنی ٹی کرین نا تمنگ آن مُسہ بندغ ٹپی واسٹ اس مرگ ئنا گواچی مسونے۔

ٹپی آتے جام غلام اسپتال آ دننگانے، اندن مرگ ئنا گواچی مروک بندغ نا تعلقداری پنجاب آن پاننگک۔

براہوئی بولی نا پنی آ شاعر، و راسکوہ ادبی دیوان نا بنجائی چیئرمین گل زمان گل جہان ءِ یلہ کرے۔ گل زمان گل ایماندار لال نا مار ئس۔

نوشکے آن تعلقدار گل زمان گل بھلو وخت ئسے آن راسکوہ ادبی دیوان نا پِڑ آن ادب تون تفوک ئس۔ او شاعری آن بیدس نثر ئٹ ہم ادبی نغدکاری و ایلو سرحال تیا نوشتہ کرینے۔

اونا کذیت آ شاعر و ادیب آک تینا اُست ہسونی نا درشانی کرینو۔ دا رد اٹ پنی آ شاعر حمید عزیز آبادی تینا اسہ ہڑزخواہی کلہو اسے ٹی پارینے کہ  سنگت گل زمان گل براہوٸی زبان نا اسہ گچین ءُ نوشتوک اس ٸس۔ اونا شاعری ٹی فکرو فن ہڑتوم آک ہمسفر ئسُرہ۔

او پارے ایماندار راسکوہ ادبی دیوان نا پڑآن تینا لاٸخی تے گچین ءُ وڑ اسے اٹ درشان کرسا کرے۔ او اسہ فطری ءُ شاعری اسے آن بیدس اسہ ہنین ءُ سنگت اس ہم ٸس۔ اونا کزیہ غان براہوٸی زبان و ادب اسہ گچین ءُ شاعر ئسے آن محروم مس۔

سندھ ئنا بنجائی شار کراچی آن سی ٹی ڈی اِرا بندغ ءِ دزگیر کننگ نا دعویٰ کرینے، اندن بلوچستان نا ضلع کیچ آن فورسز آک مُسہبندغ ءِ دزگیر کریسہ نادرست جاگہ آ درینو۔

کاؤنٹر ٹیررازم ڈیپارٹمنٹ نا عملہ کراچی نا علاقہ ناظم آباد، پاپوش نگر ئٹ اسہ کاروائی اسیٹ اِرا بندغ ءِ دزگیر کریسہ اوفتیان سلاء وگولہ بارود خننگ نا دعویٰ کرینے۔

سی ٹی ڈی نا شعبہ سر و سوج نا انچارج چوہدری غلام صفدر نا رد ئٹ ناظم آباد، پاپوش نگر ئٹ کاروائی نا وخت 2 دوبہ دار فہدبلوچ و زاہد بلوچ ءِ دزگیر کننگا۔

اونا رد ئٹ دوبہ دار تیان اسہ توفک، 17 نائن ایم ایم پستول، توفک، نائن ایم ایم تون اوار جتاء وڑ ئنا 6500 سُم و نائن ایم ایم پستول نا34 میگزین خننگانو۔

غلام صفدر نا رد ئٹ اوفتے حوال رسینگاسس کہ پن کروک دوبہ دار آک سلاء تا بھلو کچ اس کراچی ٹی جلہو تا منصوبہ بندی کن اسہجاگہ ئسے آ سر کننگ خواہرہ۔

غلام صفدر نا رد ئٹ دوبہ دار زاہد بلوچ داڑان مالو ہم کیہی وار دزگیر مسونے، کیہی وار جیل آ ہنانے و ڈوہ تا ہیلی ئسے، دوبہ دار تا برخلاف سی ٹی ڈی تھانہ ئٹ مقدمہ درج کننگا۔

ایلو پارہ غا بلوچستان نا ضلع کیچ آن پاکستانی لشکر اِرا بندغ ءِ زوراکی ئٹ بیگواہی نا گواچی کریسہ نادرست ہند ئسے آ درینے۔

بیگواہ مروک ورنا تا چاہنداری وہاب نا مار واجو و شفیع محمد نا مار حسیم نا پن تیٹ مسونے۔ بیگواہ مروک آتے فورسز آک ہموتم دزگیرکریر ہراتم او غیاب آن گواک آ ہننگ ئسر۔

حوال تا رد ئٹ پن کروک ہڑتوما ورناک خڑک ئنا سیال ءُ و ہڑتوماک تیل ئنا پوریا تون تفوک ءُ و اوفتے دزگیر ہم ہموتم کننگا ہراتم او زر اکنخواجہ غا ہننگ ئسر۔

اندن استو کیچ ئنا بنجائی شار تربت آبسر آن فورسز آک اُرا غا چھاپہ خلیسہ زوراکی ئٹ بیگواہ کریر۔

ورنا نا زوراکی ئٹ بیگواہی ءِ اونا خاہوت پک کریسہ پارے کہ استو ننکان سئے بجہ غا پاکستانی لشکر حکیم بلوچ نا مار محمد جان ءِاونا اُرا غان دزگیر کریسہ نادرست جاگہ آ درے۔

خاہوت نا رد ئٹ ورنا دائسکان بیگواہ ءِ، اوفک کوالخواہ تیان اونا زو یلہ کننگ نا خواست کرینو۔

بلوچ لبریشن آرمی نا ترجمان جیئند بلوچ میڈیا غا شینک کروک بیان اسیٹ پارے کہ ننا سرمچار آک اِرا جتا جلہو تیٹ کوزہ گیرپاکستانی لشکر و اسہ حوالکاری ٹاور ئسے ٹک کریر۔

او پارے کہ بی ایل اے نا سرمچار آک استو مستونگ نا علاقہ کھڈ کوچہ ئٹی کوزہ گیر پاکستانی لشکر نا اسہ کیمپ ئسے نا بنجائی درآ سلوک کارندہ تے چغلی بمب ئٹ ٹک کریر ہرا نا سوب اوفتے جانی نسخان آتون مون تروئی تما۔

ترجمان نا گیشتر پاننگ ئس کہ اندن بی ایل اے نا سرمچار آک اِرا دے مالو پنجگور نا علاقہ گچک ئٹ کہن نا ہند آ یوفون کمپنی نا اسہحوالکاری ٹاور ئسے نا مشینری ءِ ہشیسہ بھس کریر۔

جیئند بلوچ پارے کہ بلوچ لبریشن آرمی دا جلہو تا ذمہ واری ءِ ارفک۔ بلوچ ڈغار نا آجوئی اسکان کوزہ گیر لشکر و اوڑتون ہمکوپہ مروکآتیا ننا جلہوک برجاء مرور۔