حوال تا رد ئٹ ترکیہ ٹی بھس کروک زمین جمب نا سوب آن حکومتی کمکی کارروائی تیا ودوک آن لائن نغد کاری تیان گڈ ترکیہ ٹی ٹوئٹرسروس بند کننگا۔

گیشتر حوال تا رد ئٹ پیشین ملکی حوال تروک ادارہ نا رد ئٹ ترکی ٹی ٹوئٹر بند ءِ اندن شاری تے راجی حوالکاری میڈیا ءِ کاریم اٹہتنگ کن وی پی این سروس خوائک۔

راجی حوالکاری میڈیا نا کاریم تے اروک ادارہ نیٹ بلاکس ڈاٹ او آر جی نا پاننگ ءِ اول ٹوئٹر کنٹرول کننگا واپس تیوہ موبائل فونسروس تیا اودے تیوہ وڑ ئٹ بلاک کننگا۔ داسہ انٹرنیٹ مانیٹنگ کمپنی نیٹ بلاکس نا پاننگ ءِ کہ ترکیہ ٹی ٹوئٹر بحال کنگانے۔

یاتی مرے ترکیہ ٹی مروک زمیں جمب آتا سوب آن پانزدہ ہزار آن زیات بندغ مرگ ئنا گواچی مسونو اندن بھاز آک ٹپی زمین جمب ناسوب آن بندغ آک سختی تا گواچی مسونو حوال تا رد ئٹ مونی ہم زمین جمب نا گمان ارے۔ 

ہیومن رائٹس کمیشن پاکستان تینا شینک مروک بیان اسیٹ کوئٹہ آن محمد رحیم و اونا زائیفہ نا زوراکی ئٹ بیگواہی نا ترند مذمتکرینے۔

بیان ئٹ پاننگانے کہ ایچ آر سی پی 3 فروری آ کوئٹہ آن سادہ پُچ بینوک نادرست بندغ آتا دو آن محمد رحیم و اونا زائیفہ رشیدہ ناگمانی وڑ ئٹ زوراکی ئٹ بیگواہی نا ترند مذمت کیک۔

او پارے کہ رحیم نا پیر انگا لُمہ و اونا اِرا چنک سن آ چناتے ہم دننگا ولے اوفتے زوت یلہ کننگا۔ واہم او تینا دے تے گدریفنگ کن تینا باوہ،اسہ سوزی بہا کروک ئسے نا سیبو ئٹی ءُ۔

او پارے کہ رحیم و اونا زائیفہ ءِ زوت و بیدس شڑط آن یلہ کننگ مرے و ڈوہدار تا چاہنداری کننگے و اوفتا احتساب مرے۔

اندا وخت ئٹ بلوچستان ئٹ زوراکی نا بیگواہی تا برخلاف کاریم کروک گل وائس فار بلوچ مسنگ پرسنز نا چئرمین نصراللہ بلوچ نا رد ئٹاو زوراکی ئٹ بیگواہ رشیدہ و اونا اَرغ محمد رحیم نا خاہوت تون اوار ایس پی، ڈی ایس پی، و ایس ایچ او سریاب تون اوڑدہی کریر واودے زیمی مروک خاہوت نا ایف آئی آر نا بابت خواست تننگا اندن بلوچستان نا وزیر داخلہ ءِ ہم کیس ئنا شابیتی حوال تے تننگانے۔

یاتی مرے کہ 3 فروری آ بلوچستان نا بنجائی شار کوئٹہ گشکوری ٹاؤن نا ناشناس کالونی آن پاکستانی لشکر سرچ آپریشن نا وختزالبول و چنا تون اوار پنچ بندغ ءِ دزگیر کننگ آن گڈ بیگواہ کرے پن کروک بندغ آتیٹ چاکر خان زہری نا مار محمد رحیم زہری، اونا اسہسالی مسڑ دعا زہری، چار سالی مار یحیٰ زہری، اونا زائیفہ رشیدہ زہری و لُمہ بس خاتون اوار ئسر۔

واہم دزگیر مننگ آن گڈ بیگواہ مروک محمد رحیم زہری نا لُمہ بس خاتون، اِرا چنک سن آ چناک دعا زہری و یحیٰ زہری یلہ مسر، ولےمحمد رحیم زہری و اونا زائیفہ رشیدہ زہری دائسکان یلہ کننگتنو۔

زوراکی ئٹ بیگواہ بلوچ زالبول رشیدہ زہری نا لُمہ تدوکا دے تیٹ میڈیا آ شینک کروک ویڈیو بیان اسیٹ پاریسس کہ اونا مسڑ و سالمدائسکان پاش کننگتنو اندن اودے پاننگپک ہم کہ زالبول و چنا تے ہرا ڈوہ ئٹ بیگواہ کننگانے و دا وخت ہراڑے و دیر نا قیذ ئٹی ءُ۔

ترکیہ و شام ٹی دوشمبے آ مروک زیات زمین جمب آن کہوک آتا کچ چرجوئی تون ودِنگ ءِ ۔

پیشن ملکی میڈیا نا ردئٹ زمین جمب نا سوب آن مرگ نا گواچی مروک ًآتا کچ پانزدہ ہزار آن زیات مس۔

کوالخواہ نا پاننگ ءِ  کہ ترکیہ ٹی دوانزدہ ہزار 391 و شام ٹی اِرا ہزار 992 بندغ مرگ نا گواچی مسونو ۔

پیشن ملکی میڈیا نا ردئٹ بھاز یخ نا مُد نا سوب کُمکار باسک آتے ڈغار ئٹ بُھس ماڑی تیٹ مروک بندغ آتے کشِنگ ٹی زیات سختیمننگ ءِ۔

شابیت حوال تا ردئٹ ترکیہ نا صدر رجب طیب اردوان زمین جمب آن زیمی مروک علاقہ آتا دورہ ءِ  ہم کرینے۔

او زیمی مروک آتون اوڑدئی کرے و عزم پاش کرے کہ اسہ ہم بندغ ئسے بے اُرا مننگ الوفن ، زیمی مروک خاہوت نا زُوت ئٹ مالی کمککننگ ءُ  ۔

بلوچستان نا علاقہ خاران ئٹ نادرست بندغ آک سم کاری کریسہ بندغ ئسے مرگ ئنا گواچی کرینو۔

حوال تا رد ئٹ خاران ئٹ سم کاری نا تدینی لجے نا علاقہ ٹی مونا بس ہراڑے سم کاری آن مرگ ئنا گواچی مروک بندغ نا چاہنداریحسن خان نا مار محمد جان ساسولی نا پن ئٹ مسنے۔

علاقائی حوال تا رد ئٹ پن کروک بندغ نا تعلقداری سرکار تون مخ تفی کروک ٹولی آن ءِ ہرادے نادرست سلاء بند بندغ آک سم کاریکریسہ مرگ ئنا گواچی کریر۔

اندن پن کروک جلہو نا ذمہ واری ءِ بلوچ لبریشن آرمی نا ترجمان جیئند بلوچ ارفیسہ پارے کہ بی ایل اے نا سرمچار آک خاران نا علاقہلجے ٹی کوزہ گیر پاکستانی لشکر و ڈھکوک ادارہ تا آلہ کار ءِ جلہو ئٹ مرگ ئنا گواچی کریر و اونا سلاء تے کوزہ کریر۔

جیئند بلوچ نا رد ئٹ سرمچار آک استو لجے توک نا علاقہ ٹی کاروائی کریسہ، حسن خان نا مار محمد جان ساسولی ءِ مرگ ئنا گواچیکریر و اوڑان اونا اسہ توفک ئسے ہم کوزہ کریر۔

ترجمان نا پاننگ ئس کہ پن کروک بندغ دژمن نا مونا سلاء بِٹیسہ بھلو وخت ئسے آن کوزہ گیر پاکستانی لشکر و ڈھکوک ادارہ تا جوڑکروک ٹولی نا بشخ اس ئس و لجے و ایب کیب ئٹ آلہ کار نا وڑ کاریم کننگ ئس پن کروک بندغ فوجی لشکر کشی تیٹ دژمن نا کمککننگ تون اوار زالبول تے بلیک میل کریسہ دژمن نا کمک کن کاریم ئٹ ہتروک آ کاریم تا ڈوہدار ئس۔

جیئند بلوچ پین پارے کہ بلوچ لبریشن آرمی دا جلہو نا ذمہ واری ءِ ارفک۔ نن درشانی کرینن کہ دژمن نا پاننگ آ کاریم کروک غدار تے ہچوڑ اسیٹ پشخنگپرو و دا ٹولی تون تفوک ایلو غدار تے زوت اوفتا ایسری اسکان سر کننگ مرو۔

بلوچستان نا ضلع پنجگور و مستونگ آن پاکستانی لشکر و نادرست سلاء بند بندغ آک پنچ بندغ ءِ دزگیر کننگ آن گڈ نادرست جاگہ تیادرینو۔

شابیتی حوال تا رد ئٹ پنجگور نا علاقہ خدابادان مواچ چوک آن سرف گاڑی ٹی سوار نادرست سلاء بند بندغ آک اسہ بندغ ئسے برمتہکریسہ نادرست جاگہ آ درینو، ہرا نا چاہنداری ایوب نا مار شعیب ہند خدابادان نا پن آن مسنے۔

پولیس تدینی نا پک کرینے، واہم پین شابیتی حوال پولیس تیتو و نئے کہ برمتہ کروک آتا چاہنداری ءِ پولیس دائسکان کرینے۔

خیال ئٹ مرے کہ بلوچ راج دوست آک دا وڑ ئنا تدینی تا بارو ئٹ پاکستانی ڈھکوک ایجنسی و اوفتون مُخ تفی کروک ٹولی (ڈیتھ اسکواڈ) تیا دوبہ خلیرہ، اوفتا پاننگ ءِ کہ دا وڑ ئنا تدینی تیٹ زیات ریاستی مشینری اوار ءِ۔

اندن پنجگور نا تحصیل گچک آن پاکستانی لشکر اِرا بندغ ءِ دزگیر کننگ آن گڈ نادرست جاگہ آ درینے۔ ہرافتا چاہنداری واحد نا مارگلاب و ملنگ نا مار سلیم نا پن تیٹ مسنے۔

حوال تا رد ئٹ پن کروک بندغ آتے دئے دے مالو پاکستانی لشکر دزگیر کننگ آن گڈ نادرست جاگہ آ درینے، واہم علاقہ ٹی حوالکاریبست و بند مفننگ آن اوفتا زوراکی نا بیگواہی نا پک داسا مننگ ءِ۔

ایلو پارہ غا بلوچستان نا ضلع مستونگ آن ڈھاڈر نا ہندی اِرا بندغ ءِ پاکستانی لشکر زوراکی ئٹ بیگواہ کرینے۔ حوال تا رد ئٹ برجاءسال یک فروری آ پاکستانی لشکر اِرا بندغ عبداللہ نا مار رؤف و محمد امین نا مار امیر ہند ڈھاڈر ءِ اسہ ہوٹل ئسے آن دزگیر کننگ آنگڈ نادرست جاگہ آ درے۔ ہراڑان گڈ اوفتا بابت ہچ وڑ ئنا معلومداری رسینگتنے۔

خاہوت پارے کہ اوفتے ہرا ڈوہ ئٹ بیگواہ کننگانے ننے پاننگ مرے و اوفتے عدالت ئٹ ہتنگے۔

یاتی مرے مستونگ آن تدوکا ہفتہ اسہ پین ورنا نصیب اللہ شاہوانی ہم بیگواہ کننگاسس۔

بلوچستان نا علاقہ دکی ٹی سورک نا دین چنا تا زند آتے بیم ئٹ شاغانے۔

جلال آباد نا علاقہ متین کالونی ٹی سورک آن اسہ پین چنا اس کسکنے۔ کہوک آ چنا نا چاہنداری 4 سالی علی محمد نا مار محمد بلالقوم ترہ کئی نا پن آن مس۔ خلق ئٹ ایلو کیہی چناک ہم سورک نا گواچی ءُ۔ برجاء سال دکی ٹی سورک آن مروک مرگ آتا کچ ہفت مس۔

ایلو پارہ غا دین ئنا توننگ کن السی کڑدہ غاک محکمہ جانجوڑی و اعلیٰ کوالخواہ تیان ہلہلہی بنداو آ گام گیج کننگ نا خواست کرینو۔السی کڑدہ غاک محکمہ جانجوڑی و اعلیٰ کوالخواہ تیان خواست کرینو کہ زوت سورک توننگ و چنا تے کہنگ آن رکھنگ کن ویکسین وگام گیج کننگے۔

داڑان مالو جنوری نا بنائی دے تیٹ محکمہ جانجوڑی رپورٹ شینک کریسہ پاریسس کہ دکی ٹی سورک آن چِل چنا دائسکان زیمی ءُ۔

ایم ایس ڈاکٹر جوہر خان شادوزئی سورک آن رکھنگ نا خیالداری وڑ تا بارو ئٹ پارے کہ سورک وائرس آن ودی مروک اسہ ناجوڑیئسے ہرا نا داخس بھلو دارو درمان اس اف سورک آن لس وڑ ئٹ ہِڷ، جکہ، خنتا ہشنگ و دانہ غاتا ناجوڑی ودی مریک سورک بھاز زوایلوفتے زیمی کیک اندا خاطران دادے تالان کننگ نا جاگہ غا خیالداری نا گرج ءِ اندا سوب آن تینا چنا تے زو یکہ کبو۔

بھاز کم کیس آتیٹ سورک آن ناجوڑ مروک بندغ ءِ اسپتال ئٹ داخل کننگ نا گرج مریک رکھوک ٹیکہ خلفنگ آن سورک نا ناجوڑی آنبچنگ مریک۔

بلوچستان نا بنجائی شار کوئٹہ آن زوراکی ئٹ بیگواہ محمد رحیم زہری نا لُمہ و چنک سن چناک یلہ مسر اندن او تینا زائیفہ تون اواردائسکان بیگواہ ءِ۔

حوالکار آک پک کریسہ ٹی بی پی ءِ پاریر کہ دزگیری آن گڈ بیگواہ مروک محمد رحیم زہری نا لُمہ بس خاتون، اِرا چنک سن ءُ چنا دعازہری و یحیٰ زہری یلہ مسر۔ اندن محمد رحیم زہری و اونا زائیفہ رشیدہ زہری دائسکان بیگواہ ءُ۔

خیال ئٹ مرے پن کروک بندغ آتے 3 فروری آ گشکوری ٹاؤن، ناشناس کالونی آن سرچ آپریشن نا وخت دزگیر کننگ آن گڈ بیگواہ کننگاہراڑان گڈ اوفتا بابت ہچ وڑ ئنا معلومداری رسینگتنے۔

رحیم زہری و اونا خاہوت نا بندغ آتے دزگیر و بیگواہ کننگ آ جتاء فکر اتون تعلقداری تخوک بندغ آک حکومت آک نغدکاری کننگ ءُ۔

بلوچ یکجہتی کمیٹی نا راہشون ماہ رنگ بلوچ دا بابت پارینے کہ بلوچستان ئٹ جمہوری قانود آخہ تو جنگی قانود ٹہیفبو، بلوچ زالبول وچناک ہم ریاستی بے دادی آن رکھوک افس۔ کوئٹہ آن محمد رحیم زہری ءِ اونا خاہوت نا پنچ بندغ تون اوار زوراکی ئٹ بیگواہ کننگانے،ہرافتیٹ اونا اسہ سالی مسڑ دعا، چار سالی مار یحیٰ، اونا زائیفہ رشیدہ و لُمہ بس خاتون اوار ءُ۔

شفیق ایڈووکیٹ نوشتہ کرے کہ مشرف کسک ولے ساڑی آ جرنیل آک اونا پالیسی ءِ برجاء تخانو و کوئٹہ آن محمد رحیم زہری ءِ اونا اسہسالی مسڑ دعا، چار سالی مار یحیٰ، اونا زائیفہ و لُمہ تون اوار برمتہ کننگانے۔ عاصم منیر دیخہ ننگ، دیخہ لج؟

عبدالحفیظ زہری تون انت اس مس؟

ٹی بی پی تیدری

نوشت: فتح بلوچ

برجاء سال مُسہ فروری آ انسداد دہشت گردی عدالت کراچی نا جج محمد یاسین قادری محمد رمضان نا مار عبدالحفیظ آ خلوک تومت آک پک مفرینگ آ اودے شرف تون یلہ کرے۔

عبدالحفیظ کراچی سنڑل جیل ٹی بندی ئسک، ہرا وخت اونا خاہوت نا بندغ آک اودے عدالتی پرمان ہلیسہ جیل آن تینا ایلم ءِ دوٹی ہلیسہ پیشین پیش مس گڑا اسہ پیہنو ویگو گاڑی اس اوفتا کسر ءِ ہلک و عبدالحفیظ ءِ تینتون دننگ نا کوشست کرے۔

ہراڑان گڈ اونا ہیڑ و خاہوت نا ایلو بندغ آک سخت مزاحمت کریر سلاء بند بندغ آک اوفتیا سم کاری کریر، زالبول تے لغت کاری کریر، کرینگ تسر و پژہ غاتے چکار، بی بی فاطمہ تینا گُم مروک، دزگیر ایلم ءِ واپس بیگواہ مننگ کن ہلیتو۔

سلاء بند بندغ آک مزاحمت ءِ خنیسہ نرینگ آن مست عبدالحفیظ ءِ کسفینگ نا کوشست کریسسہ بھاز ٹپی کریر تا۔

سوشل میڈیا ٹی اسٹ آن زیات شابیت تالان وڈیو تیٹ دا ندارہ خننگ مریک۔

عبدالحفیظ دبئی آن کراچی ءِ امر سرمس؟

عبدالحفیظ ءِ تدوکا سال 27 جنوری نا شام ہمو وخت اونا اُرا نا مون آن گاڑی سلیفوک جاگہ آن متحدہ امارات نا ڈھکوک ادارہ آک دزگیر کریسہ بیگواہ کریر، ہرا وخت او کاریم  آن واپس اُرا آ بننگ ئس۔

اوکان گڈ سما تما کہ اودے اماراتی ڈھکوک پولیس پاکستانی کوالخوا تا دوٹی تسونے ولے انت گنا اسیٹ دن پاننگتو۔

اسہ بھلو وخت ئسے اسکان پاکستان ٹی اونا ہچ ءُ نشانی ملتو۔ حفیظ نا خاہوت اونا بابت سما کننگ کن پاکستان ٹی ہر ئسے ہمو جاگہ غا ہنا ہراڑ اسکان اونا وس ئس، ایسر ٹی مسہ تون آن گڈ اونا سما تما۔

اوکان گڈ اونا خاہوت سندھ ہائیکورٹ ٹی اسہ خواست اس تس ہرادے 29 مارچ 2022 آ باقاعدہ بِننگ کن موکل رسینگا۔

تدوکا سال اپریل آ ہرا وخت اونا گم مننگ نا خواست بِننگا گڑا ہائیکورٹ ءِ خف تننگا کہ اودے سی ٹی ڈی  کراچی آن دزگیر کرینے و اودے سینٹرل جیل کراچی آ رادہ کرینے۔

عبدالحفیظ نا برخلاف سی ٹی ڈی تھانہ ضلع جہندمی کراچی ٹی سندھ سلاء ایکٹ نا رِد ئٹ مقدمہ نوشت کننگاسس۔

اونا بر خلاف درج ایف آئی آر نا رد ئٹ اودے 31 مار چ 2022 آ مبارک شہید روڈ آن دزگیر کننگاسس و داڑان اسہ 30 بور نا پسٹل و سم خننگاسس۔

اندن سی ٹی ڈی نا پارہ غان سندھ ہائیکورٹ ٹی دا لڑ ئٹ 14 اپریل آ ہرا ورندی مچ کننگا، اونا رد ئٹ بیگواہ عبدالحفیظ  دزگیری کننگاسس و اونا برخلاف اِرا دفعات نا رد ئٹ مقدمہ نوشت کننگانے۔

دا وخت اونا ہیڑ پارے کہ اونا ایلم  بے گنا ءِ و ننے اومیت ءِ کہ عدالت آتیان انصاف رسنیگو و ایلم ءِ یلہ کرور و اندن مسک حفیظ آن دروغ نا تومت آک مُر کننگار۔

تدوک وخت ئٹ حفیظ زہری نا خاہوت آ انت گدرینگا؟

عبدالحفیظ زہری نا زور اٹ بیگواہ و بے دادی اونا خاہوت کن اولیکو ویل اف بلکن دئے سال مُست او زور اٹ بیگواہ تا، جشوک آجوْن تا و  ٹارگٹ کلنگ نا ویل تے سگانو۔

حفیظ زہری نا زورٹ بیگواہی آن مُست اوفتا سیال، بندغی حق آتا باسک راشد حسین بلوچ 26 دسمبر 2018 آ متحدہ عرب امارات آن زور اٹ بیگواہ کننگاسس، راشد حسین نا خاہوت نا پاننگ ءِ کہ ادے شش تو زورٹ بیگواہ تخینگ آن گڈ متحدہ عرب امارات و پاکستان نا کوالخواک بیدس قانودی وڑ ئٹ پاکستان آ راداہ کریر، ہراڑان گڈ او داسکان بیگواہ ءِ۔

اوکان گڈ اونا سالم عبدالحمید زہری 10 اپریل 2021 ئٹ کراچی آن زور اٹ بیگواہ کننگا ہرا داسکان یلہ مننگ کتنے۔

اندن دئے سال مست خضدار آن حفیظ زہری نا 14 سال ئنا ایلم مجید زہری ءِ 2010 ٹی زورٹ بیگواہ کننگ آن گڈ کسفنگا و وانا  جشوک آ جوْن خننگاسس، دا ویل ئنا اِرا سال آن گڈ 2012 ٹی حفیظ زہری نا باوہ، چاہندار آ واپار حاجی رمضان زہری ءِ خضدار بازار ٹی سم کاری کریسہ اودے کسفنگا۔

پن کروک ہڑتوما بندغ تا خون ئنا ویل آتیٹ اوار سیاسی و چاگڑدی جماعت آک پاکستانی فوج و اونا ٹہیفوک سلاء بند ٹولی تے پِن کیرہ۔

عبدالحفیظ داسا ہرادکن ءِ؟

عبدالحفیظ زہری کراچی ٹی ٹپی حالیت ئٹ تینا ہیڑ ئنا اُراٹی بند ءِ، اونا ہیڑ فاطمہ بلوچ پاہک کہ ڈھکوک ادارہ آک اونا ایلم ءِ واپس برمتہ کننگ نا کوشست کرور۔

فاطمہ حمید نا پاننگ ءِ تدوکا دے تیٹ سینٹرل جیل کراچی آن یلہ مننگ آن گڈ پیہن ویگو گاڑی ٹی سوار ڈھکوک ادارہ آتا سلاء بند کارندہ آک عبدالحفیظ ءِ زورٹ بیگواہ کننگ نا کوشست ٹی مزاحمت آ بے دادی کریر دا وخت حفیظ زہری و اونا چنکا ایلم بھاز ٹپی آ حالیت ئٹ ءُ اندن بے وسی ٹی درمان کن اوفتے اسپتال آ ہم دننگ کپنا۔

فاطمہ حمید نا رد ئٹ تدوکا دے ہرا وخت خاہوت ڈھکوک ادارہ آتا کارندہ آتیان تینا ایلم تے رکھ کریسہ ٹپی حالیت ئٹ  اسپتال آ دننگ کہ کرے گڑا ہمو ویگو گاڑی و سلاء بند کارندہ آک اونا رند ءِ ہلیسہ کریر، داسا ہم عبدالحفیظ و اونا ایلو سیال آک بے دادی نا سوب آن  ٹپی ءُ، داسکان خلیس آن نن اوفتے دراخی کن دننگ کپنا۔

عبدالحفیظ زہری نا ہیڑ بلوچ سیاسی تنظیم و بندغی حق ئنا ادارہ آتیان و وکیل تیان خواست کرینے کہ او دا ویل ٹی اونا توار جوڑ مریر تاکن او عدالت آن بے گناہ پاروک تینا ایلم نا زند رکھنگ کے۔

فاطمہ اندا اومیت کننگ ءِ کہ عدالت اودے رکھ و انصاف تے۔

درو 5 فروری آ بلوچ اسٹوڈنٹس کونسل ملتان اسہ ادبی مجلس اس ہڈ تس ہرا ٹی خوانندہ غاک اوار مریسہ علم اتون دوستی نا درشانیکریر۔

مجلس ئٹ ملتان نا نواز شریف زرعی یونیورسٹی و نشتر میڈیکل یونیورسٹی نا یونٹ اوغدیدار و باسک آتون اوار جامعہ پنجاب لاہور آنبروک مہمان خوانندہ غاک ہم اوار مسر۔

مجلس ئٹ قرآن پاک نا خواننگ، راجی شئر، پینل ڈسکشن و علمی و درسی تران، شئر و شاعری، اسٹیج ڈرامہ و ایلو علمی ویل آتیاشرہ مس۔

مجلس نا گڈ سر ئٹ کتاب مُچی اس ہڈ تننگا ہراڑے خوانندہ تا بھلو کچ اس بریسہ تینکن کتاب ہلک۔ اندن بلوچ اسٹوڈنٹس کونسل ملتانتینا مہمان تا منتواری کرے و پارے کہ نن اومیت کینہ کہ بلوچ خوانندہ تا ویل آتیان بیدس علمی سفر اندن جوان انگا پارہ غا مون مُستیبرجاء مرے۔

بلوچ لبریشن آرمی نا ترجمان جیئند بلوچ میڈیا ئٹ تروک بیان ٹی پارے کہ بی ایل اے نا سرمچار آک پنج فروری نا شام زامران نا علاقہ تگران کلگ ٹی کوزہ گیر پاکستانی لشکر نا اسہ کیمپ ئسے راکٹ و ایلو بھلا سلاء تیٹ ٹک کریر ۔

‏‎جیئند بلوچ نا رد ئٹ دا جلہو نا سوب آن دژمن فوج نا مسہ کارندہ ٹپی مسونو اندن کیمپ ءِ بھاز نسخان مس و سرمچار آتیان شکست آن گڈ دژمن فوج ایب کیب نا علاقائی مخلوق تون بے دادی کرے۔

‏‎بی ایل اے  نا ترجمان پین پارے کہ بلوچ لبریشن آرمی دا جلہو نا ذمہ واری ءِ ارفک، بلوچستان آن دژمن فوج نا تیوہ ایسری اسکان ننا کاروائیک برجاہ مرور۔

اندن مند ئٹی فوجی چوکی آ جلہو نا ذمہ واری ءِ بی ایل ایف ارفے، بلوچستان لبریشن فرنٹ نا ترجمان میجر گہرام بلوچ ضلع کیچ ٹی پاکستانی فوج آ جلہو نا ذمہ واری ءِ ارفیسہ میڈیا ٹی شینک کروک بیان ٹی پارے کہ سرمچار آک پنج فروری نا شام ہفت بجہ آ مند نا علاقہ مہیر ٹی بنگلہ چوکی آ راکٹ آتیٹ جلہو کریر۔

او پارے کہ سرمچار آک دئے راکٹ خلکر ہرا چوکی آ تمار جلہو ٹی کوزہ گیر فوج ءِ جانی و مالی نسخان ارفوئی تما مرگ ئنا گواچی مروک و ٹپی کارندہ آتا دننگ کن ایمبولینس جلہو نا ہند آ سر مس۔

ترجمان پارے کہ ترند جلہو آن گڈ کوزہ گیر فوج لس آباتی تیا بندغ آتون بے دادی کرے۔