تربت سول سوسائٹی نا پارہ غان رشیدہ زہری و اونا اَرغ رحیم زہری نا زوراکی ئٹ بیگواہ کننگ نا برخلاف یک شمبے نا دے تربت پریسکلب نا مونا برانز کننگا ہراٹی سیاسی باسک آک و چاگڑدی باسک آک بھلو کچ اسیٹ اوار مسر ۔

برانز کروک آک رشیدہ زہری و اونا ارغ نا زوراکی ئٹ برمتہ کننگ نا بر خلاف نعرہ خلکر و اودے دمدستی ئٹ یلہ کننگ کن بندغی حق آتاتنظیم و عدلیہ آن گام ارفینگ نا خواست کریر۔

برانز آن ہیت کریسہ تربت سول سوسائٹی نا کنوینر گلزار دوست پارے ریاست نا زوراکی بلوچ آتا بر خلاف ہننگ ءُ بلوچ آتے زوراکی ئٹبیگواہ نا گواچی کننگ ہڑدئی جوڑ مسونے ہرا تدوکا بھاز آ سال تیان برجاہ ءِ۔

او پارے تدوکا شام تربت ٹی ڈاکٹر واحد بخش نا ارا آ چھاپہ خلیسہ زالبول و چنا تیا بے دادی کننگ بلوچ چادر و چار دیوال نا عزت ءِلتاڑنگ ءِ او پین پارے نن داسا دا سرپد مننگ اون کہ ریاستی پالیسی بلوچ ءِ تینا ڈیہہ آ زندہ مننگ خواپک بلکن ریاست بلوچ آتا ساحلوسائل ءِ خوائک۔

او پارے کہ مست بلوچ نرینہ آتے زوراکی ئٹ بیگواہ نا گواچی کریسہ بے ڈس ءُ جاگہ ئسے آ دریرا داسا چنکا چنا و زالبول تے ہم ٹککیرا۔

رانز کروک آک پاریر کہ بلوچستان ٹی سیاسی  باسک و خوانندہ آتا زوراکی ئٹ برمتہ کننگ بھاز آ سال تیان برجاہ ءِ داٹی داسا ترندیاتیسہ زالبول تا زوراکی ئٹ بیگواہ نا سیاہ ءُ وخت ئسے نا بناء کننگانے، دا بے دادیک بھلو وخت ئسے آن برجاہ ءُ بلوچ معاشرہ نا لتاڑنگءِ دود اس جوڑ کرینے۔

او پارے کہ بلوچ چاگڑد ٹی مست ئنا وخت آتیان الیس اینو اسکان  زالبول ءِ عزت تیرا ولے داسا فورسز بلوچ عزت ءِ لتاڑینگ ءِ دانا  مطلبدادے کہ پہ رضا سوختہ کننگ ءِ۔

او پارے کہ بلوچ آک ہر وخت تینا زالبول و چنا تے رکھ کرینو ریاست اوفتے زوراکی ئٹ بیگواہ نا گواچی کننگ ءِ داسا ننا وجود آ ہیتبسونے دا ریاستی پالیسی ریاست کن اسہ وڑ ئٹ ہم جوان مروف۔

او پارے فورسز و ذمہ وار ادارہ غاک سوختہ کننگ آ پارت کریسہ ورنا تے پہ رضا نفرت آتا پارہ غا دھکہ تفس انتئے کہ بلوچستان تدوکابھاز آ سال تیان فورسز نا سوختئی نا گواچی ءُ و اسہ اندن ءُ خاخر اس خلکنو ہرانا کہنگ نا ہچ ءُ وڑ خننگپک۔

بلوچستان نا جتاء علاقہ تیٹ مروک آ تدینی تیٹ اِرا بندغ کسکر، زالبول آتون اوار چار بندغ ٹپی، اندن اسہ جوْن اس خننگانے۔

شابیتی حوال تا رد ئٹ ہفتہ نا سہب بلوچستان نا بنجائی شار کوئٹہ نا بنجائی بازار سلیم میڈیکل کمپلیکس آن خڑک نادرست بندغ آکسم کاری کریسہ اسہ بندغ ئسے کسفیر و چار بندغ ءِ ٹپی کریر۔

کوئٹہ پولیس جاگہ غا سر مریسہ جوْن و ٹپی آتے اسپتال آ درینے ہراڑے کہوک آ بندغ نا چاہنداری عبداللہ نا پن ئٹ مسنے اندن ٹپیآتیٹ عبداللہ نا مار نور احمد، ولی محمد نا مار سردار، خان محمد نا زائیفہ رقیہ بی بی، سید علی نا زائیفہ زاکرہ اوار ءُ۔

جلہو کار آک جاگہ غان نرنگ ئٹ سرسہب مسر۔ واہم تدینی نا سوب آک دائسکان سماء تمیتنو۔

ایلو پارہ غا ضلع کیچ ئنا علاقہ تربت ئٹ سروس اسٹیشن آ کاریم نا وخت بجلی نا کرنٹ لگنگ آن نور محمد قاسم نا مار کہور ہند شاپکساہ تسنے۔

اندا وخت ئٹ سبی آن خڑک پنجاب آن کوئٹہ غا ہنوک جعفر ایکسپریس ئٹ سفر نا وخت آ اسہ بندغ اس کسک ہرا نا چاہنداریعبدالصمد نا مار محمد ظریف ہند کوئٹہ نا پن ئٹ مسنے۔

تدوکا سال دسمبر ٹی زوراٹ بیگواہ مروک لسبیلہ یونیورسٹی نا خوانندہ عبدالقدوس قمبرانی داسکان یلہ مننگ کتئو۔ بیگواہ خوانندہ نا اسہ ایلم ئسے نا جشوک آ جوْن ہم داکان مست خننگانے۔

لسبیلہ یونیورسٹی آف ایگریکلچر واٹر اینڈ میرین سائنس اوتھل (لوامز) نا خوانندہ عبدالقدوس قمبرانی داسکان یلہ مننگ کتئو۔ او کوئٹہ سمنگلی روڈ آ اسہ ہوٹل ئسے آن 28 دسمبر 2022 نا شام نادرست سلاء بند بندغ آک زوراکی ئٹ گاڑی ٹی تولفیسہ بیگواہ کریر۔

خاہوت آن رسینگوک حوال تا رد ئٹ اودے یک ونیم تو آن ہم زیات وخت گدرینگانے ولے اونا بابت اسہ وڑ ئنا ہم حوال اس رسینگتنے، حوال تا رد ئٹ عبدالقدوس قمبرانی یونیورسٹی ٹی امتحان تریسہ چھٹی تے گدریفنگ کن کوئٹہ ٹی تینا ارا غا ہناسوس و ہمو شام سنگت آتون اوار بازار آ ہناسس ہراڑے اودے زوراکی ئٹ بیگوا کننگا۔

خاہوت پک کریسہ پارے کہ او یک و نیم تو ءِ اندا سوب آن چھپ ئسر کہ بلکن پولیس سروسوجنا پاریسہ اودے تینتون دروک آک زوت اُرا غا سر کرور ولے اوفتا صبر و چھپی بے سہب پک مس۔

یاتی مرے داکان مست عبدالقدوس قمبرانی نا اسہ ایلم اس باقر قمبرانی سال 2013 ٹی قلات آن زوراکی ئٹ بیگواہ کننگاسس ہرادے اِرا سال آن گڈ یلہ کننگا اندن اندا نیام ئٹی لسبیلہ یونیورسٹی ٹی واٹر ریسورس منیجمنٹ نا خوانندہ اونا ایلو ایلم حفیظ قمبرانی ءِ 14 مارچ 2015 آ قلات آن زوراکی ئٹ بیگواہ کریسر ہرانا جشوک آ جون اسہ تو ئسے آن گڈ 24 اپریل آ خننگاسس۔

خاہوت آن رسینگوک پین حوال تا رد ئٹ تدوکا دے تیٹ قدوس قمبرانی نا یونیورسٹی ٹی ارٹمیکو سمسٹر نا امتحان آک ہم بناء مسوسر ہرا داسا ایسر ہم مرور ہراڑان اونا تعلیمی سال و سمسٹر زوال مننگ نا خلیس ہم ارے۔

خاہوت نا پاننگ ءِ کہ اسہ ہم بے گناہ خوانندہ ءِ ٹک کننگ بھلو بے دادی ئسے و تعلیم دژمنی ئسے۔ قدوس قمبرانی اسہ خواری کش و لائخ ءُ خوانندہ ئسے ہرا وڑ ایلو باشعور بلوچ خوانندہ آتیا زمین تنک کننگانے، قدوس ہم اندا بے گناہ بیگواہ بلوچ ورنا تیان اسٹ ءِ ہرا نادرست سلاء بند و ڈیوائس دوٹی بندغ  آتا دو آن زوراکی ئٹ بیگواہ نا گواچی مسونے۔

اندن خاہوت بڑز کوالخوا و بیگواہ بندغ آتیکن ٹہیفوک کمیشن آن خواست کرینے کہ قدوس قمبرانی ءِ زوت آن زوت پاش کیر تاکن او تینا خواننگ نا لڑ ءِ برجاہ تخینگ کے۔

تربت آن پاکستانی لشکر ورنا ئسے دزگیری آن گڈ بیگواہ کرے حوال تا رد ئٹ پاکستانی سیکورٹی فورسز اسہ ورنا ئسے دزگیری آن گڈ بے ڈس ءُ جاگہ اس درے، فورسز نا دو آن دزگیری آن گڈ زورٹ بیگواہ مروک ورنا نا چاہنداری زمان بلوچ نا پن ئٹ مسونے۔

بلوچ نیشنل مومنٹ نا بندغی حق آتا سیل پانک نا رد ئٹ پن کروک ورنا ءِ پاکستانی سیکورٹی فورسز و ڈکوک ادارہ آتا کارندہ آک تدوکا دے تربت آن دزگیر کریسہ تینتون دریر اندن زمان بلوچ داکان مست 9 جون 2020 ٹی ہم زورٹ بیگواہی نا گواچی مسوسس۔

تنظیم نا رد ئٹ 2020 ٹی شش تو بیگواہ مننگ آن گڈ زمان بلوچ یلہ مسوسس اندن زمان بلوچ 2016 ٹی پاکستانی فورسز نا  دو ان  تینا باوہ آن ہم بے بشخ مسوسس-

بلوچستان ٹی زورٹ بیگواہی تا لڑ داسکان برجاہ ءِ، دی بلوچستان پوسٹ ءِ برجاہ تو ئٹی جتا علاقہ آتیان پاکستانی لشکر نا دو ان اِرا بلوچ زالبول و اِرا چنا تون اوار 14 بندغ نا زورٹ بیگواہی نا حوال تننگاسس ہرافتیٹ اسہ بلوچ زالبول و اِرا چنا اوکان گڈ یلہ کننگانو-

زورٹ بیگواہ زالبول تیٹ اوار رشیدہ زہری و اونا ہرغ محمد رحیم زہری داسکان پاش کننگتنو ہرافتا زورٹ بیگواہی نا برخلاف پگہ بلوچستان نا شار حب چوکی و تربت ٹی برانز مُچی کننگو اندن 14 فروری آ کوئٹہ ئٹ برانز نا پڑو کننگانے۔

کوئٹہ ئٹی پاکستان سپر لیگ نا نشان تس گوازی

ٹی بی پی سرگپ

پنچ فروری یک شمبے نا دے سوگوْ سیکیورٹی نا پلویڑ ئٹ پاکستان سپر لیگ نا ٹیم آک کوئٹہ گلیڈیٹر و پشاور زلمی نا نیام ئٹ نواب اکبر خان بگٹی اسٹیڈیم کوئٹہ ٹی نشان تس گوازی اس کننگا۔ پاکستان کرکٹ بورڈ نا پاننگ ءِ کہ کوئٹہ ٹی دا نشان تس میچ ئنا مسخت بلوچستان ئٹ کرکٹ نا گوازی ءِ دوارہ ہتنگ ءِ۔

بلوچستان حکومت میچ ئنا ٹہیفنگ کن کوئٹہ شار ئٹ سوگوْ سیکیورٹی نا بست و بند کریسس۔ کرکٹ میچ ئٹ پانزدہ ہزار بندغ نا اوار مننگ دا ہیت ئنا درشانی ئس کہ مخلوق بلوچستان ئٹ گوازی تے ہتنگ خوائک۔

بلوچستان نا راج دوست کڑدہ غاک سرپد مریرہ کہ کرکٹ نا نشان تس میچ بلوچستان نا بد حالیت آتیان خنتے چپ کننگ ئسے۔ میچ آن اِرا دے مالو تیوہ کوئٹہ شار ءِ سوگوْ سیکیورٹی پلویڑ کریسس، اُرا اُرا ءِ پٹنگا و ہمو ہفتہ ئٹی گشکوری ٹاؤن آن رحیم زہری ءِ اونا لُمہ، زائیفہ و چنا تون اوار زوراکی ئٹ بیگواہ کننگاسس۔

راج دوست کڑدہ غاتا دعویٰ ءِ کہ کوئٹہ ٹی مون نمائشی کرکٹ میچ جہان ءِ نشان تننگ ئسے کہ بلوچستان ئٹ ہچو ‘انسرجنسی’ اس وجود تخپک، داڑے ایمنی حالیت آتیٹ پاکستان سپر لیگ نا ٹیم آک کرکٹ نا میچ ٹہیفنگ کیرہ ولے ہرا دے آ میچ ٹہیفنگا ہمو دے آ کوئٹہ نا ریڈ زون ئٹ طالبان آک پاکستانی لشکر نا اسہ چیک پوسٹ ئسے آ جلہو کریر ہراٹی بیست آن زیات بندغ مرگ ئنا گواچی و ٹپی مسوسر۔

بلوچستان نا صوبائی و پاکستان نا بنجائی حکومت ءِ سوبری ئٹ بلوچ ویل ءِ سرپد مننگ نا گرج ءِ، نمائشی کرکٹ میچ آتیان بلوچستان نا ویل آک ایسر مفرور، گوازی تا مننگ آن ہچو چاہندار بندغ اس نمن مننگ کپک ولے نشان تس میچ آن بلوچستان نا حالیت آک جُوان مفرور بلکن ریاست ءِ ویل آتا ایسری کن سوگوْ گام گیج کروئی تمو۔ دا نشان تس میچ آتیا گیشتر سوج آک دا سوگوْ زمینی گواچنی تا سوب آن بش مریرہ کہ دن انگا نشان تس میچ، چانڑدہ اگست و بیست و سئے مارچ کوْن آ دے تیا سیکیورٹی ادارہ تا کنڈ آن جشن ٹہیفنگ نا مسخت گوازی و فن ئنا تالانی آن زیات بلوچستان نا بد حالیت آتے ڈھکنگ ءِ۔

بلوچ اسٹوڈنٹس ایکشن کمیٹی نا بنجائی ترجمان تینا شینک کروک بیان اسیٹ پارے کہ 21 فروری آ لمئی بولی تا جہانی دے ئنا رد ئٹ“زبان راجی پجار ءِ ” نا پن ئٹ غٹ ہنکین آتیٹ مجلس ہڈ تننگو و بلوچستان نا جتاء جاگہ تیٹ مجلس ہڈ تننگ نا کوشست کننگو۔

بنجائی ترجمان پین پارے کہ بلوچ اسٹوڈنٹس ایکشن کمیٹی اسہ خوانندہ گل ئسے نا رد ئٹ مدام بلوچ نا لمئی بولی تا رکھ اکن جہد ئٹیءِ و ہندا سوب گل جتاء جتاء ءُ سیاسی و ادبی تاک شینک و چاپ کننگ ءِ۔ گل ئنا آفیشل بولی تے بلوچی و براہوئی کننگانے، ہندا خاطرانادب، مجلس ، ہنکینی و یونٹ دیوان آتون اوار چنکا و بھلا غٹ مجلس آک لمئی بولی تیٹ کننگرہ۔ گل ئنا ہنکین آک بلوچی و براہوئی کلاسہڈ تننگ نا ہم کوشست کریسہ ءُ و گل ئنا کوشست ءِ کہ بلوچ الس پیشن آن بروک بولی تا وامداری آن پیشن تمیسہ تینا بولی تے تینٹمونا دے و جہانی تلہ غا سر کے۔

بنجائی ترجمان پارے کہ پیشن نا بروک آ بولیک بلوچ راج ئنا بولی تے گم کننگ ءُ و بلوچ نا دود آتون اوار اونا ذہن ہم مٹ مننگ ءِ۔ بلوچراجی پجار نا خاطران لمئی بولی تا کڑد بلوچ کن ہستی و نیستی نا وڑ ءِ۔ ہندا خاطران دا حالیت آتیٹ ہندن کہ بلوچ نا بولی تے گم کننگکن ڈھکوک ءُ چم مننگ ءِ و بلوچ آتے بولی تا زی آ جتا کننگ و جنگ ترفنگ نا کوشست مننگ ءِ۔ گڑا دا رد ئٹ بلوچ الس نا کوپہ آتا زی آبھلو ذمہ واری اس تینا زبان تے رکھنگ و اوفتا دیمروی مریک۔ پاننگک کہ زبان ءِ رکھوک آ راج زندہ ءُ راج اس پاننگک۔

بنجائی ترجمان گڈ سر ئٹ پارے کہ تدوکا سال ئنا وڑ لمئی بولی تا جہانی دے آ غٹ ہنکین آتیٹ مجلس ہڈ تننگو و بلوچستان نا جتاءجاگہ آتیٹ چنکو و بھلو مجلس ہڈ تننگ نا کوشست مرو۔

اردو ادب نا پنی آ شاعر، ادیب و ڈرامہ نویس امجد اسلام امجد 78 سال ئنا عمر ئٹی پاکستانی شار لاہور ٹی است ئنا دورہ آن کزیتکرے۔

پاکستانی سروزیر شہباز شریف اردو ادب نا دا عظیم نسخان آ است ہسونی نا درشانی کرے کزیت کروکا کن دعا خواہس و اونا خاہوتتون ہم است ہسونی نا درشانی کرے۔

شہباز شریف پارے کہ “امجد اسلام امجد اردو ادب ءِ وارث، فشار و سمندر آن بارہنگا ڈرامہ تسونے،ادب کن اونا خدمت آک بھاز وختاسکان یات تخنگور ،او پارے کہ امجد اسلام امجد نا کزیت آن پاکستانی ادب اسہ عظیم مصّنف و شاعر ئسے آن بے بشخ مس”۔

ضلع کیچ آن حوال آک رسینگانو کہ کینسر آن اسہ پین بندغ اس کسک۔

کینسر نا سوب کہوک آ بندغ نا چاہنداری محمد حکیم نا مار اکبر ہند ڈنے سر نا پن ئٹ مسنے ہرا میڈیکل ٹیکنیشن اس ئس۔

خیال ئٹ مرے کہ بلوچستان ئٹ کینسر نا ناجوڑ آتیٹ ودکی مننگ ءِ۔ تدوکا دے تیٹ کینسر آن زیمی اسہ پین چنا اس کسکسس۔

تیوہ بلوچستان ئٹ کینسر نا دارو درمان کن جانجوڑی آسراتی تا کمبتی ءِ۔ بلوچستان ئٹ چاگڑدی و سیاسی باسک و گل آتا کنڈ آن واروار خواست کننگا کہ کینسر نا ناجوڑی ٹی ودکی تا ایسری کننگ مرے و بلوچستان ئٹ کینسر اسپتال جوڑ کننگے۔

کینسر نا ناجوڑی نا بلوچستان ئنا کیہی علاقہ خاص وڑ ئٹ خضدار و نوشکے ٹی درزن آ کیس آک مونا بسنو و دا وخت اسکان کیہیبندغ آک کینسر آن کسکنو ہرافتیٹ بھلا کچ چنا و ورنا تا ءِ۔

سلاء بند بندغ آک گچین کاری آن گڈ بننگ آ اُلاخ ئسے سُم کاری کریسہ ٹِک کریر۔

شابیتی حوال تا ردئٹ بلوچستان نا ضلع ڈیرہ بگٹی ٹی ریٹرننگ آفیسر پھیلاوغ نا ٹولی آ نا درست بندغ آک سُم کاری کریر، سلاء بند بندغ آتا جلہو آن اسہ لیویز کارندہ اس مرگ نا گواچی و مُسٹ ٹپی مسر۔

گچین کاری آفیسر نا ٹولی ءِ ڈیرہ بگٹی نا علاقہ پھیلاوغ آن لوپ آ بننگ وختا جہلو ئٹ ٹِک کننگا ٹپی مروک آتے ڈسٹرکٹ ہیڈ کوارٹر ہسپتال ڈیرہ بگٹی آ دننگانے۔

یاتی مرے کہ اینو ڈیرہ بگٹی ٹی بلدیاتی گچین کاری برجاء ءِ بلدیاتی گچین کاری نا اولی وار نا بنائی آن خرابی برجا ءِ تدوکا نن نا درست بندغ آک اسہ دُکان ئسے آ جہلو کریسہ گڑاتے پرغار و مڈی تے ہُشیسہ نسخان تسوسر ہرانا فوٹیج سوشل میڈیا آ تالان مسس ۔

ڈیرہ بگٹی بلدیاتی گچین کاری ٹی خرابی نا دوبہ مسکوہی وزیر داخلہ سرفراز بگٹی آ خلنگسہ ءِ۔

ڈیرہ بگٹی ٹی بلدیاتی گچین کاری آن مالو مسکوہی وزیر داخلہ سرفراز بگٹی نا برخلاف امیتوار آک دوبہ خلکر کہ نن نیمہ آ اوتا مڈی ءِ ہُشیسہ نسخانی کریر، سرفراز بگٹی نا پاننگ ئس کہ منَہ وے سلوک ورناک دا دا گڑا ءِ کرینو او و اونا معاملہ ءِ قبائلی رواج آتا ردئٹ ایسر کننگ ءُ۔

داڑان مالو دسمبر ئٹ بلدیاتی گچین کاری تیٹ بشخ ہلوک ہندی اومیتوار آتون اوار 200 بندغ نا بر خلاف انسداد دہشت گردی ایکٹ نا رد ئٹ ایف آئی آر درج کننگاسس ہراٹی منہ کونسلر ہم اوار ئسر ہرافک سرفراز بگٹی آ سی ٹی ڈی نا کمک ئٹ زور شاغنگ نا دوبہ خلکسر۔