حق دو تحریک نا سروک مولانا ہدایت الرحمان دعویٰ کرینے کہ گوادر نا جاگہی، بیگواہ جنید ولد اللہ بخش ءِ پاکستانی فورس آک دزگیری ٹی کسفینو و جون ءِ ہم اونا خاہوت نا حوالہ کتنو۔

بلوچستان نا دریابی شار گوادر نا ہندی جُنید بلوچ ولد اللہ بخش ءِ 12 اکتوبر 2012 آ اوتھل زیرو پوائنٹ آن زوراکی ئٹ بیگواہی نا گواچی کننگاسس۔

مولانا ہدایت الرحمان دا ہیت ءِ پاکستانی وزیراعظم شہباز شریف نا اینو نا دورہ گوادر نا وختا اونا کسر آ اڈ تروک تولوک برانز ئٹی میڈیا باسک آ تتون تران کریسہ پارے و اونا پاننگ ئس کہ ننے دا ہیت اوفتا تہہ ئنا بندغ آ تیان خبر تمانے۔

خیال مرے کہ پاکستانی وزیر اعظم شہباز شریف اینو گوادر نا دورہ آ بسونے و گوادر نا بندغ آک تینا خواست آتا حق ئٹی اونا کسر آ تولوک برانز کننگ ءُ۔

بلوچستان نا دریابی شار گوادر ئٹی حق دو تحریک نا سروک مولانا ہدایت الرحمان بلوچ و حسین واڈیلہ ہندی مچھی ہلوک آتتون اوار تدوکا دے پاکستانی وزیر اعظم شہباز شریف نا دورہ گوادر نا وختا برانز کننگ نا پڑو کریسہ پاریر کہ گوادر پورٹ نا مونا وزیر اعظم نا برانزی بخیرٹ مرو، اوفتا پاننگ ئس کہ ہزار آ لمّہ آتا جغر نا ٹکر آک بیگواہ ءُ مخلوق نہاد تا ودکی آن فریشان ءِ، سیمی کاروبار آک بند کننگانو و سیکورٹی فورس آتا روشت ہچ بدل متنے۔

تدوکا دے مولانا ہدایت الرحمان پاریسس کہ گوادر، مکران و بلوچستان نا ویل آتے اسہ وڑ نظرانداز کننگ و بیگواہ آ بندغ آتا آجو مفنگگ آ حق دو تحریک وزیراعظم میاں شہبازشریف نا دورہ گوادر نا وختا جون ئنا 24 تاریخ، جمعہ نا دے سہب ئنا 11 بجہ غا پورٹ روڈ آ برانز کرو، وزیراعظم نا برانزی بخیرٹ کننگو و او گوادر نا غٹ مخلوق ءِ اوار مننگ نا صلاح ہم خلکر۔

اوفتا پاننگ ئس کہ بنجائی و صوبائی حکومت نا کنڈ آن بلوچستان اسہ وڑ نظرانداز مننگ ئٹی ءِ۔ گوادر و مکران نا ویل آک ایسر مننگ افس۔ بڑز ئنا کوالخواک تینا دورہ غا تیٹ بیرہ خاص تپہ آ تتون اوڑدئی کیرہ، اندہ سوب آن الس ئنا جائز بنماسی ویل آ تیا اوفتا خنک تر ءُ۔ حاشیہ بردار آتے خوش تخنگ نا پالیسی داسا اوفتے کاریم تفرو۔

ایلو نیمہ غان وائس فار بلوچ مسنگ پرسنز نا بین برانز کیمپ اینو 4682 می دے ہم برجاء مس۔

دا وختا وی بی ایم پی نا کمک کماش ماما قدیر بلوچ نا پاننگ ئس کہ بلوچ نا ڈیھ عظیم ءُ جہد ئسے کن تینا ساہ تے ندر کننگ ءُ۔ بلوچستان نا ہزار آ شہید آک اسہ عظیم ءُ مسخت ئسے کن رخصت مسنو و تینا زند آتے دا اومیت و ارمان ئٹ ندر کرینو کہ اوفتا شہادت اوفتا عظیم مسخت ءِ پورو کرو۔ بروکا زنک ءِ اوفتا قربانی تے نظر ئٹ تخیسہ اوفتا کسر آ پند خلیسہ اوفتا کاریم ءِ مونی دروئی ءِ۔

او ودیک پارے کہ اینو ہم ہزار آ بلوچ فرزند آک زندان تیٹ بند ءُ و سما اف ہراڑے و انت حالیت ٹی ءُ۔ اوفتا لمّہ آک اوفتا مُری آن سخت فریشانی آن گدرینگ ءُ، دا نا اندازہ ہمو لمّہ غا تے ارے ہرافتا چُناک کیہی سال تیان بیگواہ ءُ۔

حوال تا رد ئٹ بلوچستان نا ضلع خضدار ئٹی درو ننکان نادرست ءُ بندغ ہندی سڑدار نا اُرا آ جلہو کرینو۔

جلہو خضدار نا علاقہ زہری چشمہ نا ہند آ مسونے۔ ہندی حوال تا رد ئٹ درو ننکان 40 :1 منٹ آ زہری چشمہ ثمری ٹی نادرست ءُ سلاء بند بندغ حاصل خان جتک نا اُرا نا چارمہ کنڈ آ جلہو کریسہ سُم کاری کرینو۔

حوال تا رد ئٹ اسہ گھنٹہ اسکان ہڑتوما کُنڈ آن سُم کاری برجاء مسوسس، اندن دا نیام ئٹ راکٹ آتے ہم آزاتی ئٹ کاریم ئٹ ہتنگاسس۔

تدینی ٹی ہچ وڑ ئنا جانی نسخان نا حوال رسینگتنے ولے حاصل خان جتک نا اُرا ءِ نسخان مسونے و تدینی نا سوب داسکان سما اف۔

بلوچستان نا بنجائی شار کوئٹہ ٹی وائس فار بلوچ مسنگ پرسنز نا کنڈ آن زوراکی نا بیگواہی و بیگواہ غا بندغ آتا آجو مفننگ نا برخلاف برانزی کیمپ ءِ 4679 دے پورو مس۔

اندن بلوچستان آن جتا وخت آ تیٹ زوراکی نا بیگواہی تا گواچی مروک ہشت بندغ پاش کننگانو ہرافتیان چار بندغ نوشکی سی ٹی ڈی نا دزگیری ٹی ءُ و چار بندغ آجو مریسہ تینا اُرا تیا سر مسنو۔

کوئٹہ ٹی زوراکی نا بیگواہی تا برخلاف وی بی ایم پی نا کیمپ ئٹی تنظیم نا کمک کماش ماما قدیر بلوچ تون بیگواہ راشد حسین نا لمّہ و ایلو بیگواہ غا بندغ آتا خاہوت آک اوار ئسر۔

دا وختا خاہوت آ تتون بی ایس او، بی ایس او پجار و ایلو سیاسی و چاگڑدی باسک آک اواری نا درشانی کریر۔

ماما قدیر بلوچ نا پاننگ ئس کہ بلوچستان تون اوار کراچی ٹی تدوکا اسہ اِرا تو ئٹی بلوچ آتا زوراکی نا بیگواہی تیٹ باز ترندی بسنے۔

اونا پاننگ ئس کہ پاکستانی ریاست جہانی بندغی حق آتا قانود آتا لتاڑ کننگ ءِ، ولے اوفتے سوج کروکو کس اف، بندغی حق آتا تنظیم آتا دعویٰ و بیان آک بس لوز آ تسکان رہینگانو، بلوچستان بندغی حق آتا بابت ئٹ بلیک ہول جوڑ مریسٹ ءِ، نیشنل و انٹرنیشنل میڈیا بلیک آؤٹ ءِ، غٹ خن تے تر تخانو۔

بندغی حق آتا ادارہ آتا کنڈ آن کیہی نوٹس ہلنگ و اعلامیہ شینک مننگ آن بیدس ہم بندغی حق آتا سخت لتاڑ ئٹی ہچو کمبوتی متنے نئے دافتیا عمل مننگ ئٹی ءِ۔

اونا پاننگ ئس کہ نن غٹ بیگواہ غا بندغ آتا خاہوت آ تیان خواست کینہ کہ او تینا بندغ آتا آجوئی کن تینٹ بریر برانز ریکارڈ کرفر۔

ایلو نیمہ غان نوشکی ٹی سی ٹی ڈی نا حوالہ مروکا بندغ آ تیٹ پیرجان ولد سردو سکنہ ایرو، پسند علی ولد چار شمبے سکنہ کساک بلیدہ، عبدالصمد ولد رحیم بخش سکنہ ایریکان، پھلان حان ولد خدا بخش اوار ءُ۔ ولے پولیس نا کنڈ آن دا بندغ آتیا لگوکا کیس آتا ہچو شابیت حوال مونا بتنے۔

اندن پنجگور آن بیگواہ مروک اِرا حقی ءُ ایلم ارشاد و شرافت ولد محمد عوض آجو مریسہ اُراغا سر مسنو۔

اندا وڑ برجاء سال تربت آن بیگواہ مروکا خوانندہ حفیظ بشیر و ابرار بلوچ تدوکا دے آجو مریسہ تینا اُراغا سر مسنو۔

جنگ یوکرین نا سوب آن روس آ جہانی رکھ آ تیان گڈ روس چین ءِ ارزان نرخ آ تیا غٹ آن زیات خام تیل بہا کروکا ملک جوڑ مسنے۔

تدوکا سال ئنا مقابلہ ٹی دا سال ئنا مئی اسکان چین روس آن 55 درسد زیات خام تیل بہا ئٹ ہلکنے۔ اندن سعودی عرب نا جاگہ غا روس، چین ءِ آئل بہا کروکا غٹ آن بھلا ملک جوڑ مسنے۔

کووِڈ نا رکھ و معیشت ئٹی سست روی نا سوب آن خواست کم مننگ آن بیدس چین روسی تیل ءِ بہا ئٹ ہلنگ ئٹی ودکی کرینے۔ فروری ٹی چین و روس سنگتی نا پڑو کریسر و پاریسر کہ سنگتی نا ہچو سیم اس اف۔

چینی کمپنیک، ہرافتیٹی سائنوپیک و ژینوا آئل ہم اوار ءُ، اندا تو تیٹ گیشتر کچ ئٹ و رعایتی نرخ آ تیا روسی تیل بہا ئٹ ہلکنو انتئے کہ یوکرین آ جلہو نا سوب آن امریکہ و یورپ روس آ رکھ خلکنو۔

چینی جنرل ایڈمنِسٹریشن آف کسٹمز نا ڈیٹا نا رد ئٹ تدوکا تو 8.42 ملین ٹن تیل بہا ئٹ ہلنگ مسنے۔ دا نا مقابلہ ٹی چین سعودی عرب آن 7.82 ملین ٹن تیل ہلکنے۔ اندن سعودی عرب ہرا چین ءِ غٹ آن زیات تیل بہا کریکہ ارٹمی نمبر آ بسنے۔

دے کہی ڈیہہ آک یوکرین آ روسی جلہو نا ورندی معاشی پڑ آ تننگ ءُ۔ مارچ ئٹی امریکہ و برطانیہ پڑو کریسر کہ او روسی تیل آ رکھ خلور، و یورپ نا پاننگ ئس کہ او روسی گیس ئنا کارمرز ءِ کم کننگ کن گام ارفنگ ءِ۔

بی بی سی نا گلوبل ٹریڈ کارسپانڈینٹ، دھارشینی نا پاننگ ءِ کہ بیرہ چین دا وخت آن سواد ارفنگ اف بلکن انڈیا ہم روسی تیل بہا ئٹ ہلنگ ئٹی ودکی کرینے۔

روسی تیل ئنا خواست ئٹی ودکی آن روس ئنا کھٹیائی زیات زیمی متنے ہرا نا خلیس یوکرین آ جلہو آن پد ودی مسوسس۔ ولے اوفتا پاننگ ءِ کہ ’تیل آن مروکا دا کھٹیائی داسا کم مننگ ءِ، و یورپی قوم آتا روسی تیل ئنا جاگہ غا توانائی کن پین وڑ و ڈول ارفنگ آن گڈ داٹی پین ترندی بسنے۔

روسی تیل آ رکھ ئنا بابت ئٹ امریکی صدر جو بائڈن نا پاننگ ئس کہ ’دا گام ئنا مسخت روسی معیشت نا ساہ رغ‘ ءِ ٹک کننگ ئس۔

دو شمبے نا کچ و حساب آن اندا گمان مریک کہ چین تدوکا تو ایران آن ہم 260,000 ٹن تیل بہا ئٹ ہلکنے۔ دسمبر آن پد دا اونا مسٹمی شپمنٹ ئس۔ تہران آ امریکی رکھ آ تیان بیدس چین ایرانی تیل بہا ئٹ ہلیسہ بسنے۔

جعفر آباد ئٹ نادرست سلاء بند بندغ آک پولیس چوکی آ سم کاری کریسہ اِرا کارندہ ءِ مرگ ئنا گواچی کریر۔

سم کاری نا تدینی جعفر آباد نا علاقہ قیدی شاخ آن خڑک مندرانی ئٹ مس ہراڑے نادرست بندغ آک پولیس چوکی آ سم کاری کریسہ ہیڈ کانسٹیبل بابل خان کنڈرانی و کانسٹیبل مور حسین ءِ مرگ ئنا گواچی کریر۔

تدینی آن گڈ جلہو کرور آک نرار، پولیس ٹیم تدینی ہند آ سرمریسہ کارندہ تا جوْن تے ہسپتال آ درے و تدینی نا ردئٹ پین پٹ و پول برجاء ءِ۔

ایلو پارہ غان ہرنائی ئٹ اسیکہ وا سلاء بند بندغ آک روڈ ٹہیفوک کمپنی نا وتاخ آ جلہو کرینو۔ سم کاری نا تدینی استو سئے بجہ مس، دا وخت وتاخ ئٹ دوانزدہ مزور کار ساڑی ئسر، سم کاری آن بیم تالان مس واہم ہچ ءُ جانی نسخان اس متنے۔

ضلعی کوالخوا تا ردئٹ جلہو کروک آ سم کاری آن گڈ اسہ ٹیکٹر و کرش مشین ءِ خاخر تسر و ہنار۔

لیویز نا ردئٹ اِرا دے مُست ہم ہرنائی ئٹ روڈ جوڑ کروک کمپنی نا وتاخ آ سم کاری کننگاسس ہراڑان اِرا مزور کار ٹپی مسوسر۔

لیویز نا ردئٹ دا تدینی ئٹ سلاء بند بندغ آک چار مزور کار ءِ برمتہ کریسہ دریسر ہرافتا بابت دائسکان حوال اف۔

دا جلہو تا ذمہ داری دائسکان کس ارفتنے۔

پاکستان نا بنجائی شار اسلام آباد ئٹی ہائی کورٹ نا چیف جسٹس اطہر من اللہ جمعہ نا دے مدثر نارو و ایلو بیگواہ مروکا بندغ آتا آجو نہ مننگ نا برخلاف تروک درخواست آتے بننگ نا وختا ریمارکس تریسہ پارے کہ ریاست زوراکی نا بیگواہی تیٹ تُد ءِ۔

انڈیپینڈنٹ اردو نا رد ئٹ اسلام آباد ہائی کورٹ زوراکی نا بیگواہی تا بابت ئٹ کیس آتیٹ مسکوہی وزیر داخلہ شیخ رشید و ساڑی وزیر داخلہ رانا ثنا اللہ آن بیان حلفی ہم خواہا۔

بیگواہ غا بندغ آتا بابت ئٹ شش کیس ءِ سال 2021 آن بننگ برجاء ءِ۔ دا شش کیس ئٹی صحافی و بلاگر مدثرنارو نا آجوئی نا کیس ہم اوار ءِ۔

یاتی مرے کہ بنجائی کابینہ بیگواہ غا بندغ آتا جیڑہ آ وزیر آتیا ساڑی کمیٹی اس ہم ہڈ تسنے۔ ڈپٹی اٹارنی جنرل نا پاننگ ءِ کہ ’پٹ و پول کروک ایجنسیک تینا کوشست آتے کننگ ءُ۔‘

چیف جسٹس نا پاننگ ئس کہ ’داسا ہم ہڑدے بندغ آک بیگواہ مننگ ءُ، کس سوج کروکو اف۔ عدالت بنجائی حکومت ءِ پرویز مشرف و اوڑان پد ئنا غٹ وزیر اعظم آتے نوٹس تننگ نا حکم تسس۔

او پارے کہ ہمو نوٹس و بیان حلفیک ہرادو؟ دا غٹ آن اہم ءُ جیڑہ سے و دا ٹی ریاست نا دا روشت ءِ؟

عدالت تدوکا سماعت نا وختا ساڑی و مسکوہی وزیر داخلہ آتے عدالت آ بننگ نا پاریسس۔ وزیر داخلہ نا عدالت ئٹی بے بننگ نا بابت ئٹ چیف جسٹس نا پاننگ ئس کہ مگہ دا جوان خننگو کہ دا عدالت چیف ایگزیکٹو ءِ خوائے؟ غٹ حکومت آک راہبند و تینا قول ئنا خلاف ورزی کننگ ءُ۔ دا جیڑہ بایدے بنجائی حکومت و غٹ سیاسی سروک آ تیکن کل جیڑہ آ تیان بڑز مرے۔

وزارت حوالکاری و شینکاری نا نمائندہ آک عدالت ءِ پاریر کہ دا بابت ئٹ پاکستان براڈکاسٹرز ایسوسی ایشن ءِ چھٹی لکھنگانے۔ ہرا نا ورندی ٹی چیف جسٹس نا پاننگ ئس کہ “ اوکان گڈ مسنگ پرسن آتا بابت ئٹ اخس پروگرام مسنے‘

کیس آتے بننگ نا وختا وکیل کرنل (ر) انعام الرحیم عدالت ءِ پارے کہ انتئے کہ او بیگواہ غا بندغ آتا بابت ئٹ ہیت کیک تو اندا سوب آن انا ٹیلی وژن آ بننگ آ رکھ خلنگانے۔

اونا پاننگ ئس کہ پرویز مشرف آن ہلیس اینو اسکان بندغ آتے زوراکی ئٹ بیگواہ کننگ ریاستی ادارہ آتا پالیسی ءِ۔‘

چیف جسٹس تون تران کریسہ اونا پاننگ ئس کہ دنو دہ کیس ساڑی ءُ ہراڑے بندغ آک بیگواہ کننگانو و پدان خبر تمانے کہ اوفتا ٹرائل مسنے و اوفتے سزا ہم تننگانے۔ اوفتے پدان جیل آن خبر تمانے کہ او بندغ آتیٹ منَٹ ئسے تو سزائے موت تننگانے۔ فوجی عدالت آتا آرڈیننس ایسر مننگ آن بیدس ہم اوفتے آفیشل سیکرٹ ایکٹ نا رد ئٹ سزا تننگانے۔ و اوفتا وارٹ آتے دا بابت ئٹ پدان جیل آن خبر تمانے۔

چیف جسٹس اطہر من اللہ کابینہ نا ہڈ تروک کمیٹی ءِ نہ مننگ نا بریبر پاریسہ سوج کرے کہ عدالت دا زوراکی نا بیگواہی تا ذمہ وار دیر ءِ پائے؟ یا تو دا پابو کہ داڑے ریاست نا تہٹی پین ریاست اس ہم ارے۔

چیف جسٹس نا پاننگ ئس کہ پولیس، انٹیلی جنس بیورو و فوج ئنا ایجنسی تیا ہم دوبہ خلنگک۔ وزیر دفاع دیر نا شیف آ کاریم کیک؟ یا تو وزیراعظم پائے کہ او بے وس ءِ و اگہ او بے وس اف تو آئین نا رد ئٹ او ذمہ وار ءِ۔ وزیر اعظم گڑا دا عدالت نا مونا دا پائے کہ عدالت دیر نا برخلاف کارروائی کے۔

دا بابت ئٹ بنجائی وزیر داخلہ رانا ثناء اللہ نا پاننگ ئس کہ بیگواہ غا بندغ آتا خاہوت آک ننے ثبوت ایتر نن اوفتا آجوئی کن تیار اُن۔

اونا پاننگ ئس کہ اگہ عدالت ننے بیگواہ غا بندغ آتا بابت ئٹ حکم تننگ ءِ تو کنتو اخس ایجنسیک کاریم کیرہ ای تعاون کننگ کن تیار اُٹ۔