بلوچستان نا بھلا شار کوئٹہ اٹ پوسکنا سال ءِ “کتاب میراث” نا سرحال تون بخیر کننگا۔ کتاب میراث نا مُچی مسہ سال آ کوئٹہ اٹ ہڈتننگسہ ءِ۔
دا مُچی اٹ اڑزان نرخ آتیا کتاب دوئی کننگ مریک۔ مُچی ئٹ زند ئنا جتا بشخ آن بھلو کچ اسیٹ مخلوق بشخ ہلک۔
کوہلو و دکی ٹی کولا کانڑ ویل آتیٹ 4 مزورکار مرگ نا گواچی
بلوچستان نا علاقہ کوہلو و دکی ٹی کولا کانڑ ٹی مروک ارا ویل ئٹی 4 کانکن مرگ نا گواچی مسونو۔
کوہلو ٹی نوہشم نا ہند آ کولا کانڑ نا کانڑ تولینگ آن ارا کانکن مرگ نا گواچی مسر ہراتا چائنداری غلام قادر و شادی خان مری نا پن ئٹ مسونے و اوفتا تعلق کوہلو آن ءِ۔
اندا وڑ دکی نا علاقہ چمالنگ ئٹ کولا نا کانڑ ٹی مِش ئنا کرود تمینگ آن 2 کانکن مرگ نا گواچی مسونو۔ پولیس نا پاننگ ءِ کہ اڑتوما بندغ آتا جون تے کولا کانڑ آن کشیسہ اسپتال آ سرکینو۔
یاتی مرے کہ کولا نا کانڑ پٹنگ بلوچستان نا بھلا صنعت آتیان اسٹ ءِ و بلوچستان نا جتا علاقہ آتیٹ چارنیم ہزار آن زیات کولا نا کانڑ ارے و کانڑ آتیٹ بھازی گیس تالان مننگ، مش ئنا کرود تمینگ و تراک آتا سوب آن ویل آک مریرا۔
پاکستان سینٹرل مائنز لیبر فیڈریشن نا رد ئٹ بلوچستان و پاکستان نا ایلو صوبہ آتیٹ کانڑ تا ویل آک ہر سال تقریبا200 مرگ مریک۔
پوسکنا سال – برزکوہی | عتیق آسکوہ بلوچ
پوسکنا سال
نوشت: برزکوہی | مٹ: عتیق آسکوہ بلوچ
پوسکنا سال ئنا بننگ نا گل و بالی ئٹ چیچلو کنوک بھلا مُچی ئٹ پخیر بھلو گھڑی اس ارفوک پیہنگ تون تُرند آن تینا لٹ ءِ ڈغار اٹ اِرا وار خلنگ آن گڈ تُرند آ توار تون پارے “بروک آ وخت آ ناچ کروک و تدوکا وخت آ ماتم کروکاک، بنبو! وخت بیرہ اسہ چاگڑدی لڑ بند ئسے، خوڑت ریک تمیسہ کے یا گھڑی نا دروشم آ سیلہ پیری خلیسہ کے، کلینڈر نا پنہ غا ایمون مریسہ سال ءِ پورہ کیر، دا بیرہ اسہ موضوعی درک ئسے۔ ہچس مٹ مروف۔ انت سال مٹ مننگ آن حال مٹ مرو؟ نہ، اخس پوسکنو سال بریر، حساب بدل مرو زند آخہ۔ نم انتس کہ بنگرے، تیوہ غاتے اُست آن دبو، نہ وخت ٹپ آتے درمان کیک، نہ زند مٹ مریک و نہ راج آتا بروکا وخت بیرفنگک، وخت بیرہ مُشت ئٹ بند ہِس ءِ۔”
تیوہ غا مُچی دا پخیر نا پارہ غا پام کرے و مُچی آن اسٹ ئسے نا سبّر آ توار بس “او گنوک! اگہ وخت اف، اگہ پوسکنا تُو و سال اف، گڑا بدلی انت ئسے؟ گڑا راج آتا زند دیر بدل کیک؟”
پخیر بند آ گھڑی ءِ ڈغار آ تخیسہ پارے “وخت ہچس بدل کپک، تیوہ غاتے وخت ءِ بدل کروک آ بدل کیرہ۔ پوسکنا سال آخہ، پوسکنا بندغ آک بدل کیرہ۔ ہرا ملی و ہرا بندغ ہرا ویل آتے ودی کرے، ہرا برجاء کیفیت ودی کرے۔ ہمو ذہنیت و ہمو بندغ نا برجائی ءِ پرغنگ کیک و نہ اونا وجود آن وختس ایسری تِرک کیک۔ پوسکنا بندغ ءِ ودی مروئی ءِ۔ وخت ءِ بدل کننگ کن۔”
مُچی آن مخنگ نا توار بس و اسہ ورنا اس ٹوک تروک وڑ پارے “او سنیاسی بابا! امر مریرہ دا پوسکنا بندغ آک؟ ہراکان بریرہ؟ دا پوسکنا بندغ ودی امر مریک؟ ہرا لمہ غاک ودی کیرہ دُن انگا بندغ تے؟”
پخیر گھڑی نا دامون ایمون آن پیری خلیسہ پارے “پوسکنا بندغ آک لمہ تا کُٹ آن ودی مفسہ، دا بندغ نا وجود نا تہٹی دِرک تیک، ہموکان پٹیسہ خننگک، نن تیوہ غاتیٹ اسہ پوسکنو بندغ اس ارے، ہرا خننگ نا ودار ئٹی ءِ۔ دا پوسکنا بندغ وختس زرتشت آنبار دئے سال گیاوان تیٹ سرگڑدان مننگ آن گڈ رسینگک، گڑا وختس دیو جانس کلبی آنبار ترکِ عشرت کریسہ رسینگک، وختس بدھا آنبار چُپ عبادت آن رسینگک، گڑا وختس منڈیلہ آنبار تارمہ غا زندان و دوارہ چی گویرا آنبار سُم تا توار ئٹ و وخت وخت اُراٹی تولوک کڑمب ءُ ساہ اس ہلیسہ تینا زنچک اٹ اُریسہ پام کننگ و ارادہ آتیٹ رسینگک، ہرکس تینا وجود نا تہٹی دا پوسکنا بندغ نا پٹ و پول ءِ جتا وڑتیٹ کیک، و ہرکس نا پوسکنا بندغ جتا مریک، ولے جتا مریسہ ہم تیوہ غاک اسہ وڑ مریرہ، تیوہ غاتیٹ جہان بدل کننگ نا طاغت مریک۔”
تیوہ غا مُچی گھڑی نا دامون ایمون ترندی تون پیری خلوک پخیر ءِ گنوک سرپد مریسہ اونا ہیت آتیان چس ہلنگ نا کوشست اٹ اوڑان خڑک مریسہ کریر، اندا توار توار ئٹ، اسہ کںڈ ئسے آن توار بس “جُوان، پخیر بابا! گڑا دا پا کہ امر مریک نا دا پوسکنا بندغ؟”
پخیر اسہ دم تون پیری خلنگ ءِ بند کرے، و گھڑی نا زی آ تولسہ مون ءِ آسمان کن بڑز کریسہ استار تے اریسہ پارے “پوسکنا بندغ؟ دا ہمو بندغ مریک ہرا تینا مرک آن پد ودی مریک، او بروکا وخت نا بندغ مریک ولے ساڑی وخت اٹ زند گدریفک۔ او تنیا مننگ آن خُلیپک، او چُپ مننگ و ہیت کننگ ہڑتوم آتے چائک و چُپی و ہیت کننگ نا وخت ءِ چائک۔ اونا شعوری بالاد تلار آتیان سوگو مریک۔ او تینا بد آن بد آ حالیت اٹ ہم انفرادیت آن گچین مریک۔ او حق آ سلوک مریک بیدس غرض کہ او داڑان فائدہ ارفہ یا اودے مرک دوئی مرے۔ اوٹی سوج کننگ نا جیرت و ورندی پٹنگ نا جستجو مریک۔ اودے توروک سیم تا خلیس مفک۔ اونا تہہ ئنا حساس بندغ زندہ مریک، پوسکنا زیمل تون او اُست ہلوک مریک، فن ئنا اودے چاہنداری مریک و فنکار ئنا اودے قدر مریک۔ اونا رہی آ بے بنوک ءِ بننگ کن خف مریک و ہرا دائسکان متنے اودے خنوک آ خن مریک۔ او تینے ٹی آجو مریک و تینا آجوئی کن فیصلہ تا باریم ءِ ارفنگ کیک و تینا آجوئی تون مابت کیک۔ او تینتون مابت کیک و تینے شرف ایتک۔ او وختی ہنوک کسر تیا ہنپک، اونا تینا خوشیک مریرہ، تینا دیک، تینا کاریم و ماتم نا دے مریرہ۔ او ساندہ راہشونی کن تیار مریک، و خواست تمے راہشون نا رند ئٹ برجاء مزاج تون ہننگ ءِ چائک۔ او بیدس سائیں کروک آ زند ءِ گدریفک، او خطرہ آتیٹ زند کیک، او مش تا ٹُل تیا مریک، او نادرست آ سمندر تیٹ تینا کشتی تے دڑیفک، او جنگ اکن ہروخت تیار مریک، وختس طاغت تخوک تون، وختس تینا برابر نا تون یا گڑا تینتون۔ او کٹک، یا باغی مریک یا گڑا خلنگک۔ چاگڑد آتے، راج آتے، جہان ءِ، تاریخ ءِ پوسکنا سالک آخہ، پوسکنا بندغ آک بدل کیرہ۔ توبو تینا مبارکباد نا کلہو تے، ڈھکبو تینا پوسکنا سال نا پٹاسکی تے، کس ئسے خمب کپبو، کلینڈر نا پارہ غا ارپبو، گھڑی تے شیف کبو، پوسکنا سال نا بست بند کپبو، پوسکنا دے ئنا ودار کپبو، پوسکنا بندغ نا ودار ءِ کبو، پوسکنا بندغ نا پٹ و پول ءِ کبو، نمے آن ہرکس ہمو پوسکنا بندغ ءِ خنے، تینا تہٹی یا تینے آن پیشن گڑا کل پٹاسکی تے ترخفبو، ساف آ کاغذ تے کشیسہ قلم دوٹی ہلبو پوسکنا تاریخ ءِ نوشتہ کننگ کن، گھڑی تے خوڑتی اٹ اربو، مٹ مروک وخت ئنا شاہد مبو۔”
پخیر تینا ہیت ءِ نیمہ غا ہلیسہ خڑک آ پاٹ چمولی و کاغذ نا ٹکر مُچ کننگ بناء کرے، مُچی سرپد مننگ الو کہ دا گنوک انت کننگے، اسٹ اس ٹوک تروک پارے “دنو ہیت ئسے گڑا انتکن ہربندغ پوسکنو بندغ اس مفک خواجہ؟”
پخیر چمولی و کاغذ نا ٹکر تے گھڑی نا دامون ایمون و زی آ شاغسہ باکس نا تیلی ءِ لگفسہ دافتے خاخر تس و دوارہ گڑد پیری کریسہ ورندی تس “انتیکہ پوسکنا بندغ بیرہ آجو بندغ مننگ کیک و آجو بندغ رسینگپک۔ ہر پارہ غا بندغ آجوئی نا پٹ و پول ئٹی ءِ ولے بندغ تیوہ غاتیان زیات بیم نا گواچی اندا آجوئی آن ءِ۔ آجوئی نا شعور بندغ کن بیم ئنا سوب ءِ، انتیکہ آجوئی تینتون ذمہ واری ہم اوار ہتیک۔ بیوسی ئٹی اٹ گچین کننگ مفک و آجوئی تینتون گچین کننگ نا بڈ ءِ ہم ہتیک۔ اندا آجوئی نا بے دادی آن دو خلاسی کن وختس بندغ پائک کہ دا کائنات نا بست و بند میکانکی ءِ و نن چنکو بشخ اس دانا مونا بے وس اُن، ہچس کننگ کپنہ وختس او پائک کہ تیوہ غا تدینیک خدا تعالیٰ نا تابع ءُ و بندغ نا انت اوقات، نن تو بیرہ بیوس اُن۔ وختس تینا کچ ءِ عمرانی، زرگزرانی، نفسیاتی عمل تا مونا کُورک۔ دا تیوہ غاتیان اسٹ نہ اسہ نیمون اس نن بنینہ، دافتا مسخت بندغ تینا آجوئی آ دو ارفیسہ تینے ایب کیب و فطرت نا دوتیٹ ہِلنگ خوائک و دُن کننگ نا بدل ئٹ او جارات خنک، انتیکہ اوڑا ہچو ذمہ واری اس مفک۔ ہر بندغ چائسہ تینے ریفک۔ اسہ آجو بندغ اس تینا تہہ اٹ پوسکنو بندغ ئسے پٹنگ کیک، آجوئی اولیکو شڑط ءِ، ولے داڑے آجو انسان دو بفک۔”
ہراتم چمولیک، کاغذ و گھڑی ہشنگسہ ہِس مسر، گڑا پخیر تینا لٹ ءِ ارفیسہ پارے “نم مشت آتے وخت ئنا ہس تیان پُر کبو، ای کاوہ، وخت ئنا بند مُشت ءِ ملوکا ءِ پٹنگ کن۔”
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
تخلیق انا ہَر پاس ئٹی – باری آجو
تخلیق انا ہَر پاس ئٹی
سیخائی ءَ مَش ماس اٹی
رازئس ارے ۔ ۔ ۔ ۔
ہر کَس کہ بس
گام ءِ تِخا
عاشق مریک
عاشق کہ مَس
او فکرئنا خالق مریک
تخلیق انا ہر پاس اٹی
ہیت اس ارے۔۔۔۔
ہیت اس ارے ، کَس چائہ تہ
یا پارِفِہ ، یا پائہ تہ
ہر کَس کہ پُہہ مَس تہ۔۔۔۔ہِنا
ایپار نا لگا مَش ءَ
خلق ءِ ، ہِنا ، مُر آن ہُرا
انت پاؤ ۔۔۔۔۔او دیرے خنا !
تخلیق انا دا پاس اٹی
شئیدائی ءَ احساس اٹی
راستی نا پُرءَ تاس اٹی
زارئس ارے ـــــ
ہر کَس کُنیک۔۔۔۔زندہ سَلِک
کُنپَک اگہ۔۔۔۔۔۔۔۔۔ہڑدے کَہِک
او بھیم اٹی ، وسواس اٹی
خنپک تینے مَش ماس اٹی
تخلیق انا هِچ پاس اٹی
ڈاکٹر باری آجو
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
کوئٹہ، زیارت، قلعہ سیف اللہ تون اوار بلوچستان نا جتا علاقہ آتیٹ پِر و برف
حوال تا رد ئٹ کوئٹہ، زیارت ، قلعہ سیف اللہ تون اوار بلوچستان نا جتا علاقہ آتیٹ پر و برف آن گڈ مُد یخ مس و بجلی تننگ بند مس۔ بروکا ہفتہ آن زیات پر و برف تمنگ نا گمان ءِ۔
گیشتر حوال تا رد ئٹ جمعہ نا دے کوئٹہ، زیارت ، قلات ، مستونگ ، دالبندین ، نوشکی ، قلعہ سیف اللہ ، پشین ، قلعہ عبد اللہ تون اوار ایلو علاقہ آتیٹ پر ومش تیا کم برف تمنگ نا لڑ دم دمہ آ برجاہ اندن زیارت، مسلم باغ ، ہنہ اوڑک ، کان مہترزئی ، خوجک ٹاپ تو اوار ایلو علاقہ آتیٹ برف باری نا لڑ برجاہ مس۔
ہرانا سوب آن یخ ئنا ترندی ٹی ودکی مسونے، اندن مد ئنا حالیت تون مون تننگ کن پی ڈی ایم اے نا عملہ ء پرمان تریسہ کنٹرول روم ہڈ تننگ و لکپاس، خوجک ٹاپ ، کان مہترزئی ، زیارت و قلعہ عبد اللہ ٹی مشینری سر کننگانے، اوار ہیوی مشینری اسٹینڈ بائے کننگانو۔
کوئٹہ ٹی پر مننگ تون شار ئنا 17 فیڈر ٹرپ کریر ہرانا سوب آن شار ئنا بھلو بشخ ئسے نا نہ بیرہ بجلی بند ءِ بلکن ہڑدے ئی زند ہم بھاز خراب زیمی ءِ۔
اندن کیسکو کوالخوا تا رد ئٹ بجلی نا کاریم مد ئنا حالیت جوان مننگ تون اوار بناء کننگو۔ محکمہ مد نا رد ئٹ ہفتہ آ قلات، مستونگ، کوئٹہ، پشین ، زیارت، قلعہ سیف اللہ، قلعہ عبداللہ ٹی پر اندن مشی علاقہ آتیٹ برف باری نا گمان ءِ اندن 2 جنوری آن کوئٹہ، زیارت ، پشین ، ژوب ، قلعہ عبد اللہ ، نوکنڈی ، دالبندین،نوشکی، تربت ،پنجگور ، گوادر ، پسنی ، جیونی ، لسبیلہ ، قلات ، خضدار ، مستونگ ، نصیر آباد ، جعفر آباد ، جھل مگسی ، بولان ، بی ، کوہلو ، بارکھان ٹی بناء مروک پر تا لڑ 6 جنوری اسکان برجاہ مننگ نا گمان ارے۔
اندا نیام ئٹی کوئٹہ، پشین، زیارت، قلعہ عبداللہ، ہرنائی، چمن ٹی بھاز برف باری نا ہم گمان ءِ۔ محکمہ مد ئنا رد ئٹ3 آ 5 جنوری نا نیام ئٹی سبی، بولان، قلات، خضدار، نصیر آباد ٹی نالہ تیٹ چُلک نا گمان ءِ۔
ورنا ڈاکٹرزایسوسی ایشن خواست آتا پورو مفرینگ آ برانزی روڈ آ او پی ڈیز بناء کرے
حوال تا رد ئٹ ورنا ڈاکٹرزایسوسی ایشن خواست آتا پورو مفرینگ آ برانزی روڈ آ او پی ڈیز بناء کرے، جمعہ نا دے ورنا ڈاکٹرز ایسوسی ایشن نا پارہ غان خواست آتے پورو کپرینگ نا برخلاف احتجاجاً روڈ آتیا ٹیبل خلیسہ اوپی ڈیز ٹی ناجوڑی تے چیک اپ بناء کننگا۔
گیشتر حوال تا رد ئٹ ینگ ڈاکٹرز ایسوسی ایشن نا اوغہدیدار ڈاکٹر یاسر اچکزئی ، ڈاکٹر صد پانیزئی و ایلو تا پارہ غان جتا ناجوڑی تا ناجوڑ تےاوننگا۔
اندن اوفتے دوائی تا پرچی نوشت کریسہ تننگا،اوفتا پاننگ اس کہ ہرا وخت ہسپتال آتیٹ آسراتی کمبوتی مرے گڑا اوکان جوان ءِ کہ نن روڈ تیا اوپی ڈیز بناء کین، بنماسی دوائیک ہسپتال آتیٹ ریسنگپسہ گڑا تیوہ آ تر نزلہ ڈاکٹر تیا خلنگیگ
کوہلو ٹی زالبول ڈاکٹر مفننگ، غریب مخلوق تڑئی ڈاکٹر تا رحم و کرم آ
حوال تا رد ئٹ ڈسٹرکٹ ہیڈ کوارٹر ہسپتال کوہلو ٹی زالبول میڈیکل ڈاکٹر تخپرنگ آ چنا خننگ نا کیس آتیٹ تڑئی ڈاکٹر آک غریب آتے پولینگ ءُ۔ ڈسٹرکٹ ہیڈ کوارٹر ہسپتال کوہلو ٹی زالبول میڈیکل آفیسر تا تخپرنگ آن زالبول ناجوڑ آتا سختی تیٹ ودکی مننگ ءِ، چنا خننگ نا کیس آتیٹ جانجوڑی آسراتی مفرینگ نا سوب آن تڑئی ڈاکٹر آک غریب آتے ہڑتوما دو تیٹ پولینگ ءُ۔
عوامی حلقہ آک ڈسٹرکٹ ہیڈکوارٹر ہسپتال ٹی میڈیکل تخنگ ءِ یخینی کننگ و خالی اسامی تیا دمدستی تخنگ نا خواست کننگانے۔
گیشتر حوال تا رد ئٹ ارا لکھ چانڑدہ ہزار بندغ نا آباتی آ ٹہفوک ضلع ٹی چنا خننگ نا سنٹر مفرینگ و لیڈی میڈیکل آفیسرز تخپرنگ آن زالبول تا جانجوڑی ٹی بھاز سختی مننگ ءِ۔
برجاہ سال دئے ئنا کچ چنا خننگ نا کیس آتیٹ لمہ و چنا مرگ نا گواچی مسونو، ساندہی و مُر ئنا علاقہ آتیٹ مرغن کسر تے خلیسہ ہیڈ کوارٹر آ سر مروک ناجوڑ آک جانجوڑی نا آسراتی مفرینگ نا سوب آن ہراڑے بھاز سختی و ویل آتا گواچی ءُ۔
اندن زیاتی پیسہ نا خڑچ آتا سوب آن درپدر آ ضلع ٹی ہراڑے جانجوڑی نا ایلو آسراتی تا کمبوتی ء اندن لیڈی میڈیکل آفیسر تا تخپرنگ و تقریری آن ویل آتیٹ پین ودکی مننگ ءِ۔
بلوچستان: کورونا وائرس نا اسہ ناجوڑ اس مرگ نا گواچی، 3 پوسکنو کیس رپورٹ
حوال تا رد ئٹ بلوچستان ٹی کورونا وائرس نا اسہ ناجوڑ اس مرگ نا گواچی اندن 3 پوسکنو کیس رپورٹ مننگ آن گڈ زیمی بندغ آتا کچ 33633 مسونے۔
محکمہ جانجوڑی نا کورونا وائرس آپریشن سیل نا شینک کروکا رپورٹ نا رد ئٹ بلوچستان نا6 اضلاع آن کورونا وائرس نا 363 ٹیسٹ کننگانے ہرافتیٹ 3 بندغ ٹی کورونا وائرس پک مسونے اندن293 بندغ نا نتیجہ بتنے داسکان رپورٹ نا رد ئٹ تدوکا دے2 گھنٹہ نا نیام ئٹی بلوچستان ٹی کورونا وائرس نا گواچی 3 ناجوڑ درواخ مسونو۔
ہراڑان گڈ درواخ مروک آتا کچ 33183 مسونے اندن بلوچستان ٹی کورونا وائرس نا فعال ناجوڑ تا کچ86 ء ہارفت 5 ہسپتال ٹی دوا مننگ ئٹی ء ہراتے پائی آکیسجن فلو آ تخانو،رپورٹ نا رد ئٹ بلوچستان ٹی داسکان کورونا وائر آن 364 مرگ مسونے،رپورٹ نا رد ئٹ کورونا وائرس نا کچ 83 ۔ 0 فیصدریکارڈ کننگانے۔
تمبو غیرت نا پن آ زالبول تون اوار ارا بندغ نا خون
حوال تا رد ئٹ تمبو چھتر نا علاقہ ٹی غیرت نا پن آ سم کاری آن زالبول تون اوار اِرا بندغ نا خون مسونے و ڈودار نرانے، پولیس نا رد ئٹ چھتر سٹی ٹی ڈودار احسان علی غیرت نا پن آ سم کاری کریسہ تینا کزن مسمات عمرانہ بی بی و ملک داد ءِ کسفینے۔
گیشتر حوال تا رد ئٹ ڈودار ہند آن نرانے، حوال رسینگتون پلیس ویل ئنا جاگہ سرمس و جون تے دوٹی الیسہ سیول ہسپتال ڈیرہ مراد جمالی آ سر کرے ہراڑے المی کاروائی آن گڈ جونک خاہوت نا دو ٹی تننگ تننگار پین کاروائی بناء کننگانے۔
اندن پین حوال ئسے نا رد ئٹ بلوچستان نا علاقہ حب شار ئنا خڑک زیر تعمیر شالی بائی پاس آن ہندو تاجر نا جون خننگانے اندن جون ئنا خڑک آن کہوکا نا کار ہم رسینگانے ہرانا چائنداری رتو ڈیرو لاڑکانہ سندھ نا ہندی نند لال نا46 سال ئنا رمیش لال نا پن ئٹ مسونے۔
پولیس نا رد ئٹ کہوک تیز ینگا ازباب نا کمک اٹ کننگانے، خنگوک آ جون نا چائنداری کروک آ اسہ خڑک ئنا تیناس پارینے کہ مرگ نا گواچی مروکا تدوکا دے لاڑ کانہ آن تینا کار ٹی پیشتماسس ہراڑان گڈ بیگواہ اس و موبائل فون ہم بند ئس۔
برجاہ سال ئٹ بلوچستان نا کولا کانڑ تیٹ 65 ویل مسونو ۔رپورٹ
برجاہ سال بلوچستان نا کولا کانڑ تیٹ 65 ویل ئٹی87 کانکن مرگ نا گواچی مسونو، اندن 43 آن زیات بندغ ٹپی مسونو۔
حوال تا رد ئٹ بلوچستان نا کولا کانڑ تیٹ برجاہ سال ہم ویل آتیٹ کمی بننگکتو، 65 ویل ئٹی 87 کانکن مرگ نا گواچی مسونو اندن 43 آن زیات ٹپی مسونو تدوکا مسہ سال ٹی بلوچستان نا کولا کانڑ تیٹ265 کان کن مرگ نا گواچی مسونو۔
محکمہ معدنیات و کوالخوا تا رد ئٹ بلوچستان نا شش سد کولا کانڑ تیٹ 2021 نا نیام ئٹی میتھن گیس نا تالان مننگ آن، مش ئنا کرود تمینگ آن، چٹ کشینگ آن ٹرالی نا ڈک لگینگ و خاخر لگینگ نا65 ویل مسونو، دا ویل آتیٹ 87 کانکن مرگ نا گواچی مسونو اندن43 آن زیات ٹپی مسونو۔
بلوچستان نا ضلع دکی نا کولا کانڑ تیٹ تیوہ آتیان زیات ویل مسونے بلوچستان نا کولا کانڑ تیٹ مرگ نا گواچی مروک آ زیات بندغ نا تعلقد کے پی کے آن ء ،محکمہ معدنیات نا کوالخوا نا رد ئٹ 2020 نا نیام ئٹی بلوچستان نا کولا کانڑ ٹی مروک ویل آتیٹ 92 کانکن مرگ نا گواچی اندن 2019 نا نیام ئٹی 86 کانکن مرگ نا گواچی مسوسر۔
