بلوچستان نا ضلع مستونگ نا علاقہ کھڈکوچہ ئٹ گیت نا ہند آ باغ ئٹ کاریم کروک مزور آتیا ڈرون جلہو نا سوب آن چار مزور کسکر و مُسٹ ٹپی مسر۔
کمکار آتا رد ئٹ تدینی کھڈکوچہ نا علاقہ گیت ئٹ مون آ بس، ہراڑے مزور آک باغ ئٹ کاریم کننگ ئٹ گٹ ئسر کہ ہندا وخت ڈرون جلہو مسک۔ جلہو نا سوب آن چار بندغ ہمو وخت کسکر و ہندن مُسٹ پین ٹپی مسر۔
تدینی آن گڈ کمکار آک کہوک آتا جون و ٹپی مروک آتے شہید نواب غوث بخش رئیسانی ہسپتال آ سر کریر، ہراڑے ٹپی آتے جان جوڑی کمک تننگ برجا ءِ۔
کمکار آتا رد ئٹ ٹپی مروک آتیٹ علی رضا مینگل ہند کھڈکوچہ، نصیب اللہ ابڑو ہند حاجی شار کچھی و خالد حسین ہند حاجی شار کچھی اوار ءُ۔
حوالکار آتا رد ئٹ جلہو ئٹ کہوک آتا چاہنداری گل خان مغیری ہند حاجی شار، عمران ہند حاجی شار و عبیداللہ ہند حاجی شار، جہانزیب ابڑو نا پن تیٹ مسنے۔
کمکار آتا پاننگ ءِ کہ جلہو ئٹ کہوک و ٹپی مروک کل بندغ آک باغ ئٹ مزوری کریرہ۔
تدینی آن پد علاقہ ئٹ خُلیس تالان مسنے۔