بلوچ یکجہتی کمیٹی پارینے کہ حاتم بلوچ ولد احمد ہند پنجگور، ہرا اسکول ماسٹر اس ئس۔ اودے عئید آن مالو وشبود بازار آن زوراکی ئٹ بیگواہ کننگا۔ اودے ریاستی مخ تف سلہہ بند ٹولی اس بیگواہ کرے، ہراڑان گڈ کیہی ہفتہ تے اسکان او نا بابت ئٹ ہچو ڈس اس مون آ بتو۔
او پارے کہ حاتم بلوچ اسہ ماسٹر اس ئس و تینا زند ءِ ایلوفتے علم تننگ نا پن آ کریسس۔ اسہ لس شاری و ماسٹر ئسے نا حیثیت ئٹ اودے رکھ تننگ نا جاگہ غا او ہم بلوچستان ئٹ بلوچ اُلس نا برخلاف برجا بیدادی تا اسہ پین ٹک اس جوڑ مس۔ 8 اگست آ اونا جون سی پیک روڈ آ جعفر اسکیم نا خڑک چغل تننگا، اوکان گڈ اونا خاہوت نا کیہی ہفتہ تیا مروک بے باوری و ودار ایسر مس۔
بی وائی سی پارے کہ حاتم بلوچ نا خون بلوچستان ئٹ بلوچ شاری تیتو مروک آ بھیم آتا شاہدی ءِ تیک۔ ہراڑے سلہہ بند ٹولی و رکھ ئتون تفوک کارندہ غاک بیدس سوگو سر و سوج آن کاروائی کیرہ۔ استاد، خوانندہ ورنا، مزور، مچھی ہلوک و ایلو لس شاریک زوراکی نا بیگواہی و عدالت آن چپ خون آتون مون تریسا ءُ۔ ہندن اوفتا خاہوت آک تیوہ زند دڑد آتیٹ زند تدیفرہ۔
حاتم بلوچ نا خون و او نا جون ءِ کسر ئنا کرک آ بٹنگ بیرہ اسہ بندغی ساہ ئسے نا ایسری آخہ بلکن مالو آن برجا بندغی حق آتا مفننگ آن اسٹ مروک اسہ تیوہ ءُ برادری اسیکن اسہ پین کڑمب ءُ صدمہ ئسے۔ دننگا تدینیک خلیس ءِ گیشتر کیرہ، خاہوت آتے بُھس کیرہ و بلوچستان ئٹ گمانی وڑ ئٹ اوار مننگ نا ماحول ءِ سوگو کیرہ۔
پین پارے کہ جہانی برادری و بندغی حق آتا تنظیم آک بائدے بندغی حق آتا برخلافی تے دمدستی دستاویزی دروشم ایتر و آزاتی ئٹ پٹ و پول نا خواست کیر۔ بلوچستان نا الس ءِ گیشتر رکھ، انصاف و اوفتا بندغ آتا بابت ورندی آن بیدس اِلینگ مفک۔