بلوچستان نا ضلع خضدار و قلات آن پاکستانی فورسز مسہ ورنا دزگیر کننگ آن گڈ نادرست جاگہ ئسے آ درے، ہراڑان گڈ اوفتا رد ئٹ ہچ ءُ احوال اس رسینگتنے۔
خضدار نا علاقہ زہری آن تعلق تخوک آ مسٹ انگا ورناتے تدوکا دے فورسز بیگواہ کرے۔ حوالکار آک ٹی بی پی ءِ پاریر کہ محمد ایوب نا مار یاسر ایوب ءِ زہری نا علاقہ تلاوان آن تدوکا دے پاکستانی فورسز اُراغا چھاپہ خلیسہ دزگیر کننگان آن گڈ بیگواہ کریر۔
فورسز کارندہ آک ارا ٹی ساڑی زالبول و ایلو بندغ آتون بے دادی کریر، اندن ارا ٹی گڑاتے پرغار۔
اندن پین حوال ئسے نا رد ئٹ تدوکا دے زہری نا رہینگوک اِرا ورنا حیدر خان نا مار بہادر خان و حضور بخش نا مار غلام قادر ءِ قلات آن زہری نا پارہ آ ہننگ آ کپوتو نا ہند آ سی ٹی ڈی کارندہ آک سم کاری کریسہ ٹپی آ حالیت ٹی دزگیر کننگ آن گڈ نادرست ءُ جاگہ ئسے آ دریر۔
سی ٹی ڈی دعویٰ کرینے کہ دا بندغ آک سلاء بند ئسر ہرا سم کاری کننگ آن گڈ دزگیر کننگار، علاقائی احوال تا رد ئٹ دا ورناک بے سلاء ئسر ہرافتے کارندہ آک خننگ تون سم کاری ئٹ ٹک کریر۔
یاتے مرے برجاہ سال مارچ نا تو ئٹی سی ٹی ڈی دعویٰ کریسس کہ مستونگ ٹی مروکا اسہ مون رس اسیٹی بلوچ سلاء بند تنظیم نا پنج کارندہ خلینگانو، اوکان گڈ ہمو بندغ آتا خاہوت آخ سی ٹی ڈی نا دعوی ءِ منیتوس و پاریر کہ دا بندغ آک مست آن دزگیز ئسر۔
سی ٹی ڈی نا کنڈان بلوچستان نا بنجائی شار کوئٹہ تون اوار ایلو علاقہ آتیٹ دروغ نا مون تس آتا ویل آک مالو ہم مسونو۔ بندغی حق آتا تنظیم آتون اوار بلوچستان نا سیاسی جماعت آک ہم سی ٹی ڈی نا دروغ با مون تس ٹی خلینگوکا بندغ آتا خون ئنا قانودی سر و سوج نا خواست کریسہ بننگ ءُ۔