حب چوکی آن زوراکی ئٹ بیگواہی نا گواچی مروک صحافی زبیر بلوچ نا خاہوت و بلوچ یکجہتی کمیٹی حب اوار پریس کانفرنس کریسہ پاریر کہ زوراکی نا بیگواہی اسہ اندنو ناسور ئسے ہراڑان اینو ہر بلوچ اُرا زہمی ءِ۔
اوفک پاریر کہ کس ئسے نا ایلم، کس ئسے نا مار، و کس ئنا باوہ دا ریاست نا بیداد جاہ تیٹی بلوچ مننگ نا سزا کُننگ ءِ۔ اینو نن نما مونا تینا دڑدی آ کسہ ءِ بِنفنگ کن بسونن، اندن بلوچستان نا جتا علاقہ تیٹ دا ظلم ئنا برخلاف تولوک برانز آک برجاء ءُ۔
اوفک پاریر کہ قلات ئٹ سید اختر شاہ نا خاہوت اونا آجوئی کن تولوک برانز کریر، و تربت ڈی چوک آ ظریف بلوچ نا خاہوت اونا بیدس عدالت خون ئنا برخلاف انصاف نا خواست کننگ ءِ۔
خاہوت نا پاننگ ئس کہ الطاف بلوچ نا مار زبیر، ہرا تجابان، تربت نا ہندی و بلوچستان یونیورسٹی آن پولیٹیکل سائنس ئٹ گریجویٹ کرینے، صحافت نا شعبہ تون تفوک مسنے و چھٹی تیکن حب چوکی آ بسوسس استو سئے بجہ غا سلہہ بند بندغ آک اُرا ٹی پترینگسہ اودے زور ئٹ ارفیر دریر۔
خاہوت پارینے کہ ننے باور ءِ کہ دا کاریم ریاست و اونا ادارہ تا پارہ غان کننگانے، و ننے بھاز خُلیس ءِ کہ زبیر ءِ ہم اشتماعی سزا ٹی ٹک کننگسہ ءُ، اندنکہ بلوچستان ئٹ ایلو زوراکی نا بیگواہی و بیدس عدالت خون تا تدینی تیٹ خننگک۔
اوفک پاریر کہ بلوچستان ئٹ زوراکی نا بیگواہی تا ودوک تدینی تا سوب آن ننے خُلیس ءِ کہ زبیر بلوچ ءِ ہم نسخان تننگ مریک۔ دا مننگ کپک کہ ریاست ننا بندغ آتے بیدادی کریسہ زوراکی ئٹ بیگواہ کے و نن چُپ مرین۔ ننا خواست ءِ خواست اسُل پاش ءِ: زبیر بلوچ ءِ دمدستی آجو کننگہ۔
خاہوت نا پاننگ ئس کہ نن حب چوکی ٹی بھوانی بائی پاس چوک آ تولوک برانز کننگ اُن، و ہمو وخت اسکان برانز برجاء مرو ہراتم اسکان ننا خواست آک منّنگتنو۔ ریاست ءِ مُسہ دے ئنا وخت ایتنہ کہ زبیر بلوچ ءِ رکھوک آجو کننگہ، نئے گڑا برانز ءِ شابیت کریسہ ترند ءُ گام ارفنگو۔
خاہوت گیشتر پارے کہ نن بلوچ الس آن خواست کینہ کہ زوراکی نا بیگواہیک اسہ خاہوت ئسے نا افس، بلکن تیوہ راج ئنا ویل ءِ۔ اگہ اینو نن چپ مسون گڑا پگہ پین اسٹ نا مار، ایلم، یا باوہ بیگواہ مرو۔ ننے ہمکوپئی نا درشانی کریسہ تینا توار ءِ بڑز کروئی تمو تاکہ ریاست ءِ دا کلہو تننگ مرے کہ نن دا ظلم ئنا برخلاف چپ تولپرون۔