بلوچستان نا ضلع خاران نا علاقہ البت ئٹی درو پیشیم نا دو بجہ نا وخت پاکستانی لشکر کن پوسٹ جوڑ کروک آ کمپنی نا کارندہ تے سلہہ بندغ بندغ آک دزگیر کریسہ تینتون دریر۔
ہندی وسیلہ تا رد ئٹ تدینی ہمو وخت مس ہراتم کہ ماڑی تفوک کمپنی نا کارندہ غاک ہندا علاقہ ٹی پاکستانی لشکر کن پوسٹ اس تفنگ ئٹ گٹ کاریم کریسہ ئسرہ۔ وسیلہ تا پاننگ ئسک کہ سلہہ بند بندغ آک جاگہ نا زی آ سر مریسہ کمپنی نا کارندہ تے دزگیر کریسہ بے ڈس ءُ جاگہ تیا دریر۔
واہم دائسکان دزگیر مروک آ کارندہ غاتا کچ و اوفتا حالیت نا بابت ہچو شابیت حوال اس بتنے۔
دائسکان کس ئنا پارہ غان تدینی نا زمواری ارفنگتنے و نئے کہ کارندہ تا دزگیری نا سوب آتا حوالہ ئٹ بیان گڑاس مون آ بسونے۔ ایلو پارہ غان سرکاری سروک آتا پارہ غان ہم تدینی تون پک امنا یا نمن مننگ نا ہچو بیان اس مون آ بتنے۔