پاکستان نا قطب دے کہی علاقہ ئٹ اینو سلہہ بند بندغ آک قدرتی گیس و تیل کشوک اسہ پلانٹ ئسے آ جلہو کریر، ہرا نا سوب چار ایف سی کارندہ و اِرا نجی کارندہ تتون اوار شش کارندہ مرگ ئنا گواچی مسر۔

پولیس اوغدہ دار عرفان خان ‘رائٹر’ ءِ پارینے کہ 50 سلہہ بند بندغ اوغان سیم آن خڑک ضلع ہنگو ٹی ایم او ایل پاکستان آئل اینڈ گیس کمپنی نا بست و بند ئٹ کاریم کروک پلانٹ آ جلہو کریر۔

پولیس نا پاننگ ءِ کہ سلہہ بند بندغ آک راکٹ ئٹ کاریم کروک چغلی بمب آتون اوار بھلا سلہہ تیٹ اِرا دون ایم-8 و ایم-10 ءِ ٹک کریر۔

پولیس نا رد ئٹ ایم-8 ئنا سکیورٹی کارندہ غاک جلہو ءِ بے سہب کریر ولے ایم-10 ئٹ مرگ آک مسر۔

او پین پارے کہ سلہہ بند بندغ آک قطبی وزیرستان آن خڑک ئنا علاقہ ئٹ نرنگ آن مالو گیس پاور پلانٹ ئٹ شمسی توانائی نا اسہ پلانٹ ئسے ہم نسخان تسر۔

مرگ ئنا گواچی مروک کارندہ تا چاہنداری سپاہی حمزہ علی، سپاہی شریعت اللہ، سپاہی محمد ولید و سپاہی ظفر اعظم نا پن تیٹ مسونے۔

پولیس نا رد ئٹ جلہو کار آک کارندہ تا سرکاری سلہہ و ایلو گڑا تے ہم تین تون درینو۔ سلہہ تیٹ 4 ایس ایم جی، اسہ ایل ایم جی اس میگزین و گرنیڈ تون اوار اندن آئل کمپنی نا کارندہ تا 2 رائفل اوار ءُ۔

پولیس نا پاننگ ءِ کہ سکیورٹی کارندہ تا جون تے کمبائنڈ ملٹری اسپتال ٹل آ دننگانے اندن پوسٹ مارٹم آن گڈ جون تے اوفتا علاقہ تیا رادہ کننگو۔

واہم دائسکان ہچ ءُ گل اس دا جلہو نا ذمہ واری ءِ ارفتنے۔

چینی شاری تیا جند ندری جلہو کروک بلوچ زالبول شاری بلوچ نا بچوک اُزبہ غاک خاہوت نا دو ٹی تننگار، سینزدہ تُو آن گڈ اونا گڈیکو نماز باوہ پیرئی علاقہ ئٹ خواننگا۔

خدو 26 اپریل آ کراچی یونیورسٹی نا بنجاہی در آ اسہ جند ندری جلہو اسیٹ چینی استاد آتے ٹک کروک شاری بلوچ نا بچوک اُزبہ غاتے خاہوت نا دو ٹی تننگانے، شاری بلوچ نا گڈیکو نماز اینو اونا باوہ پیرئی علاقہ نذر آباد ئٹ سہب ئنا دئے بجہ غا خواننگانے۔

یاتی مرے کہ تدوکا سال کراچی ٹی 26 اپریل نا نیمروچ وخت آ جند ندری جلہو اسیٹ 3 چینی تتون اوار 4 بندغ مرگ ئنا گواچی مسوسر۔

کراچی جلہو نا ذمہ واری ءِ بلوچستان ئٹ کاریم کروک آجوئی دوست سلہہ بند گل بلوچ لبریشن آرمی ارفیسس۔ ترجمان جیئند بلوچ پاریسس کہ جلہو ءِ اوفتا گل ئنا مجید برگیڈ نا سنگت شاری بلوچ سر تسونے۔

وزیرستان نا علاقہ میر علی ٹی نادرست بندغ آک مسن تا مڈل اسکول تے بارود ئٹ بھس کریر۔

ڈی پی او میر علی سلیم ریاض نا رد ئٹ ننکان 2 گرلز مڈل اسکول تے بارود ئٹ بھس کننگا۔ تراک ئٹ گورنمنٹ گرلز مڈل اسکول حسوخیل ءِ نسخان رسینگا۔

ڈی پی او نا رد ئٹ مسن تا اسکول تے بارود ئٹ بھس کننگ نا تدینی تیٹ ہچ ءُ جانی نسخان نا حوال رسینگتو۔

میر علی بازار تون تفوک گورنمنٹ گرلز مڈل اسکول ڈاکٹر نورجنت گل مرحوم کوٹ و میر علی بازار آن اِرا کلو میٹر مُر جاندم نا کنڈ آ دریائے ٹوچی آن خڑک ٹہیفوک گورنمنٹ گرلز مڈل اسکول خسوخیل ءِ تراکی مواد آتیٹ بھس کننگا۔

ہڑتوما اسکول تا ماڑی تے دیخہ نسخان رسینگانے، ڈی پی او نا رد ئٹ ہڑتوما فعال ءُ اسکول ءُ ہرافتیٹ کیہی چناک خوانیرہ۔

بلوچستان نا علاقہ بولان ئٹ پاکستانی لشکر کشی برجاء ءِ۔ لشکر کشی نا وخت آ بلوچ لبریشن آرمی نا سرمچار آک پاکستانی کارندہ تے جلہو تیٹ ٹِک کننگو۔

بلوچ لبریشن آرمی نا ترجمان جیئند بلوچ میڈیا ٹی شینک کروک بیان اسیٹ پارے کہ ننا سرمچار آک بولان نا علاقہ مارگٹ ئٹ اسہ جلہو اسیٹ کوزہ گیر پاکستانی لشکر نا مُسہ ایس ایس جی کمانڈو ءِ مرگ ئنا گواچی کرینو۔

ترجمان پارے کہ درو آن مارگٹ، زرغون و بولان نا ایلو علاقہ تیٹ بننگ نا کوشست کروک کوزہ گیر پاکستانی لشکر نا کارندہ تے سرمچار آک ہمو وخت ٹک کریر ہرا وخت اوفک مُچی نا دروشم ئٹ تولوک ئسر۔

جیئند بلوچ پارے کہ سرمچار آک پوسکن سلہہ تیٹ جلہو کریسہ دژمن لشکر نا مُسہ کمانڈو جاگہ غا مرگ ئنا گواچی و کیہی تے ٹپی کریر۔

ایسر ئٹ او پارے کہ بلوچ لبریشن آرمی دا جلہو نا ذمہ واری ءِ ارفک و نن دا دوارہ پانہ کہ کوزہ گیر پاکستانی لشکر نا تیوہ پیش تمنگ اسکان ننا کاروائیک ترندی تون برجاء مرور۔

یاتی مرے کہ داکان مُست مارگٹ تون اور آ علاقہ زرغون ئٹ پاکستانی لشکر نا پوسٹ ئسے جلہو ئٹ ٹِک کننگا۔ پاکستان فوج نا احوال کاری تلہ آئی ایس پی آر بیان تریسہ پک کرے کہ جلہو ئٹ پاکستانی لشکر نا مُسہ کارندہ مرگ ئنا گواچی مسونو۔

زرغون جلہو نا ذمہ واری ءِ ارفیسہ بی ایل اے نا ترجمان جیئند بلوچ پارے کہ سرمچار آتا جلہو ئٹ پنچ کارندہ ہند آ مرگ ئنا گواچی ءُ مُسٹ ٹپی حالیت ئٹ نرار۔

جیئند بلوچ پارے کہ جلہو آن گڈ پاکستانی لشکر علاقہ ئٹ آپریشن نا بناء کرے۔ آپریشن ئٹ بشخ ہلوک کارندہ غاتے مارگٹ اٹ اسہ پین جلہو اسیٹ ٹِک کننگا ہراٹی کم آن کم چار پین کارندہ مرگ ئنا گواچی و چار ٹپی مسر۔

بلوچ نیشنل موومنٹ (بی این ایم) نا چیئرمین ڈاکٹر نسیم بلوچ پارے کہ بلوچستان پاکستان نا کوزہ و لُٹ و پُل آن آجوئی نا کنڈ آ گامخلنگ ءِ۔ او تینا خیال آتا درشانی ٹوئٹر اسپیس آ انڈیا نریٹو نا صحافی رول کمار تون تران کریسہ کرے۔

ڈاکٹر نسیم بلوچ پارے کہ پاکستان “خیسُن و دتر نا پالیسی” آ عمل کننگ ءِ، یعنی او بلوچ آتا دتر ءِ شولیسہ بلوچستان نا مڈی ءِ لُٹنگ ءِ۔

ڈاکٹر نسیم پارے کہ بلوچ الس تینا مڈی ٹی بشخ خواہنگ اف بلکن تینا ڈغار ءِ خواہنگ ءِ ہراڑے او آجو و خودمختار قوم ئنا حیثیت ئٹ زندکننگ کے و ہرا کہ تاریخی گواچن و جہانی قانود آتا بنداو آ اوفتا حق ءِ۔

او پارے کہ بلوچ نا جہد منظم ءِ ہرا ٹی سیاسی مزاحمت و پیشن ملک جلاوطن سیاسی باسک آک تینا اہم کڑد ئس ایسری تننگ ءُ۔ اوپارے کہ بھاز آ بلوچ سیاسی باسک آک بلوچستان آن جلاوطن مریسہ جتا ڈیہہ تیٹ آباد مسنو ہراڑے او تحریک آزادی نا بشخ جوڑمسنو۔

او پُراعتماد ئنگا لہجہ ئٹی پارے بلوچستان آجوئی نا کُنڈا ہِننگے ،حالانکہ دا پاننگ مفک کہ ارا وخت اسکان مرو ۔

او پارے کہ دا اسہ لس مخلوق نا تحریک ئسے ، ارادے بھلو کچ ئسے ٹی بلوچ راج ئنا حمایت حاصل ئے ، اوپارے کہ بلوچ راج غلامی واستعمار ئے پین برداشت کننگ کپک ۔

او ڈیھہی و دران ڈیھہی و عیلاقائی طاقت آتا زور شاغَا کہ او مداخلت کیر ، و پاکستان نا ظلم ئے سلیفیر ، او پارے کہ بلوچ نا آجوئیدا خطہ ٹی امن و خوشحالی ہتنگ نا سوب مرو ۔

بلوچ رہنماء نا پاکستان و چین ئنا برخلاف آ دران ڈیھہی مداخلت نا خواست :

بلوچ نیشنل موومنٹ (بی این ایم) نا چیئرمین ڈاکٹر نسیم بلوچ  دران ڈیھہی تاغت آتا زور شاغسہ پارے کہ مداخلت کیر ، و پاکستان ناظلم و زوراکی تے بلوچستان ئٹی بند کرفیر ۔

او پارے کہ چین و پاکستان اقتصادی راہداری (سی پی ای سی ) اسہ بھلو انفراسٹرکچر منصوبہ سے ، اراکہ چین ئنا سنکیانگ ناعیلاقہ ئے بلوچستان نا گوادر بندرگاہ تون اوار کیک ، دا منصوبہ بلوچستان ئٹی دُزی و لٹنگ ، مخلوقے دربدر کننگ نا سوب ئے ، اوپارے کہ بلوچ دافتا براخلاف جہد کننگے و دانا موازنہ ئے بنگلہ دیش ئنا آجوئی مہٹ نسل کشی تون کرے ۔

او پارے کہ بلوچستان آجوئی نا نیمہ آ گام خلنگے ہراڑان تیبہ خطہ ئے فائدہ مرو۔

جدوجہد آجوئی نا بابت سوال آتا زی آ چیئرمین بی این ایم نا جواب آک:

بلوچ نیشنل موومنٹ(بی این ایم) نا چیئرمین ڈاکٹر نسیم بلوچ دا رد ئٹ ہیت کرے۔ او بلوچستان ئٹی فعالیت نا حکمت عملی، بلوچ وپشتوں تحریک آتا نیام ئٹ رشتہ و جیڑہ ءُ مڈی نا کڑدار نا بابت ہیت کرے۔

او پارے کہ پاکستانی نا “ خلنگ و بٹنگ” پالیسی نا سوب آن بی این ایم و ایلو پارٹی تے ڈھکوکائی کاریم کروئی تما۔ او پارے کہ آجوئینا مسخت کن و بندغ آتے کاریم ہلنگ کن سیل سسٹم اڈ تننگانے۔

او مونی ہیت کرسہ پارے کہ بلوچ تحریک مڈی تا نہ بلکہ بلوچستان نا آجوئی نا تحریک ئے۔

او تینا انٹرویو نا ایسر ئے دا ہیت آتون کرے کہ بلوچ اُلس پاکستانی قوضہ و زوراخی آن بچنگ خوائک ۔ بلوچ تحریک پاکستان آن مُستو بلوچستان آن مڈی پیش تمنگ آن مُست ارے۔

بلوچستان نا علاقہ بولان ئٹ پاکستانی لشکر بھلو کچ ئسے آ زمینی و فضائی آپریشن ءِ بناء کرینے۔ آپریشن نا بناء تون گن شپ ہیلی کاپٹر آک کیہی گھنٹہ تے اسکان جتاء ہند آتیا شیلنگ کریر۔

اینو سہب ئنا مالو پاکستانی لشکر بولان نا جتاء علاقہ بزگر، ہلیکسر، چلڑی، مارواڑ، پیر اسماعیل، شامیر لٹ و ایب کیب نا علاقہ تیٹ فوجی آپریشن ءِ بناء کرے۔ فوجی آپریشن ئٹ گن شپ ہیلی کاپٹر آتون اوار سیاڈی طیارہ غاک ہم بشخ ہلنگ ءُ اندن بولان آن خڑک ئنا علاقہ تیٹ فوجی کارندہ تا ہن و بر خننگ ئٹ بننگ ءِ۔

علاقائی احوالکار آک ٹی بی پی ءِ پاریر کہ سہب ئنا شش بجہ نا وخت پاکستانی لشکر نا گن شپ ہیلی کاپٹر آک جتاء ہند آتیا شیلنگ بناء کریر ہرا کم آن کم اِرا گھنٹہ اسکان برجاء مس۔

علاقائی احوالکار تا پاننگ ءِ کہ ہیلی کاپٹر آتون اوار سیاڈی طیارہ تا بال ہم برجاء ءِ۔ کوالخواک دائسکان دا بابت ہچ ءُ شابیتی حوال اس تتنو۔

خیال ئٹ مرے کہ تدوکا دے تیٹ بلوچستان ئٹ فوج تخنگ نا موْکل تننگاسس۔

حوال تا رد ئٹ بلوچستان حکومت فوج تخنگ نا سفارش کریسس، صوبہ ئٹ فوج تخنگ نا موْکل سرکولیشن سمری نا ذریعت ئٹ تننگانے۔

ایران حکومت نا برخلاف مروک برانز آتا وخت سکیورٹی فورسز تا برخلاف بے دادی نا دوبہ ئٹ دزگیر مُسہ بندغ ءِ پاہو تسونے۔

احوال تروک ادارہ ‘اے ایف پی’ نا رد ئٹ ایران نا عدلیہ پارینے کہ جمعہ غا مُسہ بندغ ءِ مہسا امینی نا مرک ئنا برخلاف برانز آتیٹ سکیورٹی فورسز تا برخلاف بے دادی نا ڈوہ دار مننگ آ سزا تننگا۔

عدلیہ میزان آن لائن نیوز ویب سائٹ نا پاننگ ئس کہ ماجد کاظمی، صالح میر ہاشمی و سعید یغوبی ءِ اصفہان شار ئٹ برانز نا وخت سلہہ توننگ آ ‘محاربہ’ یا ‘خدا نا برخلاف جنگ’ ئنا ڈوہ دار پن کننگاسس۔ دا برانز ئٹ سکیورٹی فورسز تا مُسہ کارندہ کسفنگاسر۔

جمعہ غا تروک پاہو آن گڈ برانز آتیا مروک سزائے مرک آتا کچ ہفت اسکان سر مسونے۔ ماجد کاظمی، صالح میر ہاشمی و سعید یغوبی ءِ تدوکا سال نومبر ئٹ دزگیر کننگاسس اندن اوفتے جنوری 2023 ئٹ مرگ ئنا سزا بِنفنگاسس۔

داڑان مالو امریکہ ایران آ زور شاغاسس کہ او تدوکا سال دزگیر کروک مُسہ بندغ نا سزائے مرگ آ عمل درآمد ءِ تورے۔

امریکی محکمہ خارجہ نا ترجمان ویدنت پٹیل پنچ شمبے آ صحافی تتون ہیت کریسہ پاریسس کہ ایرانی شار ماجد کاظمی، صالح میر ہاشمی و سعید یغوبی نا سزائے مرگ آ عمل درآمد کننگ بندغی حق آتا بے شرفی آنبار مرو۔

تدوکا سال مہسا امینی پنی ءُ زالبول ئسے نا پولیس دزگیر ئٹ مرگ ئنا برخلاف تیوہ ایران ئٹ برانز مسوسس ہرافتے ایسر کننگ کن حکومت کیہی بندغ تے دزگیر کریسس۔

بندغی حق آتا جہانی گل ایمنسٹی انٹرنیشنل چار شمبے آ اسہ بیان اسیٹ پاریسس کہ ایران نا سرکاری میڈیا ٹی ہر مُسہ بندغ نا ڈوہ تا بابت منوک بیان تے شینک کننگ آن گڈ سپریم کورٹ ہر مُسہ بندغ نا سزائے مرگ ءِ برجاء تخا۔

ایمنسٹی انٹرنیشنل نا رد ئٹ چار شمبے آ ہر مُسہ بندغ نا خاہوت آتے اوڑدہی کننگ نا موکل تننگا و دا پاننگاسس کہ دا اوفتا گڈیکو اوڑدہی ہم مننگ کیک۔

دے ٹکی نیام ئکن ایمنسٹی انٹرنیشنل نا ڈپٹی ڈائریکٹر ڈیانا التہاوی اسہ بیان اسیٹ پاریسس کہ ایران نا عدالتی بست و بند ئٹ گوڑیفوک وڑ ئٹ ہر مُسہ بندغ نا برخلاف مقدمہ کننگا و اوفتے سزا بِنفنگا۔

او ودیک پارے کہ سر و سوج نا وخت آ ہر مسٹ آ بے دادی، زوراکی ئٹ بیان ہلنگ، شاہدی تا کمبوتی و انصاف نا وڑ ڈول تیان چھپ مننگ نا نزوریک انصاف تروک مقدمہ نا شڑط آتے پاش بے پام کننگ نا اسہ پین مثیال ئسے۔

یاتی مرے کہ مہسا امینی نا مرگ ئنا برخلاف تیوہ ایران ئٹ کیہی تُوہ تے اسکان برانز تا لڑ برجاء مس ہرافتا وخت کیہی برانزی تتون اوار سکیورٹی فورسز آک ہم مرگ ئنا گواچی مسوسر۔

جماعت اسلامی پاکستان نا سروک و مسکوہی سینیٹر سراج الحق خود کش جلہو ئٹ رکھوک مس، اندن جلہو ٹی شش بندغ ٹپی مسونو۔

جمعہ نا دے جماعت اسلامی نا سیکریٹری جنرل امیر العظیم اسہ ٹویٹ اسیٹ پارے کہ ‘امیر جماعت اسلامی پاکستان سراج الحق آ بلوچستان ٹی خودکش جلہو  اس مسونے، جلہو کروک بندغ خلنگانے، الحمداللہ سراج الحق و ایلو سنگت آک رکھوک ءُ۔

سراج الحق آ جلہو بلوچستان نا ضلع ژوب ٹی مس ہراڑے اونا جلسہ مننگ ئس۔

کمشنر ژوب ڈویژن سعید عمرانی احوالکار آتے پارے کہ سراج الحق جلسہ نا پارہ غا ہننگ ئس کہ اودے ٹک کریر۔ جلہو ٹی منہ بندغ ٹپی مسونو واہم امیر جماعت اسلامی رکھوک ءِ۔

جماعت اسلامی بلوچستان نا ترجمان ولی خان نا پاننگ ئس کہ ‘ژوب ٹی جماعت اسلامی نا جلسہ ئس ہراٹی اوار مننگ کن سراج الحق رسینگاسس۔ او گاڑی ٹی ئس اوڑتون اوار جماعت اسلامی بلوچستان نا امیر مولانا عبدالحق ہاشمی و صوبائی نائب امیر عبدالکبیر شاکر ہم اوار ئسر۔ باسک و پارٹی نا ذمہ وار آک ژوب نا علاقہ کوئٹہ روڈ آ اونا بخیرٹ کن مُچ ئسر۔

تراک نا ڈرون فوٹیج ئٹ ہم خننگ مریک کہ پارٹی نا باسک آک امیر جماعت اسلامی نا گاڑی تون اوار اوار ہننگ ئسر کہ ہمو وخت ترند تراک مس۔ واہم تراک نا ترندی زیات الو۔

ایس ایچ او ژوب شیر علی نا ردئٹ ‘تراک خود کش اس ئس، بدن آ بارود آن پُر جیکٹ ئس تفوک جلہو کروک آ گاڑی نا خڑک بریسہ تینے تراک ئٹ بھس کرے۔ قسمتی تیوہ جیکٹ ترغتئو و جلہو کروک مرگ ئنا گواچی مس اندن شش بندغ ٹپی مسر۔’ اونا پاننگ ئس کہ ٹپی مروک آتے ڈسٹرکٹ ہیڈ کوارٹر ہسپتال ژوب آ دننگانے۔

ایس ایچ او نا ردئٹ جماعت اسلامی تینا جلسہ ءِ ایسر کتو و سراج الحق جلسہ نا جاہ آ سر مریسہ ہیت کرے۔

وزیراعظم شہباز شریف امیر جماعت اسلامی سراج الحق نا ٹولی آ خود کش جلہو نا مذمت کریسہ پٹ و پول نا پرمان تسونے۔

ژوب نا سیمک خیبر پختونخواہ نا دہشت گردی آن زیمی ضلع وزیرستان و ڈیرہ اسماعیل خان تون اوار افغانستان تون ہم تفوک ءُ۔

تدوکا وخت ٹی دا علاقہ بلوچستان ٹی تحریک طالبان پاکستان (ٹی ٹی پی) نا کوٹ مسونے۔ سال 2007 ئٹ ٹی ٹی پی نا راہشون بیت اللہ محسود نا خڑک ئنا سنگت و گوانتانا موبے نا مسکوہی کیزی عبداللہ محسود ژوب ٹی اسہ آپریشن اسیٹ کسفنگاسس۔

ٹی ٹی پی برجاء دے تیٹ بلوچستان نا پشتون علاقہ آتیکن اسہ جتاء تنظیمی کڑدہ ‘صوبہ ژوب’ جوڑ کرینے۔

تدوکا ہفتہ ژوب تون گنڈوک ضلع قلعہ سیف اللہ ٹی ایف سی نا مسلم باغ کیمپ آ بھلو جلہو اس مس ہراٹی کہی کارندہ آتون اوار 13 بندغ مرگ ئنا گواچی مسر۔

شہید ضیاء الرحمان 

نوشت: دوستین لاسی 

مٹ: زباد بلوچ زباد 

دی بلوچستان پوسٹ 

ضیاء الرحمان پن کروک دلجان کنے بشخس ای نے رست کننگ ئٹ ہرے کریٹ و داسا حب چوکی نا گلی تیٹ الہ آباد نا گراؤنڈ نا ہیب کیب نیتون اوڑدئی مروف، ولے لسبیلہ خوش بخت ءِ، حب چوکی خوش بخت ءِ کہ نی داڑے ورنا مسس حب ئنا گلیک نے یات کننگ ءُ، کنا وڑ پین کیہی بندغ آک نے یات کننگ ءُ۔

20 فروری نا سہب موبائل ڈیٹا ءِ  ملاٹ فیسبک ہننگ ئسٹ کہ نا فوٹو مون آن گدرینگا ولے باور بننگ الو کہ دا ننا حب چوکی نا ضیاء ءِ۔ ای ناگمان سٹاٹ کہ بلوچستان نا پنی آ جہدکار ٹک تیر ضیاء الرحمان زہری ئس۔ ولے ننا بدبختی ءِ ہر کہ ضیاء الرحمان داڑے گلزمین نا باہوٹ متو شاید اود ننے آن خر ئس کہ لسبیلہ نا بندغ آک وطن تون مابت کپسہ ولے ضیاء الرحمان دا وڑ ہچبر سوچتوکہ، اود بھلو سوچ ئسے نا خواجہ ئس، اود ہندی بد گمانی تیان پاک وطن نا دیوانہ اس ئس۔ ای شہید جاوید نصیر، شہید صمد و ضیاء الرحمان آن بھاز گڑا ہیل کرینٹ ولے ضیاء الرحمان آن ہمو ہیت آتے ہیل کریٹ کہ زند مچ کنے است بڈی ترور۔

اگہ ضیاء الرحمان تون اوڑدئی متوکہ گڑا ای اینو اسہ راج دژمن ءُ پارٹی سے نا باسک مسوٹہ، جام بھوتانی رجب یا لالا مجید نا شیدائی اس مسوٹہ ولے ضیاء الرحمان و بی ایس او نا سرکل آک کنے شعور تسر، ضیاء الرحمان تون گڈیکو اوڑدئی گمانی 4 سال مست مس، اود جمعہ ہوٹل ئٹ داسا پاش تولتوکہ و کنے سماء مس کہ ضیاء الرحمان اسٹیج و جلسہ تا سیاست آن بھاز مر پیشتمانے، چار سال آن گڈ اینو اونا عکس کنے بھاز بدل کرے۔

ضیاء الرحمان لسبیلہ الم سوچو انتئے کہ لسبیلہ بلوچستان آن بروکا جتاء جتاء قبیلہ تا اسہ زیبدار ءُ گلدستہ سے۔ لسبیلہ نا مزور، خوانندہ و سیاسی باسک آتے ای دا الم پاروٹ کہ داڑے پیشن نا بروکا پنجابیک و ایلو سرمایہ دارک تدوکا دہ دوانزدہ سال آن ننے دا سوب آن 12 ہزار نا نوکری ترسہ ءُ کہ ضیاء الرحمان نا وڑ انگا ورنا تا توفک آک ننے شرف بشخانو۔ ایہن گڑا جام بھوتانی و دا پارلیمانی پارٹیک ننا سودا ءِ ہراتم آن کرینو، ایہن گڑا ننے بندغ ہراڑے ساہدار تیان گندہ نابود تکرہ۔

است پاہک بھاز نوشتہ کیو ضیاء الرحمان ولے داسا نوشتہ کننگ تون اوار اوار نا عظیم آ کڑد ءِ لس کروٹ۔کنے یات ءِ 2011 ٹی ڈگری کالج حب ئٹ بی ایس او نا سرکل ئٹ اسہ سنگت اس پارے کہ دانگان نا ہندی بندغ آک وختس ام جہد ئٹ ساڑی مروفس۔

ای پاریٹ نی رد اس، اود پارے کہ ای ارا سال آن اسہ لاسی سے اٹ ہرا سرکل تا بریوہ ایلوفک انتئے بفسہ؟ ای شاہد تینا اسہ سواد ئسے کن سرکل ئٹ توسنٹ۔ ای ہمو سنگت آن خر کرسہ سرکل آن بش مسٹ اناٹ۔

ولدا حب آن کیہی سنگت آک شہید مرسہ کریر و اوفتے ٹی عابد علی موٹک ام اوار ئس، ہراد دانگانا ہندی لاسی قبیلہ غان تعلقداری تخاکہ۔

ولدا 2013 ٹی اسہ سنگت ئسے تون حوال مس اود پارے دوستین بشخس دا جہد ننا کل ئنا ءِ دا راج  مکرانی، مینگل، زہری، مری، بگٹی، رونجھہ و موندرہ کل ئنا ءِ۔

تینا ہیت آتے انداڑے چٹفنگ آن مہالو داخس پاروٹ داسا حالیت مٹ مسنے داسا ہمو سرکل آک و دیوانک اوپن مننگ کپسہ اینو کنتون ہچو سلہہ بند بندغ اس ہم اف ولے درو ای اسہ موندرہ اس ئسٹ اینو ہم فکر کالج نا کیہی سنگت آک و نن کل سنگت آک اوار مرسہ شہید ضیاء الرحمان نا کلہو ءِ لسبیلہ ٹی لس کرون۔