بلوچ اسٹوڈنٹس آرگنائیزیشن آزاد نا بیگواہ مروک مسکوہی کمک کماش نا بیگواہی ءِ 13 سال پورو مننگ و بلوچستان آن بیگواہ مروک بندغ آتا بابت ئٹ کوئٹہ ٹی اینو برانز مچی کننگا۔
برانز مچی ٹی اوار مروکا تیٹ بیگواہ مروکا بندغ آتا خاہوت آک، سیاسی و چاگڑدی تنظیم آتا سروک و باسک آ تتون اوار خوانندہ آک بھلو کچ ئسے ٹی اوار مسر۔
اوار مروکا تتون ہیت کریسہ زاکر مجید نا لمّہ نا پاننگ ئس کہ کنا مار زاکر مجید نا بیگواہی ءِ کہی سالک گدرینگانو ولے اینو اسکان اودے ہچو عدالت ئسے ٹی ہتنگ متنے۔ زاکر مجید نا لمّہ نا پاننگ ئس کہ ای سوج کننگ خواہوہ کہ کنا مار ئنا ڈوہ انت ءِ کہ اذیت نا سینزدہ سال ئنا مرغنا انتظار آن بیدس کنا مار ءِ آجو کننگ مفک۔
زاکر مجید نا لمّہ نا پاننگ ئس کہ کنا مار ئنا ڈوہ اسہ سیاسی ورکر اس مننگ و تینا حق کن توار بڑز کننگ ءِ۔ اونا پاننگ ئس کہ زاکر خضدار آن بیگواہ مروک اولیکو بندغ ءِ، بیگواہ آ بندغ آتا کیمپ زاکر نا آجوئی کن ہڈ تننگاسس اینو دا ٹی ہزار آ بلوچ چُنا تا عکس آک خلوک ءُ ہرافتے بے قانودی بیگواہ کننگانے۔
اونا پاننگ ئس کہ ایسکان زندہ اُٹ تینا چُنا نا آجوئی کن جہد کروٹ، ننتون داکان بیدس پین ہچ کسر اف۔
برانز ئٹ اوار مروکا تتون چار تو مُست بلوچستان نا علاقہ منگچر آن زوراکی ئٹ بیگواہ مروک کفایت اللہ نا اُرائی ہم اوار ئس و اونا پاننگ ئس کہ کفایت اللہ ءِ ریاستی ادارہ آتا کارندہ آک کنا مونا دزگیر کننگ آن گڈ بیگواہ کرینو۔
بیگواہ راشد حسین نا لمّہ نا پاننگ ئس کہ اینخو 21 جون آ راشد نا پاکستان حوالگی و بیگواہی ءِ مُسہ سال پورو مننگ ءِ ہرا نا برخلاف کوئٹہ پریس کلب نا مونا برانز مچی کننگو۔ راشد حسین نا لمّہ خواست کرے کہ برانز ئٹ اوار مریسہ اونا مار ئنا آجوئی کن توار ارفر۔
برانز ئٹ سعیدہ بلوچ ہم اوار مس و اونا پاننگ ئس کہ اونا ایلم سجاد احمد، و ظہور احمد ءِ ریاستی ادارہ آک کوئٹہ آن دزگیر کریسہ بیگواہ کرینو۔
اونا پاننگ ئس کہ پاکستان نا تینا آئین زوراکی نا بیگواہی تا موکل تفک و اگہ بیگواہ مروکا تیا دوبہ اس ارے تو اوفتے تینا جند ئنا عدالت آ تیٹ ہتیسہ سزا ایتر۔
لاپتہ ظہیر بلوچ نا ہیڑ عظمیٰ بلوچ نا پاننگ ئس کہ کنے پاننگ مرے کہ نن تینا ایلم ءِ اراڑے پٹین، دا ہشت تو آکہ نن کن ہشت سال ءُ۔
نوشکی آن ریاستی ادارہ آتا دو آن بیگواہ مروک نصیب اللہ نا لمّہ خواست کرے کہ اونا مار ئنا آجوئی کن غٹ تینا کڑدار ادا کیر۔
سائرہ بلوچ نا پاننگ ئس کہ اونا ایلم و تاتہ مار آصف و رشید ءِ نوشکی آن پکنک نا وختا بیگواہ کننگانے و بیگواہی آن گڈ سیکورٹی فورس آک اوفتا دزگیری ءِ پک ہم کریسر ولے اوفتے ہچو عدالت ئسے ٹی ہتنگ متنے۔ او پارے کہ نن تینا ایلم و تاتہ مار ئنا بے قانودی دزگیری و زوراکی نا بیگواہی نا برخلاف انصاف نا ہر درگہ آ ہنانُن ولے ننے انصاف ملتنے۔
برانز ئٹ اوار مروکا تتون ماما قدیر بلوچ تران کریسہ پارے کہ بیگواہ آ بندغ آتا آجوئی کن دا کیمپ ئنا بنیات ءِ زاکر مجید نا بیگواہی نا وختا اونا ہیڑ فرزانہ مجید تخا و ہموکان گڈ ننا دا جہد بناء مس۔ ماما قدیر بلوچ نا پاننگ ئس کہ دا مرغنا جہد ئٹی کہی سنگت آک ننا شہید مسر و بیگواہ آ بندغ آتا آجوئی اسکان نن تینا جہد ءِ برجاء تخون۔
اوار مروکا تتون تران کریسہ نیشنل پارٹی نا ضلعی صدر نیاز بلوچ نا پاننگ ئس کہ بندغ آتے بیگواہ کننگ ئٹی براہ راست ریاست و اونا ادارہ آک تُد ءُ۔
اونا پاننگ ئس کہ داڑے بےقانودی ئٹ بندغ آتے سال تا سال بیگواہ کننگک و اوفتا چشوک جون تے خسنگ مریک ولے دافتے سوج کروکو کس اف۔
ایکٹویسٹ بیبرگ بلوچ تران کریسہ پارے کہ زاکر مجید کنا سیاسی استاد ئس و اینو او سینزدہ سال آن زندان تیٹ بندی ءِ ننے بیگواہ آ بندغ آتا ڈکھ و کرب محسوس مریک۔ اونا پاننگ ئس کہ زاکر نا لمّہ داخس سال آن تینا مار کن جہد کننگ ءِ ولے داڑے انصاف تروکو کس اف۔
وائس فار بلوچ مسنگ پرسنز نا چیئرمین نصر اللہ بلوچ تران کریسہ پارے کہ اینو بلوچستان تون اوار پاکستان نا کنڈ کنڈ آن بلوچ آک بیگواہ مننگ ءُ و ہرا وخت وزیر اعظم داڑے بس تو او بے وس خننگاکہ۔
نصر اللہ بلوچ برانز ءِ ایسر کریسہ پارے کہ ملکی ادارہ آک بیگواہ آ بندغ آتا فریاد ءِ بنیسہ اوفتے انصاف ایتر۔
ایلو نیمہ غان بیگواہ آ بندغ آتا دے ئنا رد ئٹ چاگڑدی حوالکاری میڈیا غا ایکٹویسٹ و بی ایس او آزاد نا باسک آتا کنڈ آن زوراکی نا بیگواہی و بیگواہ زاکر مجید بلوچ نا آجوئی کن آن لائن کیمپئن ہم کننگا۔
