بلوچ اسٹوڈنٹس آرگنائزیشن نا بنجائی کمیٹی نا اِرا دے ئی مجلس چیئرمین ظریف رند بلوچ نا کماشی ٹی کراچی ٹی اڈ تننگا۔ سیکریٹری رپورٹ، علاقئی و جہان حالیت آتیا ہیت گپ، تنظیمی کاریم تیتون اوار اہم انگا ٹِک آتیا ہم گپ و تْران مس، بروک آ وخت نا کاریم تا رِدئٹ فیصلہ غاک کننگار۔

بلوچ اسٹوڈنٹس آرگنائزیشن نا بنجائی کمیٹی نا اِرا دے ئی مجلس 27،28 فروری آ چیئرمین ظریف رند بلوچ نا کماشی ٹی مس ہرانا کاروائی ءِ سیکریٹری جنرل چنگیز بلوچ مُستی درے۔

مجلس نا بناء شہدائے بلوچستان، شہدائے عالم انقلاب و شہدائے سراوان ایران نا یات ئٹ اِرا منٹ ئنا چُھپی تون مس۔

چیئرمین ظریف رند بلوچ مجلس نا بنائی تران ئٹی پارے کہ اینو اسہ وار ولدا سیاسی ردئٹ مُچیک تیوی ڈیہہ اکن اومیت نا رژنائی ئسے ہرا اسہ روشن ءُ وخت ئسے نا پارہ غا اشارہ کیرہ۔

او پارے کہ اینو بلوچستان تون اوار تیبہ جہان ٹی بش مروکا تحریک آک تنظیم تا ردئٹ راستی ءِ پاش کنّنگ ئٹی ءُ۔ جہان نا ہر نیمہ سیاسی زْرمبش نا گواچی ءِ، امریکہ، افریقہ و ایشیا آن ہلیس یورپ اسکان ننے مزور و محکوم آتا جہد ظلم و بے برابری آ تخوکا نظام ءِ بھلّو کچ اسیٹی سرفنگ ئٹی خننگک ہرا استحصالی بست و بند نا روتہ ءِ گُڈسہ تینا مزل آ سر مرو۔

بلوچستان ٹی ساڑی آ تحریک آک ہم جہانی بدلی تون گنڈوک ءُ و بلوچ راج ءِ اینو نا جہان تون برابری آ ہتنگ ئٹی ءُ ہرا انقلابی جنز ئنا پیدواریک ءُ۔ دننگا وخت ئٹ اسہ سوگوْ ءُ لیڈرشپ اس ہر دیار ءِ دا بھلّا بحران آن کشّنگ کیک ہرا بے برابری و بے انصافی نا نظام نا بنماس آن دیر ہلوکے۔ مظلوم اُلس نا تنظیم سازی و محکوم راج آتیٹ  اسٹی بھلّا تبدیلی نا شڑط ءِ۔

چاگڑدی زند ئٹی تنظیم نا کڑدار آ ہیت کرسہ او پارے کہ سوگوْ تنظیم ئسے آن بیدس جبر ئتون جنگ کننگ مننگ کپک، ہرا وخت اسکان کہ چاگڑد نا ہر بشخ سیاسی ردئٹ واخب متنے، اے وخت اسکان اسہ آجو ءُ چاگڑد اسینا شون مفرنگ کپرو و نیم پورو مرو۔

او کیڈر آتا بابت پارے کہ اوفتے شعوری کاریم تے مونا دروئی ءِ۔ خوانندہ آتا بھلو وخت ئسے آن ظلم ئنا سوب آن بش مروک آ بے جاراتی ءِ سیاسی جوزہ ٹی مٹ کروئی تمو۔ راج ئنا خوار انگا حالیت اونا لیڈرشپ آ پاش کننگ ئٹی ءِ کہ کیڈر ساز ادارہ نا مننگ باشعور سیاسی راہشون ڈس ءِ ایتک۔

چیئرمین ظریف تنظیمی ادارہ غاتا اہمیت آ گپ کرسہ پارے کہ تنظیمی ادارہ غاتا برجاء غا جہد ئنا سوب آن تنظیم ئٹی شابیتی بریک ہرا کہ تنظیمی استحکام و بھلّا کاریم تیک بھاز لازم ءُ۔ گراؤنڈ نا زی آ تنظیمی بشخ آتا مونا بننگ تنظیمی کاریم ٹی بُڑزی ہتو و باسک آتا فکری ردوم و کاریم  کننگ نا زانت ءِ ودّفو۔

سیکریٹری رپورٹ ٹی تنظیمی کاریم و ساڑی آ حالیت آ چمشانک شاغنگا و سیاسی ردئٹ بھاز بدلی تے تیا شرہ کننگا۔ تنظیم نا شونداری ءِ تنظیم نا فکری راستی نا سوب پاننگا۔

سکریٹری رپورٹ ٹی پاننگا کہ اینو نا وخت ٹی بی ایس او نا بیانیہ نا راستی اونا بھلّا مسخت ءِ درشان کیک۔ بلوچ ڈغار نا حالیت نا رد ئٹ بی ایس او نا شون دے پہ دے بُڑزا برسہ کیک ہرا ننے تینا اہمیت آن واخب کرسہ کائک دا وڑ نا وخت ئٹ ننے تینا کاریم تون اوار اوار تینا اہمیت نا ہم اندازہ ءِ خلوئی ءِ۔

رپورٹ ٹی جہانی حالیت آتا ترندی ئٹ مٹ مروکا نشخہ غا ہم ہیت مس و رائٹ نا پر تشدد سیاست ٹی ودّنگ ءِ تیوی جہان ٹی پوسکنا سیاسی کُڑدہ بندی تیٹ ترندی بننگ و اقتدار نا خواجہ تپہ نا بے سہبی آ سرجمی ئٹ ہیت مس۔

بحث ٹی مونا پاننگا کہ کووڈ 19  آن معاشی عدم استحکام ئنا پاش مس ہرا سیاسی حالیت ءِ ہم زو اس مٹ کننگ نا پارہ غا درو ہراڑکن انقلابی طاغت آتا بیدار مننگ الّمی مرو۔ دا خاطر آن کہ اُلس نا بے جاراتی ءِ سیاسی دروشم اس تننگہ۔

بلوچ کلچر ڈے (دود و ربیدگ دے) ہر سال دو مارچ آ ہڈ تننگک۔ اینو دا دے ئنا رد ئٹ بلوچستان تون اوار تیوی جہان ئٹ مجلس و مچی تا ہڈتس برجاء ءِ ہرافتیٹ چنا بھلا تیتون زالبولک بشخ ہلنگو۔

بلوچ دود ربیدگ دے ئنا بناء 2010 آ مس۔ دا دے آ بلوچ مخلوق تینا ربیدگی پُچ آتے گوْر آ کریسہ بلوچ راج ئنا کُن و خور زند گدریفنگ نا دود و ربیدگ ءِ یات کیرہ۔

بلوچ دود ربیدگ دے ئنا بھلا مجلس آک بلوچستان نا بھلا شار آک کوئٹہ، گوادر تون اوار کراچی ئٹ ہڈ تننگرہ، زیملی مجلس آک دا مجلس آتا گچین آ بشخ پاننگرہ۔

وحید آجوئی نا چراغ

نوشت: ثناء بلوچ

دی بلوچستان پوسٹ

سوزہ رنگ مخوکا دروشم، چُنکا بالاد، نیم لاغر آ جوْن چلتن نا وڑ سوگوْ سلوک تینا بالاد آن مُرغنو سوچ تخوکا  وطن نا مڷ اینو آن منہ سال مُست تینا معصوم و دلیر آ سنگت، ہمسر، دلبر سلمان جان تون ہمرا دا بارن آ ڈغار آ دتر تے شولسہ ندر مسُر۔

ہرا وخت بلوچستان ملاسی آن چیہانٹ خلنگ ئس، نوری کمک خواٸنگ ٸس، نواب نوروز سنگت پٹنگ ٸس، ڈاکٹر اللہ نظر باشعور انگا سنگت آتے اسہ جاہ مُچ کننگ ٸس، نواب خیر بخش مری جنگجو پٹنگ ٸس۔ اندا وحید و دلیرا سلمان تینا خیسُن آ دتر ٸٹ ملاس آ ڈغار نا ملاسی ءِ دریر، نوری نا کمک، نواب نوروز نا سنگت، ڈاکٹر نا باشعور آ سنگت، و نواب خیر بخش مری نا جنگجو جوڑ مسر۔

ہرا وخت ظالم آک وحید جان نا بھلا ایلم کبیر جان ءِ بیگواہ کریر ہرا دائسکان ظالم تا زندان ٸٹ بھگت سنگھ نا ڈول آجوئی و انقلاب نا نعرہ ءِ خلیسہ ظالم تے دا کُلہو ءِ تننگ ءِ کہ کنا ایسری اُست خواہی وطن نا آجوئی یا شہادت ءِ۔ کبیر جان نا بیگوائی آن گُڈ وحید جان تینا ایلم نا جوزہ غاتے تینے ٹی ہتیسہ تینا سنگت تون ہمراہ خاک ءِ تینا سجدہ کریسا ظالم ءِ دا کلہو تسر کہ کبیر نا سیخاک نُما مون ئٹی ءُ نُم اخس کبیر خلورے؟ کبیر اسل کسپک او شہید سمیع نا دروشم ٸٹ زندہ ءِ، او زیبا غا ایلم سمیع نا زیبا غا جوْن ٸٹ زندہ ءِ، او لطیف نا جوزہ غاتیٹی زندہ ءِ، او گودی جویریہ نا راجی آ لوز آتیٹی زندہ ءِ، او ہر ورنا، پیر، کماش ٸٹی زندہ ءِ، او استاد اسلم نا فکر ٸٹی زندہ ءِ او مچ آ راج ٸٹی زندہ ءِ، او بلوچستان ٸٹی زندہ ءِ۔

وحید جان اسے خوانندہ ءُ ورنا اس ٸس۔ او بھاز مطالعہ کننگ نا سوب آن  پوہ مسکہ تینا کسر، مزاحمتی آ سفرے تینا راج ٸنا ڈُک آتے تینا ہیڑ تا بے وسی ءِ۔ اودے دا سما ٸس ننا ایسری مزل آجوئی ءِ نہ تو آجوئی آن بیدس ننا لُمہ غاتا ننگ ہیڑ تا غیرت سلامت مفرو و آجوئی بیدس دتر آن ملپک، آجوئی اسے تُغ ٸسے ہرادے ہر ورنا خنیسا بسونے ہرا نا تعبیر مننگ کن دتر بکارے و وحید تینا دلیر آ سنگت سلمان جان تون ہمراہ  ڈغارے دتر تریسا تینا دژمن ءِ دا کُلہو تسر دا ڈغار ننا ءِ نن ہر وخت تینا ڈغار کِن دتر تریسا کرون۔

ایسر ٸٹ شہید سنگت ثناء نا منہ لوز: “اوارن، اوارن تانکہ آجوئی اسکان اواران۔”

بلوچ اسٹوڈنٹس ایکشن کمیٹی نا بیان ردئٹ تدوکا دے ارٹمیکو بنجائی کونسل سیشن نا بابت مروک آ مرکزی کمیٹی نا مجلس ٹی سیشن نا تاریخ تخنگانے۔

تنظیم نا ارٹمیکو بنجائی کونسل سیشن مسکوئی وائس چیئرمین فیروز بلوچ بیاد شہید پروفیسر رزاق بلوچ، سنگت الیاس بلوچ 26، 27 و 28 مارچ آ کراچی ٹی ہڈ تننگو۔

بیان ٹی پاننگانے کہ بلوچ اسٹوڈنٹس ایکشن کمیٹی اسہ سوگوْ ءُ خوانندہ تنظیم ئسے ہرانا بنماس اسہ سوگوْ نظریہ و راہبند اسیتو تفوک ءِ۔ تنظیم تینا بناء آن ہلیس کہ اینو اسکان کل جمہوری اقدار ءِ مُستی دریسہ و ہر وخت تنظیمی دروشم ئٹ راہبند ءِ بڑز اوننگانے۔

بیان ئٹ مُستی پاننگانے کہ تنظیمی راہبند نا ردئٹ تنظیم ہر اِرا سال آن گڈ تینا بنجائی کونسل سیشن ہڈ تسونے و ہندا لڑ ءِ برجاء تخیسہ تنظیمی کابینہ ءِ اِرا سال پورو مننگ آ بنجائی کونسل سیشن نا پڑو کننگانے۔

تیوی جہان ئٹ امن سلامتی نا اومیت تون اوار بروکا سال 2021 ہم بلوچستان ئٹ روڈ شکست آتیٹی کمبوتی ہتنگ کتو، بلوچستان نا کسر تیا ویل آتا لڑ سلینگ کتو، جنوری نا توہ ئٹ برجائی تون اوار بلوچستان نا جتا کسر تیا 995 ویل مونا بسونو ہرافتے ٹی 1446 بندغ ٹپی و 106 بیران مسر۔

بلوچستان یوتھ اینڈ سول سوسائٹی نا پارہ غان برجاء مروکا روڈ شکست آتا گیشتری حوال آتا رد ئٹ بلوچستان ٹی جنوری نا توہ، 2021 ئٹ بلوچستان ئٹ 955 ویل مونا بسر ہرافتے ٹی 1446 بندغ ٹپی و 106 بیران مسر۔
بلوچستان یوتھ اینڈ سول سوسائٹی نا رد ئٹ ویل آک بلوچستان نا جتا آ شار و علاقہ تیٹی مسونو۔ کوئٹہ، مستونگ، کھڈ کوچہ، قلات، کان میتھرزئی پشین، بوستان، کچلاک، قلہ سیف اللہ، قلہ عبداللہ، چمن و مسلم باغ ئٹ 366 بیم بش کروک ءُ ویل مسر اندن ٹپی تا کچ 462 و 29 بیران مسر۔

خضدار، وڈھ، سوراب، باغبانہ لسبیلہ، وندر، اوتھل، گڈانی حب چوکی نوجوانی ٹی 564 ویل آتیٹی 566 بندغ ٹپی و 73 بیران مسر۔ ژوب، لورالائی ہرنائی، خانوزئی، شیرانی، موسی خیل و بدزئی ٹی 97 ویل آتیٹی 501 بندغ ٹپی و 41 بیران مسر۔

سبی، ڈیرہ مراد جمالی، ڈیرہ اللہ یار، ڈیرہ بگٹی، نصیر آباد، کوہلو، مچھ، بولان، جھل مگسی، رکنی، کولپور، و پیرغیب ئٹ 37 ویل آتیٹی 96 ٹپی و 12 مرک مسر۔ پنجگور، تربت، گوادر، تمپ، پسنی، مکران، کوسٹل ہائی وے، اورماڑہ جیونی ٹی 19 ویل آتیٹی 59 بندغ ٹپی و 6 بیران مسر۔

نوشکی، خاران، چاغی، دالبندین، نوکنڈی، تفتان، بسیمہ، اسماعیل یلانڈی احمد وال و یک مچھ ئٹ 92 ویل آتیٹی 95 ٹپی و 8 مرک مسر۔

برجاء آ تو فروری ٹی ہم منہ خاہوت زیمی مسر ہرافتے ٹی ارغ، زائیفہ و مسڑ بیران مسر، ہرافتا تعلقداری چمن آن اس۔ ایلو زیمی مروکا آ خاہوت لمہ، باوہ و مار بیران مسر و ارا چنا بھاز ٹپی مسر ہرافتا تعلقداری پنجاب آن اس۔ مسٹمی خاہوت باوہ و مار ہرتوم آک روڈ شکست ئٹی بیران مسر۔ ہرافتا تعلقداری کاسی قبیلہ غان اس، اسہ چنا اس ہرا جہان ئٹ بننگ آن مست روڈ شکست نا گواچی مس۔ اسہ پڈ ہر ءِ زالبول اس بیران مس ہرانا تعلقداری پنجگور آن اس، و اسہ پین خاہوت باوہ و مار ہڑتوم آک روڈ شکست ئٹی بیران مسر ہرافتا تعلقداری شیرانی آن اس۔

بلوچستان نیشنل پارٹی نا سر کماش و بنجائی اسمبلی باسک سردار اختر جان مینگل پارینے کہ بلوچستان نا حکومت تینا جوان انگا کاریم تیان تینٹ فریشان ءِ، ننے اوڑکن خواری کننگ نا خواست اف، جمعیت علماء اسلام تون اواری وڑ ڈول ٹہینگانے زوت ایلو پڑو کننگو، اِرا دے ودار کبو پی ڈی ایم نا ہدف مونا برو۔

دا ہیت آتا درشانی ءِ او پشتونخوامیپ نا سر کماش محمود خان اچکزئی نا اُرا غاہننگ نا وخت آ میڈیا تون ہیت کریسہ پارے۔ اوڑدئی ٹی محمود خان اچکزئی تون اوار پارٹی راہشون عثمان کاکڑ، رحیم زیارتوال، رضا محمد رضا و نصر اللہ زیرے ئسر و سردار اختر جان مینگل تون اوار بلوچستان اسمبلی نا باسک ثناء اللہ بلوچ، میرحمل کلمتی، بابو رحیم مینگل، نصیر شاہوانی ہم ساڑی ئسر۔

اوڑدئی ٹی سینٹ گچین کاری نا وخت آ پی ڈی ایم نا اوار انگا امیت وار آتا زی آ ہیت و گپ کننگا۔ محمود خان اچکزئی و سردار اختر مینگل پی ڈی ایم بلوچستان نا پڑ آ سینٹ امیت وار آتا اواری گمانی ءِ۔

پی ڈی ایم  تدوکا دے خیبر پختونخوا ٹی ہم اوار امیت وار آتا پڑو ءِ کرے۔ پی ڈی ایم نا بنجائی اجلاس ٹی صوبائی تلہ غا امیت وار آتا فیصلہ صوبہ ٹی ساڑی جماعت آتا راہشون آتا اوڑدئی آن گڈ سردار اختر جان مینگل میڈیا تون ہیت کریسہ پارے کہ بلوچستان حکومت تینا کروکا کاریم تیان تینٹ فریشان ءِ و حکومت ٹی اوار باسک آک ہم ڈکھیہ ءُ، داڑکن خواری نا خواست اف۔

او پارے کہ ہراڑ اسکان سینیٹ نا گچین کاری ٹی اوار مننگ نا ہیتءِ اوڑکن اِرا دے  ووار کبو، پی ڈی ایم نا ہدف تون اوار تیوہ آ گڑاک پاش مریرہ

او پارے کہ بلوچستان ٹی تیوہ آ سیاسی جماعت آک و قبائلی بندغ آک ننکن شرف نا لائخ ءُ، نن تینٹ سیاسی پارٹی تون تعلق تخینا پاش ءُ ہیت ئسے سینیٹ گچین کاری نا وخت آ تیوہ آ جماعت تون اوار اوڑدئیک برجاء مرور۔

فائل فوٹو

عوامی نیشنل پارٹی بلوچستان نا ترجمان اسد اچکزئی نا جون بلوچستان نا شار کوئٹہ نا علاقہ نوحصار آن خننگا۔

اسد خان اچکزئی ءِ 5 توہ مست بیگواہ کننگاسس۔ اسد خان اچکزئی عوامی نیشنل پارٹی بلوچستان نا صدر ایم پی اے اصغر خان اچکزئی نا الہ نا مار ئس و عوامی نیشنل پارٹی بلوچستان نا ترجمان ام ئس۔

اسد خان اچکزئی نا بیگوائی نا برخلاف نیشنل عوامی پارٹی اونا بیگوائی نا دے آن برانزی مچی کننگ و اوڑتون اوار غٹ بیگواہ غا بندغ آتے یلہ کننگ کن توار ارفنگ ئس۔

عوامی نیشنل پارٹی نا بنجائی کماش اسفند یار ولی خان بیگواہ غا اسد اچکزئی نا جون نا خننگ نا مذمت کریسہ پارینے کہ ریاست و حکومت نا ذمہ واری جوڑ مریک کہ وہ تینا اُلس و شاری تا رکھ ءِ کے۔

او مونی پارینے کہ پارٹی نا راہشون اسد اچکزئی 5 توہ بیگواہ ئس، ننا پارٹی ہر جاگہ اوڑکن توار ارفے و بلوچستان ہائی کورٹ اونا بیگوائی نا برخلاف پٹیشن ام داخل کرے ولے یلہ کننگ نا جاگہ غا اینو اونا جوْن خننگا۔

امریکا نا پارہ غان شام ئٹ ایران نا مخ تفی دوئی کروک ملٹری انفرا اسٹرکچر آ جلہو غان 17 جنگجو خلنگار۔

غیر ملکی میڈیا نا رد ئٹ امریکہ نا فوج نا پارہ غان شینک کروک آ بیان ئٹ پاننگانے کہ دے ٹکی شام ئٹ ایران نا مخ تفی دوئی کروک ملیشیا غا جلہو کننگا۔

امریکہ محکمہ رکھنگ (دفاع) پینٹاگون نا ترجمان جان کربی نا پاننگ ءِ کہ صدر جو بائیڈن نا پاننگ آ آ ایرانی مخ تفی دوئی کروک ملیشیا غا جلہو کننگا ہرا عراق ئٹ امریکہ نا فوجی تیا کروک آ راکٹ جلہو نا ورندی ءِ.

پینٹاگون نا کوالخواہ تا رد ئٹ امریکہ نا جہاز آک ایرانی مخ تفی دوئی کروک ملٹری انفرا اسٹرکچر آ 500 پونڈ نا 7 گائیڈڈ پریسیشن بم بٹیر و سلاء بند گروپ آتا پارہ غان سلاء تا دروک آتون اوار 7 ہند ٹک کننگا.
سیرین آبزرویٹری فار ہیومن رائٹس نا رد یٹ امریکہ نا حملہ تے ٹی اسہ درزن آن گیشتر ایرانی مخ تفی دوئی کروک جنگجو بیران مسر و اسلحہ و بارود آتے ہرفوکا مسہ گاڑی ہم تباہ مسر.
یاتی مرے کہ ارا ہفتہ مست عراق ئٹ اربل ائیرپورٹ آن خڑک اسہ ملٹری بیس آ حملہ ئٹ امریکہ اتحادی فورس نا اسہ کار کن اس بیران و امریکہ نا فوجی تون اوار 9 غیر ملکی ٹپی مسسر.

دے کہی بلوچستان ئٹ بے جاراتی

ٹی بی پی سرگپ

قدرتی مڈی تیان سیر مننگ آن بیدس ہم بلوچستان نا اُلس غریبی نا لیک آن شیف زند گدریفنگ آ بیوس ءِ، ہرانا تیوہ غاتیان بھلا سوب سال آتیان برجاء استحصال و بے بست و بندی ءِ۔

بیروزگاری نا ودوک کچ نا سوب آن بلوچ ورناک، ہرافتیان بھازاک بھلا جامعہ آتیان فارغ مروک ڈگری تخوک ءُ، تیل نا گروزی نا کاروبار آ بیوس ءُ کہ وہ تینا اُرا نا دیگ دان تے لگفنگ کیر۔ کوالخواک دا کاروبار ءِ “گروزی” نا پِن ایترہ، ولے گولڈ سمڈ لائن نا دامون ایمون آبات بلوچ آتیکن دا کھٹیا نا اسٹ آ کسر ءِ، ہراڑان بیدس بھاز غریبی و بیروزگاری نا سوب آن مخلوق لنگڑی آ بیوس مریرہ۔

دا تیل ئنا سر کننگ “گولڈ سمڈ لائن” آن مریکک۔ یاتی مرے گولڈ سمڈ لائن بلوچ آتا تاریخی ڈیہہ ءِ اِرا بشخ، دے ٹکی بلوچستان ہرا پاکستانی بست و بند ئٹی ءِ و دے کہی بلوچستان ہرا ایرانی بست و بند ئٹی ءِ، تیٹ ونڈ کیک۔ واہم بلوچ آتا بھلو بشخ اس، گچین وڑئٹ بلوچ قوم پرست بلوچستان نا دا بشخنگ و گولڈ سمڈ لائن نا حیثیت ءِ منیپسہ، اندا سوب دا لیک ئنا ہڑتوم آ کُنڈ آتیا “عظیم تر آجو بلوچستان” کن سال آتیان مزاحمت برجاء ءِ۔

دا لیک ئنا دامون ایمون آبات ہزار آ اُراک، تیل دننگ نا بیم بش کُروک کاروبار تون تفوک ءُ، ہرا اوفتا اسٹ آ کھٹیا ءِ۔ بیدس داڑان کہ ساندہ تیل نا کاروبار تون تفوک دا بلوچ آتے ہڑتوم آ پارہ غاتیا پاکستان و ایرانی فورسز نا پارہ غان بے شرفی تون مون تروئی تمک۔ حالانکہ دا شکائست ہر پارہ غا ارے کہ سیکورٹی فورسز دا کاروبار کروک بندغ آتیان بھلو زر اس رشوت و بھتہ نا دروشم ئٹ زوراکی تون ہلیرہ۔ ولے داڑان بیدس ہم تنک کننگ ایسر مفک۔

فروری ئٹ اندنو اسہ تدینی اس ایرانی سیم سری علاقہ حق آباد و پاکستانی سیم سری علاقہ پروم نا نیامٹ اِرا دے اسکان ہزار آتا کچ ئٹ کاروباری بندغک بیدس پڑو آ سیم نا بند کننگ نا سوب گٹ مسر۔ چنکو وخت اسیکن سیم نا بند کننگ ہڑدے ئی ہیت ئسے ولے اِرا دے اسکان گیاوان ئٹ دا مرغنا بند کننگ نا سوب آن مخلوق نا کُننگ نا گڑاک ایسر مسر، ہرانا سوب کاروباری بندغ آک مُچ مریسہ برانز آ لگار۔

ولے دا جائز آ برانز ءِ ایرانی فوج ترندی ئٹ شیف خلنگ نا فیصلہ کریسہ برانز کروک آتیا سد آ سُم تے شلا، ہرانا سوب آن دے ٹکی و دے کہی بلوچستان آن تعلقدار کم و وَد اسہ درزن بلوچ ہند آ بیران، اندن بھازاک ٹپی مسر۔ بھاز حوال تا ردئٹ بیران مروک آتا کچ بھاز زیات ءِ ولے میڈیا رکھ ئنا سوب گواچن حساب سما تمنگ اف۔

دا بیدادی آن گڈ جتا شار آتیٹ پروشت پروش و شابیت ءُ برانز بناء کریر، ہراڑے روڈ آک بند کننگار، ایرانی فوج نا گاڑی و چوکیک اُشنگار۔ سہہ شمبے نا دے برانز کروک آک سراوان نا گورنر نا دفتر آ شولنگار۔ برانز نا لڑ چار شمبے و درو پنچ شمبے نا دے ہم برجاء مس۔

گولڈ سمڈ لائن نا ہڑتوم آ پارہ غاتیا آبات بلوچ و گچین وڑئٹ بلوچ قوم پرست آک دا تدینی نا ترند آ لوز آتیٹ مذمت ءِ کرینو۔ بلوچ نیشنل موومنٹ (بی این ایم) ہرا دے ٹکی بلوچستان نا اسہ قوم پرست جماعت ئسے، دا تدینی نا ترند آ لوز آتیٹ مذمت ءِ کریسہ پارے کہ “معصوم آ مخلوق آ سیم سری فورس نا سم کاری پاش بے دادی و بندغی حق آتا برخلاف ءِ۔ ڈوہدار آتے دمدستی تون سزا تننگہ”

انداڑتون دے ٹکی بلوچستان نا اسہ بااثر شخصیت و دارالعلوم سیستان و بلوچستان نا سرکماش مولانا عبدالحمید دا تدینی نا مذمت کریسہ پارے کہ بے گناہ کاروباری مخلوق نا ایرانی فورس نا پارہ غان خون قانود ءِ پاش لتاڑنگ ءِ۔

زوت تدینی دا ڈول نا اولیکو تدینی اف، گولڈ سمڈ لائن تون اوار آبات علاقہ تا مخلوق سال آتیان دننگا ظلم ئنا شکائست کننگو۔ پِتی آ تار خلیسہ ہزار آ خاہوت آتے ونڈ کننگسہ ءِ، سد آ سال آتیان ہرا مخلوق سیالی کن ہنارہ داسہ اوفتے تینا سیال آتیون اوڑدئی کن لٹ کُٹ و بے شرفی تون مون تروئی تمک۔

ہڑتوم آ پارہ غاتا فورسز آتا رویہ غاک دا علاقہ آتیٹ بلوچستان نا آجوئی نا دوئی کننگ نا جوزہ آتیٹ ودکی ایسنو۔ بھازا سلاء بند و بیدس سلاء بند جماعت آک سیم نا ہڑتوم آ پارہ غا بلوچستان نا آجوئی کن جہد کننگ ءُ و اوفتا پنی مننگ ئٹ دے پہ دے آن ودکی مننگ ءِ۔ دا مزاحمتی تنظیم آک ہڑتوم آ ملک ایران و پاکستان آن آجوئی نا خواست کیرہ۔

ہندی ذرائع تا ردئٹ کہ کاروباری مخلوق ءِ بیرہ ایرانی فوج نا ڈھکیا تون مون تروئی تمنگ اف بلکن پاکستان فوج ہم تدوک وخٹ ئٹ بھاز وار مخلوق آ سم کاری کریسہ بھاز آتے کسفینے۔

بندغی حق آتا بھازا تنظیم آک دا خواست ءِ کرینو کہ آجو جہانی پٹ و پولی ادارہ غاتے پن کروک علاقہ آتے اسکان ہننگ نا موکل تننگے کہ او دا تدینی نا پٹ و پول ءِ کننگ کیر۔

بلوچ سد آ سال آتیان دا ڈیہہ ئنا خواجہ مسونے، اوفتے تینا جند ئنا ڈیہہ آ ارٹمیکو درجہ نا شاری جوڑ کننگ نا ایسری آ فائدہ دوئی مفرو۔